Ntak Emi Ẹkesobode Akani Ererimbot?

UKWỌ ofụri ererimbot oro ikedịghe oto-obot afanikọn̄. Enye ekedi ubiereikpe Abasi. Ẹma ẹnọ ntọt, edi ẹma ẹnen̄ede ẹfụmi ntọt oro. Ntak-a? Jesus ama anam an̄wan̄a ete: “Koro nte mmọ ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ndọ ke mme usen eke ẹkebemde ukwọ iso, tutu esịm usen emi Noah odụkde ke ubom, mînyụn̄ ifiọkke tutu ukwọ edi edimen mmọ kpukpru efep.”—Matthew 24:38, 39; sịghisịghi ubọkn̄wed edi eke nnyịn.

Ntatenyịn Oro Ọkọkọride

Ke ndusụk usụn̄, ntatenyịn oro okodude mbemiso Ukwọ ama enyene mme ufọn oro nnyịn mînyeneke mfịn. Ke uwụtn̄kpọ, ofụri ubonowo ekesem usem kiet. (Genesis 11:1) Emi ekpekenyene ufọn ke utomusọ ye ifiọk ntaifiọk oro oyomde ntan̄ndian ukeme ediwak owo oro ẹnyenede nsio nsio usọ. N̄ko, anyan isua uwem oro ata ediwak owo ẹkedude ini oro ọkọwọrọ ke mmọ ẹkpekekeme ndika iso mfori se mmọ ẹkekpepde ediwak isua ikie oro mmọ ẹkedude uwem.

Ndusụk owo ẹdọhọ ke isua uwem oro ikenen̄ekede iniọn̄ ntre ini oro ye nte ke mme isua oro ẹsiakde ke mbụk Bible ẹkenen̄ede ẹdi mme ọfiọn̄. Ndi oro edi akpanikọ? Ọfọn, kere ban̄a Mahalalel. Bible ọdọhọ ete: “Mahalalel odu uwem ke isua ata ye ition, ndien obon Jared: . . . ofụri ini uwem Mahalalel edi isua ikie itiaita ye anan̄ ye efụt ndien enye akpa.” (Genesis 5:15-17) Edieke isua kiet edide ọfiọn̄ kiet, Mahalalel okobon eyen esie ke ini ekedide  isua ition kpọt ke emana! Baba, mme owo ini oro ẹma ẹnen̄ede ẹkpere ndinyene mfọnmma nsọn̄idem nte eke akpa owo oro, Adam. Mmọ ẹma ẹnen̄ede ẹdu uwem ke ediwak isua ikie. Nso ke mmọ ẹkekeme ndinam?

Ediwak isua ikie mbemiso Ukwọ, ibatowo ke isọn̄ ama ọtọt ekesịm udomo oro Cain eyen Adam ọkọbọpde obio, emi enye okokotde Enoch. (Genesis 4:17) Ke mme isua oro ẹkebemde Ukwọ iso, ẹma ẹtọn̄ọ nsio nsio usiakifia. Mme usiakifia ẹma ẹdu oro ẹkedomde ‘kpukpru n̄kpọutom okpoho ye ukwak.’ (Genesis 4:22) Nte eyịghe mîdụhe ẹma ẹsida mme n̄kpọutom emi ẹnam utom ubọpn̄kpọ, usọeto, ukịmọfọn̄, ye utọ in̄wan̄. Ẹtịn̄ ẹban̄a kpukpru mme utom emi ke mbụk mme akpasarade owo oro ẹkedụn̄de ke isọn̄.

Anaedi ifiọk oro ẹkekọde akpakanam edi mmemmem ọnọ mme emana oro ẹketienede ndikọri mme utọ n̄wọrọnda ubọkutom nte ubot ukwak, utọ in̄wan̄, ubọk erọn̄ ye enan̄, uwet n̄wed, ye mme mbuwed. Ke uwụtn̄kpọ, Jubal ekedi “ete kpukpru mmọ eke ẹbrede harp ye ndido.” (Genesis 4:21) Ntatenyịn ama enen̄ede atara. Edi, kpukpru n̄kpọ ẹma ẹdisịm utịt ke mbuari. Nso iketịbe?

Nso Ikakwan̄a?

Ye kpukpru ntatenyịn esie, n̄kaowo oro ekebemde Ukwọ iso ama enyene idiọk ntọn̄ọ. Adam, oro ọkọtọn̄ọde enye, ama ọsọn̄ ibuot ye Abasi. Cain, andikọbọp akpa obio ke mbụk, ama owot eyeneka esie. Eyịghe idụhe idiọkido akatarade asuana usọp usọp! Mme utịp idiọk n̄kpọ akpa oro Adam ọkọkpọn̄de ọnọ nditọ esie ẹma ẹkọri sụn̄sụn̄.—Rome 5:12.

Nte an̄wan̄ade, mme n̄kpọ ẹma ẹbe ubọk ke ini Jehovah ekebierede ete ke imọ idiyak idaha oro aka iso ke isua 120 efen kpọt. (Genesis 6:3) Bible ọdọhọ ete: “Idiọk-n̄kpọ owo [ama okpon] ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini. . . . Afai onyụn̄ ọyọhọ ke ererimbot.”—Genesis 6:5, 11.

Nte ini akakade, ẹma ẹsian Noah nnennen nnennen ẹte ke Abasi ọmọn̄ ada ukwọ osobo kpukpru obụkidem. (Genesis 6:13, 17) Okposụkedi Noah ekedide “ọkwọrọ edinen ido,” ana in̄wan̄-in̄wan̄ nte ke ama ọsọn̄ mme owo ndinịm ke akpanikọ nte ke kpukpru n̄kpọ oro ẹkedude ẹkan mmọ ke ẹkesan̄a ẹkpere utịt. (2 Peter 2:5) Owo itiaita kpọt ẹkenam ntọt oro ndien ẹma ẹnyan̄a mmọ. (1 Peter 3:20) Ntak emi edide akpan n̄kpọ ọnọ nnyịn mfịn?

Nso ke Ọwọrọ ọnọ Nnyịn?

Nnyịn idu uwem ke eyo ebietde eke Noah. Kpukpru ini nnyịn imesikop iban̄a mme enyene-ndịk edinam oyomonsia, ubịnikọt ediwot ofụri orụk, mme owotowo ke ikan̄ ye unana uduak, ye afai esịtufọk ke udomo oro akpade owo idem. Afai ọtọn̄ọ ntak ọyọhọ ererimbot, ndien nte ekedide ke mbemiso, ẹtọt ererimbot ẹban̄a ubiereikpe oro edide. Jesus ke idemesie ama ọdọhọ ke imọ iyedi nte Ebiereikpe oro Abasi emekde ndibahade mme owo nte emi ekpemerọn̄ abaharede erọn̄ ye ebot. Jesus ọkọdọhọ ke mbon oro ẹkụtde nte mîdotke “ẹyedaha ẹkedụk ke nsinsi ufen.” (Matthew 25:31-33, 46) Nte ededi, Bible ọdọhọ ete ke isan̄ emi ediwak miliọn mme andibọhọ ẹyedu—akwa otuowo oro ẹtuakde ibuot ẹnọ ata Abasi kierakiet. Ke ererimbot oro edide, mme owo emi ẹyedara uwem ke nsinsi emem ye ifụre oro akanam mmọ mîdarake.—Micah 4:3, 4; Ediyarade 7:9-17.

Ediwak owo ẹsasak mme utọ ikọ Bible oro ye mme ntọt ẹban̄ade ubiereikpe oro ẹdiwụtde nte ke mme utọ ikọ emi ẹdi akpanikọ. Edi apostle Peter ama anam an̄wan̄a nte ke mme utọ mbon eyịghe emi ẹfụmi akpanikọ. Enye ekewet ete: “Ke ukperedem ini mbon nsahi ẹyeda nsahi ẹdi; . . . ẹnyụn̄ ẹdọhọ ẹte, Edidi eke Enye ọkọn̄wọn̄ọde ete iyedi enye? . . . Koro ẹkoi ẹfre ẹte, tutuko ikpa-enyọn̄ ama odu, ye isọn̄ emi ikọ Abasi okosiode ke mmọn̄ owụk, onyụn̄ adade mmọn̄ obot; ndien edi mmọn̄ ke ẹkeda ẹfụk ẹnyụn̄ ẹsobo ererimbot emi okodude adan̄aoro. Edi ama edi ikpa-enyọn̄ ye isọn̄ emi ẹdude ke emi, ikọ Abasi okomụm mmọ enịm ọnọ ikan̄; ekpeme mmọ enịm ọnọ usen eke Abasi edikpede ikpe ye mmọ emi mîbakke  Enye, edinyụn̄ osobo mmọ.”—2 Peter 3:3-7.

Mfịn ke ẹnọ ntọt ke ofụri ererimbot ẹban̄a usen ubiereikpe oro edide, ke ẹnyụn̄ ẹkwọrọ etop eti mbụk ifịk ifịk ẹban̄a emem oro editienede ke ndinam ntịn̄nnịm ewụhọ Jesus. (Matthew 24:14) Owo inyeneke ndida ntọt emi mfefere mfefere. Ata Ọkpọsọn̄ Abasi esisu Ikọ esie.

Ererimbot Oro Edide

Nso idi ini iso ubonowo, ke ikerede iban̄a akpan ukpụhọde oro edide? Ke ntọn̄ọikọ esie ke ọwọrọetop Ukwọrọikọ oro ke Obot, Jesus ama ọn̄wọn̄ọ ete: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.” Ekem enye ama ekpep mme mbet esie ndibọn̄ akam nnọ Abasi nte: “Yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 5:5; 6:10) Ih, Jesus ke idemesie ama ekpep nte ke utịbe utịbe ini iso ke ana ebet mme anam-akpanikọ ubonowo mi ke isọn̄. Enye ama etịn̄ aban̄a enye nte “ini ẹdinamde n̄kpọ ẹkabade ẹdi mbufa.”—Matthew 19:28.

Ntre nte afo ekerede aban̄a ini iso, kûyak mbon nsahi ẹnam fi eyịk ntọt Abasi. Edi akpanikọ, ekeme nditie nte n̄kpọ iditịmekede n̄kann̄kụk nnyịn, ererimbot nnyịn onyụn̄ odu ebịghi. Kpa ye oro, nnyịn ikpenyeneke ndikọn̄ mbuọtidem nnyịn ke enye. Ẹbiom ererimbot ubonowo ikpe. Do, bọ ndọn̄esịt to utịtikọ leta apostle Peter emi:

“Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido ye ke uten̄e Abasi? mbufo emi ẹtiede ẹbet ẹnyụn̄ ẹsọn̄ọde ẹyom edidi Usen Abasi? . . . Sia mbufo ẹtiede ẹbet mme n̄kpọ emi, ẹnyene ifịk ndien, man Enye ekpesịm mbufo nte ẹtiede ke emem, ẹnana ntọi, ẹnyụn̄ ẹnana ndo ke enyịn Esie. . . . Ẹtie ke mfọn ye ifiọk Ọbọn̄ ye Andinyan̄a nnyịn Jesus Christ ẹkọri n̄kọri.” (2 Peter 3:11, 12, 14, 18) Ntem, kpep n̄kpọ to se iketịbede ke eyo Noah. San̄a kpere Abasi. Kọri ke ifiọk Jesus Christ. Kọri uten̄e Abasi, nyụn̄ du ke otu ediwak miliọn owo oro ẹmekde ndibọhọ utịt ererimbot emi ndụk emem emem obufa ererimbot oro edide.

[Ndise ke page 5]

Ẹma ẹfiọk utom ukwak mbemiso Ukwọ

[Ndise ke page 7]

Utịbe utịbe ini iso ke ana ebet nnyịn