Ndiben̄e Idem ke Kpukpru Nde nte Mme Andikpep Ikọ Abasi
Ndiben̄e Idem ke Kpukpru Nde nte Mme Andikpep Ikọ Abasi
‘Abasi anam nnyịn itịm idot ndidi mme asan̄autom.’—2 CORINTH 3:5, 6, NW.
1, 2. Mme ukeme ewe ndikwọrọ ikọ ke ẹsisịn ke ndusụk idaha, edi ntak emi mmọ ẹsiwakde ndikpu?
NTE afo akpama ẹnọ fi utom oro afo mûdotke ndinam? Kere ban̄a emi: Ẹbon mme n̄kpọ oro afo oyomde, mme n̄kpọutom ẹnyụn̄ ẹdu. Edi afo ufiọkke nte akpanamde utom emi. Ke akam ọdiọkde akan, oyom ẹnam utom emi usọp usọp. Mme owo ẹdori enyịn ke afo. Nso n̄kpọ edikpu ke oro ekpedi ntem!
2 Utọ ọkpọsọn̄ mfịna emi idịghe sụk n̄kpọ oro ẹkerede-kere. Kere ban̄a uwụtn̄kpọ kiet. Ke ndusụk idaha, kiet ke otu ufọkabasi Christendom esidomo nditịm nnyụn̄ nnam utom ukwọrọikọ eke enyịn̄usụn̄ ke enyịnusụn̄. Mme utọ ukeme oro ẹsiwak ndikpu, ẹsan̄ade sụn̄sụn̄ ẹsịm utịt ke urua m̀mê ọfiọn̄ ifan̄ ẹbede. Ntak-a? Christendom in̄wamke mme andibuana ke enye man ẹben̄e idem ndinam utom emi. Idem mme ọkwọrọ ederi idotke ndinam utom ukwọrọikọ, ediwak ini kpa ye oro ẹma ẹkebọ ukpep ediwak isua ke mme ufọkn̄wed ererimbot ye ke mme itie unọ mme oku ukpep. Ntak emi nnyịn idọhọde ntre?
3. Ke 2 Corinth 3:5, 6, ikọ ewe ke ẹda ẹtịn̄ ikọ utịm ikata, ndien nso ke enye ọwọrọ?
3 Ikọ Abasi anam an̄wan̄a se inamde ata ọkwọrọ eti mbụk Christian odot. Ẹma ẹnọ apostle Paul odudu spirit ndiwet nte: “Emi iwọrọke ite ke nnyịn ke idem nnyịn imetịm idot ndibiere n̄kpọ ekededi ke odudu idem nnyịn: edi nnyịn nditịm ndot oto Abasi, emi ke akpanikọ anamde nnyịn itịm idot ndidi mme asan̄autom.” (2 Corinth 3:5, 6, NW) Tịm fiọk ikọ oro ẹdade ẹtịn̄ ikọ utịm ikata mi—‘editịm ndot.’ Nso ke enye ọwọrọ? Vine’s Expository Dictionary of Biblical Words ọdọhọ ete: “Ke ini ẹdade ẹtịn̄ ẹban̄a mme n̄kpọ, [akpasarade ikọ Greek oro] ọwọrọ ‘edikem’ . . . ; ke ini ẹtịn̄de ẹban̄a mme owo, enye ọwọrọ ‘edikeme,’ ‘edidot.’” Ntem, owo oro ‘etịmde odot’ ekeme onyụn̄ odot ndinam utom oro ẹnọde enye anam. Ih, mme ata asan̄autom eti mbụk ẹdot ndinam utom emi. Mmọ ẹkeme m̀mê ẹdot ndikwọrọ ikọ.
4. (a) Didie ke uwụtn̄kpọ Paul owụt ke ndidot ndinam utom ukwọrọikọ Christian inyeneke sụk ibat ibat mme ọwọrọiso owo? (b) Nso idi usụn̄ ita oro Jehovah adade anam nnyịn idot nte mme asan̄autom?
4 Nte ededi, m̀mọ̀n̄ ke editịm ndot oro oto? Ndi oto ndammana ifiọk? Ndi oto n̄kon̄n̄kan ikike? Ndi oto san̄asan̄a ukpep oro ẹbọde ke mme ọwọrọetop ufọkn̄wed? Nte an̄wan̄ade, apostle Paul ama enyene kpukpru oro. (Utom 22:3; Philippi 3:4, 5) Edi, enye ke nsụhọdeidem ama enyịme ete ke se ikanamde imọ idot nte asan̄autom ikotoho ukpep oro imọ ikọbọde ke ufọkn̄wed ntaifiọk, edi okoto Jehovah Abasi. Ndi mme utọ n̄kpọ oro ẹnamde owo odot mi ẹnyene sụk ibat ibat mme ọwọrọiso owo? Paul ama ewet n̄wed ọnọ ẹsọk esop Corinth aban̄a “nnyịn nditịm ndot.” Oro ke akpanikọ owụt ete ke Jehovah esikụt ete ke kpukpru mme anam-akpanikọ asan̄autom imọ ẹdot, ẹnyene ukeme ndinam utom oro enye ọnọde mmọ ẹnam. Didie ke Jehovah anam mme ata Christian ẹdot mfịn? Ẹyak nnyịn ineme iban̄a usụn̄ ita emi enye adade anam n̄kpọ: (1) Ikọ esie, (2) edisana spirit esie, ye (3) esop esie eke isọn̄.
Ikọ Jehovah Anam Nnyịn Idot
5, 6. Edisana N̄wed Abasi enyene nso odudu ke idem mme ata Christian?
5 Akpa, didie ke Ikọ Abasi an̄wam ndinam nnyịn idot nte mme asan̄autom? Paul ekewet ete: “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.” (2 Timothy 3:16, 17) Ntre, Edisana Ŋwed Abasi Ibom an̄wam ndinam nnyịn ‘inyene ọyọhọ ifiọk, inyụn̄ iben̄e idem ke kpukpru nde’ ndinam “eti utom” eke edikpep mme owo Ikọ Abasi. Nte ededi, nso kaban̄a kpukpru mme andibuana ke mme ufọkabasi Christendom? Mmọ ẹnyene Bible. Didie ke n̄wed kiet ekeme ndin̄wam ndusụk owo ẹkabade ẹdi mme asan̄autom oro ẹdotde edi in̄wamke mbon eken ẹkabade ẹdi? Ibọrọ ọkọn̄ọ ke edu oro nnyịn inyenede iban̄a Bible.
6 Ke mfụhọ, ediwak mme aka ufọkabasi idaha etop Bible ke se enye ke akpanikọ edide “nte ikọ Abasi.” (1 Thessalonica 2:13) Christendom ọwọrọ idiọk etop ke afan̄ emi. Nte mme ọkwọrọ ederi ẹben̄e idem nte mme andikpep Ikọ Abasi, ke ẹma ẹkebiat ediwak isua ẹkpep n̄kpọ ke ufọkn̄wed ukpepn̄kpọ ido ukpono? Baba-o. Kamse, ndusụk nditọ ufọkn̄wed ẹsitọn̄ọ ukpep ke ufọkn̄wed ukpep utom oku nte mme andinịm Bible ke akpanikọ edi ẹkụre ukpep nte mbon eyịghe! Ke oro ebede, utu ke ndikwọrọ Ikọ Abasi—emi ediwak mmọ mînịmke aba ke akpanikọ—mmọ ẹwọn̄ọde utom mmọ ẹsịn ke mme usụn̄ efen, ẹbuanade ke mme eneni ukaraidem, ẹsịnde udọn̄ ẹnọ gospel mfọnido, m̀mê ẹdoride nsọn̄uyo ke mme ukpepn̄kpọ akwaifiọk owo ke ukwọrọikọ mmọ. (2 Timothy 4:3) Ke edide isio, mme ata Christian ẹtiene uwụtn̄kpọ Jesus Christ.
7, 8. Didie ke edu Jesus kaban̄a Ikọ Abasi okokpụhọde ye eke mme adaiso ido ukpono eyo esie?
7 Jesus ikayakke mme adaiso ido ukpono eyo esie ẹkara usụn̄ ukere n̄kpọ esie. Edide ekekpep ekpri otu, utọ nte mme apostle esie, m̀mê akwa otu, Jesus ama esida ndisana uwetn̄kpọ anam n̄kpọ nte ọfọnde. (Matthew 13:10-17; 15:1-11) Emi ama anam enye okpụhọde ye mme adaiso ido ukpono ini oro. Mmọ ẹma ẹnen̄ede ẹkpan mme usụhọde owo ndidụn̄ọde nditụn̄ọ n̄kpọ Abasi. Ke akpanikọ, ekedi ido andikpep eyo oro ndidọhọ ke ndusụk udịmikọ Bible ẹkam ẹtụn̄ọ ẹkaha ndidi se ẹnemede ye owo ekededi ke mîbọhọke ye ata n̄kpet n̄kpet nditọ ukpepn̄kpọ imọ—ndien idem ke ini enemede, anamde ntre ke sụn̄sụn̄ uyo onyụn̄ ayarade n̄kpọ ke ibuot. Mme adaiso ido ukpono oro ẹma ẹkpere ndinyene nsunsu ekikere mban̄a edineme ndusụk itie ke Bible nte mmọ ẹkenyenede ẹban̄a edikot enyịn̄ Abasi!
8 Christ ikanamke ntre. Enye ekenịm ke akpanikọ ete ke ama oyom mme owo ke ofụri ofụri ẹkere ẹban̄a ‘kpukpru ikọ eke ẹwọrọde Abasi ke inua,’ idịghe ibat ibat owo oro ẹmekde kpọt. Ikọdọn̄ke Jesus ndiyak ukpọhọde ifiọk ekededi nnọ otu mme ọwọrọiso nditọ ukpepn̄kpọ. Enye ama asian mme mbet esie ete: “Se ndọhọde mbufo ke ekịm, ẹmen ẹtịn̄ ke un̄wana; se mbufo ẹnyụn̄ ẹkopde ke utọn̄, ẹkwọrọ ke ọkọm ufọk.” (Matthew 4:4; 10:27) Ama enen̄ede ọdọn̄ Jesus ndibuana ifiọk Abasi ye adan̄a ediwak owo nte enye ekekeme.
9. Didie ke mme ata Christian ẹsida Bible ẹnam n̄kpọ?
9 Ikọ Abasi ekpenyene ndidi ebiet oro iwụkde ntịn̄enyịn ke ini inọde ukpep. Ke uwụtn̄kpọ, ke ini nnyịn inọde utịn̄ikọ ke Ufọkmbono Obio Ubọn̄ Mme Ntiense Jehovah, isikemke ndikot mme ufan̄ikọ oro ẹsatde-sat ẹto Bible. Ekeme ndiyom nnyịn inam an̄wan̄a, inọ uwụtn̄kpọ, inyụn̄ iwụt ebuana oro itien̄wed oro enyenede ye udọn̄ikọ. Uduak nnyịn edi ndisio etop Bible ke n̄wed nsịn ke esịt mbon oro ẹkpan̄de utọn̄ ẹnọ nnyịn. (Nehemiah 8:8, 12) N̄ko, ẹkpenyene ndida Bible nnam n̄kpọ ke ini oyomde ẹnọ item m̀mê ntụnọ edinen̄ede. Okposụkedi ikọt Jehovah ẹsemde nsio nsio usem ẹnyụn̄ ẹtode nsio nsio idaha ke uwem, kpukpru mmọ ẹkpono N̄wed emi akande kpukpru n̄wed mi—kpa Bible.
10. Nso odudu ke etop Bible eke odudu spirit ekeme ndinyene ke idem nnyịn?
10 Etop Bible enyene odudu ke ini ẹdade ẹnam n̄kpọ ke utọ ukpono ukpono usụn̄ oro. (Mme Hebrew 4:12) Enye esinụk mme owo ndinam mme ukpụhọde ke uwem mmọ, utọ nte ediwọn̄ọde n̄kpọn̄ mme edinam oro mîkemke ye N̄wed Abasi nte use, efịbe, ukpono ndem, ukpammịn, ye uyịpinọ. Enye an̄wam ediwak owo ndisio akani owo nduọk nnyụn̄ mmen obufa owo nsịne. (Ephesus 4:20-24) Ih, edieke nnyịn ikponode enye ikan ekikere m̀mê item owo ekededi inyụn̄ idade enye inam n̄kpọ ke edinam akpanikọ, Bible ekeme ndin̄wam ndinam nnyịn inyene ifiọk, inyụn̄ iben̄e idem ke kpukpru nde nte mme andikpep Ikọ Abasi.
Spirit Jehovah Anam Nnyịn Idot
11. Ntak emi ẹtịn̄de nte odotde ẹban̄a edisana spirit Jehovah nte “Ibetedem”?
11 Ọyọhọ iba, ẹyak nnyịn ineme iban̄a udeme oro edisana spirit, m̀mê anamutom odudu Jehovah enyenede ke ndinam nnyịn iben̄e idem ke kpukpru nde. Inaha nnyịn idede ifre ite ke spirit Jehovah edi n̄kponn̄kan odudu oro odude. Jehovah ọmọnọ edima Eyen esie odudu ndikama utọ enyene-uten̄e odudu oro ke ufọn kpukpru mme ata Christian. Nte odotde, Jesus ama etịn̄ aban̄a edisana spirit nte “Ibetedem.” (John 16:7) Enye ama eteme mme anditiene enye ete ẹben̄e Jehovah spirit oro, ọsọn̄ọde etịn̄ ọnọ mmọ ete ke Jehovah ọyọnọ enye ke ntatubọk.—Luke 11:10-13; James 1:17.
12, 13. (a) Ntak edide akpan n̄kpọ nnyịn ndibọn̄ akam mben̄e ite edisana spirit an̄wam nnyịn ke utom ukwọrọikọ nnyịn? (b) Didie ke mme Pharisee ẹkewụt ke edisana spirit ikanamke utom ke idem mmọ?
12 Oyom nnyịn ibọn̄ akam iben̄e edisana spirit ke usen ke usen, akpan akpan man an̄wam nnyịn ke utom ukwọrọikọ nnyịn. Nso utịp ke anamutom odudu oro ekeme ndinyene ke idem nnyịn? Enye ekeme ndinam utom ke ekikere ye esịt nnyịn, an̄wamde nnyịn ndinam ukpụhọde, ndinam n̄kọri, ndinyụn̄ mmen obufa owo nsịne ke itie akani owo. (Colossae 3:9, 10) Enye ekeme ndin̄wam nnyịn ndikọri mme ọsọn̄urua edu oro ẹbietde eke Christ. Ediwak nnyịn imekeme ndikot Galatia 5:22, 23 ke ibuot. Mme ufan̄ikọ oro ẹsiak mbun̄wụm spirit Abasi. Akpa edi ima. Edu oro edi akpan n̄kpọ ke utom ukwọrọikọ nnyịn. Ntak-a?
13 Ima edi akwa odudu oro onụkde owo anam n̄kpọ. Ima ẹnyenede ẹnọ Jehovah ye mme ekemmọ owo esinụk mme ata Christian ndibuana eti mbụk. (Mark 12:28-31) Ke utọ ima oro mîkpodụhe, nnyịn ikpekemeke ndinen̄ede ndot nte mme andikpep Ikọ Abasi. Tịm fiọk ukpụhọde oro odude ke ufọt Jesus ye mme Pharisee. Matthew 9:36 etịn̄ aban̄a Jesus ete: “Edi ke adan̄aemi Enye okụtde mme otu owo, atua mmọ mbọm, koro mmọ ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” Didie ke mme Pharisee ẹkese mme usụhọde owo? Mmọ ẹkedọhọ ẹte: “Ama edi otu owo eke mîfiọkke ibet, mmọ ẹdi mbukpo owo.” (John 7:49; sịghisịghi ubọkn̄wed edi eke nnyịn.) Mme Pharisee oro ikamaha mme owo, edi ẹkese mmọ ke ata usụhọde. Nte an̄wan̄ade, spirit Jehovah ikanamke utom ke idem mmọ.
14. Didie ke uwụtn̄kpọ Jesus eke ediwụt ima ke utom ukwọrọikọ okponụk nnyịn?
14 Jesus ama esitua mme owo mbọm. Enye ama ọfiọk ubiak mmọ. Enye ama ọfiọk ete ke ẹkenam n̄kpọ ye mmọ ke idiọk usụn̄, ke mmọ ẹkedu ke nnanenyịn, ẹnyụn̄ ẹsuana nte erọn̄ eke mînyeneke andikpeme. John 2:25 asian nnyịn ete ke Jesus ‘ama ọfiọk se idude owo ke esịt.’ Sia enye ekedide Etubom Anamutom Jehovah ke ini edibotn̄kpọ, Jesus ama enyene ntotụn̄ọ ifiọk aban̄a nte owo etiede. (Mme N̄ke 8:30, 31) Ifiọk oro ama anam ima esie otụn̄ọ. Akpakam utọ ima oro edi odudu oro onụkde nnyịn kpukpru ini ndinam utom ukwọrọikọ! Edieke nnyịn ikerede ke imekeme ndinam ukpụhọde ke afan̄ emi, ẹyak nnyịn ibọn̄ akam iben̄e edisana spirit Jehovah ndien ekem inam n̄kpọ ke n̄kemuyo ye akam nnyịn. Jehovah eyeyere nnyịn. Enye ọyọnọ odudu emi owo mîkemeke ndibiọn̄ọ man an̄wam nnyịn itịm ikpebe Christ, emi eketịmde odot ndikwọrọ eti mbụk.
15. Didie ke ikọ Isaiah 61:1-3 ekenyene n̄kpọ ndinam ye Jesus ndien ke ukem ini oro ayararede mme scribe ye mme Pharisee?
15 Mme n̄kpọ oro ẹkenamde Jesus odot ẹketo m̀mọ̀n̄? Enye ọkọdọhọ ete: “Spirit Jehovah odoro Mi ke idem.” (Luke 4:17-21) Ih, Jehovah ke idemesie akada edisana spirit emek Jesus. Ikoyomke Jesus enyene mme n̄kpọ efen efen oro ẹnamde owo odot. Nte ẹkeda edisana spirit ẹmek mme adaiso ido ukpono eyo esie? Baba. Owo ikonyụn̄ itịmke mmọ idem ndisu Isaiah 61:1-3, emi Jesus okokotde uyo ọwọrọ onyụn̄ adade etịn̄ aban̄a idemesie. Mbọk kot mme ufan̄ikọ oro, nyụn̄ kụt ke idemfo nte ke mme scribe ye mme Pharisee oro ẹkedide mbon mbubịk ikodotke. Mmọ ikenyeneke eti mbụk ndikwọrọ nnọ mme ubuene. Ndien didie ke mmọ ẹkpekekeme ndikwọrọ uwọrọ-ufụn nnọ mbuotekọn̄ ye edikụt usụn̄ nnọ mme nnan? Ke usụn̄ifiọk eke spirit, mmọ ke idemmọ ẹkedi nnan ẹkenyụn̄ ẹdụk ufụn ẹnọ item owo! Ke mîbietke mme Pharisee oro, nte nnyịn imetịm idot ndikpep mme owo n̄kpọ?
16. Nso mbuọtidem ke ikọt Jehovah ẹkeme ndinyene mfịn mban̄a se inamde mmọ ẹdot nte mme asan̄autom?
16 Edi akpanikọ, nnyịn ibọhọ ukpep ke ikpọ ufọkn̄wed Christendom. Owo imekke nnyịn nte mme andikpep ke ufọkn̄wed ukpep utom oku. Do, nte nnyịn imanana mme n̄kpọ oro ẹnamde owo odot? Ke akpanikọ, nnyịn inanake! Edi Jehovah emek nnyịn nte Mme Ntiense esie. (Isaiah 43:10-12) Edieke nnyịn ibọn̄de akam iben̄e spirit esie inyụn̄ inamde n̄kpọ ke n̄kemuyo ye akam oro, nnyịn iyetịm idot. Nte ededi, nnyịn idi mme anana-mfọnmma inyụn̄ ikemeke nditiene uwụtn̄kpọ oro Akwa Andikpep, Jesus, ekenịmde ke mfọnmma usụn̄. Kpa ye oro, nte nnyịn iwụtke esịtekọm nte ke Jehovah ada spirit esie anam nnyịn idot onyụn̄ etịm nnyịn idem nte mme andikpep Ikọ esie?
Esop Jehovah Anam Nnyịn Idot
17-19. Didie ke mbono esop ition eke urua ke urua oro esop Jehovah etịmde ẹn̄wam ndinam nnyịn idot nte mme asan̄autom?
17 Idahaemi, ẹyak nnyịn ineme iban̄a ọyọhọ usụn̄ ita oro Jehovah adade etịm nnyịn idem nte mme andikpep Ikọ esie—esop esie eke isọn̄, emi ekpepde nnyịn ndidi mme asan̄autom. Didie? Kam kere ban̄a ndutịm ukpep oro nnyịn isibọde! Ke urua kiet, nnyịn imesidụk mbono esop Christian ition. (Mme Hebrew 10:24, 25) Nnyịn imesisop idem ke n̄kpri otu ke Ukpepn̄kpọ N̄wed Esop ndikpep ntotụn̄ọ ukpepn̄kpọ Bible ebe ke n̄wed ukpepn̄kpọ oro ẹnọde ebe ke esop Jehovah. Ke ndinọ n̄kpan̄utọn̄ nnyụn̄ nnọ ibọrọ, nnyịn imesikpep n̄kpọ ito inyụn̄ isịn udọn̄ inọ kiet eken. Nnyịn n̄ko imesibọ ọkpọkpọ item ye ntịn̄enyịn ito esenyịn ukpepn̄kpọ n̄wed. Ke An̄wan̄wa Mbono Esop ye ke Ukpepn̄kpọ Enyọn̄-Ukpeme, nnyịn imesidia nti udia eke spirit efen efen.
18 Ẹtịm Ufọkn̄wed Utom Ukara Abasi nnyịn ndinọ nnyịn item ke nte nnyịn ikpọnọde ukpep. Ke nditịm idem nnọ mme utịn̄ikọ eyen ufọkn̄wed, nnyịn ikpep nte ikpadade Ikọ Abasi inọ ukpep ke ata ediwak ibuot nneme. (1 Peter 3:15) Nte akanam ẹnọ fi utịn̄ikọ ke ibuot nneme oro etiede nte emetịm emehe, n̄kukụre ndikụt idemfo nte ekpepde obufa n̄kpọ aban̄a enye? Oro edi ọsọ ifiọk n̄kpọntịbe. Idụhe n̄kpọ oro edemerede ifiọk nnyịn kaban̄a ibuot nneme akan edida enye n̄kpep mbon en̄wen. Idem ke ini nnyịn mînyeneke utịn̄ikọ ndinọ, nnyịn imekeme ndisụk n̄kpep ndidi nti andikpep. Nnyịn imesikụt nti edu ke idem eyen ufọkn̄wed kiet kiet, ndien nnyịn imekeme ndikere mban̄a nte ikpekpebede mme utọ edu oro.
19 Ẹtịm Esoputom n̄ko ndinam nnyịn idot nte mme andikpep Ikọ Abasi. Ke urua ke urua, nnyịn imesikop mme ufiop ufiop utịn̄ikọ, mme nneme, inyụn̄ ikụt mme nnamn̄wụt oro ẹtịmde kaban̄a utom ukwọrọikọ nnyịn. Nso nneme ke nnyịn idida inam n̄kpọ? Didie ke nnyịn ikeme ndise mban̄a mme san̄asan̄a n̄kpọ-ata ke an̄wan̄wa utom ukwọrọikọ nnyịn? Mme usụn̄ ukwọrọikọ ewe ẹberede ẹnọ nnyịn oro oyomde nnyịn ika iso idụn̄ọde? Nso idin̄wam ndinam nnyịn idi mme andikpep oro ẹtịmde ẹnyene uforo ke ini inamde mfiakn̄ka inyụn̄ inịmde ukpepn̄kpọ Bible? (1 Corinth 9:19-22) Ẹsibọrọ ẹnyụn̄ ẹneme mme utọ mbụme oro ọyọhọ oyọhọ ke Esoputom. Ediwak ikpehe ke mbono esop emi ẹsikọn̄ọ ke mme ibuotikọ ke Utom Obio Ubọn̄ Nnyịn, kpa n̄kpọutom efen oro ẹnọde nditịm nnyịn idem kaban̄a akpan utom nnyịn.
20. Didie ke nnyịn ikeme ndibọ ufọn ọyọhọ ọyọhọ nto mme mbono esop ye mme mbono?
20 Ke nditịm idem nnọ nnyụn̄ ndụk mme mbono esop nnyịn ndien ekem ida se nnyịn ikpepde iban̄a utom nnyịn nte mme andikpep inam n̄kpọ, nnyịn ibọ akpakịp ukpep. Edi mme n̄kpọ efen efen ẹdu. Nnyịn n̄ko imenyene ikpọ mboho—n̄kpri ye ikpọ mbono—oro ẹtịmde man ẹnam nnyịn idot nte mme andikpep Ikọ Abasi. Ndien nnyịn isidori enyịn didie ntem ndinọ ọyọhọ n̄kpan̄utọn̄ nnyụn̄ nda utọ item oro nnam n̄kpọ!—Luke 8:18.
21. Nso uyarade iwụt nte ke ukpep oro ẹnọde nnyịn enyene uforo, ndien anie enyene itoro?
21 Nte ukpep oro Jehovah ọnọde enyene uforo? Ẹyak ise uyarade oro odude. Isua kiet kiet, ẹsin̄wam ediwak tọsịn owo ke mme itie ikie ndikpep mme akpan ukpepn̄kpọ Bible ndinyụn̄ ndu uwem ke n̄kemuyo ye se Abasi oyomde oto mmọ. Ibat nnyịn ke ọkọri, edi owo nnyịn ndomokiet ikemeke ndibọ ọkpọkpọ itoro kaban̄a oro. Ana nnyịn ise mme n̄kpọ ke ata ata usụn̄, nte Jesus ekesede. Enye ọkọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odudi enye edi.” Ukem nte mme apostle eset, ediwak nnyịn idi mbon emi mîkekpepke n̄wed inyụn̄ idi ndisịme ke ifiọk n̄wed. (John 6:44; Utom 4:13) Unen oro nnyịn ikụtde ọkọn̄ọ ke Jehovah, emi esidụride mbon eti esịt ọnọ akpanikọ. Paul ama etịn̄ nte enende ete: “Ami n̄kọtọ, Apollos ọkọbọk ke mmọn̄; edi n̄kọri oto Abasi.”—1 Corinth 3:6.
22. Ntak emi nnyịn mîkpakpaha mba ndibuana ọyọhọ ọyọhọ ke utom ukwọrọikọ Christian?
22 Ih, Jehovah Abasi abuana ifịk ifịk ke utom nnyịn nte mme andikpep Ikọ esie. Ekeme ndidi nnyịn idiwakke ndikere ke imodot nte mme andikpep. Edi ti ete ke edi Jehovah odụri mme owo ọnọ idemesie ye Eyen esie. Edi Jehovah ada Ikọ esie, edisana spirit esie, ye esop esie eke isọn̄ anam nnyịn idot ndikwọrọ ikọ nnọ mbufa owo oro. Ẹyak nnyịn ibọ ukpep oro Jehovah ọnọde ebe ke ndida nti n̄kpọ oro enye ọnọde nnyịn idahaemi ndinam nnyịn iben̄e idem ke kpukpru nde nte mme andikpep Ikọ Abasi nsịn ke edinam!
Didie ke Afo Ọkpọbọrọ?
• Didie ke Bible etịm nnyịn idem ọnọ utom ukwọrọikọ?
• Nso udeme ke edisana spirit enyene ke ndinam nnyịn idot nte mme asan̄autom?
• Ke mme usụn̄ ewe ke esop Jehovah eke isọn̄ an̄wam ndinam fi odot nte ọkwọrọ eti mbụk?
• Ntak ikpenyenede mbuọtidem ke ini ibuanade ke utom ukwọrọikọ?
[Mme Mbụme Ukpepn̄kpọ]
[Ndise ke page 25]
Nte andikpep Ikọ Abasi, Jesus ama enyene ima ọnọ mme owo