Nte Afo Ọmọbọ “Spirit Akpanikọ”?
Nte Afo Ọmọbọ “Spirit Akpanikọ”?
“Ete . . . ọyọnọ mbufo Ibetedem efen, man Enye edidu ye mbufo ke nsinsi; kpa Spirit akpanikọ.”—JOHN 14:16, 17.
1. Nso akpan ntọt ke Jesus ọkọnọ mme mbet esie ke akpatre hour oro enye okodude ye mmọ ke ubet enyọn̄?
KIET ke otu mbụme oro mme apostle Jesus ẹkebụpde enye ke akpatre hour oro enye okodude ye mmọ ke ubet enyọn̄ ke Jerusalem ekedi “Ọbọn̄, afo akaka mmọn̄?” (John 13:36) Nte mbono oro akakade iso, Jesus ama asian mmọ ete ke ekem ini imọ ndikpọn̄ mmọ mfiak nnyọn̄ mbịne Ete imọ. (John 14:28; 16: 28) Enye ididụhe aba ye mmọ ke obụkidem man ekpep mmọ n̄kpọ onyụn̄ ọbọrọ mme mbụme mmọ. Nte ededi, enye ama afiak ọsọn̄ọ mmọ idem, ọdọhọde ete: “Nyonyụn̄ mben̄e Ete, ndien Enye ọyọnọ mbufo Ibetedem efen [m̀mê, ọnọ-ndọn̄esịt], man Enye edidu ye mbufo ke nsinsi.”—John 14:16, ikọ idakisọn̄ NW.
2. Nso ke Jesus ọkọn̄wọn̄ọ ndinọ ẹsọk mme mbet esie ke enye ama ọkọnyọn̄?
2 Jesus ama anam ẹdiọn̄ọ se Ibetedem oro edide onyụn̄ anam an̄wan̄a nte emi edin̄wamde mme mbet esie. Enye ọkọdọhọ mmọ ete: “N̄kasianke mbufo mme n̄kpọ emi ke editọn̄ọ, sia nsụk ndodu ye mbufo. Edi mmọn̄ ndinyọn̄ ke emi ntiene Enye emi ọkọdọn̄de Mi; . . . edinyọn̄ Mi ọyọfọn ye mbufo: koro edieke mmenyọn̄ke, Ibetedem iditieneke mbufo; edi mma nnyọn̄, nyọdọn̄ Enye etiene mbufo. Edi ke adan̄aemi Enye oro edidide, kpa Spirit akpanikọ, Enye ayada mbufo odụk ke ofụri akpanikọ.”—John 16:4, 5, 7, 13.
3. (a) Ini ewe ke ẹkenọ “Spirit akpanikọ” ẹsọk mme akpa Christian? (b) Nso ikedi akpan usụn̄ kiet oro spirit emi ekedide “Ibetedem” ọnọ mmọ?
3 Un̄wọn̄ọ emi ama osu ke Pentecost 33 E.N., nte apostle Peter ọkọsọn̄ọde ete: “Abasi akanam Jesus emi eset ke n̄kpa, nte nnyịn kpukpru idide mme ntiense. Mmọdo sia ubọk nnasia Abasi ama emenede Enye enịm ke enyọn̄, Enye ama onyụn̄ ọbọ Ete Edisana Spirit emi ẹken̄wọn̄ọde ndinọ, Enye an̄wan̄a se mbufo ẹkụtde ẹnyụn̄ ẹkopde.” (Utom 2:32, 33) Nte nnyịn idikụtde ke ukperedem, edisana spirit oro ẹken̄wan̄ade ẹduọk ke Pentecost ama anam ediwak n̄kpọ ọnọ mme akpa Christian. Edi Jesus ama ọn̄wọn̄ọ ete ke “spirit akpanikọ” ayanam ‘mmọ ẹti kpukpru se imọ iketịn̄de inọ mmọ.’ (John 14:26) Enye ayanam mmọ ẹti utom ukwọrọikọ ye mme ukpepn̄kpọ Jesus, ẹkam ẹtide mme ikọ oro enye eketịn̄de, ẹnyụn̄ ẹwet mmọ ke n̄wed. Emi ama enen̄ede edi n̄kpọ un̄wam ọnọ akanieren apostle John ke utịt akpa isua ikie E.N. ke ini enye ọkọtọn̄ọde ndiwet Gospel esie. Mbụk oro esịne ọsọn̄urua item oro Jesus ọkọnọde ke ini enye ọkọtọn̄ọde Editi n̄kpa esie.—John, ibuot 13-17.
4. Didie ke “Spirit akpanikọ” akan̄wam mme akpa Christian oro ẹyetde aran?
4 Jesus ama ọn̄wọn̄ọ n̄ko ọnọ mme akpa mbet oro ete ke spirit oro ‘eyekpep mmọ kpukpru n̄kpọ’ onyụn̄ ‘ada mmọ odụk ke ofụri akpanikọ.’ Spirit oro ama an̄wam mmọ ndifiọk nditụn̄ọ n̄kpọ N̄wed Abasi onyụn̄ anam mmọ ẹka iso ẹnyene ekikere, ifiọk, ye uduak kiet. (1 Corinth 2:10; Ephesus 4:3) Ntem edisana spirit ama ọnọ mme akpa Christian oro odudu ndinam n̄kpọ nte otu “asan̄autom emi anamde akpanikọ, onyụn̄ enyenede ọniọn̄” man ọnọ owo kiet kiet ke otu mme Christian oro ẹyetde aran ‘udia eke spirit ke edikem ini.’—Matthew 24:45.
Spirit Etie Ntiense
5. (a) Nso obufa idotenyịn ke Jesus akayarade ọnọ mme mbet esie ke okoneyo oro ekesierede Nisan 14, 33 E.N.? (b) Nso udeme ke edisana spirit ekenyene ke edisu un̄wọn̄ọ Jesus?
5 Ke okoneyo oro ekesierede Nisan 14, 33 E.N., Jesus ama asian mme mbet esie ete ke ukperedem ke imọ iyedida mmọ inọ idem imọ man mmọ ẹnyụn̄ ẹdụn̄ ye imọ ye Ete imọ ke heaven. Enye ọkọdọhọ mmọ ete: “Ediwak ufọk ẹdu ke ebiet Ete Mi; edieke mîkpedịghe ntre, n̄kpọdọhọ mbufo; koro mmọn̄ n̄ka n̄ketịm itie nnịm nnọ mbufo. Ndien edieke n̄kade n̄ketịm itie ntre nnọ mbufo, nyafiak ndi ndida mbufo nnọ Idem Mi; man mbufo ẹnyụn̄ ẹdu ke ebiet eke Ami ndude.” (John 13:36; 14:2, 3) Mmọ ẹyeda ubọn̄ ye enye ke Obio Ubọn̄ esie. (Luke 22:28-30) Man mmọ ẹnyene idotenyịn eke heaven emi, mmọ ẹkenyene ‘ndimana nto ke Spirit’ nte nditọ Abasi eke spirit ẹnyụn̄ ẹyet mmọ aran man ẹnam utom nte ndidem ye oku ye Christ ke heaven.—John 3:5-8; 2 Corinth 1:21, 22; Titus 3:5-7; 1 Peter 1:3, 4; Ediyarade 20:6.
6. (a) Ini ewe ke ikot eke otode ke heaven ọkọtọn̄ọ, ndien owo ifan̄ ke ẹkot? (b) Ẹkenịm mbon oro ẹkekotde baptism ẹsịn ke nso?
6 “Ikot eke otode ke heaven” mi ọkọtọn̄ọ ke Pentecost 33 E.N. ndien, etie nte akpan ikpehe esie ama esịm utịt ke ufọt ufọt iduọk isua 1930. (Mme Hebrew 3:1) Ibat mbon oro edisana spirit efịkde idiọn̄ọ ndidi ubak Israel eke spirit edi owo 144,000, oro ‘ẹkefakde ẹsio ke otu owo.’ (Ediyarade 7:4; 14:1-4) Ẹkenịm mmọ emi baptism ẹsịn ke idem Christ eke spirit, esop esie, ye ke n̄kpa esie. (Rome 6:3; 1 Corinth 12:12, 13, 27; Ephesus 1:22, 23) Ke ẹma ẹkenịm mmọ baptism mmọn̄ ẹnyụn̄ ẹyet aran ke edisana spirit, mmọ ẹma ẹdụk usụn̄ uwem n̄waidem, uwem nsọn̄ọnda tutu esịm n̄kpa.—Rome 6:4, 5.
7. Ntak emi mme Christian oro ẹyetde aran kpọt ẹdotde ndidia mme n̄kpọ idiọn̄ọ oro ke Editi?
7 Nte Israel eke spirit, mme Christian oro ẹyetde aran ẹkedu ke obufa ediomi oro ẹkenamde ke ufọt Jehovah ye “Israel Abasi.” (Galatia 6:16; Jeremiah 31:31-34) Ẹkeda iyịp Christ oro ẹkeduọkde ẹsọn̄ọ obufa ediomi oro. Jesus ama etịn̄ aban̄a emi ke ini enye ọkọtọn̄ọde Editi n̄kpa esie. Luke ewet ete: “Enye onyụn̄ emen uyo, ndien ke ama ọkọnọ ekọm, obụn̄, ọnọ mmọ, ete, Emi edi ikpọkidem Mi eke ẹnọde kaban̄a mbufo: ẹnam emi nditi Mi. Enye anam kpa ntre ye cup, ke ini mmọ ẹdiade ẹma, ete, Cup emi edi Obufa Ediomi ke iyịp Mi, emi ẹduọkde kaban̄a mbufo.” (Luke 22:19, 20) Nsụhọ mme andibuana ke otu owo 144,000 oro ẹsụk ẹdude ke isọn̄, ẹdi mmọ emi ẹdotde ndita ndamban̄a uyo nnyụn̄ n̄n̄wọn̄ ndamban̄a wine oro ke Editi n̄kpa Christ.
8. Didie ke mbon oro ẹyetde aran ẹfiọk ke mmimọ imọbọ ikot eke otode ke heaven?
8 Didie ke mbon oro ẹyetde aran ẹfiọk ẹte ke mmimọ imọbọ ikot eke otode ke heaven? Ye unana ndudue, edisana spirit esitie ntiense ọnọ mmọ. Apostle Paul ekewet ọnọ utọ mbon oro ete: “Koro adan̄a owo nte Spirit Abasi adade mmọ usụn̄, mmọ oro ẹdi nditọ Abasi. . . . Spirit ke Idem Esie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi enịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyonyụn̄ ida ubọn̄ ye Enye.” (Rome 8:14-17) Ntiense emi Spirit emi etiede enen̄ede okop odudu tutu mbon oro ẹnyenede esisịt eyịghe m̀mê mmimọ imọbọ ikot eke otode ke heaven oro ẹkeme nte owụtde ifiọk ndibiere nte ke mmimọ ibọhọ, ndien mmọ ke ntre ẹyetre ndidia mme n̄kpọ idiọn̄ọ oro ke Editi.
Spirit ye Mme Erọn̄ En̄wen
9. Ewe isio isio otu iba ke ẹsiak ke mme Gospel ye ke n̄wed Ediyarade?
9 Ke ekerede aban̄a esisịt ibat Christian oro ẹkotde ndinam Israel eke spirit, Jesus okokot mmọ “ekpri otuerọn̄.” Ẹda mmọ ẹdisịn ke “ufọk-erọn̄” obufa ediomi, ke edide isio ye “mme erọn̄ en̄wen” oro owo mîkemeke ndibat, emi Jesus ọkọdọhọde ke inyene nditan̄ mmọ n̄ko mbok. (Luke 12:32; John 10:16) Mbon oro ẹbuanade ke otu mme erọn̄ en̄wen oro ẹtan̄de ẹbok ke utịt ini emi ẹdinam “akwa otuowo” oro ẹdibọhọde “akwa ukụt,” ye idotenyịn edidu uwem ke nsinsi ke paradise isọn̄. Nte enemde, n̄kukụt oro John okokụtde ke utịt akpa isua ikie E.N. owụt ukpụhọde oro odude ke ufọt akwa otuowo emi ye owo 144,000 oro ẹdide mme andibuana ke Israel eke spirit. (Ediyarade 7:4, 9, 14) Ndi mme erọn̄ en̄wen n̄ko ẹbọ edisana spirit, ndien edieke edide ntre, didie ke enye otụk uwem mmọ?
10. Didie ke mme erọn̄ en̄wen ẹna baptism “ke enyịn̄ Ete ye Eyen ye Edisana Spirit”?
10 Ke akpanikọ, edisana spirit enyene akpan udeme ke uwem mme erọn̄ en̄wen. Mmọ ẹyarade uyakidem mmọ ẹnọ Jehovah ke ndina baptism “ke enyịn̄ Ete ye Eyen ye Edisana Spirit.” (Matthew 28:19) Mmọ ẹnyịme itie edikara Jehovah, ẹsụk ibuot ẹnọ Christ nte Edidem ye Andifak mmọ, ẹnyụn̄ ẹsụk idem ẹnọ edinam spirit, m̀mê anamutom odudu Abasi, ke uwem mmọ. Ke usen ke usen, mmọ ẹdomo ndikọri “mbun̄wụm spirit,” edide “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.
11, 12. (a) Didie ke ẹnam mbon oro ẹyetde aran ẹsana ke ata san̄asan̄a usụn̄? (b) Ke nso usụn̄ ke ẹnam mme erọn̄ en̄wen ẹsana ẹnyụn̄ ẹdi edisana?
11 Mme erọn̄ en̄wen ẹnyene n̄ko ndiyak Ikọ Abasi ye edisana spirit esie ẹnam mmọ ẹsana. Ẹnanam mbon oro ẹyetde aran ẹsana ke ata san̄asan̄a usụn̄, ẹtebede mmọ ikpe ẹnyụn̄ ẹnamde ẹsana nte n̄wanndọ Christ. (John 17:17; 1 Corinth 6:11; Ephesus 5:23-27) Prọfet Daniel etịn̄ aban̄a mmọ nte “edisana ikọt Ata Edikon̄,” emi ẹbọde Obio Ubọn̄ ke idak “eyen owo,” Christ Jesus. (Daniel 7:13, 14, 18, 27) Ke mbemiso, ebede ke Moses ye Aaron, Jehovah ama ọdọhọ idụt Israel ete: “Koro ami ndide Jehovah Abasi mbufo; ẹnam idem mbufo ẹsana ndien, ẹnyụn̄ ẹdi edisana: koro ami nsanade.”—Leviticus 11:44.
12 Ikọ oro “edinam asana” akpan akpan ọwọrọ “edinam n̄kpọ asana, edidianade, m̀mê edisio nnịm kaban̄a utom Jehovah Abasi m̀mê edidianade nnịm nnọ Jehovah Abasi; idaha edidi edisana, m̀mê idaha oro ẹnamde asana.” Ke ata edem edem ko ke 1938, Enyọn̄-Ukpeme (Ikọmbakara) ọkọdọhọ ete ke mme Jonadab, m̀mê mme erọn̄ en̄wen, “ẹnyene ndifiọk nte ke ẹyom ediyak idem nnọ ye edisana idaha ẹto owo kiet kiet emi edikabarede edi ubak akwa udịmowo oro ẹdidụn̄de ke isọn̄.” Ke n̄kukụt aban̄ade akwa otuowo, oro ẹwetde ke n̄wed Ediyarade, ẹtịn̄ ẹban̄a mmọ nte “ẹyetde ọfọn̄idem mmọ ẹnam afia ke iyịp Eyen-erọn̄” ẹnyụn̄ ‘ẹnamde n̄kpọ ẹnọ Jehovah uwemeyo ye okoneyo ke temple Esie.’ (Ediyarade 7:9, 14, 15) Ye un̄wam edisana spirit, mme erọn̄ en̄wen ẹnam ofụri ukeme mmọ ndidu uwem ekekem ye edisana idaha Jehovah.—2 Corinth 7:1.
Ndinam Nti N̄kpọ nnọ Nditọete Christ
13, 14. (a) Nte ekemde ye n̄ke Jesus aban̄ade erọn̄ ye ebot, edinyan̄a mme erọn̄ ọkọn̄ọ ke nso? (b) Ke utịt ini emi, didie ke mme erọn̄ en̄wen ẹnam nti n̄kpọ ẹnọ nditọete Christ?
13 Jesus ama owụt n̄kpet n̄kpet mbọbọ oro odude ke ufọt mme erọn̄ en̄wen ye ekpri otuerọn̄ ke n̄ke esie oro aban̄ade erọn̄ ye ebot, oro esịnede ke ntịn̄nnịm ikọ aban̄ade “akpatre ini eyo emi.” Ke n̄ke oro, Christ ama owụt in̄wan̄-in̄wan̄ nte ke edinyan̄a eke mme erọn̄ en̄wen enyene n̄kpet n̄kpet ebuana ye edu mmọ kaban̄a mbon oro ẹyetde aran, emi enye okokotde “nditọ-ete Mi.” Enye ọkọdọhọ ete: “Edidem ọyọdọhọ mmọ emi ẹdude ke ubọk nnasia, ete, Ẹdi, mbufo emi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot. . . . Ke akpanikọ ke ndọhọ mbufo, Adan̄a nte mbufo ẹkenamde n̄kpọ emi ẹnọ kiet ke otu nditọ-ete Mi, kpa ata n̄kpri emi, mbufo ẹkenam ẹnọ Mi.”—Matthew 24:3; 25:31-34, 40.
14 Ikọ oro “adan̄a nte mbufo ẹkenamde n̄kpọ emi,” etịn̄ aban̄a ima ima un̄wam oro ẹnọde nditọete Christ oro ẹbonde ke spirit, emi ererimbot Satan anamde n̄kpọ ye mmọ nte isenowo, idem otomode ndusụk mmọ ọdọn̄ ke ufọk-n̄kpọkọbi. Mmọ ẹyom udia, edisịnen̄kpọ oro ekemde, ye nsọn̄idem. (Matthew 25:35, 36, ikọ idakisọn̄ NW) Ke utịt ini emi, toto ke 1914, ediwak ke otu mbon oro ẹyetde aran ẹmekụt idemmọ ke mme utọ idaha oro. Mbụk eyomfịn eke Mme Ntiense Jehovah ọsọn̄ọ nte ke spirit omonụk mme enyene-nsọn̄ọnda nsan̄a mmọ, mme erọn̄ en̄wen, ndinọ mmọ un̄wam.
15, 16. (a) Ke nso utom ke mme erọn̄ en̄wen ẹnen̄ede ẹn̄wam nditọete Christ oro ẹyetde aran ke isọn̄? (b) Didie ke mbon oro ẹyetde aran ẹwụt esịtekọm ẹnọ mme erọn̄ en̄wen?
15 Nditọete Christ oro ẹyetde aran emi ẹdude ke isọn̄ ke utịt ini emi ẹnen̄ede ẹbọ ata un̄wam otode mme erọn̄ en̄wen ke ndinam utom emi Abasi ọnọde mmọ ‘ndikwọrọ gospel Ubọn̄ Abasi emi ke ofụri ekondo nte ntiense nnọ kpukpru mme idụt.’ (Matthew 24:14; John 14:12) Ke adan̄aemi ibat mbon oro ẹyetde aran ke isọn̄ akade-ka iso ndisụhọde ke ediwak isua emi ẹbede, ibat mme erọn̄ en̄wen ọmọdọk esịm ediwak miliọn. Ediwak tọsịn ke otu mmọ emi ẹnam utom nte mme ọkwọrọikọ uyọhọ ini—mme asiakusụn̄ ye mme isụn̄utom—ẹsuande eti mbụk Obio Ubọn̄ “tutu esịm utịt ererimbot.” (Utom 1:8) Mbon efen ẹbuana ke utom edinọ ikọ ntiense emi adan̄a nte mmọ ẹkekeme ẹnyụn̄ ẹdat esịt ndida okụk nnọ akpan utom emi ibetedem.
16 Nditọete Christ oro ẹyetde aran ẹwụt esịtekọm didie ntem ẹban̄a ibetedem nsọn̄ọnda emi mme nsan̄a mmọ oro ẹdide mme erọn̄ en̄wen ẹnọde! Mmọ ẹma ẹnen̄ede ẹtịn̄ nte etiede mmimọ ke idem ke n̄wed oro Worldwide Security Under the “Prince of Peace,” emi otu asan̄autom okosiode ke 1986. Enye ọdọhọ ete: “Ọtọn̄ọde ke Ekọn̄ Ererimbot II, edisu ntịn̄nnịm ikọ Jesus aban̄ade ‘akpatre ini eyo emi’ ọkọn̄ọ akamba akamba ke utom oro ‘akwa otuowo’ eke ‘mme erọn̄ en̄wen’ ẹnamde. . . . Mmọdo, nnyịn imenen̄ede ikọm ‘akwa otuowo’ eke ẹtode ke ofụri ererimbot ẹnyụn̄ ẹsemde ediwak usem ke akamba udeme oro mmọ ẹnyenede ke edisu ntịn̄nnịm ikọ [Jesus] ke Matthew 24:14!”
‘Inamke Mmọ Ẹfọn Ẹma ke Nnyịn Mîdụhe’
17. Ke nso usụn̄ ke owo ‘mîdinamke’ mme anam-akpanikọ eke ini edem oro ẹdinamde ẹset ke isọn̄ ‘ẹfọn ẹma’ ke mbon oro ẹyetde aran mîdụhe?
17 Ke etịn̄de ikọ nte kiet ke otu mbon oro ẹyetde aran onyụn̄ etịn̄de aban̄a mme anam-akpanikọ iren ye iban oro ẹkedude mbemiso Christ, apostle Paul ama ewet ete: “Ẹtịn̄ n̄kpọ ẹtụk kpukpru mmọ kaban̄a mbuọtidem mmọ; edi mmọ ikọbọhọ se Abasi ọkọn̄wọn̄ọde ndinọ mmọ; sia Abasi ekenịmde se ifọnde ikan ọnọ nnyịn [mbon oro ẹyetde aran]; ntem ke ikemeke ndinam mmọ ẹfọn ẹma ke nnyịn mîdụhe.” (Mme Hebrew 11:35, 39, 40) Ke Tọsịn Isua, Christ ye nditọete esie 144,000 oro ẹyetde aran emi ẹdude ke heaven ẹyenam n̄kpọ nte ndidem ye mme oku ẹyenyụn̄ ẹda mme ufọn uwa ufak Christ ẹsọk isọn̄. Ntem ẹyenam mme erọn̄ en̄wen “ẹfọn ẹma” ke ikpọkidem ye ke ekikere.—Ediyarade 22:1, 2.
18. (a) Akpanikọ Bible ekpenyene ndin̄wam mme erọn̄ en̄wen ndifiọk nso? (b) Ke nso idotenyịn ke mme erọn̄ en̄wen ẹtie ẹbet ‘ediyarade nditọ Abasi’?
18 Kpukpru emi ẹkpenyene ndinam mme erọn̄ en̄wen ẹkere ntak emi N̄wed Abasi Christian Usem Greek enen̄erede owụk ntịn̄enyịn ke Christ ye nditọete esie oro ẹyetde aran ye akpan udeme oro mmọ ẹnyenede ke ndisu mme uduak Jehovah. Ntre, mme erọn̄ en̄wen ẹbat ke edi akwa ifet ndinọ otu asan̄autom oro ẹyetde aran ibetedem ke kpukpru usụn̄ oro mmọ ẹkemede ke adan̄aemi ẹtiede ẹbet ‘ediyarade nditọ Abasi’ ke Armageddon ye ke Tọsịn Isua. Mmọ ẹkeme ndisak iso nse edidi se ‘ẹsiode ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.’—Rome 8:19-21.
Ndidi Kiet ke Spirit ke Editi
19. Nso ke “Spirit akpanikọ” anam ọnọ mbon oro ẹyetde aran ye mme nsan̄a mmọ, ndien didie ke mmọ ẹdinen̄ede ẹdiana kiet ke mbubịteyo March 28?
19 Ke akam ediberi esie ke okoneyo oro ekesierede Nisan 14, 33 E.N., Jesus ọkọdọhọ ete: “Mben̄e mban̄a mmọ . . . man mmọ kpukpru ẹkpekam ẹdi kiet, nte Afo, Ete, odude Mi ke idem, Ami nnyụn̄ ndude ke Afo; man ererimbot enịm ke akpanikọ ete, edi Afo ọkọdọn̄ Mi.” (John 17:20, 21) Ke ntak ima, Abasi ama ọdọn̄ Eyen esie edinọ uwem esie kaban̄a edinyan̄a mbon oro ẹyetde aran ye ererimbot okopitem ubonowo. (1 John 2:2) “Spirit akpanikọ” amadian nditọete Christ ye mme nsan̄a mmọ ọtọkiet. Ke mbubịteyo March 28, ke utịn ama okosụhọde, otu mbiba emi ẹyesop idem ọtọkiet nditi n̄kpa Christ ye kpukpru se Jehovah anamde ọnọ mmọ ebe ke uwa edima Eyen esie, Christ Jesus. Mmọ ndidụk akpan edinam emi akpakam ọsọn̄ọ edidianakiet mmọ onyụn̄ afiak ọsọn̄ọ ubiere mmọ ndika iso nnam uduak Abasi, ke ntem ẹnọde uyarade nte ke mmimọ imadat esịt ndisịne ke otu mbon oro Jehovah amade.
Ke Ndidụn̄ọde
• Ini ewe ke ẹkenọ “Spirit akpanikọ” ẹsọk mme akpa Christian, ndien didie ke enye ekedi “Ibetedem”?
• Didie ke mbon oro ẹyetde aran ẹfiọk ke mmimọ imọbọ ikot eke otode ke heaven?
• Ke mme usụn̄ ewe ke spirit Abasi anam utom ke idem mme erọn̄ en̄wen?
• Didie ke mme erọn̄ en̄wen ẹnam nti n̄kpọ ẹnọ nditọete Christ, ndien ntak emi mîdinamke mmọ “ẹfọn ẹma” ke mbon oro ẹyetde aran “mîdụhe”?
[Mme Mbụme Ukpepn̄kpọ]
[Ndise ke page 21]
Ẹma ẹn̄wan̄a “Spirit akpanikọ” ẹduọk mme mbet ke Pentecost 33 E.N.
[Mme ndise ke page 23]
Mme erọn̄ en̄wen ẹmenam nti n̄kpọ ẹnọ nditọete Christ ebe ke ndinọ mmọ ibetedem ndiyọhọ utom edikwọrọ ikọ oro Abasi ọnọde mmọ