Mme Edumbet Oro Afo Emekde

NTE afo emenyene edumbet? Mîdịghe ndi afo ese nti edumbet nte n̄kpọeset? Akpanikọ edi nte ke ndusụk orụk edumbet oro nnyịn idade ke akpan n̄kpọ ẹda kpukpru nnyịn usụn̄. Nte ekemde ye The New Shorter Oxford English Dictionary, ẹkeme ndikabade edumbet nte “ọkpọkpọ ibet aban̄ade eti edinam.” Mme edumbet ẹsikara mme ubiere nnyịn ẹnyụn̄ ẹbiere usụn̄ edinam nnyịn ke uwem. Mme edumbet ẹkeme ndinam n̄kpọ nte ukwak uwụt owo usụn̄.

Ke uwụtn̄kpọ, Jesus ama eteme mme anditiene enye ete ẹnịm Mfọnmma Ibet, oro ẹkụtde ke Matthew 7:12: “Ntre sededi mbufo ẹyomde owo ẹnam ye mbufo, ẹnam kpa ntre ye mmọ.” Mme anditiene Confucius ẹnịm edumbet li ye jen, emi ẹtịn̄de ẹban̄a mme utọ edu nte mfọnido, nsụhọdeidem, ukpono, ye edinam akpanikọ. Idem mme owo oro mîdịghe mbon ido ukpono ẹnyene ndusụk akpan n̄kpọ m̀mê ndausụn̄ oro ẹbierede nte mmọ ẹnamde n̄kpọ.

Mme Orụk Edumbet Ewe?

Nte ededi, nnyịn iyanam ọfọn nditi nte ke mme edumbet ẹkeme ndidi nti m̀mê ndiọi. Ke uwụtn̄kpọ, ke isua duop emi ẹkebede m̀mê akande oro, se ẹkedide ẹdidiọn̄ọ nte edu ami-ndi-akpa akara ata ediwak owo. Okposụk ekemede ndidi ediwak owo ifiọkke ikọ emi m̀mê ẹkemede ndikere ke enye inyeneke n̄kpọ ndinam ye mmimọ, edu ami-ndi-akpa edi usụn̄ ido uwem oro ediwak owo ẹwọn̄ọrede ẹbịne, ẹkpọn̄de n̄kokon̄ idaha edu uwem. Edide ẹda ikọ m̀mê idaha ẹdiọn̄ọ, edu ami-ndi-akpa edi uyarade ibụk, awakde ndisan̄a ye uma-inyene oro mîwụtke ifiọk. Etubom ufọkutom TV ke China ọkọdọhọ ete: “Nnyịn inyene edumbet iba kpọt. Kiet edi ndiyụhọ udọn̄ mme owo. Enye eken edi ndikọ okụk.”

Edu ami-ndi-akpa ekeme ndinam n̄kpọ nte maknet. Ndien didie ke maknet esitịmede ukwak uwụt owo usụn̄? Ke ini mbiba ẹdude ẹkpere kiet eken, abiabon ukwak uwụt owo usụn̄ esinọ owo ukwan̄ ndausụn̄. Ke ukem usụn̄ oro, edu ami-ndi-akpa ekeme nditịmede ukwak uwụt owo usụn̄ ido uwem, m̀mê edumbet eti edu uwem, ke ndinam kpukpru n̄kpọ ẹdi udiana ẹnọ mme udọn̄ owo oro.

Nte afo okpokop n̄kpaidem ndifiọk nte ke edu ami-ndi-akpa idịghe edu eyomfịn? Usụn̄ udu uwem emi ọkọtọn̄ọ ke in̄wan̄ Eden ke ini akpa ete ye eka nnyịn ẹkekpọn̄de idaha udu uwem oro Andibot nnyịn ekenịmde. Oro ama etịmede ukwak uwụt owo usụn̄ ido uwem mmọ. Nte mme andito ubon Adam ye Eve, ukem usụn̄ udu uwem emi, edide se ẹkotde ke ndondo emi “ami-ndi-akpa,” afịna mme owo.—Genesis 3:6-8, 12.

Ẹnen̄ede ẹkụt nte edu emi atarade ke ini emi ntịn̄nnịm ikọ Bible okotde “ukperedem ini,” emi ẹdade “ndiọk eyo” ẹdiọn̄ọ. Ediwak owo ẹdi “mme ama idem.”  Idịghe n̄kpọ n̄kpaidem nte nnyịn isisobode mfịghe editiene usụn̄ uwem ami-ndi-akpa.—2 Timothy 3:1-5.

Eyedi afo eyenyịme ye uyen oro ekerede Olaf emi ekewetde ọnọ ẹsọk n̄kọk itieutom Mme Ntiense Jehovah ke Europe ete: “Enen̄ede edi ọkpọsọn̄ n̄kpọ ndika iso nnyene eti ido uwem, akpan akpan ye nnyịn n̄kpri owo. Mbọk ẹka iso nditi nnyịn ufọn edisọn̄ọ nyịre ye mme edumbet Bible.”

Olaf ama enyene ọniọn̄ ọniọn̄ ekikere. Mme edumbet Abasi ẹkeme ndin̄wam nnyịn—n̄kpri ye ikpọ—ndisọn̄ọ mmụm n̄kokon̄ idaha edu uwem n̄kama. Mmọ ẹkeme n̄ko ndinam nnyịn ibiọn̄ọ edu ami-ndi-akpa, edide ẹkot enye ntre m̀mê owo ikotke. Edieke edimade ndikpep n̄kpọ efen efen mban̄a nte mme edumbet Bible ẹkemede ndinen̄ede n̄n̄wam fi, mbọk kere ban̄a ibuotikọ oro etienede.

[Mme ndise ke page 4]

Ediwak owo mfịn ikereke iban̄a ufọn mbon efen