Obio Eke Ẹbọpde ke Enyọn̄ Obot

JESUS ama asian mme mbet esie ke ọwọrọetop Ukwọrọikọ esie oro ke Obot ete: “Mbufo ẹdi un̄wana ererimbot. Obio eke ẹbọpde ke enyọn̄ obot ikemeke ndidịbe.”—Matthew 5:14.

Ẹkebọp ediwak obio Judea ye Galilee ke enyọn̄ obot utu ke ndibọp ke unaisọn̄. Akpan ntak oro ẹkemekde enyọn̄ obot ekedi man ẹnyene ukpeme. Ke adianade ye mme udịmekọn̄ oro ẹkesidade ẹkọn̄ ẹdụk, mbon n̄wo ẹma ẹsibiat itieidụn̄ nditọ Israel. (2 Ndidem 5:2; 24:2) Nditọisọn̄ oro ẹkopde odudu ẹma ẹsikeme ndikpeme mme ufọk oro ẹbọpde ẹkpere kiet eken ke enyọn̄ obot mmemmem mmemmem n̄kan nte ẹkpemede mme ufọk oro ẹbọpde ke unaisọn̄, emi ekesiyomde akamba ibibene kaban̄a ukpeme.

Sia ẹkesiwakde ndiyet ndom ke ibibene ufọk mme Jew, ẹma ẹsikeme ndida ke ediwak kilomita n̄kụt otu mfia ufọk oro ẹbohode ọtọkiet ke enyọn̄ obot mi. (Utom 23:3) Ke ini utịn ayamade ke Palestine, mme obio enyọn̄ obot emi ẹma ẹsiyama nte un̄wana, kpa nte mme obio Mediterranean ẹsụk ẹyamade mfịn.

Jesus ama ada n̄wọrọnda ikpehe obio-in̄wan̄ Galilee ye Judea emi ndikpep mme anditiene enye se idide utom ata Christian. Enye ama asian mmọ ete: “Kpa ntre yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:16) Ke adan̄aemi mme Christian mîsinamke nti utom man mme owo ẹtoro mmọ, nti edu uwem mmọ isidịbeke.—Matthew 6:1.

Ẹsinen̄ede ẹkụt utọ nti edu uwem emi ke mme mbono district eke Mme Ntiense Jehovah. Ke etịn̄de aban̄a mbono kiet eke ndondo emi, n̄wedmbụk n̄kpọntịbe kiet ke Spain ama ọtọt ete: “Ke adan̄aemi mme owo mînyeneke aba udọn̄ ke mme ibuot nneme ẹban̄ade ido ukpono ke mme n̄ka ido ukpono en̄wen, emi idịghe ntre ye Mme Ntiense Jehovah. Sia mmọ mîyomke Bible anana ufọn, mmọ ẹda Ikọ Abasi ẹsịn ke edinam.”

Thomas, ekpeme an̄wambre kiet ke ufọt edem edere ye edem usoputịn Spain oro Mme Ntiense ẹsidade ẹnam n̄kpọ kpukpru ini, ama esima ndidu n̄kpere mbon oro ẹdade Ikọ Abasi ẹsịn ke edinam. Enye ama esịk ini ukpọn̄ utom esie aka ediwak urua ke iso man enye ekeme ndidụk mbono district eke Mme Ntiense Jehovah. Ke ini ediwak mme andidụk mbono, esịnede n̄kpri owo, ẹkedide ẹbịne enye ke mbono oro ama akasuana ndikọm enye kaban̄a edidianakiet esie ke ediwak isua oro ẹkebede ye kaban̄a utom oro enye oyomde ndikpọn̄, enye ama atua eyet. Enye ọkọdọhọ ete: “Ndidi ndidiọn̄ọ mbufo edi kiet ke otu mfọnn̄kan n̄kpọ ke uwem mi.”

Obio oro ẹbọpde ke enyọn̄ obot esimụm ntịn̄enyịn mme andida nse koro enye esiwọrọde ada ke ikpaenyọn̄ ye koro un̄wana utịn esiwọrọde ọtọ mfia ufọk ẹbọpde ke enye. Kpasụk ntre, mme ata Christian ẹwọrọ ẹda isio isio koro mmọ ẹdomode nditiene mme n̄kokon̄ idaha N̄wed Abasi utọ nte edinam akpanikọ, eti ido uwem, ye mbọm.

Ke adianade do, mme Christian ẹsiwụt un̄wana akpanikọ ebe ke utom ukwọrọikọ mmọ. Apostle Paul ama etịn̄ aban̄a mme Christian akpa isua ikie ete: “Sia nnyịn inyenede  utom emi ite inam, kpa nte Abasi akatuade nnyịn mbọm, esịt iduọhọ nnyịn: . . . edi ke edisian se idide akpanikọ an̄wa-an̄wa, ke inam kpukpru owo ẹfiọk ke esịt mmọ, ẹte nnyịn inanam se inende ke iso Abasi.” (2 Corinth 4:1, 2) Okposụkedi mmọ ẹkesobode ubiọn̄ọ ke kpukpru ebiet oro mmọ ẹkekwọrọde ikọ, Jehovah ama ọdiọn̄ utom ukwọrọikọ mmọ, tutu etisịm n̄kpọ nte isua 60 E.N., Paul ama ekeme ndiwet nte ke ẹma ẹkwọrọ eti mbụk “ẹnọ kpukpru owo ke idak ikpa-enyọn̄.”—Colossae 1:23.

Mfịn, Mme Ntiense Jehovah n̄ko ẹda mbiomo mmọ ‘ndiyak un̄wana mmọ ayama ke iso owo’ ke akpan n̄kpọ, nte Jesus okowụkde. Ebede ke ikọ inua ye mme n̄wed, Mme Ntiense Jehovah ẹsuan eti mbụk Obio Ubọn̄ emi ke idụt 235 ke ofụri ererimbot. Man un̄wana akpanikọ Bible esịm ediwak owo nte ekekeme, mmọ ẹnam mme n̄wed Bible mmọ ẹdu ke n̄kpọ nte usem 370.—Matthew 24:14; Ediyarade 14:6, 7.

Ke ediwak ebiet, Mme Ntiense ẹmenyịme n̄kpọ-ata edikpep usem isenowo oro ẹtode mme idụt oro ẹkpande utom ukwọrọikọ. Ke uwụtn̄kpọ, ediwak mbon China ye Russia ẹbụn̄ọ ẹdụk ediwak ikpọ obio ke Edem Edere America. Mme Ntiense n̄kann̄kụk ẹdomo ndikpep usem Chinese, Russian, ye mme usem eken man ẹkwọrọ eti mbụk ẹnọ isenowo emi. Ke akpanikọ, ke ẹnọ usọp usọp ukpep ke ediwak usem man ẹkeme ndikwọrọ eti mbụk nnọ mbon en̄wen koro in̄wan̄ adat “ekem ini ukpen̄e.”—John 4:35.

Prọfet Isaiah ama ebem iso etịn̄ ete: “Ama ekem ke utịt eyo, obot ufọk Jehovah oyowụhọ ke enyọn̄ ikpọ obot, onyụn̄ okon̄ akan n̄kpri obot; ndien kpukpru mme idụt ẹyebụn̄ọ ẹdụk ke esịt.” Ebede ke edu uwem ye utom ukwọrọikọ mmọ, Mme Ntiense Jehovah ke ẹn̄wam mme owo ke kpukpru ebiet ndidọk ndi “obot ufọk Jehovah” ndikpep ido Abasi nnyụn̄ nsan̄a ke usụn̄ Abasi. (Isaiah 2:2, 3) Nte Jesus okosiode owụt, idara idara utịp edi nte ke mmọ ẹdiana ọtọkiet ‘ẹtoro ete mmọ eke heaven,’ kpa Jehovah Abasi.—Matthew 5:16; 1 Peter 2:12.