Nti Utom Ẹnọ Abasi Ubọn̄
Nti Utom Ẹnọ Abasi Ubọn̄
MME ata Christian ẹsida nti ido ye nti utom mmọ ẹnọ Abasi ubọn̄. (1 Peter 2:12) Ẹkeme ndikụt emi ke se itịbede ke Italy ke mme isua ndondo emi.
Ke September 1997, ọkpọsọn̄ unyekisọn̄ ama etịbe ke nsio nsio ikpehe Marche ye Umbria, owụride se ikperede ndisịm ufọk 90,000. Otu Mme Ntiense Jehovah ẹma ẹsọsọp ẹnọ mme ekemmọ andinịm ke akpanikọ ye mbon en̄wen un̄wam. Ẹma ẹnọ mme ufọkisan̄, mbri, mfiọk mbakara, ukwak unọ ikan̄ ilektrik, ye mme n̄kpọ eken oro ẹkeyomde. Mme n̄kpọ un̄wam emi ikedịbeke.
N̄wedmbụk n̄kpọntịbe oro Il Centro ama ọtọt ete: “Mme Ntiense Jehovah ke Roseto [ke mbahade obio ukara Teramo] ẹkedi akpa ndida mme n̄kpọ un̄wam ndi itie n̄kpọntịbe oro . . . Ke adianade ye edisop idem ke ini ke ini man ẹbọn̄ akam, mbon oro ẹnamde akpanikọ ẹnọ Jehovah ẹsinam n̄kpọ ke ata ata usụn̄, ẹn̄wamde mbon oro ẹkụtde ndutụhọ, ikereke m̀mê mmọ ẹdu ke ewe ido ukpono.”
Ọbọn̄ obio Nocera Umbra, kiet ke otu obio oro unyekisọn̄ ekenen̄erede ọnọmọ, ekewet ọnọ ẹsọk Mme Ntiense ete: “Ami ke idemmi mmenen̄ede n̄kọm mbufo mban̄a un̄wam oro mbufo ẹnọde mbon Nocera. Mmenịm ke akpanikọ nte ke kpukpru nditọisọn̄ Nocera ẹkere ntre.” Adianade do, Itieutom Esede Aban̄a Mbubehe Obio ama ọnọ Congregazione Cristiana dei Testimoni di Geova (Esop Christian eke Mme Ntiense Jehovah) n̄weditoro eti utom ye n̄kpọmbana “ndiwụt utom ye ifịk mmọ ke mme mbabuat idaha oro ẹkedemerede ke mme ikpehe Umbria ye Marche.”
Ke October 2000, enyene-ndịk ukwọ ama ọtọ emen ikpehe Piedmont ke edere edere Italy. Ini kiet efen, Mme Ntiense ẹma ẹsọsọp ẹdiomi ndinọ un̄wam. Nti utom emi ikedịbeke n̄ko. Ikpehe Piedmont ama ọnọ mmọ n̄kpọmbana ke “ọsọn̄urua utom unyịmesịt mmọ ndin̄wam mbon Piedmont emi ukwọ oro ọkọnọmọde.”
Jesus Christ ọkọnọ mme mbet esie item ete: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:16) Mme Ntiense Jehovah ẹkop inemesịt ndinọ Abasi ubọn̄, idịghe idemmọ, ebe ke ndinam “nti utom” oro ẹn̄wamde mme mbọhọidụn̄ mmọ ke n̄kan̄ eke spirit ye ke mme usụn̄ en̄wen.