“Emi Ekeme Ndibiak”

NTE akanam afo omokop ẹtịn̄de mme ikọ oro? Eyedi abiaibọk m̀mê nurse ama etịn̄ mme ikọ emi mbemiso ọsọbọde fi idem.

Eyedi afo ukesịnke ndibọ usọbọ n̄kukụre man efep ubiak oro asan̄ade ye enye. Utu ke oro, afo ama ọyọ ubiak oro man okop nsọn̄idem ke ini iso. Ke ata n̄kpọsọn̄ idaha, edinyịme m̀mê edisịn ndibọ ubiak ubiak usọbọ ekeme ndidi n̄kpọ n̄kpa ye uwem.

Okposụkedi ekemede ndidi nnyịn isikaha ibịne abiaibọk kpukpru ini, kpukpru nnyịn nte mme anana-mfọnmma owo imoyom ntụnọ, m̀mê edinen̄ede, ndusụk ini idem enye oro ekemede ndibiak. (Jeremiah 10:23) Ke ọsọn̄ọde etịn̄ nte nditọwọn̄ ẹyomde emi, Bible ọdọhọ ete: “Ndisịme ido eyịre ke esịt eyenọwọn̄: eto item eyebịn enye efep ọkpọn̄ enye anyan usụn̄.”—Mme N̄ke 22:15.

Ke idaha enye emi, eto ada aban̄a odudu ete ye eka. Edi akpanikọ nte ke ibat ibat nditọwọn̄ ẹsima ndibọ item. Edieke abuanade ndusụk orụk edimia ufen, mmọ ẹkeme ndisịn. Nte ededi, mme enyene-ọniọn̄ ye ima ima ete ye eka ẹsise ẹbe ubiak oro eyen okopde ẹkesịm ufọn oro edisụn̄ọde. Mme ete ye eka ẹdide Christian ẹfiọk ẹte ke Ikọ Abasi etịn̄ akpanikọ ke ini ọdọhọde ete: “Idahaemi kan̄a kpukpru ntụnọ itiehe inem-inem, edi ababiak; edi ke ukperedem, enye on̄wụm mfri emem ọnọ mmọ emi ẹkebede ke nsịn̄ede esie, kpa mfri edisana ido.”—Mme Hebrew 12:11; Mme N̄ke 13:24.

Nte ededi, idịghe nditọwọn̄ kpọt ẹyom item. Ikpọ owo ẹyom enye n̄ko. Bible etịn̄ ikọ ọnọ ikpọ owo ke ini ọdọhọde ete: “Sọn̄ọ mụm item kama, kûyak: nịm enye; koro enye edide uwem fo.” (Mme N̄ke 4:13) Ih, mme enyene-ibuot owo—n̄kpri ye ikpọ—ẹyedara ndibọ item oro ọkọn̄ọde ke Ikọ Abasi, kpa Bible, koro ndinam ntre eyenịm mmọ uwem ke akpatre.