Ẹnyene Eti Ibuot eke Mmọ

N̄KE Nigeria kiet ọdọhọ ete: “Ikpọ owo ẹnyene eti ibuot, edi nditọwọn̄ ẹnyene eti ibuot eke mmọ.” Edwin, ebiowo Christian ke Nigeria, ama okụt nte emi edide akpanikọ.

Usen kiet, Edwin ama okụt ekebe atian kiet ke ufọk esie ke idak okpokoro ukotn̄wed esie.

Edwin ama obụp nditọ esie mbita ete: “Anie enyene ekebe emi?”

Emmanuel emi ekedide isua itiaita ke emana ama ọbọrọ ete: “Ami nnyene.” Enye ama ọsọsọp adian do ete ke ekebe atian oro atade n̄karafan̄ mi oro edide sentimita 12 ke n̄kan̄ mbinan̄ onyụn̄ enyenede ekpri odudu ke enyọn̄ mi enyene etịbe kaban̄a utom ofụri ererimbot eke Mme Ntiense Jehovah. Enye ama anam an̄wan̄a ete: “Sia mmensikaha Ufọkmbono Obio Ubọn̄ kpukpru usen, mma mbiere ndinam ekebe man ke ini ekededi oro mmendaha okụk udep mfefere udia mi ndep n̄kpọ, n̄kpekeme ndisịn okụk oro ke ekebe emi.”

Ete Emmanuel ama enyene ekebe oro enye ekesidade esịn okụk man mmọ ẹkpekeme ndida n̄ka mbono district eke isua ke isua. Edi ke ntak mbabuat idaha ke ubon, mmọ ẹma ẹbiat okụk oro. Man okụt ete ke owo idaha okụk imọ inam n̄kpọ efen ekededi, Emmanuel ama ada akani iko kiet ebịne esịri-n̄kpọ man enye ekesịri iko oro. Ke ọfiọkde se enye oyomde ndida iko oro nnam, esịri-n̄kpọ oro ama ada mbak tian anam ekebe ọnọ Emmanuel. Michael, udọeka Emmanuel emi ekedide isua ition ke emana, ama ọdọhọ ete ẹnam ekebe n̄ko ẹnọ imọ.

Ke okopde n̄kpaidem aban̄a se nditọ emi ẹkenamde, Edwin ama obụp ntak emi mmọ ẹkedọhọde ẹnam mme ekebe oro. Michael ama ọbọrọ ete: “Nyom ndisịn etịbe!”

Ye unana ete ye eka mmọ ndifiọk, Emmanuel, Michael, ye Uchei, kpa adiahaeka mmọ emi ekedide isua usụkkiet ke emana, ke ẹkesịn ubak okụk udia uwemeyo mmọ ke mme ekebe oro. Mmọ ẹkeda ifiọk emi ke m̀mọ̀n̄? Ke ndondo oro nditọ emi ẹkekponide ẹkem ndimụm okụk ke ubọk, ete ye eka mmọ ẹma ẹkpep mmọ ndisịn okụk ke ekebe etịbe ke Ufọkmbono Obio Ubọn̄. Nte an̄wan̄ade, nditọ oro ẹma ẹda ukpep oro ẹsịn ke edinam.

Ke ini mme ekebe oro ẹkeyọhọde, ẹma ẹbom mmọ. Okụk oro mmọ ẹkesịnde ke ekebe oro ama esịm $3.13 (U.S.)—emi idịghe ekpri okụk ke idụt oro okụk ofụri isua ke ẹbaharede ukem ukem edide sụk dollar ikie ifan̄. Ẹda mme utọ ẹnọ unyịmesịt oro ẹn̄wam utom ukwọrọikọ Mme Ntiense Jehovah oro ẹnamde idahaemi ke idụt 235 ke ofụri ererimbot.