Mme Mbụme Ẹtode Mme Andikot
Mme Mbụme Ẹtode Mme Andikot
Ndi enen ndidọhọ ke mbọm Jehovah akara unenikpe esie?
Okposụkedi ẹsitịn̄de ikọ emi, ọfọn nditre nditịn̄ sia etiede nte enye ọwọrọ ke mbọm isiyakke Jehovah ekpe edinen ikpe m̀mê ke esinam unenikpe esie emem, nte n̄kpọ eke mbọm okponde akan ọkpọsọn̄ edu unenikpe. Emi inenke.
Ikọ Hebrew oro ẹkabarede “unenikpe” ekeme n̄ko ndiwọrọ “ikpe.” Unenikpe enyene n̄kpet n̄kpet ebuana ye edinen ido. Nte ededi, unenikpe esiwak ndibuana ikpe esop. Edinen ido isibuanake ikpe. Edi akpanikọ nte ke unenikpe Jehovah ekeme ndibuana edinọ ufen oro odotde, edi enye n̄ko ekeme ndibuana edinyan̄a mbon oro ẹdotde. (Genesis 18:20-32; Isaiah 56:1; Malachi 4:2) Ntem, owo ikpenyeneke ndise unenikpe Jehovah nte nsọn̄ido m̀mê se iyomde ẹnam emem.
Ikọ Hebrew oro adade ọnọ “mbọm” ekeme ndiwọrọ ndikara iyatesịt ke ini ẹbierede ikpe. Enye n̄ko ekeme ndiwọrọ ata ata editua mbọm, ẹdade ubọhọ ẹsọk owo emi odude ke nnanenyịn.—Deuteronomy 10:18; Luke 10:29-37.
Jehovah edi Abasi unenikpe ye mbọm. (Exodus 34:6, 7; Deuteronomy 32:4; Psalm 145:9) Unenikpe ye mbọm esie ẹfọn ẹma ẹnyụn̄ ẹdu ke n̄kemuyo. (Psalm 116:5; Hosea 2:19) Edu mbiba ẹda ata ukem ukem m̀mê ẹnam kiet eken ọyọhọ. Ntem, edieke nnyịn idọhọde ke mbọm akara unenikpe Jehovah, nnyịn n̄ko idọhọ ke unenikpe akara mbọm esie.
Isaiah ama ebem iso etịn̄ ete: “Jehovah eyebet, man atua mbufo mbọm, oto oro n̄ko Enye ayadaha ke enyọn̄, man ọfọn ido ye mbufo: koro Jehovah edide Abasi edinen ido [“unenikpe,” The New English Bible].” (Isaiah 30:18) Mi, Isaiah owụt nte ke unenikpe Jehovah esinụk Enye nditua owo mbọm utu ke ediwụt ke mbọm anam unenikpe esie emem m̀mê ndibiọn̄ọ unenikpe esie. Jehovah esitua owo mbọm koro enye edide edinen onyụn̄ edide ima.
Edi akpanikọ, James andiwet Bible ama ewet ete: “Mbọm obụre mbụre akan ikpe.” (James 2:13b) Nte ededi, ke udọn̄ikọ emi James itịn̄ke iban̄a Jehovah edi etịn̄ aban̄a mme Christian oro—ke uwụtn̄kpọ, ẹtuade mbon ukụt ye mme ubuene mbọm. (James 1:27; 2:1-9) Ke ini ẹdade utọ mbon oro ẹsituade owo mbọm do ẹdi ikpe, Jehovah esikere aban̄a edu mmọ onyụn̄ atua mmọ mbọm ke ndifen nnọ mmọ ke isọn̄ uwa Eyen esie. Ntem, edu editua owo mbọm mmọ akan ikpe ekededi oro ẹkpebiomde mmọ.—Mme N̄ke 14:21; Matthew 5:7; 6:12; 7:2.
Ke ntre, inenke ndidọhọ ke mbọm akara ikpe Jehovah ke usụn̄ifiọk nte ke esiyom enye ada mbọm anam unenikpe esie emem. Ke enyịn Jehovah edu mbiba ẹda ukem ukem. Mmọ ẹnam kiet eken ekem kpa nte mmọ ẹnamde mme edu Jehovah eken, utọ nte ima ye ọniọn̄, ẹkem, mme edu Jehovah eken ẹnyụn̄ ẹnamde mmọ ẹkem.