Mme Mbụme Ẹtode Mme Andikot

Ke nso udomo ke mme ukpan ẹban̄ade edidọ iman oro ẹkenịmde ke Ibet Moses ẹnyene n̄kpọ ndinam ye mme Christian mfịn?

Ibet oro Jehovah ọkọnọde idụt Israel itịn̄ke iban̄a ndutịm ye usọrọ ndọ. Nte ededi, enye akpan ndusụk itie ebuana ndọ. Ke uwụtn̄kpọ, ke Leviticus 18:6-20, (NW) nnyịn imokụt udịm udịm ukpan oro ẹbuanade owo ndinyene ebuana idan̄ ye “n̄kpet n̄kpet iman.” Itien̄wed oro enen̄ede anam an̄wan̄a mme n̄kpet n̄kpet iman oro mîkpanaha ẹnyene ebuana idan̄ ye kiet eken. Edi akpanikọ, mme Christian idụhe ke idak Ibet Moses m̀mê ndidi se mme ewụhọ esie ẹbọpde. (Ephesus 2:15; Colossae 2:14) Kpa ye oro, emi iwọrọke ite ke mme Christian ẹkeme ndifụmi n̄kpọ emi ke ini ẹmekde owo emi mmọ ẹdidọde. Ediwak ntak ẹdu oro anamde emi edi ntem.

Akpa kan̄a, mme ibet ererimbot ẹdu oro ẹkarade ndọ ke ufọt n̄kpet n̄kpet iman, ndien enen̄ede obiomo mme Christian ndisụk ibuot nnọ ibet idụt oro mmọ ẹdụn̄de. (Matthew 22:21; Rome 13:1) Nte ededi, mme utọ ibet oro ẹkpụhọde ke nsio nsio ebiet. Ata ediwak ibet eyomfịn ẹdide eke orụk emi ẹkọn̄ọ akpan akpan ke mme n̄kpọ ẹban̄ade nsenubon. Ẹtịm ẹdiọn̄ọ nte ke enen̄ede etie nte ndọ ke ufọt mme n̄kpet n̄kpet iman esinam nditọ mmọ ẹbiomo ndo ẹnyụn̄ ẹduọ udọn̄ọ. Ke ntak emi ye ke ntak ‘nsụkibuot mmọ nnọ mme enyene-odudu emi ẹkarade,’ mme Christian oro ẹyomde ndidụk ndọ ẹsinịm mme ibet ndọ n̄kann̄kụk.

Ndien odu n̄kpọ aban̄ade se ẹnyịmede ye se owo mînyịmeke ke obio emi owo odụn̄de. Ekpere ndidi kpukpru obio ẹnyene mme ibet ye ido oro ẹkpande ndọ ke ufọt mbon oro ẹdide ata n̄kpet n̄kpet iman, ediwak ini ẹdade utọ ndọ oro nte idan̄ iman ndien ke ntem edide ata idiọkn̄kpọ. Idem okposụkedi mme itie ebuana oro ẹkpande ẹkemede ndinen̄ede n̄kpụhọde ke nsio nsio obio, “ke nditịm ntịn̄, nte itie iman ke ufọt owo iba ekperede, ntre ke enen̄ede edi idiọkn̄kpọ mmọ ndinyene ebuana idan̄,” ntre ke The Encyclopædia Britannica ọdọhọ. Ntem, idem ke ebiet emi idan̄ iman mîbuanake, mme Christian iyomke ndinam n̄kpọ mfụmi mme ido ye ibet obio, mbak mmọ ẹdida esuene ẹsọk esop Christian m̀mê enyịn̄ Abasi.—2 Corinth 6:3.

Se owo mîkpofụmike edi ubieresịt oro Abasi ọnọde nnyịn. Kpukpru owo ẹdada ifiọk eti ye idiọk ẹmana. (Rome 2:15) Ubieresịt mmọ esisian mmọ se ifọnde inyụn̄ idotde ye se idiọkde ye se idehede, ibọhọke edi mmọ ẹma ẹda ndiọi edinam ẹbiat ubieresịt mmọ m̀mê ẹyak enye odoro ufiọn. Jehovah ama etịn̄ aban̄a emi ke ini enye ọkọnọde nditọ Israel ibet esie oro akakpande ndọ ke ufọt n̄kpet n̄kpet iman. Nnyịn ikot ite: “Mbufo ẹkûnam nte isọn̄ Egypt, emi mbufo ẹkedụn̄de ke esịt, ẹnamde: ẹkûnyụn̄ ẹnam nte isọn̄ Canaan, emi ami ndade mbufo ndụk do, ẹnamde: ẹkûnyụn̄ ẹsan̄a ke mme ewụhọ mmọ.” (Leviticus 18:3) Mme Christian ẹda ubieresịt mmọ oro ọkọn̄ọde ke Bible ke ọsọn̄urua n̄kpọ inyụn̄ iyakke n̄kakwan̄a ekikere eti ye idiọk eke mme idụt abiat enye.—Ephesus 4:17-19.

Nso, ndien, ke nnyịn ikeme ndibiere? Ke adan̄aemi mme Christian mîdụhe ke idak Ibet Moses, ubieresịt mmọ asian mmọ in̄wan̄-in̄wan̄ ete ke ndọ ke ufọt n̄kpet n̄kpet iman—utọ nte ete ye eyen, eka ye eyen, eyeneka ye eyeneka—enen̄ede edi se owo mînyịmeke ke otu mme Christian. * Nte itie ebuana ubon atarade, mme Christian ẹfiọk ẹte ke mme ibet ye ewụhọ ẹdu oro ẹkarade ndọ oro ẹkemde ye ibet ye nte ke mme idaha ẹdu oro ẹnyịmede ke n̄kaowo ye ke obio. Ana itịm ikere iban̄a emi man ikeme ndinam item N̄wed Abasi emi: “Yak kpukpru owo ẹbat ndọ ke n̄kpọ eke ẹkponode.”—Mme Hebrew 13:4.

[Ikọ idakisọn̄]