Christ Ada Esop Esie Usụn̄

“Sese, Ami ndodu ye mbufo kpukpru ini, tutu esịm utịt ererimbot.”—MATTHEW 28:20.

1, 2. (a) Ke ini ọkọnọde ewụhọ edinam mme mbet, nso ke Jesus oro ẹkenamde eset ke n̄kpa ọkọn̄wọn̄ọ ọnọ mme anditiene enye? (b) Didie ke Jesus akada akpa esop Christian usụn̄ ifịk ifịk?

 MBEMISO ọkọdọkde heaven, Jesus Christ, Adausụn̄ nnyịn emi ẹkenamde eset ke n̄kpa, ama owụt mme mbet esie idem onyụn̄ ọdọhọ ete: “Ẹnọ Mi ofụri odudu ke heaven ye ke isọn̄. Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu esịm utịt ererimbot.”—Matthew 23:10; 28:18-20.

² Jesus ikọdọn̄ke mme mbet esie utom unyan̄a uwem eke edinam mme mbet efen efen kpọt edi ama ọn̄wọn̄ọ n̄ko ndidu ye mmọ. Mbụk aban̄ade ntọn̄ọ ntọn̄ọ Ido Ukpono Christ, nte ẹwetde ke n̄wed Utom Mme Apostle eke Bible, owụt ye unana eyịghe nte ke Christ ama ada odudu oro ẹkenọde enye ndida obufa esop oro usụn̄, anam n̄kpọ. Enye ama ọdọn̄ “ibetedem” emi ẹken̄wọn̄ọde—edisana spirit—ndisọn̄ọ mme anditiene enye idem nnyụn̄ n̄kpeme mme ukeme mmọ. (John 16:7; Utom 2:4, 33; 13:2-4; 16:6-10) Jesus oro ẹkenamde eset ke n̄kpa ama ada mme angel oro ẹdude ke idak esie anam n̄kpọ ke ndinọ mme mbet esie ibetedem. (Utom 5:19; 8:26; 10:3-8, 22; 12:7-11; 27:23, 24; 1 Peter 3:22) Akan oro, Adausụn̄ nnyịn ama ọnọ esop oro ndausụn̄ ebe ke ndinam ndutịm man irenowo oro ẹdotde ẹnam utom nte otu ukara.—Utom 1:20, 24-26; 6:1-6; 8:5, 14-17.

3. Mme mbụme ewe ke ẹdineme ke ibuotikọ emi?

³ Nte ededi, nso kaban̄a eyo nnyịn, kpa “utịt editịm n̄kpọ” emi? Didie ke Jesus Christ ada esop Christian usụn̄ mfịn? Ndien didie ke  nnyịn ikeme ndiwụt nte ke nnyịn imenyịme ndausụn̄ emi?

Eteufọk Enyene Asan̄autom Emi Anamde Akpanikọ

4. (a) Mmanie ẹnam “asan̄autom emi anamde akpanikọ, onyụn̄ enyenede ọniọn̄”? (b) Nso ke Ete-ufọk ọdọhọ asan̄autom emi ese aban̄a?

⁴ Ke ini eketịn̄de ntịn̄nnịm ikọ aban̄a idiọn̄ọ edidu esie, Jesus ọkọdọhọ ete: “Anie ndien edi asan̄autom emi anamde akpanikọ, onyụn̄ enyenede ọniọn̄, emi ete esie ekenịmde ete, akara mbon ufọk imọ, onyụn̄ ọnọ mmọ udia ke edikem ini? Ọfọfọn ọnọ asan̄autom oro ete-ufọk esie edidide okụt enye anamde ntre. Ke akpanikọ ke ndọhọ mbufo nte, ete-ufọk esie ayanam enye edi andikara kpukpru se enye enyenede.” (Matthew 24:45-47) “Ete-ufọk” oro edi Adausụn̄ nnyịn, Jesus Christ, ndien enye emek “asan̄autom emi anamde akpanikọ, onyụn̄ enyenede ọniọn̄”—otu Christian emi ẹyetde aran ke isọn̄—ndise mban̄a mme n̄kpọ esie ke isọn̄.

5, 6. (a) Ke n̄kukụt oro apostle John okokụtde, nso ke “udiọk-utuenikan̄ o-gold itiaba” ye “ntantaọfiọn̄ itiaba” oro ẹda ẹban̄a? (b) Nso ke “ntantaọfiọn̄ itiaba” oro ndidu ke ubọk nnasia Jesus owụt?

⁵ N̄wed Ediyarade eke Bible owụt nte ke Jesus Christ akara asan̄autom emi anamde akpanikọ, onyụn̄ enyenede ọniọn̄ nnennen nnennen. Ke n̄kukụt “usen Ọbọn̄,” apostle John ama okụt ‘udiọk-utuenikan̄ o-gold itiaba; onyụn̄ okụt ke ufọt udiọk-utuenikan̄ oro Kiet, emi ebietde eyen owo, akamade ntantaọfiọn̄ itiaba ke ubọk nnasia Esie.’ Ke anamde n̄kukụt emi an̄wan̄a John, Jesus ọkọdọhọ ete: “Ndịbe-n̄kpọ emi odude ke ntantaọfiọn̄ itiaba oro okụtde Mi ke ubọk nnasia, ye udiọk-utuenikan̄ o-gold itiaba oro. Ntantaọfiọn̄ itiaba oro ẹdi mme angel ufọk Abasi mbitiaba: udiọk-utuenikan̄ itiaba ẹnyụn̄ ẹdi ufọk Abasi mbitiaba.”—Ediyarade 1:1, 10-20.

⁶ “Udiọk-utuenikan̄ o-gold itiaba” oro ẹda ẹban̄a kpukpru ata esop Christian oro ẹdude ke “usen Ọbọn̄,” emi ọkọtọn̄ọde ke 1914. Edi nso kaban̄a “ntantaọfiọn̄ itiaba” oro? Ke akpa ifet, mmọ ẹkeda ẹban̄a kpukpru mme esenyịn oro ẹkeyetde aran ẹnyụn̄ ẹbonde ke spirit, oro ẹkesede ẹban̄a mme esop akpa isua ikie. * Mme esenyịn ẹkedu ke ubọk nnasia Jesus—ke idak ukara ye ndausụn̄ esie. Ih, Christ Jesus akada ntan̄ndian otu asan̄autom emi usụn̄. Nte ededi, idahaemi mme esenyịn oro ẹyetde aran ẹdi ekpri ke ibat. Didie ke Christ ọnọ se iwakde ibe esop 93,000 eke Mme Ntiense Jehovah ke ofụri ererimbot ndausụn̄?

7. (a) Didie ke Jesus ada Otu Ukara ọnọ ndausụn̄ ke mme esop ke ofụri isọn̄? (b) Ntak emi ẹkemede ndidọhọ ke ẹda edisana spirit ẹmek mme esenyịn Christian?

⁷ Kpa nte ekedide ke akpa isua ikie, ekpri otu irenowo emi ẹdotde emi ẹtode ke otu mme esenyịn oro ẹyetde aran mi ẹnam utom nte Otu Ukara, ẹdade ke ibuot ntan̄ndian asan̄autom emi anamde akpanikọ, onyụn̄ enyenede ọniọn̄. Adausụn̄ nnyịn ada Otu Ukara emi ndimek irenowo oro ẹdotde—edide mmọ ẹdi mbon oro ẹyetde aran ke spirit m̀mê idịghe—nte mbiowo ke mme esop n̄kann̄kụk. Ke afan̄ emi, edisana spirit emi Jehovah ọnọde Jesus odudu ndida nnam n̄kpọ, enyene ata akpan udeme. (Utom 2:32, 33) Akpa kan̄a, mme esenyịn emi ẹnyene ndisịm mme n̄kpọ emi ẹyomde nte ẹwụtde ke Ikọ Abasi, emi ẹkewetde ke odudu edisana spirit. (1 Timothy 3:1-7; Titus 1:5-9; 2 Peter 1:20, 21) Ẹnam editoro ye edimek ke ẹma ẹkebọn̄ akam ye ke idak ndausụn̄ edisana spirit. Adianade do, mme owo emi ẹmekde ẹnọ uyarade nte ke imosion̄o mbun̄wụm spirit oro. (Galatia 5:22, 23) Ntem, item Paul abuana kpukpru mbiowo ukem ukem, edide ẹdi mbon oro ẹyetde aran m̀mê idịghe: “Ẹtịm ẹse idem mbufo, ye ofụri otu erọn̄, emi Edisana Spirit ekenịmde mbufo ke mme andikpeme mmọ.” (Utom 20:28) Irenowo emi ẹmekde mi ẹbọ ndausụn̄ ẹto Otu Ukara ẹnyụn̄ ẹkpeme esop ke unyịmesịt. Ke usụn̄ emi, Christ odu ye nnyịn  idahaemi ke onyụn̄ ada esop esie usụn̄ ifịk ifịk.

8. Didie ke Christ ada mme angel anam n̄kpọ ke ndinọ mme anditiene enye ndausụn̄?

⁸ Jesus ada n̄ko mme angel ke ndinọ mme anditiene enye ndausụn̄ mfịn. Nte ekemde ye n̄ke eti ye idiọk n̄kpasịp, ini ukpen̄e edidi “akpatre ini eyo emi.” Mmanie ke Eteufọk oro edida anam utom ukpen̄e emi? Christ ọkọdọhọ ete: “Mbon-ukpen̄e ẹdi mme angel.” Enye ama adian do ete: “Eyen Owo oyosio mme angel Esie ọdọn̄, ndien mmọ ẹyetan̄ kpukpru n̄kpọ emi ẹsịnde owo ẹduọ, ye mmọ emi ẹnamde ukwan̄ido ẹfep ke Obio Ubọn̄ Esie.” (Matthew 13:37-41) Akan oro, ukem nte angel akadade Philip usụn̄ ebịne eunuch owo Ethiopia, kpa ntre ke uwak n̄kpọ ntiense ẹdu mfịn nte ke Christ ke ada mme angel esie anam n̄kpọ ke ndinọ utom mme ata Christian ndausụn̄ man mmọ ẹkụt mbon esịt akpanikọ.—Utom 8:26, 27; Ediyarade 14:6.

9. (a) Ke usụn̄ ewe ke Christ ọnọ esop Christian ndausụn̄ mfịn? (b) Nso mbụme ke nnyịn ikpenyene ndikere mban̄a edieke nnyịn iyomde ndibọ ufọn nto ndausụn̄ Christ?

⁹ Ọnọ ndọn̄esịt didie ntem ndifiọk nte ke Jesus Christ ọnọ mme mbet esie ndausụn̄ mfịn ebe ke Otu Ukara, edisana spirit, ye mme angel! Idem ọkpọkọm ẹdadian̄ade ndusụk mme andituak ibuot nnọ Jehovah ẹkpọn̄ Otu Ukara ke ibio ibio ini ke ntak ukọbọ m̀mê mme n̄kpọ ntre, Christ oyosụk ọnọ ndausụn̄ ebe ke edisana spirit ye un̄wam mme angel. Nte ededi, nnyịn ibọ ufọn ito ndausụn̄ esie n̄kukụre ke ini nnyịn inyịmede enye. Didie ke nnyịn ikeme ndiwụt nte ke imenyịme ndausụn̄ Christ?

“Ẹkop Uyo . . . Ẹsụk Ibuot”

10. Didie ke nnyịn ikeme ndikpono mbiowo oro ẹmekde ke esop?

¹⁰ Adausụn̄ nnyịn ọmọnọ mme esop “enọ ke owo” (NW)—ọnọ “ndusụk owo nte mme ọkwọrọ-gospel, onyụn̄ ọnọ ndusụk nte mme andikpeme ye mme anditeme.” (Ephesus 4:8, 11, 12) Ido ye mme edinam nnyịn ye mmọ ẹnen̄ede ẹwụt m̀mê nnyịn imenyịme ndausụn̄ Christ. Odot nnyịn ‘inyene esịt ekọm’ iban̄a iren eke spirit emi ẹdotde oro Christ ọnọde. (Colossae 3:16) Odot nnyịn ikpono mmọ n̄ko. Apostle Paul ekewet ete: “Ẹyak ẹbat ẹte, mbiowo eke ẹtịmde ẹkara ẹdot akwa utịp.” (1 Timothy 5:17) Didie ke nnyịn ikeme ndiwụt esịtekọm ye ukpono nnọ n̄kani owo—mbiowo, m̀mê mme esenyịn—ke esop? Paul ọbọrọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ.” (Mme Hebrew 13:17) Ih, nnyịn inyene ndikop uyo mmọ inyụn̄ isụk ibuot, inyịme inọ mmọ.

11. Ntak emi ediwụt ukpono nnọ mbiowo owụtde edidu uwem ekekem ye baptism nnyịn?

¹¹ Adausụn̄ nnyịn edi mfọnmma owo. Mme owo emi enye ọnọde nte enọ idịghe mme mfọnmma owo. Ntre mmọ ẹkeme ndinam ndudue ndusụk ini. Kpa ye oro, edi akpan n̄kpọ ete nnyịn ika iso inam akpanikọ inọ ndutịm Christ. Ke akpanikọ, ndidu uwem ekekem ke uyakidem nnọ ye baptism nnyịn ọwọrọ ete nnyịn inyịme ke odudu oro spirit emekde ke esop enen inyụn̄ inyịme ndisụk ibuot nnọ enye. Baptism nnyịn ‘ke enyịn̄ Edisana Spirit’ edi an̄wan̄wa uyarade nte ke nnyịn imọdiọn̄ọ edisana spirit inyụn̄ inyịme udeme oro enye enyenede ke mme uduak Jehovah. (Matthew 28:19) Utọ baptism oro abuana nnyịn  ndidiana kiet ye spirit inyụn̄ inamke n̄kpọ ndomokiet ndibiọn̄ọ edinam esie ke otu mme anditiene Christ. Sia edisana spirit enyenede akpan udeme ke editoro ye edimek mbiowo, nte nnyịn imekeme ndinen̄ede nnam akpanikọ ke uyakidem nnyịn edieke nnyịn itrede ndibere ye mbiowo ke esop?

12. Mme uwụtn̄kpọ ewe ẹban̄ade ediwụt unana ukpono nnọ odudu ke Jude asiak, ndien nso ke mmọ ẹkpep nnyịn?

¹² N̄wed Abasi esịne mme uwụtn̄kpọ oro ẹkpepde nnyịn ufọn n̄kopitem ye nsụkibuot. Ke etịn̄de aban̄a mbon oro ẹkesụn̄ide irenowo oro ẹkemekde ke esop, mbet oro Jude ama anyan ubọk owụt ntọt uwụtn̄kpọ ita, ọdọhọde ete: “Idifọnke fọn inọ mmọ! koro mmọ ẹkesan̄ade ke afan̄ Cain, ẹnyụn̄ ẹduọkde idem ke nduyo Balaam ke ntak udori, ẹnyụn̄ ẹtak ke nsọn̄-ibuot Korah.” (Jude 11) Cain ama ofụmi ima ima item Jehovah onyụn̄ okokoi aka iso ke edu usua adade esịm uwotowo. (Genesis 4:4-8) Kpa ye oro Abasi akakade iso ndinọ enye ntọt, Balaam ama odomo ndisụn̄i ikọt Abasi ke ntak okụk. (Numbers 22:5-28, 32-34; Deuteronomy 23:5) Korah ama enyene eti ifetutom ke Israel, edi oro ikekemke enye. Enye ama esịn udọn̄ ọnọ edisọn̄ ibuot ye asan̄autom Abasi oro Moses, emi ekedide ata sụn̄sụn̄ akan ke isọn̄. (Numbers 12:3; 16:1-3, 32, 33) Afanikọn̄ ama esịm Cain, Balaam, ye Korah. Mme uwụtn̄kpọ emi ẹkpep nnyịn ke in̄wan̄-in̄wan̄ usụn̄ didie ntem ndikop item mbon oro Jehovah adade anam n̄kpọ ke mme ifetutom ndinyụn̄ n̄kpono mmọ!

13. Mme edidiọn̄ ewe ke prọfet Isaiah ekebem iso ọn̄wọn̄ọ ọnọ mbon oro ẹsụkde ibuot ẹnọ mbiowo?

¹³ Anie mîdimaha ndibọ ufọn nto akwa ndutịm eke edise enyịn oro Adausụn̄ nnyịn ekenịmde ke esop Christian? Prọfet Isaiah ama ebem iso etịn̄ aban̄a mme edidiọn̄ esie, ọdọhọde ete: “Sese! Edidem kiet ayakama obio nte enende; ama edi mbọn̄, mmọ n̄ko ẹyeda ubọn̄ ke eti ido. Ndien owo kiet ayakabade ebiet ọtọ udịbe ofụm, ye etehe ubọhọ edịm; ebiet akpa  mmọn̄ ke edisat isọn̄, ebiet mfụt akwa itiat ke isọn̄ n̄kpa-mba.” (Isaiah 32:1, 2) Ebiowo kiet kiet enyene ndidi utọ “ebiet” ukpeme ye ifụre oro. Idem ọkpọkọm edisụk ibuot nnọ odudu edi ọkpọsọn̄ n̄kpọ ọnọ nnyịn, ẹyak nnyịn isịn ọkpọsọn̄ ukeme ndikop item nnyụn̄ nsụk ibuot nnọ odudu oro Abasi emekde ke esop.

Nte Mbiowo Ẹsụkde Ibuot ẹnọ Ndausụn̄ Christ

14, 15. Didie ke mbon oro ẹdade usụn̄ ke esop ẹwụt nte ke mmọ ẹsụk ibuot ẹnọ ndausụn̄ Christ?

¹⁴ Kpukpru mme Christian—akpan akpan mbiowo—ẹnyene nditiene ndausụn̄ Christ. Mme esenyịn, m̀mê mbiowo ẹnyene ndusụk udomo odudu ke esop. Edi mmọ iyomke ndidi ‘mme andikara’ ekemmọ mme andinịm ke akpanikọ ‘ke n̄kpọ mbuọtidem’ ebe ke ndidomo ndikara uwem mmọ. (2 Corinth 1:24) Mbiowo ẹkere ẹban̄a mme ikọ Jesus emi: “Mbufo ẹfiọk ẹte, mme andikara mme Gentile ẹsọn̄ ubọk ẹkara mmọ, ikpọ owo mmọ ẹnyụn̄ ẹbre odudu ye mmọ. Ididịghe ntre ke otu mbufo.” (Matthew 20:25-27) Nte mbiowo ẹbiomde mbiomo mmọ, mmọ ẹdomo ndinam n̄kpọ nnọ mbon efen ke esịt akpanikọ.

¹⁵ Ẹsịn udọn̄ ẹnọ mme Christian ẹte: “Ẹti mmọ emi ẹkedade mbuot usụn̄. . . . Ẹtịm ẹse se uwem mmọ ọwọrọde ke akpatre, ẹnyụn̄ ẹkpebe mbuọtidem mmọ.” (Mme Hebrew 13:7) Owo iyomke ẹnam emi ke ntak mbiowo ẹdide mme adausụn̄. Jesus ọkọdọhọ ete: “Kiet edi Adausụn̄ mbufo, kpa Christ.” (Matthew 23:10, NW) Mbuọtidem mbiowo ke ẹnyene ndikpebe sia mmọ ẹdide mme andikpebe ata Adausụn̄ nnyịn, Christ. (1 Corinth 11:1) Kere ban̄a ndusụk usụn̄ emi mbiowo ẹdomode ndikpebe Christ ke ebuana mmọ ye mbon efen ke esop.

16. Kpa ye odudu oro enye ekenyenede, didie ke Jesus akanam n̄kpọ ye mme anditiene enye?

¹⁶ Idem okposụkedi Jesus okokon̄de akan mme anana-mfọnmma owo ke kpukpru usụn̄, Ete esie okonyụn̄ ọnọde enye anana-mbiet odudu, enye ama osụhọde idem ke mme edinam esie ye mme anditiene enye. Enye ikadaha akan ifiọk itịn̄ ikọ ye mme andikpan̄ utọn̄ nnọ enye. Enye ama ọfiọk mme ntụk mmọ onyụn̄ atua mme anditiene enye mbọm, ekerede aban̄a mme udọn̄ eke owo mmọ. (Matthew 15:32; 26:40, 41; Mark 6:31) Akananam enye ikoyomke n̄kpọ okpon akan se mme mbet esie ẹkekemede ndinam, akananam enye ikonyụn̄ ibiomke mmọ mbiomo oro okodobide akan se mmọ ẹkekemede ndibiom. (John 16:12) Jesus ama enyene ‘ifụre-ifụre ido onyụn̄ osụhọde idem ke esịt.’ Ke ntre, idịghe n̄kpọ n̄kpaidem ediwak owo ẹkediọn̄ọde enye nte owo oro ọnọde nduọkodudu.—Matthew 11:28-30.

17. Didie ke mbiowo ẹkpenyene nsụhọdeidem ebietde eke Christ ke itie ebuana mmọ ye mbon efen ke esop?

¹⁷ Edieke Christ emi edide Adausụn̄ okowụtde nsụhọdeidem, adan̄a didie akan oro ke mbon oro ẹdade usụn̄ ke esop ẹkpewụt! Ih, mmọ ẹdu ke ukpeme mbak ẹdida odudu ekededi oro ẹnọde mmọ ẹnam n̄kpọ ke idiọk usụn̄. Ndien mmọ ‘isan̄ake ye akan ifiọk,’ ẹdomode ndinam mbon efen ẹkụt ifiọk mmimọ. (1 Corinth 2:1, 2) Utu ke oro, mmọ ẹdomo nditịn̄ mme ikọ akpanikọ N̄wed Abasi ke mmemmem usụn̄ ye ke ofụri esịt. Akan oro, mbiowo ẹdomo ndiwụt eti ibuot ke se mmọ ẹyomde ẹto mbon efen ndinyụn̄ n̄kere mban̄a mme udọn̄ mmọ. (Philippi 4:5) Ke ẹfiọkde ẹte ke kpukpru owo ẹnyene mmeme, mmọ ke ima ima usụn̄ ẹfen mme mmeme nditọete mmọ. (1 Peter 4:8) Ndien nte mbiowo oro ẹsụhọrede idem ẹnyụn̄ ẹnyenede ifụre ifụre ido inọhọ nduọkodudu? Ke akpanikọ ẹnọ.

18. Nso ke mbiowo ẹkeme ndikpep nto usụn̄ oro Jesus akanamde n̄kpọ ye nditọwọn̄?

 ¹⁸ Jesus ekedi se mme owo, idem n̄kpri owo, ẹkekemede ndisan̄a n̄kpere. Kere ban̄a nte enye akanamde n̄kpọ ke ini mme mbet esie ẹkesuade ẹnọ mme owo ke ntak ‘ẹkedade n̄kpri nditọ ẹsọk Enye.’ Jesus ọkọdọhọ ete: “Ẹyak n̄kpri nditọ ẹtiene Mi; ẹkûkpan mmọ.” Ekem “Enye emen mmọ akama, odori mmọ ubọk, onyụn̄ ọdiọn̄ mmọ.” (Mark 10:13-16) Jesus eketie ima ima onyụn̄ ọfọn ido, ndien mbon efen ẹma ẹsisan̄a ẹkpere enye. Mme owo ikesifeheke Jesus. Idem nditọwọn̄ ẹma ẹsinyene ifụre ke ini enye odude. Mbiowo n̄ko ẹdi mbon oro ẹkemede ndisan̄a n̄kpere, ndien nte mmọ ẹwụtde ufiop ufiop ima ye mfọnido, mbon efen—idem nditọwọn̄—ẹyenyene ifụre ndidu ye mmọ.

19. Nso ibuana ke ndinyene “ekikere Christ,” ndien nso ukeme ke emi oyom?

¹⁹ Udomo oro mbiowo ẹkemede ndikpebe Christ Jesus ọkọn̄ọ ke nte mmọ ẹtịmde ẹfiọk enye. Paul okobụp ete: “Koro anie owo ọmọfiọk ekikere [Jehovah, NW], nte ọkpọnọde Enye item?” Ekem enye ama adian do ete: “Edi nnyịn imenyene ekikere Christ.” (1 Corinth 2:16) Ndinyene ekikere Christ abuana ndifiọk usụn̄ ukere n̄kpọ esie ye ofụri edu esie man otodo nnyịn ifiọk se enye akpanamde ke akpan idaha ekededi. Kere nte ikpedide idifiọk Adausụn̄ nnyịn etịm ọfọn ntre! Ih, emi oyom inọ ọyọhọ ntịn̄enyịn ke mme mbụk Gospel inyụn̄ ikpep iban̄a uwem ye uwụtn̄kpọ Jesus kpukpru ini. Ke ini mbiowo ẹsịnde ukeme nditiene ndausụn̄ Christ ntre, mbon oro ẹdude ke esop ẹyenen̄ede ẹkpebe mbuọtidem mmọ. Ndien mbiowo ẹyekop uyụhọ ke ndikụt mbon efen ẹtienede nde ikpat Adausụn̄ emi ke idatesịt.

Ka Iso ke Idak Ndausụn̄ Christ

20, 21. Nte nnyịn isan̄ade ikpere obufa ererimbot oro ẹken̄wọn̄ọde, nso ikpenyene ndidi ubiere nnyịn?

²⁰ Edi akpan n̄kpọ nte kpukpru nnyịn ika iso idu ke idak ndausụn̄ Christ. Nte nnyịn isan̄ade ikpere utịt editịm n̄kpọ emi, idaha nnyịn ebiet eke nditọ Israel ke Unaisọn̄ Moab ke 1473 M.E.N. Mmọ ẹkedu ke adan̄a Isọn̄ Un̄wọn̄ọ, ndien ebede ke prọfet Moses, Abasi ọkọdọhọ ete: “Koro afo [Joshua] edisan̄ade ye mbon emi aka isọn̄ emi Jehovah ọkọn̄wọn̄ọde ọnọ mme ete mmọ ete iyọnọ mmọ.” (Deuteronomy 31:7, 8) Joshua ekedi adausụn̄ emi ẹkemekde. Man ẹdụk Isọn̄ Un̄wọn̄ọ, nditọ Israel ẹkenyene ndisụk ibuot nnọ ndausụn̄ Joshua.

²¹ Bible ọdọhọ nnyịn ete: “Kiet edi Adausụn̄ mbufo, kpa Christ.” Christ ikpọn̄ edida nnyịn usụn̄ esịm obufa ererimbot oro ẹken̄wọn̄ọde, emi edinen ido edidụn̄de. (2 Peter 3:13) Ke ntre, ẹyak nnyịn ibiere ndisụk ibuot nnọ ndausụn̄ esie ke kpukpru ikpehe uwem.

[Ikọ idakisọn̄]

Nte Afo Emeti?

• Didie ke Christ akada akpa esop usụn̄?

• Didie ke Christ ada esop esie usụn̄ mfịn?

• Ntak emi nnyịn ikposụkde ibuot inọ mbon oro ẹdade usụn̄ ke esop?

• Ke mme usụn̄ ewe ke mbiowo ẹkeme ndiwụt ke Christ edi Adausụn̄ mmimọ?

[Mme Mbụme Ukpepn̄kpọ]

[Mme ndise ke page 15]

Christ ada esop esie usụn̄ onyụn̄ akama mme esenyịn ke ubọk nnasia esie

[Ndise ke page 16]

“Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ”

[Mme ndise ke page 18]

Jesus eketie ima ima onyụn̄ edi se ẹkemede ndisan̄a n̄kpere. Mbiowo Christian ẹdomo nditie nte enye