Nte Afo Emesịne ke Otu Mbon Oro Abasi Amade?
Nte Afo Emesịne ke Otu Mbon Oro Abasi Amade?
“Owo eke enyenede mbet Mi, onyụn̄ enịmde mmọ, enye edi owo eke amade Mi: ndien owo eke amade Mi, Ete Mi ayama enye.”—JOHN 14:21.
1, 2. (a) Didie ke Jehovah okowụt ubonowo ima esie? (b) Nso ke Jesus ọkọtọn̄ọ ke okoneyo emi ekesierede Nisan 14, 33 E.N.?
JEHOVAH ama edibotn̄kpọ esie edide owo. Ke akpanikọ, enye ama ererimbot ubonowo “tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Nte ini edinịm Editi n̄kpa Christ asan̄ade ekpere, mme ata Christian ẹkpenyene nditịm mfiọk nte Jehovah “akamade nnyịn, onyụn̄ osiode Eyen esie ọdọn̄, ete, edidi usio-isop mme idiọk-n̄kpọ nnyịn.”—1 John 4:10.
2 Ke okoneyo emi ekesierede Nisan 14, 33 E.N., Jesus ye mme apostle esie 12 ẹma ẹsop idem ke ubet enyọn̄ ke Jerusalem ndidia Passover, ẹtide edinyan̄a oro ẹkenyan̄ade nditọ Israel ẹsio ke Egypt. (Matthew 26:17-20) Ke ẹma ẹkedia usọrọ mme Jew emi ẹma, Jesus ama ọdọhọ Judas Iscariot ọwọrọ onyụn̄ ọtọn̄ọ udia mbubịteyo editi oro akakabarede edi Editi n̄kpa Christ eke mme Christian. * Ke adade uyo eke leaven mîdụhe ye ndatndat wine nte mme n̄kpọ idiọn̄ọ oro ẹdade ẹban̄a obụkidem ye iyịp esie, Jesus ama anam mme apostle 11 ẹbuana ọtọkiet ke ndidia udia Ọbọn̄ emi. Mme andiwet Gospel oro Matthew, Mark, ye Luke ye apostle Paul, emi okokotde enye “Udia Ọbọn̄,” ẹnọ ọyọhọ ntọt ke nte enye ekenịmde usọrọ emi.—1 Corinth 11:20; Matthew 26:26-28; Mark 14:22-25; Luke 22:19, 20.
3. Ke mme akpan usụn̄ ewe ke mbụk apostle John aban̄ade akpatre ini oro Jesus okodude ye mme mbet esie ke ubet enyọn̄ ẹkpụhọde ẹkpọn̄ mbon eken?
3 Nte enemde, apostle John iketịn̄ke n̄kpọ ndomokiet iban̄a edideme uyo ye wine, eyedi koro etisịm ini oro enye ekewetde mbụk Gospel esie (ke n̄kpọ nte 98 E.N.), mme akpa Christian ẹma ẹnen̄ede ẹmehe ye ido edinam oro. (1 Corinth 11:23-26) Nte ededi, ke ndausụn̄ odudu spirit, John kpọt ọnọ nnyịn ndusụk akpan ntọt ẹban̄ade se Jesus eketịn̄de onyụn̄ anamde esisịt ini mbemiso Enye ọkọtọn̄ọde Editi n̄kpa Esie ye ke oro ebede. Mme aduai-owo-idem ntọt emi ẹyọhọ ediwak ibuot n̄wed Gospel John. Mmọ ẹnen̄ede ẹwụt mme utọ owo oro Abasi amade. Ẹyak nnyịn idụn̄ọde John ibuot 13 esịm 17.
Kpep N̄kpọ to N̄wọrọnda Ima Jesus
4. (a) Didie ke John okodori nsọn̄uyo ke akpan ibuot nneme oro Jesus ekenyenede ke osobode ye mme mbet esie ke ini enye ọkọtọn̄ọde Editi? (b) Nso idi akpan ntak kiet oro anamde Jehovah ama Jesus?
4 Ima edi n̄wọrọnda ibuotikọ ke ofụri ibuot n̄wed emi ẹsịnede item unyọn̄ oro Jesus ọkọnọde mme anditiene enye. Ke akpanikọ, nsio nsio ikọ oro ẹdade ẹnọ “ima” ẹdu utịm ike-31 do. Idụhe ebiet ndomokiet efen oro ẹtịn̄de in̄wan̄-in̄wan̄ ẹban̄a ntotụn̄ọ ima oro Jesus amade Ete esie, Jehovah, ye mme mbet esie nte ẹtịn̄de ke mme ibuot n̄wed emi. Ẹkeme ndikụt ima oro Jesus amade Jehovah ke kpukpru mbụk Gospel ẹban̄ade uwem esie, edi John kpọt ewet ete ke Jesus ama ọdọhọ in̄wan̄-in̄wan̄ ete: “Mmama Ete.” (John 14:31) Jesus ama ọdọhọ n̄ko ete ke Jehovah ama imọ onyụn̄ anam ntak an̄wan̄a. Enye ọkọdọhọ: “Kpa nte Ete akamade Mi, Ami n̄konyụn̄ mma mbufo: ẹsụk ẹdụn̄ ke ima Mi. Edieke mbufo ẹnịmde mbet Mi, mbufo ẹyedụn̄ ke ima Mi; kpa nte Ami n̄kenịmde mbet Ete Mi, nnyụn̄ ndụn̄de ke ima Esie.” (John 15:9, 10) Ih, Jehovah ama Eyen esie ke ntak ọyọhọ nsụkibuot esie. Nso eti ukpepn̄kpọ ke emi edi ntem ọnọ kpukpru mme anditiene Jesus Christ!
5. Didie ke Jesus okowụt ima oro enye ekenyenede ọnọ mme mbet esie?
5 Ẹsọn̄ọ ntotụn̄ọ ima oro Jesus enyenede ọnọ mme anditiene enye ke ata ntọn̄ọ ntọn̄ọ mbụk John aban̄ade akpatre mbono Jesus ye mme apostle esie. John ọkọdọhọ ete: “Ke ini usọrọ Passover mîtọn̄ọke kan̄a, Jesus ọfiọk ete ekem ini nte Imọ idikpọn̄de ererimbot emi inyọn̄ itiene Ete; ndien ke edima emi Enye amade ikọt Esiemmọ emi ẹdude ke ererimbot, Enye ama mmọ tutu akpatre.” (John 13:1) Ke n̄wọrọnda mbubịteyo oro, enye ama ekpep mmọ n̄kpọ oro owo mîkemeke ndifre ke ndinam n̄kpọ nnọ mbon en̄wen ke ima. Enye ama eyet mmọ ukot. Emi ekedi n̄kpọ oro owo mmọ kiet kiet ekpekenyịmede ndinam nnọ Jesus ye nditọete mmọ, edi mmọ ikanamke. Jesus ama anam usụhọde utom emi ndien ekem ọdọhọ mme mbet esie ete: “Edieke Ami ndien, emi ndide Ọbọn̄ ye Andikpep, n̄keyetde mbufo ukot, mbufo nde ẹkpeyet kiet eken ukot. Koro mmọnọ mbufo uwụt-n̄kpọ nte, mbufo nde ẹnam kpa nte Ami n̄kanamde mbufo.” (John 13:14, 15) Mme ata Christian ẹkpenyene ndinyịme nnyụn̄ n̄kop inemesịt ndinam n̄kpọ nnọ nditọete mmọ.—Matthew 20:26, 27, ikọ idakisọn̄ NW; John 13:17.
Nịm Obufa Ibet
6, 7. (a) Nso akpan ntọt ke John ọnọ kaban̄a editọn̄ọ Editi? (b) Nso obufa ibet ke Jesus ọkọnọ mme mbet esie, ndien nso ikedi obufa ke ibet emi?
6 Mbụk John aban̄ade se iketịbede ke ubet enyọn̄ ke okoneyo emi ekesierede Nisan 14 edi n̄kukụre mbụk oro etịn̄de nnennen nnennen aban̄a Judas Iscariot ndiwọrọ. (John 13:21-30) Edinam mme mbụk Gospel ẹdu ke n̄kemuyo owụt ke edi ke andida nnọ oro ama ọkọwọrọ ke Jesus ọkọtọn̄ọ Editi n̄kpa Esie. Ekem Enye ama enyene anyan nneme ye mme anam-akpanikọ apostle esie, ọnọde mmọ item unyọn̄. Nte nnyịn itịmde idem ndidụk Editi, akpana nnyịn inyene ọkpọsọn̄ udọn̄ ke se Jesus eketịn̄de ke usọrọ oro, ndien akpan akpan sia nnyịn imenen̄ede iyom ndisịne ke otu mbon oro Abasi amade.
7 Ata akpa item oro Jesus ọkọnọde mme mbet esie ke ama ọkọtọn̄ọ Editi n̄kpa esie ekedi obufa n̄kpọ. Enye ọkọdọhọ ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:34, 35) Nso ikedi obufa ke ibet emi? Ke esisịt ini ebede ke mbubịteyo oro, Jesus ama anam mme n̄kpọ ẹn̄wan̄a, ọdọhọde ete: “Ibet Mi edi ntem, ete, mbufo ẹma kiet eken, kpa nte n̄kamade mbufo. Baba owo kiet inyeneke ima eke okponde akan enye emi, owo ndikpayak uwem esie nduọk kaban̄a mme ufan esie.” (John 15:12, 13) Ibet Moses ama owụk nditọ Israel ete ‘ẹma mbọhọ-idụn̄ mmọ nte idem mmọ.’ (Leviticus 19:18) Edi ibet Jesus ama aka anyan akan oro. Mme Christian ẹkenyene ndima kiet eken kpa nte Christ akamade mmọ, ẹnyịmede ndiduọk idem uwem mmọ kaban̄a nditọete mmọ.
8. (a) Nso ke ima n̄waidem abuana? (b) Didie ke Mme Ntiense Jehovah ẹwụt ima n̄waidem mfịn?
8 Ini Editi edi ini oro odotde ndidụn̄ọde idem nnyịn, nte owo kiet kiet ye nte esop, man ikụt m̀mê nnyịn imenen̄ede inyene n̄kpọ emi ẹdade ẹdiọn̄ọ ata Ido Ukpono Christ mi—ima ebietde eke Christ. Utọ ima n̄waidem oro ekeme ndiwọrọ, esinyụn̄ ọwọrọ ndusụk ini nte ke Christian eyesịn uwem esie ke itiendịk utu ke ndida nditọete esie nnọ. Nte ededi, ediwak ini emi esibuana nnyịn ndinyịme ndiyak mme ọkpọkpọ udọn̄ nnyịn ẹtak man in̄wam inyụn̄ inam n̄kpọ inọ nditọete nnyịn ye mbon en̄wen. Apostle Paul ekedi eti uwụtn̄kpọ ke afan̄ emi. (2 Corinth 12:15; Philippi 2:17) Ẹdiọn̄ọ Mme Ntiense Jehovah ke ofụri ererimbot kaban̄a edu n̄waidem mmọ, ẹn̄wamde nditọete ye mme mbọhọidụn̄ mmọ ẹnyụn̄ ẹnọde idemmọ ndida akpanikọ Bible nsọk mme ekemmọ owo. *—Galatia 6:10.
Mme Itie Ebuana Oro Ẹkpedarade
9. Man imụm ọsọn̄urua itie ebuana nnyịn ye Abasi ye Eyen esie ikama, nso ke nnyịn isikop inemesịt ndinam?
9 Idụhe n̄kpọ ndomokiet oro ekpenen̄erede ọsọn̄ urua ọnọ nnyịn akan ndidi se Jehovah ye Eyen esie, Christ Jesus, ẹmade. Nte ededi, man mmọ ẹma nnyịn, ana nnyịn inam n̄kpọ. Ke akpatre okoneyo oro enye okodude ye mme mbet esie, Jesus ọkọdọhọ ete: “Owo eke enyenede mbet Mi, onyụn̄ enịmde mmọ, enye edi owo eke amade Mi: ndien owo eke amade Mi, Ete Mi ayama enye, Ami nyonyụn̄ mma enye, nnyụn̄ nyarade Idem Mi nnọ enye.” (John 14:21) Sia nnyịn idade itie ebuana nnyịn ye Abasi ye Eyen esie ke ọsọn̄urua n̄kpọ, nnyịn imesinịm ibet mmọ idara idara. Emi esịne obufa ibet edima ima n̄waidem ye ewụhọ oro Jesus ọkọnọde ke ama ekeset ke n̄kpa, ete ‘ikwọrọ ikọ inọ mbio-obio, inyụn̄ idi ntiense,’ idomode ndinam mbon oro ẹnyịmede eti mbụk “ẹdi mbet.”—Utom 10:42; Matthew 28:19, 20.
10. Mme ọsọn̄urua itie ebuana ewe ẹberede ẹnọ mbon oro ẹyetde aran ye “mme erọn̄ en̄wen”?
10 Ekem ke okoneyo oro, ke ndibọrọ mbụme oro anam-akpanikọ apostle Judas (Thaddaeus) okobụpde enye, Jesus ama ọdọhọ ete: “Edieke owo amade Mi, eyenịm uyo Mi; ndien Ete Mi ayama enye, nnyịn iyonyụn̄ idi ididụn̄ ye enye.” (John 14:22, 23) Idem ke adan̄aemi ẹsụk ẹdude ke isọn̄, mme Christian oro ẹyetde aran, emi ẹnọde ikot ndikara ye Christ ke heaven, ẹnyene san̄asan̄a n̄kpet n̄kpet itie ebuana ye Jehovah ye Eyen esie. (John 15:15; 16:27; 17:22; Mme Hebrew 3:1; 1 John 3:2, 24) Edi mme nsan̄a mmọ ẹdide “mme erọn̄ en̄wen,” emi ẹnyenede idotenyịn edidu uwem ke isọn̄ ke nsinsi, ẹnyene n̄ko ọsọn̄urua itie ebuana ye “Ekpeme-erọn̄ kiet,” Jesus Christ, ẹnyụn̄ ẹnyene ye Abasi mmọ, Jehovah, ama akam edi mmọ ẹkop item.—John 10:16; Psalm 15:1-5; 25:14.
‘Mbufo Idịghe Mbon Ererimbot’
11. Nso ntọt oro anamde owo ekere n̄kpọ ke Jesus ọkọtọt mme mbet esie?
11 Ke akpatre edisop idem emi ye mme anam-akpanikọ mbet esie mbemiso n̄kpa esie, Jesus ama ọnọ ntọt oro anamde owo ekere n̄kpọ: Edieke Abasi amade owo, ererimbot ẹyesua owo oro. Jesus ọkọdọhọ ete: “Edieke ererimbot asuade mbufo, mbufo ẹmefiọk ẹte, enye ama ebem iso asua Mi, ndien edisua mbufo. Edieke mbufo ẹkpedide mbon ererimbot, ererimbot akpama ikọt esie: edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo. Ẹti ikọ eke n̄ketịn̄de nnọ mbufo nte, Asan̄autom ikponke ikan ete-ufọk. Edieke mmọ ẹkesịnde Mi enyịn, ẹyesịn mbufo enyịn n̄ko: edieke mmọ ẹkenịmde uyo Mi, mmọ ẹyenịm uyo mbufo n̄ko.”—John 15:18-20.
12. (a) Ntak Jesus ọkọtọtde mme mbet esie ete ke ererimbot ayasua mmọ? (b) Nso ke edifọn kpukpru owo ẹkere ẹban̄a nte Editi asan̄ade ekpere?
12 Jesus ọkọnọ ntọt emi man mme apostle 11 emi ye kpukpru mme ata Christian oro ẹditienede mmọ ke edem ẹkûkop mmemidem ẹnyụn̄ ẹkpa mba ke ntak usua otode ererimbot. Enye ama adian do ete: “Ntịn̄ mme ikọ emi nnọ mbufo, mbak owo edisịn mbufo ẹduọ. Mmọ ẹyebịn mbufo ẹsio ke mme synagogue; ini ke onyụn̄ edi eke owo ekededi eke ediwotde mbufo eyese ete imọ inam n̄kpọ inọ Abasi. Ndien mmọ ẹyenam mme n̄kpọ emi, koro mmọ mîkọdiọn̄ọke Ete, mînyụn̄ idiọn̄ọke Mi.” (John 16:1-3) N̄wed ukabadeikọ Bible kiet anam an̄wan̄a nte ke orụk ikọedinam oro ẹkabarede ‘ndisịn ẹduọ’ mi ọwọrọ “ndinam owo ọtọn̄ọ ndinyene eyịghe onyụn̄ adian̄ade ọkpọn̄ owo emi enye ekpenyenede ndiberi edem nnyụn̄ nsụk ibuot nnọ; ndinam owo ọwọn̄ọde ọkpọn̄ usụn̄.” Nte ini edinịm Editi asan̄ade ekpere, kpukpru owo ẹyenam ọfọn nditie n̄kere usụn̄ uwem mme anam-akpanikọ, eke eset ye eke idahaemi, nnyụn̄ n̄kpebe uwụtn̄kpọ nsọn̄ọnda mmọ ke idak idomo. Kûyak ubiọn̄ọ m̀mê ukọbọ anam fi ọkpọn̄ Jehovah ye Jesus, edi biere ndiberi edem nnyụn̄ nsụk ibuot nnọ mmọ.
13. Nso ke Jesus ekeben̄e ke ibuot mme anditiene enye ke akam oro enye ọkọbọn̄de ọnọ Ete esie?
13 Ke akam ediberi esie mbemiso ọkọkpọn̄de ubet enyọn̄ oro ke Jerusalem, Jesus ọkọdọhọ Ete esie ete: “Ami n̄kayak ikọ Fo nnọ mmọ; ndien ererimbot asasua mmọ, koro mmọ mîdịghe eke ererimbot, kpa nte Ami mmendịghe eke ererimbot. Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke idiọk esie. Mmọ idịghe eke ererimbot, kpa nte Ami mmendịghe eke ererimbot.” (John 17:14-16) Nnyịn imekeme ndinịm ke akpanikọ nte ke Jehovah esikpeme mbon oro enye amade, man ọsọn̄ọ mmọ idem nte mmọ ẹdade san̄asan̄a ẹkpọn̄ ererimbot.—Isaiah 40:29-31.
Ẹsọn̄ọ Ẹdu ke Ima Ete ye Eyen
14, 15. (a) Jesus ekemen idemesie odomo ye nso, ke edide isio ye ewe ‘idiọk vine’? (b) Mmanie ẹdi “mme n̄kọk” “ata vine”?
14 Ke ntotụn̄ọ nneme oro enye ekenyenede ye mme anam-akpanikọ mbet esie ke okoneyo emi ekesierede Nisan 14, Jesus ama emen idemesie odomo ye “ata vine,” ke edide isio ye ‘idiọk vine’ edide Israel oro mîkanamke akpanikọ. Enye ọkọdọhọ ete: “Ami ndi ata vine, Ete Mi onyụn̄ edi ọdiọn̄-in̄wan̄ vine.” (John 15:1) Ediwak isua ikie ke mbemiso, prọfet Jeremiah ama ewet mme ikọ Jehovah emi enye eketịn̄de ye mme ọsọn̄ibuot ikọt esie: “N̄kọtọ fi ata vine, . . . nsinam ndien afo akabarede edi idiọk eyen vine idụt ọnọ mi?” (Jeremiah 2:21) Ndien prọfet Hosea ama ewet ete: “Israel edi vine eke asiahade, enye on̄wụm mfri ọnọ idem esie: . . . Ẹbahade esịt mmọ.”—Hosea 10:1, 2.
15 Utu ke ndin̄wụm mbun̄wụm utuakibuot akpanikọ, Israel ama ọduọ odụk nsọn̄ibuot onyụn̄ on̄wụm mfri ọnọ idemesie. Usen ita mbemiso akpatre mbono esie ye mme anam-akpanikọ mbet esie, Jesus ama ọdọhọ mbon mbubịk ada iso mme Jew ete: “Mmọdo ndọhọ mbufo nte, Ẹyebọ mbufo Obio Ubọn̄ Abasi, ẹyak ẹnọ idụt emi edin̄wụmde mfri esie.” (Matthew 21:43) Obufa idụt oro edi “Israel Abasi,” emi mme Christian oro ẹyetde aran ẹdide owo 144,000 ẹnamde, emi ẹmende ẹdomo ye “mme n̄kọk” “ata vine,” Christ Jesus.—Galatia 6:16; John 15:5; Ediyarade 14:1, 3.
16. Nso ke Jesus eketeme mme anam-akpanikọ apostle 11 ete ẹnam, ndien nso ke ẹkeme nditịn̄ mban̄a mme anam-akpanikọ nsụhọ ke utịt ini emi?
16 Jesus ama ọdọhọ mme apostle 11 oro ẹkedude ye enye ke ubet enyọn̄ oro ete: “Kpukpru n̄kọk ke idem Mi eke mîn̄wụmke mfri, Enye esịbe efep; ndien kpukpru n̄kọk eke on̄wụmde mfri, Enye ọdiọn̄, man on̄wụm mfri awak akan. Ẹdụn̄ Mi ke idem, Ami nnyụn̄ ndụn̄ mbufo ke idem. Nte n̄kọk mîkemeke ndin̄wụm mfri ke idem esie, ibọhọke enye odụn̄ ke vine, kpasụk ntre ke mbufo ikemeke ndin̄wụm mfri, ibọhọke mbufo ẹdụn̄ Mi ke idem.” (John 15:2, 4) Mbụk ikọt Jehovah eke eyomfịn owụt nte ke mme anam-akpanikọ nsụhọ Christian oro ẹyetde aran ẹmedụn̄ Ibuot mmọ, Christ Jesus, ke idem. (Ephesus 5:23) Mmọ ẹmenyịme edinam asana emi asan̄ade ye edidiọn̄. (Malachi 3:2, 3) Toto ke 1919, mmọ ẹmesion̄o akpakịp mbun̄wụm Obio Ubọn̄, akpa ẹkedi mme Christian eken oro ẹyetde aran ndien, ọtọn̄ọde ke 1935, nsan̄a mmọ ẹdide “akwa otuowo” oro ibat mmọ akade-ka iso ndikọri.—Ediyarade 7:9; Isaiah 60:4, 8-11.
17, 18. (a) Mme ikọ Jesus ewe ẹn̄wam mbon oro ẹyetde aran ye mme erọn̄ en̄wen ndidụn̄ ke ima Jehovah? (b) Didie ke edidụk Editi edin̄wam nnyịn?
17 N̄kaiso ikọ Jesus enyene n̄kpọ ndinam ye kpukpru mme Christian oro ẹyetde aran ye mme nsan̄a mmọ: “Ete Mi ada ubọn̄ ke edin̄wụm emi mbufo ẹn̄wụmde mfri ekese; ntem ke mbufo ẹdidi mbet Mi. Kpa nte Ete akamade Mi, Ami n̄konyụn̄ mma mbufo: ẹsụk ẹdụn̄ ke ima Mi. Edieke mbufo ẹnịmde mbet Mi, mbufo ẹyedụn̄ ke ima Mi; kpa nte Ami n̄kenịmde mbet Ete Mi, nnyụn̄ ndụn̄de ke ima Esie.”—John 15:8-10.
18 Kpukpru nnyịn imoyom ndidụn̄ ke ima Abasi, ndien emi onụk nnyịn ndidi mme Christian oro ẹn̄wụmde mfri. Nnyịn inam emi ebe ke ndida kpukpru ifet ndikwọrọ “gospel Ubọn̄ Abasi.” (Matthew 24:14) Nnyịn n̄ko inam ofụri ukeme nnyịn ndision̄o “mbun̄wụm spirit” ke uwem nnyịn. (Galatia 5:22, 23) Ndidụk Editi n̄kpa Christ ọyọsọn̄ọ nnyịn idem ke ubiere nnyịn ndinam emi, koro ẹyeti nnyịn akwa ima oro Abasi ye Christ ẹnyenede ẹnọ nnyịn.—2 Corinth 5:14, 15.
19. Nso un̄wam efen efen ke ẹdineme ẹban̄a ke ibuotikọ oro etienede?
19 Ke ama ọkọtọn̄ọ Editi, Jesus ama ọn̄wọn̄ọ ete ke Ete imọ ọyọnọ “Ibetedem, kpa Edisana Spirit,” ẹsọk mme anam-akpanikọ anditiene imọ. (John 14:26) Ẹyeneme nte spirit emi an̄wamde mbon oro ẹyetde aran ye mme erọn̄ en̄wen ndidụn̄ ke ima Jehovah ke ibuotikọ oro etienede.
[Mme Ikọ idakisọn̄]
^ ikp. 2 Ke isua 2002, nte ekemde ye ubatini Bible, Nisan 14 ọtọn̄ọ ke Thursday, March 28, ke utịn ama okosụhọde. Ke mbubịteyo oro, Mme Ntiense Jehovah ke ofụri ererimbot ẹyesop idem ọtọkiet nditi n̄kpa Ọbọn̄ Jesus Christ.
^ ikp. 8 Se n̄wed oro Jehovah’s Witnesses—Proclaimers of God’s Kingdom, emi Mme Ntiense Jehovah ẹsiode, ibuot 19 ye 32.
Mme Mbụme Ndụn̄ọde
• Nso ukpepn̄kpọ oro enyenede ufọn ke ndinam ima ima utom ke Jesus ọkọnọ mme mbet esie?
• Ini Editi edi ini oro odotde owo ndidụn̄ọde idemesie mban̄a nso?
• Ntak emi ntọt Jesus aban̄ade ererimbot ndisua nnyụn̄ n̄kọbọ nnyịn mîkpanamke nnyịn ituak ukot iduọn̄ọ?
• Anie edi “ata vine”? Mmanie ẹdi “mme n̄kọk,” ndien nso ke ẹyom ẹto mmọ?
[Mme Mbụme Ukpepn̄kpọ]
[Ndise ke page 15]
Jesus ama ekpep mme apostle esie n̄kpọ oro owo mîkemeke ndifre ke ndinam n̄kpọ nnọ mbon en̄wen ke ima
[Ndise ke page 16, 17]
Mme mbet Christ ẹnịm ibet esie ke ndinyene ima n̄waidem