Didie ke Afo Ekeme Ndibọhọ Utịt Ererimbot Emi?

BIBLE etịn̄ aban̄a utịt editịm n̄kpọ emi nte ‘usen ifụtesịt, usen ukụt ye nnanenyịn, usen n̄wụre ye nsobo, usen ekịm ye okoneyo, usen obubịt enyọn̄ ye ata ekịm.’ (Zephaniah 1:15) Ke akpanikọ, emi idịghe utọ usen emi afo okpodoride enyịn aban̄a! Kpa ye oro, apostle Peter ama eteme mme ekemmọ Christian ete ‘ẹtie ẹbet ẹnyụn̄ ẹsọn̄ọ ẹyom edidi Usen Abasi, kpa usen oro ẹdisịnde ikpa-enyọn̄ atara ke ikan̄, ẹdinyụn̄ ẹsịnde se ẹdade ẹbot ererimbot atara ke ọkpọsọn̄ ufiop. Edi nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.’—2 Peter 3:12, 13.

Mi Peter iketịn̄ke iban̄a edisobo ata ata ikpaenyọn̄ ye isọn̄. “Ikpa-enyọn̄” ye “isọn̄” emi Peter eketịn̄de aban̄a ke udọn̄ikọ emi ẹda ẹban̄a mbiara ukara owo emi odude ke emi ye n̄kaowo emi mîten̄eke Abasi. “Usen Jehovah” idisoboke isọn̄ ke idemesie edi “oyosobo mme idiọk owo mmọ efep ke esịt.” (Isaiah 13:9) Ke ntre, usen Jehovah edidi usen edinyan̄a ọnọ mmọ eke “ẹsemede ẹnyụn̄ ẹtuade ẹban̄a kpukpru mbubiam ido” emi ẹnamde ke idiọk n̄kaowo mfịn.—Ezekiel 9:4.

Didie, ndien, ke owo ekededi ekeme ndibọhọ “akwa usen Jehovah emi enyenede ndịk”? “Uyo Jehovah” emi ekesịmde kiet ke otu mme prọfet esie ọbọrọ mbụme oro ete: “Ndien ama ekem, kpukpru owo eke ẹsemede ẹkot enyịn̄ Jehovah ẹyebọhọ.” (Joel 1:1; 2:31, 32) Mme Ntiense Jehovah ẹyekop inemesịt ndin̄wam fi ekpep se ediseme n̄kot enyịn̄ Jehovah ọwọrọde.