Uten̄e Abasi

UKPONO, utuakibuot, ye utom ẹnamde ẹnọ Abasi, ye edinam akpanikọ nnọ itie edikara ofụri ekondo esie. N̄wed Abasi ada ikọ Greek oro eu·seʹbei·a ye mme orụk nsan̄a ikọenyịn̄, nsan̄a ikọedinam, ye ikọedinam oro ẹnyenede ẹbuana, etịn̄ ikọ. Ẹkeme ndikabade ikọenyịn̄ oro ẹdade ẹtịn̄ ikọ ke Bible ke ata ata usụn̄ nte “ediwụt ntotụn̄ọ ukpono,” ndien enye ada aban̄a edinyene ukpono m̀mê uten̄e nnọ n̄kpọ oro edide ata edisana ye edinen. (Men 2 Peter 1:​6, Kingdom Interlinear, domo.) Ikọ edide isio ye “uten̄e Abasi” edi “unana uten̄e Abasi” m̀mê “unana ukpono” (Greek, a·seʹbei·a).

Ke n̄wed oro Christian Words, Nigel Turner ekewet ete: “Eusebeia odu ke ibat ibat itie ke usụn̄ oro ọnọde ekikere aban̄a ọkpọkpọ edinam ido ukpono owo ke mme uwetn̄kpọ idahaemi . . . edi se ediwak owo ẹkediọn̄ọde ke ọwọrọetop usem Greek eke eyo mbon Rome ekedi ‘edinam akpanikọ.’ . . . Ye mme Christian, eusebeia edi n̄kponn̄kan orụk uten̄e oro ẹnyenede ẹnọ Abasi.” (1981, page 111) Nte Bible adade ikọ oro “uten̄e Abasi” etịn̄ ikọ aban̄a ọkpọkpọ ediwụt uten̄e ye edinam akpanikọ nnọ Abasi.

Nsan̄a ikọedinam oro enyenede ebuana eu·se·besʹ, emi ọwọrọde “enyene-ifịk (NW); emi eten̄ede [Abasi],” odu ke Utom 10:​2, 7; 2 Peter 2:⁠9. Nte John A. H. Tittmann ọdọhọde, eu·se·besʹ “owụt uten̄e emi owụtde idem ke edinam, emi ẹnyenede ẹnọ Abasi, akpan akpan ke utuakibuot nnọ Abasi; . . . owo emi owụtde ukpono oro enyene [eu·se·besʹ].”​—⁠Remarks on the Synonyms of the New Testament, Edinburgh, 1833, Eboho I, page 253, 254.

Ẹda ikọedinam oro eu·se·beʹo ẹtịn̄ ikọ ke 1 Timothy 5:4 ke ebuana ye edu oro nditọ m̀mê nditọ nditọ ẹnyenede ye eka m̀mê eka eka mmọ oro edide ebeakpa. A Greek and English Lexicon of the New Testament, eke Edward Robinson (1885, page 307), ọdọhọ ke eu·se·beʹo ekeme ndiwọrọ ndiwụt owo ekededi ukpono. Ke ntak emi ndusụk edikabade ufan̄ikọ emi ẹdọhọ ẹte: “Mmọ ẹnyene ndibem iso n̄kpep ndinam utom mmọ nnọ mme ubon mmọ.” (The Jerusalem Bible) Edi Abasi edi Anditọn̄ọ ndutịm ubon (Ephesus 3:​14, 15), ndien Bible emen ufọk Abasi odomo ye ubon. Ke ntre, ukpono, m̀mê uten̄e Abasi, ke itie ebuana ubon ke ufọk Christian enen̄ede edi edikpono Abasi ye edikop item nnọ mme ewụhọ Abasi oro ẹban̄ade ubon ye edu uwem oro odotde ke n̄kan̄ mme andibuana ke enye. Edikabade itien̄wed emi, “Edieke ebeakpa ekededi enyenede nditọ m̀mê nditọ nditọ, yak mmọ emi ẹkpep ndibem iso nnam uten̄e Abasi ke ufọk mmọ” (New World Translation), odu ke n̄kemuyo ye ifiọk emi.

‘Edisana Ndịben̄kpọ Uten̄e Abasi’

N̄wọrọnda uwụtn̄kpọ uten̄e Abasi edi Jesus Christ. Apostle Paul ekewet ọnọ Timothy ete: “Ke akpanikọ, edisana ndịben̄kpọ uten̄e Abasi emi enen̄ede okpon: ‘Ẹma ẹyarade enye ke obụkidem, ẹbat ke edinen ke spirit, owụt mme angel idem, ẹkwọrọ enye ke otu mme idụt, ẹbuọt idem ye enye ke ererimbot, ẹmen enye ẹdọk ke ubọn̄.’” (1 Timothy 3:​16, NW) Mfọnmma owo oro Adam ikenịmke eti uwụtn̄kpọ uten̄e Abasi. Baba eyen mmọ kiet, emi amanade nte anana-mfọnmma owo, ikemeke ndinam emi. Anie edikeme ndinam emi? Eyen Abasi ndidi isọn̄ ye usụn̄ uwem nsọn̄ọnda esie ama ọnọ ibọrọ, ayararede se edisana ndịben̄kpọ oro edide. Timothy ekenyene ndise enye kaban̄a mfọnmma uwụtn̄kpọ edu uwem oro owụtde uten̄e Abasi.​—⁠1 Timothy 3:⁠15.

Jesus Christ ekedi owo emi okowụtde uten̄e Abasi ke mfọnmma usụn̄, ke kpukpru usụn̄, owụtde nte ke owo emi edide obụk ekeme ndiwụt utọ uten̄e oro. Ke idak n̄kpọsọn̄ idomo, tutu esịm utịt uwem esie eke isọn̄ Jesus ama ‘asana, inyeneke n̄kari, inyụn̄ iduehe, isan̄ake ye mme anamidiọk.’ (Mme Hebrew 7:​26) Owo ikekemeke ndikụt ndo ndomokiet ke nsọn̄ọnda esie, ndida mbiom enye ikpe ke iso Abasi. Mbemiso n̄kpa esie, enye ama ọdọhọ ete: “Ami n̄kakan ererimbot,” n̄ko, “Ọbọn̄ ererimbot emi ke edi, enye inyụn̄ inyeneke baba n̄kpọ kiet ke esịt Mi.” (John 16:​33; 14:​30) Owo ikekemeke ndikụt ukwan̄n̄kpọ ndomokiet ke idem esie. Enye ama ekeme ndidọhọ mme asua esie nte enende ete: “Ewe owo ke otu mbufo ekeme ndiwụt idiọk-n̄kpọ eke nnamde?” (John 8:​46) Uyarade “edisana ndịben̄kpọ uten̄e Abasi emi” enen̄ede okpon onyụn̄ enen̄ede enyene ufọn ọnọ ubonowo tutu edi se ẹnyenede nditan̄a ke ofụri ererimbot. Jesus Christ ke idemesie edi uwụtn̄kpọ uten̄e Abasi ye edu uwem oro esop Christian etienede.

Oyom Edinọ Idem Ukpep ye Edikop Uyụhọ

Christian oyom ọkpọsọn̄ ukpep man enyene ọyọhọ uten̄e Abasi. Emi esịne ediyọ ubiọn̄ọ ye ukọbọ. (2 Timothy 3:​12) Uduak owo ke ndinọ idemesie ukpep idịghe man enyene ibụk ibụk udori n̄kpọ obụkidem. Edi udori odu ọnọ owo emi oyụhọde ye se enye enyenede, emi akade iso ndidu uwem uten̄e Abasi ye edikụt ke se inyenede ekem. Enye asan̄a ye “un̄wọn̄ọ uwem emi odude ke emi,” oro edi, nsọn̄idem eke spirit, edikop uyụhọ, inemesịt, ye edinyene uduak ke uwem. Enye n̄ko asan̄a ye un̄wọn̄ọ uwem emi “edidide.”​—⁠1 Timothy 4:​7, 8; 6:​6-⁠8; men Mme N̄ke 3:​7, 8; 4:​20-⁠22 domo.

Okposụkedi owo emi enyenede uten̄e Abasi ekemede ndisobo ukọbọ ye nsọn̄ọn̄kpọ, iyomke enye okop ndịk, koro “Ọbọn̄ ọmọfiọk ndinyan̄a mmọ emi ẹten̄ede Enye nsio ke idomo.” (2 Peter 2:⁠9) Apostle Peter ọnọ mme Christian item ete ẹdian uten̄e Abasi ke ime mmọ. (2 Peter 1:​5, 6) Enye eteme mmọ ete ẹdi mbon oro ẹnyenede ‘edisana ido ye uten̄e Abasi,’ man ẹbọhọ usen ubiereikpe Jehovah.​—⁠2 Peter 3:​7, 10, 11; 1 Peter 4:⁠18.

Odudu Uten̄e Abasi

Owo emi ọdọhọde ke imenyene uten̄e Abasi ana ọfiọk odudu emi enye enyenede ndikpụhọde edu esie ndien ana enye anam akpanikọ ke ndinyene nti edu. (1 Timothy 6:​11; Ephesus 4:​20-⁠24) Ana enye ọfiọk ete ke Abasi ada Ikọ Esie owụt owo usụn̄ uten̄e Abasi, ndien ke ntre ana imọ idu uwem ekekem ye mme item esie. (Titus 1:1; 2 Peter 1:⁠3) Sia uten̄e Abasi enyenede n̄kpọ ndinam ye Abasi ke idemesie, Ikọ ye spirit Abasi ẹyenam owo ọfiọk Jehovah ọkpọkpọ, ntotụn̄ọ ntotụn̄ọ, onyụn̄ akabade ebiet enye​—⁠edi andikpebe enye. (Ephesus 5:⁠1) Utọ owo oro ọyọdọdiọn̄ owụt nti edu Jehovah Abasi.​—⁠2 Corinth 3:⁠18.

Edieke owo ekededi emi ọdọhọde ke inam n̄kpọ Abasi eberide edem ke mme ekikere idemesie utu ke ndisọn̄ọ nyịre ke Bible, edieke ukpepn̄kpọ esie n̄ko ‘mîkemke ye uten̄e Abasi,’ ke ntem andikpep oro okpude ndiwụt uten̄e Abasi, “esịt esie ọdọn̄ọ.” (1 Timothy 6:​3, 4) Apostle Paul ama odụri ekpri ekemmọ asan̄autom oro Timothy utọn̄ aban̄a mbon unana uten̄e Abasi oro ẹkedọhọde ke mmimọ imenyene uten̄e Abasi. Enye ama eteme Timothy ete etịm asiak ikọ akpanikọ, efep idem ke idiọk ye ikpîkpu ndutịn̄, mbak owo idiwọn̄ọde Timothy ikpọn̄ usụn̄ uwem uten̄e Abasi. Ekem enye ama owụt nte ke mme owo ẹyedu emi ẹdinamde kpukpru orụk idiọkido, emi ke mbubịk ẹdinyenede enyọn̄ enyọn̄ ido uten̄e Abasi edi mîsan̄ake n̄kpọ ye odudu eke odude ke uten̄e Abasi. (2 Timothy 2:​15, 16; 3:​1-⁠5) Kpasụk ntre Jude owụt ete ke utọ mbon oro idinyeneke ata ukpono inọ Abasi m̀mê ndituak ibuot nnọ enye, iwụtke ukpono m̀mê esịtekọm iban̄a mfọnido esie oro owo mîdotke. Mmọ ẹdidi mme owo emi ẹkamade uten̄e Abasi ẹyom udori n̄kpọ obụkidem m̀mê udọn̄ obụkidem. Obukpo uwem mmọ ayarade mbubịk mmọ.​—⁠Jude 4.

Nso idi “ndịbe odudu edibiat-ibet” emi Paul etịn̄de aban̄a?

Mi ke ẹkụt ndịben̄kpọ efen, emi enen̄erede odu ke ntuaha ye “edisana ndịben̄kpọ” Jehovah. Enye edi “ndịbe odudu edibiat-ibet.” Emi ekedi ndịben̄kpọ ọnọ mme ata Christian koro ke eyo apostle Paul “owo eke edide ata abiatibet” ikọwọrọke iwụt idem kan̄a in̄wan̄-in̄wan̄ ke usụn̄ oro ẹdiọn̄ọde nte otu. Idem ke “owo” oro ọwọrọde owụt idem, idiọn̄ọ esie oyosụk aka iso ndidi ndịben̄kpọ nnọ ediwak owo koro enye edinamde idiọkido esie n̄kari n̄kari ke enyịn̄ uten̄e Abasi. Ke akpanikọ, enye edidi edisọn̄ ibuot ye ata uten̄e Abasi. Paul ọkọdọhọ ete ke “ndịbe odudu edibiat-ibet” emi ama ọtọn̄ọ utom ke eyo esie, koro odudu ubiatibet ama odu ke esop Christian oro ke akpatre edisụn̄ọde ke ndisio otu mbon nsọn̄ibuot emi ndi. Ke akpatre, Jesus Christ ayada uyarade edidu esie osobo enye efep. “Owo” nsọn̄ibuot emi Satan adade anam utom mi, eyemenede idemesie enịm ke enyọn̄ “ọbiọn̄ọ kpukpru se ẹkotde Abasi ẹnyụn̄ ẹtuakde ibuot ẹnọ” (Greek, seʹba·sma). Ntem akwa andibiọn̄ọ Abasi emi nte n̄kpọutom Satan editie ata abian̄a abian̄a oyonyụn̄ ada nsobo ọsọk mbon oro ẹtienede mme edinam esie. Uforo oro “owo eke edide ata abiatibet” edinyenede edikọn̄ọ ke enye ndida abian̄a abian̄a uten̄e Abasi mfụk idiọkido esie.​—⁠2 Thessalonica 2:​3-⁠12; men Matthew 7:​15, 21-⁠23 domo.