‘Ẹmenam Ima Nnyịn Okpon’

KE Friday, March 31, 2000, Obot Usu ke Hokkaido, Japan, ama otop obomo ke ama akana sụn̄ ke isua 23. Ẹma ẹnyịk ediwak tọsịn mme andidụn̄ do ndifehe n̄kpọn̄ ikpehe oro okodude ke itiendịk do. Ediwak owo ẹma ẹtaba ebietidụn̄ ye utom mmọ, edi ke mfọniso owo mmọ ndomokiet ikakpaha. Mme Ntiense Jehovah 46 ẹma ẹsịne ke otu mbon oro ẹkefehede ẹwọn̄ọ, edi owo ikọkpọn̄ke mmọ ye unana un̄wam.

Kpa ke usen oro obot oro okotopde obomo, ye un̄wam asan̄autom Christian oro asan̄ade-san̄a oro akanamde utom ke n̄kann̄kụk oro, ẹma ẹtọn̄ọ ndinam ndutịm mban̄a edinọ un̄wam. Ikebịghike-bịghi, mme n̄kpọ un̄wam ẹma ẹto mme esop ẹdude ke n̄kann̄kụk oro ẹdisịm. Ke idak edise enyịn n̄kọk itieutom Japan, ẹma ẹsọsọp ẹtịm kọmiti unọ un̄wam, ndien ediwak etịbe un̄wam ẹma ẹto Mme Ntiense Jehovah ke ofụri Japan ẹdi. Man ẹn̄wam ke mme edinam eke spirit, ẹma ẹnọ mme asan̄autom uyọhọ ini eke Mme Ntiense Jehovah ẹka mme esop oro n̄kpọntịbe emi ekenen̄erede otụk, ndien esenyịn circuit ama aka ekese ikpehe oro ndien ndien man ọnọ un̄wam eke spirit ye eke ntụk.

Mme Ntiense oro ẹdude ke ikpehe oro n̄kpọntịbe emi okotụkde ẹma ẹka iso ndinịm mme mbono esop Christian mmọ ke ọkpọsọn̄ ini oro ke mme ufọk owo oro ẹkedude ke ebiet emi n̄kpọntịbe oro mîkesịmke. Ke ini ẹkenyịmede ẹdụk ikpehe oro Ufọkmbono Obio Ubọn̄ okodude, nditọete ẹma ẹfiak ẹka do ẹnyụn̄ ẹkụt ufọk oro ama okotụhọ ọnọ n̄kan̄ kiet, asiaha, onyụn̄ abiara. Ke ebiet emi mîyomke usụn̄ ikpọn̄ Ufọkmbono Obio Ubọn̄, aba oro asiahade obufa ke okosion̄o akwa nsụn̄ikan̄. Mme Ntiense oro ẹma ẹkere, ‘Ndi owụt eti ibuot ndika iso nnịm mme mbono esop ke ebiet emi? Nte imekeme ndidiọn̄ Ufọkmbono Obio Ubọn̄ emi?’

Ẹma ẹbiere ndibọp obufa Ufọkmbono Obio Ubọn̄ ke ebiet oro ọkọfọnde akan ke mbọhọ oro. Kọmiti Ubọpufọk eke Ikpehe ke Ikpehe ama ọnọ un̄wam oro ẹkeyomde. Okụk oro Mme Ntiense ke ofụri idụt oro ẹketịpde ke ẹkeda ẹbọp ufọk oro. Ẹma ẹsọsọp ẹdep isọn̄, ndien ebede ke un̄wam ediwak mme anamutom unyịmesịt ke mme itie ikie, ẹma ẹbọp obufa Ufọkmbono Obio Ubọn̄ oro ẹkụre ke ibio ibio ini. Ke Sunday, July 23, 2000, owo 75 ẹma ẹdụk akpa mbono esop oro ẹkenịmde ke obufa Ufọkmbono Obio Ubọn̄ emi. Mmọn̄eyet idatesịt ama asiaha ediwak mme andidụk. Ke ini ẹkeyakde Ufọkmbono Obio Ubọn̄ oro ẹnọ ke October isua oro, ama onụk kiet ke otu mbiowo esop n̄kann̄kụk oro ndidọhọ: “Obot oro ndibomo ama ada nsọn̄ọn̄kpọ ye ndutụhọ edi. Edi, ubọpn̄kpọ emi ọwọn̄ọde ndịk nnyịn esịn ke idatesịt. Ẹmenam ima oro nnyịn imade Jehovah ye ndima nditọete Christian nnyịn okpon!”

[Ebiet Ẹdade Ndise Ẹto ke page 19]

Obot Usu oro otopde obomo: AP Photo/Koji Sasahara