“Ẹtiene Mi, . . . Ndien Ami Nyọnọ Mbufo Nduọk-Odudu”

‘Ndikwọrọ Ikọ’ Ọnọ Nduọkodudu

ENYE ekedi owo oro ekenen̄erede odot ndinam akpan utom kiet. Usụn̄ unọ ukpep esie ama enen̄ede enyene uforo tutu ‘n̄kpaidem omụm ediwak owo aban̄a ukpepn̄kpọ Esie.’ (Matthew 7:28) Enye n̄ko ekedi ọkwọrọikọ oro mîkpaha mba. Enye ama ayak ini, odudu, ye inyene esie esịn akpan akpan ke ndikwọrọ mban̄a Obio Ubọn̄ Abasi. Ke akpanikọ, Jesus Christ ama asan̄a ke ofụri obio emana esie nte ọkwọrọikọ ye andikpep oro mînyeneke mbiet.—Matthew 9:35.

Usọp usọp utom oro ẹkedọn̄de Jesus ekedi ndikwọrọ “gospel Ubọn̄ Heaven” nnọ mbon eyo esie ndinyụn̄ nnọ mme mbet esie ukpep ndinam ukem utom oro ke ofụri ekondo. (Matthew 4:23; 24:14; 28:19, 20) Nte mme anditiene enye oro ẹkedide mme anana-mfọnmma owo ẹkenyụn̄ ẹnyenede mme mmeme ẹma ẹkop ndịk ẹban̄a utom ukwọrọikọ mmọ oro okodobide, ekedide usọp usọp okonyụn̄ okponde?

Ke akpanikọ ikokopke! Ke ama eketeme mme mbet esie ete ẹbọn̄ akam ẹben̄e “Enyene-idọk,” Jehovah Abasi, ẹte osio mme anamutom efen efen ọdọn̄, Jesus ama ọdọn̄ mmọ ẹka ẹkenọ mme owo ukpep. (Matthew 9:38; 10:1) Ekem enye ama ọn̄wọn̄ọ ete ke mbiomo edidi anditiene imọ—esịnede utom edikwọrọ ikọ—ọyọnọ ata nduọkodudu ye ndọn̄esịt. Jesus ọkọdọhọ ete: “Ẹtiene Mi, . . . ndien Ami nyọnọ mbufo nduọk-odudu.”—Matthew 11:28.

Ebiet Emi Idatesịt Otode

Ikot oro owụt mbọm, ima, ye mfọnido didie ntem! Enye owụt nte Jesus enen̄erede ekere aban̄a mme anditiene enye. Mme mbet esie ẹkụt nduọkodudu ke ndibiom mbiomo mmọ edide edikwọrọ “eti mbụk” Obio Ubọn̄ Abasi. Emi ada ata idatesịt ye uyụhọ ọsọk mmọ.—John 4:36.

Anyan ini mbemiso Jesus ekedide isọn̄, N̄wed Abasi ama ọsọn̄ọ etịn̄ ete ke edisana utom oro ẹnamde ẹnọ Abasi ekpenyene ndisan̄a ye idatesịt. Ẹma ẹnam emi an̄wan̄a ke ini andiwet psalm ọkọkwọde ete: “Mbufo ofụri ererimbot, ẹnam idara ẹnọ Jehovah. Ẹnam n̄kpọ ẹnọ Jehovah ke idatesịt: ẹda ikwọ ẹdi enye ke iso.” (Psalm 100:1, 2) Mfịn, mme owo ẹtode kpukpru idụt ke ẹdat esịt ke Jehovah, ndien mme ikọ itoro mmọ ẹtie nte idara idara mfiori udịmekọn̄ emi akande. Mbon oro ẹnen̄erede ẹyak idem ẹnọ Abasi ẹda “ikwọ ẹdi enye ke iso.” Ndien oro enen̄ede odot koro Jehovah edide “Abasi inemesịt,” emi oyomde mme asan̄autom esie ẹkop idatesịt ke utom uyakidem oro mmọ ẹnamde ẹnọ enye.—1 Timothy 1:11, NW.

Mme Asan̄autom Emi Ẹnọde Nduọkodudu

Ọkpọsọn̄ utom oro inamde ke an̄wautom asan̄a didie ọnọ nduọkodudu utu ke ndinam nnyịn ikpa mba? Ọfọn, ndinam utom Jehovah eketie Jesus nte udia oro ọnọde odudu. Enye ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.”—John 4:34.

Kpasụk ntre, mme ifịk ifịk ọkwọrọikọ Christian mfịn ẹkop idatesịt nte mmọ ‘ẹkwọrọde ikọ.’ (2 Timothy 4:1) Connie, Christian an̄wan emi odude ke ufọt ufọt isua uwem esie, oro esibiatde se iwakde ibe hour 70 ke ọfiọn̄ ke utom ukwọrọikọ, ọdọhọ ete: “Ke mma n̄kabuana ke utom ukwọrọikọ, mmesikop uyụhọ ye inemesịt, idem ọkpọkọm n̄kokop mmemidem ke utịt usen oro.”

Nso edieke owo mînamke n̄kpọ nte ọfọnde iban̄a etop Obio Ubọn̄? Connie aka iso ete: “Inamke n̄kpọ m̀mê ẹnam n̄kpọ didie, akananam ntuaha n̄kpọfiọk ndikabuana ke utom ukwọrọikọ. Ke ẹsiode ami ndifiọk nte ke nnam se inemde Jehovah esịt ẹfep, nda editịn̄ mban̄a akpanikọ nte n̄kpọ inemesịt  koro nte nnamde oro, utịbe utịbe idotenyịn Bible esisọn̄ọ owụhọ ke esịt mi.”

Mbon efen ẹsikụt nte edin̄wam mme owo ẹnyene nnennen ifiọk Abasi anamde uwem mmọ enyene se ọwọrọde. Meloney, n̄kaiferi oro esibiatde se iwakde ibe hour 50 kpukpru ọfiọn̄ ke utom ukwọrọikọ, ọdọhọ ete: “Utom ukwọrọikọ ọnọ nduọkodudu koro enye ọnọ uwem mi ndausụn̄ ye uduak. Mme ọkpọkpọ mfịna ye mme mfịghe eke usen ke usen ẹsisụhọde ke ini mbuanade ke utom ukwọrọikọ.”

Millicent, ifịk ifịk asan̄autom eke Mme Ntiense Jehovah, ọdọhọ ete: “Utom ukwọrọikọ ofori usen kiet kiet oro mbiatde nditịn̄ nnọ mbon efen mban̄a uduak Abasi kaban̄a ubonowo ndinyụn̄ nnam an̄wan̄a nte ẹdifiakde ẹwụk Paradise ke isọn̄. Enye anam Jehovah edi ata owo ọnọ mi ke usen ke usen onyụn̄ ọnọ mi emem ye ndusụk udomo inemesịt oro owo mîkemeke ndinyene nto usụn̄ en̄wen ekededi.”

Mme Andikop Emi Ẹnọde Nduọkodudu

Ke akpanikọ, utom ukwọrọikọ Christian ọnọ mme ọkwọrọ Obio Ubọn̄ nduọkodudu, ndien mbon oro ẹnyịmede ọnọ-uwem etop emi ẹbọ ndọn̄esịt. Okposụkedi mme nun ye mme oku ẹma ẹkenọ andikpep kiet ke Portugal ukpep, enye ama ọfiọk ete ke ufọkabasi imọ ikoyụhọke udọn̄ n̄kpọ eke spirit imọ. Owo ikosụk ibọrọke mme mbụme Bible esie. Ukpepn̄kpọ Bible ofụri ini oro kiet ke otu Mme Ntiense Jehovah ekenịmde ye enye ama anam enye ọtọn̄ọ ndinyene ifiọk N̄wed Abasi sụn̄sụn̄. Enye ama okop nduaidem. Enye ọkọdọhọ ete: “Mma nsitie ye ọkpọsọn̄ udọn̄ mbet ukpepn̄kpọ mi kpukpru Wednesday sia ẹkesidade mme uyarade Bible oro ẹnamde ẹnịm ẹbọrọ mme mbụme mi kiet kiet.” Mfịn, n̄wan emi edi asan̄autom Jehovah oro ama akayak idem ọnọ, ndien enye n̄ko ke ada akpanikọ Bible anam mbon efen ẹkop nduọkodudu.

Do, ana in̄wan̄-in̄wan̄ nte ke Mme Ntiense Jehovah ikopke ndịk iban̄a utom ukwọrọikọ mmọ m̀mê nte efakutom mmọ ofụri ekondo okponde. Unana udọn̄ m̀mê ubiọn̄ọ inamke mmọ ẹkop mmemidem. Mmọ ẹnen̄ede ẹsịn ifịk ndinam utom mmọ edide edikwọrọ Obio Ubọn̄, mma. Mmọ ẹsibuana eti mbụk ye mme owo ke ebiet ekededi emi mmọ ẹdude—ke itiembehe ubomisọn̄ mbiomo ke United States (1), ke an̄wambehe ubomofụm Korea (2), ke Andes (3), m̀mê ke ufọkurua ke London (4). Mme anditiene Jesus mfịn ẹka iso ye idatesịt ndinam enyene-ufọn utom mmọ ke ofụri ererimbot. Ndien ke ndisu un̄wọn̄ọ esie, enye ọmọnọ mmọ nduọkodudu onyụn̄ ada mmọ ndinọ mbon efen nduọkodudu.—Ediyarade 22:17.