“Ẹtiene Mi, . . . Ndien Ami Nyọnọ Mbufo Nduọk-Odudu”

Mme Mbono Esop Oro Ẹdemerede Owo ẹnọ Ima ye Nti Utom

ỌTỌN̄ỌDE ke Toronto esịm Tokyo, ọtọn̄ọde ke Moscow esịm Montevideo—ke nsio nsio ini ke urua kiet kiet, ediwak miliọn Mme Ntiense Jehovah ye mme ufan mmọ ẹsibụn̄ọ ẹka mme itie utuakibuot mmọ. Mme owo emi ẹsịne mme ibuotufọk oro ẹnamde utom ọkpọsọn̄, oro ẹkpade mba ke ẹma ẹkenam utom ofụri usen; ifịk ifịk ibanndọ ye mme eka oro ẹsan̄ade ye n̄kpri nditọ; mme okopodudu uyen oro ẹma ẹkebiat ofụri usen oro ke ufọkn̄wed; n̄kani owo oro ẹma ẹkemem ẹnyụn̄ ẹsan̄ade sụn̄sụn̄ ke ntak mbiakidem; mme ebeakpa ye nditọakpa oro ẹnyenede uko; ye mbon iduọesịt oro ẹyomde ndọn̄esịt.

Mme Ntiense Jehovah emi ẹda ediwak usụn̄ ukaisan̄—ọtọn̄ọde ke mme tren emi ẹsọpde esịm mme enan̄-mbiomo; ọtọn̄ọde ke mme mfafaha ubomisọn̄ usụn̄ idakisọn̄ esịm ubomisọn̄ mbiomo. Ndusụk owo ẹnyene ndibe inyan̄ oro ọyọhọde ye ofiom, ke adan̄aemi mbon efen ẹnyenede ndiyọ ndịk otode uwak n̄kpọisan̄ ke ikpọ obio. Ntak emi kpukpru owo emi ẹsịnde ekese ukeme ntre?

Akpan ntak edi koro edidụk ye edibuana ke mme mbono esop Christian ẹdide akpan usụn̄ kiet ndituak ibuot nnọ Jehovah Abasi. (Mme Hebrew 13:15) Apostle Paul ama etịn̄ aban̄a ntak efen ke ini enye ekewetde ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, . . . edi inọ kiet eken item [“isịn udọn̄ inọ kiet eken,” NW]; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25; sịghisịghi ubọkn̄wed edi eke nnyịn.) Paul mi akafiak etịn̄ nte eketiede David andiwet Psalm ke idem, emi ọkọkwọde ete: “Mmọ eke ẹdọhọde mi, ẹte, ‘Nnyịn iyaka ke ufọk Jehovah,’ ẹdat mi esịt.”—Psalm 122:1.

Ntak emi mme Christian ẹsikopde idatesịt ndidu ke mme mbono esop mmọ? Koro mme andidụk idịghe sụk mme andida nse. Utu ke oro, mme mbono esop ẹnọ mmọ ifet ndimehe ye kiet eken. Mme mboho emi ẹsinen̄ede ẹnam mme ifet ẹdu ndinọnọ, idịghe sụk ndibọbọ, ndinyụn̄ ndemede kiet eken ndiwụt ima nnyụn̄ mbuana ke nti utom. Emi an̄wam ndinam mme mbono esop ẹdi edinam oro ọbọpde-bọp. Akan oro, mme mbono esop Christian ẹdi kiet ke otu usụn̄ oro Jesus osude un̄wọn̄ọ esie emi: “Ẹtiene Mi, . . . ndien Ami nyọnọ mbufo nduọk-odudu.”—Matthew 11:28.

 Ebiet Ndọn̄esịt ye Edikere Mban̄a

Mme Ntiense Jehovah ẹnyene nti ntak ndise mbono esop mmọ nte se inọde nduọkodudu. Akpa kan̄a, edi ke mbono esop ke “asan̄autom emi anamde akpanikọ, onyụn̄ enyenede ọniọn̄” ọnọ udia eke spirit ke edikem ini. (Matthew 24:45) Mme mbono esop ẹnyene akpan udeme n̄ko ke ndinam mme asan̄autom Jehovah ẹdi mme andikpep Ikọ Abasi emi ẹnyenede usọ ye ifịk. Adianade do, ke Ufọkmbono Obio Ubọn̄, owo ekeme ndikụt otu ima ima ufan, oro ẹwụtde edikere mban̄a, emi ẹben̄ede idem ẹnyụn̄ ẹnyịmede ndin̄wam nnyụn̄ ndọn̄ mmọ efen esịt ke ini nnanenyịn.—2 Corinth 7:5-7.

Emi ama etịbe ọnọ Phillis, ebeakpa emi akatabade ebe esie ke ini nditọ esie ẹkedide isua ition ye itiaita ke emana. Ke etịn̄de aban̄a nduọkodudu oro enye ye n̄kpri nditọ esie ẹkebọde ẹto mme mbono esop Christian, enye ọkọdọhọ ete: “Ndika Ufọkmbono Obio Ubọn̄ ama esinọ ndọn̄esịt koro mme ekemmọ andinịm ke akpanikọ ẹma ẹsiwụt ima ye edikere mban̄a kpukpru ini ke ndifat nnyịn, ndibuana ekikere N̄wed Abasi ye nnyịn, m̀mê ndimụm nnyịn ubọk. Enye ekedi ebiet oro n̄koyomde ndidu kpukpru ini.”—1 Thessalonica 5:14.

Ke Marie ama akanam akpan usiakidem, abiaibọk esie ama ọdọhọ enye ete ke edida urua itiokiet ke nsụhọde n̄kaha mbemiso enye okopde nsọn̄idem. Ke mme ntọn̄ọ ntọn̄ọ urua oro enye okodude man okop nsọn̄idem, Marie ikekemeke ndidụk mme mbono esop. Abiaibọk esie ama okụt nte ke enye iketiehe imam imam nte eketiede ke mbemiso. Ke ini enye ekedide edifiọk ete ke enye ikodụkke mme mbono esop, enye ama esịn udọn̄ ọnọ enye ndinam ntre. Marie ama ọbọrọ ete ke ebe imọ, emi mîbuanake edinịm ke akpanikọ imọ, idinyịmeke imọ ika mbono esop ke ntak ekerede aban̄a nsọn̄idem imọ. Ke ntre, abiaibọk oro ama ewet n̄wed item “owụkde” Marie ndika Ufọkmbono Obio Ubọn̄ kaban̄a nsịnudọn̄ ye itie ebuana oro ọbọpde-bọp. Marie eberi ete: “Ke mma n̄kodụk mbono esop ini kiet, mma nnen̄ede n̄kop inem. Mma ntọn̄ọ ndidia udia, mma nde idap ofụri okoneyo, n̄kesiwakke ndida ibọk usụhọde ubiak, ndien mma mfiak ntọn̄ọ ndituak inua imam!”—Mme N̄ke 16:24.

Ima oro ẹsiwụtde ke mme mbono esop Christian nnyịn isidịbeke mbon an̄wa ke enyịn. Eyen ukpepn̄kpọ akamba ufọkn̄wed kiet ama emek ndikpep n̄kpọ mban̄a Mme Ntiense Jehovah man enye ewet utom ufọkn̄wed oro ẹkenọde enye ke ukpepn̄kpọ aban̄ade ekpụk ubonowo. Kaban̄a idaha oro okodude ke mme mbono esop, enye ekewet ke n̄wed esie ete: “Ufiop ufiop ekọm oro ẹkekọmde mi . . . [ama] enen̄ede otụk mi. . . . Ufan ufan edu Mme Ntiense Jehovah ekenen̄ede edi n̄wọrọnda ndien enye edi edu oro ami ndade nte ata akpan ikpehe ke mbono oro.”—1 Corinth 14:25.

Ke ntịme ntịme ererimbot emi, esop Christian edi ebiet nduọkodudu eke spirit. Enye edi ebiet oro emem ye ima ẹdude. Ebede ke ndidụk mme mbono esop, afo emekeme ndikụt ke idemfo nte mme ikọ andiwet Psalm emi ẹdide akpanikọ: “Idụn̄ nditọ-ete ke idem ọtọ kiet ọfọn didie! onyụn̄ eye didie!”—Psalm 133:1.

[Ekebe/Ndise ke page 25]

NDIYỤHỌ SAN̄ASAN̄A UDỌN̄

Didie ke mbon inan ẹkeme ndibọ ufọn nto mme mbono esop Christian? Ke ofụri ererimbot, Mme Ntiense Jehovah ke ẹsiak mme esop usem idiọn̄ọ. Ke isua 13 emi ẹkebede, ẹsiak mme esop usem idiọn̄ọ 27 ye mme otu usem idiọn̄ọ 43 ke United States. Mme esop usem idiọn̄ọ 140 ẹdu idahaemi ke nsụhọde n̄kaha ke idụt 40 efen. Ẹmetịm mme n̄wed Christian ẹsịn ke vidio ke usem idiọn̄ọ 13.

Esop Christian ọnọ mbon inan ifet nditoro Jehovah. Odile, akani owo Catholic ke France emi ekesikopde ọkpọsọn̄ mfịghe ke ini ke ini, okonyụn̄ ekerede ndiwot idem, enen̄ede owụt esịtekọm aban̄a ukpepn̄kpọ Bible oro enye ọbọde ke mme mbono esop Christian. Enye ọdọhọ ete: “Mmafiak n̄kop nsọn̄idem ye idatesịt ke uwem. Edi ke akande kpukpru, mmokụt akpanikọ. Uwem mi enyene uduak idahaemi.”