Ẹsobo Ofụri Ererimbot!

Se ererimbot oro odude akanade fi, ye mme obio esie, mme ido esie, mme n̄kpọ oro ẹdade ifiọk ntaifiọk ẹnam, ye ediwak biliọn owo oro ẹdụn̄de ke enye. Nte enye nditie nte n̄kpọ oro ekemede ndidu ke nsinsi isitụkke owo ke idem? Nte afo emekere ke usen kiet ererimbot emi ekeme ndibe mfep ofụri ofụri? Ekeme ndidi ọkpọsọn̄ n̄kpọ ndikere ntre. Nte ededi, ndi afo ama ọfiọk nte ata eti n̄wed kiet ọdọhọde, ete ke ererimbot ama odu mbemiso enye emi ndien ke ẹma ẹsobo enye ofụri ofụri?

NNYỊN itịn̄ke iban̄a ererimbot unana ntatenyịn. Ererimbot oro ẹkesobode ekedi ererimbot ntatenyịn, ama enyene mme obio, enyene mme edinam usọ ye ifiọk ntaifiọk. Kpa ye oro, n̄wetnnịm n̄kpọ Bible asian nnyịn ete ke mbuari, ke udiana akpa ọfiọn̄, ke ọyọhọ usen 17, ke isua 352 mbemiso ete-ekpụk oro Abraham akamanade, ukwọ oro ọkọkpọride ofụri ererimbot efep ama ọtọn̄ọ. *

 Nte n̄wetnnịm n̄kpọ oro enen? Ndi utọ n̄kpọ oro ama enen̄ede etịbe? Ndi akani ererimbot oro ekenyenede uforo ama enen̄ede odu oro ẹkesobode mbemiso enye emi? Ke edide ntre, ntak emi enye ekesịmde utịt? Nso ikakwan̄a? Ndien nte nnyịn imekeme ndikpep n̄kpọ ekededi nto nsobo esie?

Ndi Ẹma Ẹnen̄ede Ẹsobo Akani Ererimbot?

Owo ikpedehede ifre utọ enyene-ndịk nsobo oro ofụri ofụri, edieke ekpedide enye ama enen̄ede etịbe. Ntem, mme n̄kpọ ndida nti nsobo oro ẹdu ke ediwak idụt. Ke uwụtn̄kpọ, kere ban̄a nnennen usenọfiọn̄ oro ẹwetde ke N̄wed Abasi. Udiana akpa ọfiọn̄ ke n̄wed usenọfiọn̄ eset ekesitọn̄ọ ke se nnyịn idahaemi ikotde ufọt ufọt October tutu esịm ufọt ufọt November. Ntre ọyọhọ usen 17 asan̄a ekekem ye n̄kpọ nte akpa usenọfiọn̄ ke November. Do, ekeme ndidi idịghe ke mbuari ke ẹnam usọrọ mme akpan̄kpa ke ediwak idụt ke ini oro ke isua.

Mme uyarade en̄wen kaban̄a Ukwọ oro ke ẹsụk ẹdodu ke n̄ke ubonowo. Ekpere ndidi kpukpru mbon eset ẹnyene mbụk nte ke mme eteete mmimọ ẹma ẹbọhọ ukwọ ofụri ererimbot. Mme Amamaisịm Africa, mbon Celt Europe, mbon Inca Edem Usụk America—kpukpru ẹnyene ukem mbụk, ukem nte mbon Alaska, Australia, China, India, Lithuania, Mexico, Micronesia, New Zealand, ye mme ikpehe Edem Edere America, ke ndisiak ibat ibat kpọt.

Edi akpanikọ, nte ini ebede, ẹda nneminua ẹbana mme mbụk emi, edi mmọ kpukpru ẹdọn̄ọ nsio nsio ntọt ndiwụt ke ẹdi ukem mbụk: Idiọkido ubonowo ama ayat Abasi esịt. Enye ama ada akwa ukwọ edi. Ẹma ẹsobo ofụri ubonowo ẹfep. Nte ededi, ẹma ẹnịm ibat ibat ndinen owo uwem. Mmọ emi ẹma ẹkọn̄ ubom emi ẹkedade ẹnyan̄a mme owo ye mme unam. Nte ini akakade, ẹma ẹsion̄o mme inuen ẹdọn̄ ẹte ẹkeyom nsatisọn̄. Ke akpatre, ubom oro ama edidoro ke obot. Ke ẹma ẹkewọn̄ọ, mme andibọhọ ẹma ẹwa uwa.

Nso ke emi owụt? Mme mbiet n̄kpọ emi ikemeke ndidi ke mbuari. Ntan̄ndian uyarade eke mme mbụk emi ọsọn̄ọ uyarade eke eset ke Bible nte ke kpukpru orụk owo ẹtọn̄ọ ẹto mme andibọhọ ukwọ oro ẹkedade ẹsobo ererimbot ubonowo. Ntem, iyomke nnyịn iberi edem ke mme mbụk m̀mê mme n̄ke mbemiso ifiọkde se iketịbede. Nnyịn imenyene n̄wetnnịm n̄kpọ oro ẹma ẹketịm ẹnịm ke N̄wed Abasi Usem Hebrew eke Bible.—Genesis, ibuot 6-8.

Bible ọdọn̄ọ n̄wetnnịm mbụk eke odudu spirit oro akade anyan ekesịm ntọn̄ọ uwem.  Nte ededi, uyarade owụt nte ke enye akan ikpu-ikpu mbụk. Ntịn̄nnịm ikọ esie oro mîkemeke ndikpu ye ntotụn̄ọ ọniọn̄ esie ẹwụt nte ke enye edi se enye ọdọhọde nte idide—etop emi Abasi ọnọde ubonowo. Ke mîbietke n̄ke, Bible ọdọn̄ọ mme enyịn̄ ye mme usenọfiọn̄ ọkọrọ ye ọyọhọ ntọt ẹban̄ade udịm ubon ye mme ebiet ke n̄wetnnịm mbụk esie. Enye anam nnyịn ikụt nte uwem eketiede mbemiso Ukwọ onyụn̄ owụt ntak emi ofụri ererimbot ekedide edisịm utịt ke mbuari.

Nso ikakwan̄a ye n̄kaowo oro okodude mbemiso ukwọ? Ibuotikọ oro etienede ọbọrọ mbụme oro. Enye edi akpan mbụme ọnọ mbon oro ẹkemede ndiyịk m̀mê ini iso n̄kaowo ntatenyịn emi eyenyene ifụre.

[Ikọ idakisọn̄]

[Chart ke page 4]

(Ama oyom ndikụt nte enye enen̄erede etie, se n̄wed)

Mme Mbụk Ukwọ ke Ofụri Ererimbot

Idụt Mme Mbiet Mbụk 1 2 3 4 5 6 7 8 9 10

Greece 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Assyria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

South America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Idiọkido ama ayat Abasi esịt

2: Ẹda Ukwọ ẹsobo

3: Abasi ọnọ ewụhọ

4: Ẹnọ ntọt Abasi

5: Ibat ibat ke otu ubonowo ẹbọhọ

6: Ẹda ubom ẹnyan̄a

7: Ẹnyan̄a mme unam

8: Ẹsio inuen m̀mê edibotn̄kpọ eken ẹdọn̄ utom

9: Ke akpatre edi edidoro ke obot

10: Ẹwa uwa