Nte Ndausụn̄ Christ Edi Ata Idem N̄kpọ ọnọ Fi?
Nte Ndausụn̄ Christ Edi Ata Idem N̄kpọ ọnọ Fi?
“Ẹkûnyụn̄ ẹyak ẹkot mbufo ‘mme adausụn̄,’ koro kiet edi Adausụn̄ mbufo, kpa Christ.”—MATTHEW 23:10, NW.
1. Anie kpọt edi Adausụn̄ mme ata Christian?
EKEDI Tuesday, Nisan 11. Ke usen ita oro etienede, ẹyewot Jesus Christ. Emi ekedi akpatre ini oro enye akakade temple. Ke usen emi, Jesus ama ọnọ otuowo ye mme mbet esie oro ẹkesopde idem do akpan ukpepn̄kpọ. Enye ọkọdọhọ ete: “Edi ẹkûyak ẹkot mbufo, ẹte, Rabbi; koro Kiet edi Andikpep mbufo, kpukpru mbufo ẹnyụn̄ ẹdi nditọ-ete. Ẹkûnyụn̄ ẹkot ndomo owo kiet ke isọn̄, ẹte, Ete; koro Kiet edi Ete mbufo, kpa Enye emi odude ke heaven. Ẹkûnyụn̄ ẹyak ẹkot mbufo, ẹte, [mme adausụn̄, NW]; koro Kiet edi [Adausụn̄, NW] mbufo, kpa Christ.” (Matthew 23:8-10) Nte an̄wan̄ade, Jesus Christ edi Adausụn̄ mme ata Christian.
2, 3. Didie ke ndikpan̄ utọn̄ nnọ Jehovah nnyụn̄ nnyịme Adausụn̄ oro enye emekde otụk uwem nnyịn?
2 Nso nti utịp ke ndausụn̄ Jesus enyene ke uwem nnyịn ntem ke ini inyịmede enye! Ke ebemde iso etịn̄ aban̄a edidi Adausụn̄ emi, Jehovah Abasi ama ada prọfet Isaiah ọtọt ete: “Ho, mbufo kpukpru emi itọn̄ asatde, ẹdi ke mmọn̄! ye owo eke mînyeneke okụk! mbufo ẹdi ẹdep ẹnyụn̄ ẹdia! ẹnyụn̄ ẹdi ẹdep wine ye mmọn̄eba, idịghe ke okụk, inyụn̄ idịghe ke ekọm-urua. . . . Ẹtịm ẹkop uyo mi, ẹnyụn̄ ẹdia se ifọnde, yak ukpọn̄ mbufo onyụn̄ enem esịt ke isek. . . . Sese mmenịm enye ke ntiense mme idụt, [nte adausụn̄, NW] ye etubom mme idụt.”—Isaiah 55:1-4.
3 Isaiah ama ada usụhọde mmemmem n̄kpọ nte—mmọn̄, mmọn̄eba, ye wine—nte mme ikọ n̄ke ndiwụt nte nnyịn ndikpan̄ utọn̄ nnọ Jehovah nnyụn̄ ntiene Adausụn̄ ye Etubom emi enye ọnọde nnyịn otụkde uwem nnyịn. Utịp etie inem inem. Enye etie nte edin̄wọn̄ mbịtmbịt mmọn̄ ke ufiop ufiop eyo. Esibịt nsatitọn̄ oro ikopde kaban̄a akpanikọ ye edinen ido. Kpa nte mmọn̄eba ọsọn̄ọde nseknditọ idem onyụn̄ an̄wamde mmọ ẹkọri, “mmọn̄-eba spirit” ọsọn̄ọ nnyịn idem onyụn̄ esịn udọn̄ ọnọ n̄kọri eke spirit ke itie ebuana nnyịn ye Abasi. (1 Peter 2:1-3) Ndien anie ekeme ndidọhọ ke wine isitịpke n̄kpọ isịn ke idatesịt ke mme ini usọrọ? Kpasụk ntre, ndituak ibuot nnọ Abasi akpanikọ nnyụn̄ ntiene nde ikpat Adausụn̄ emi enye emekde anam owo enyene ‘idatesịt’ ke uwem. (Deuteronomy 16:15) Do, edi akpan n̄kpọ nte kpukpru nnyịn—n̄kpri ye ikpọ, iren ye iban—iwụt ite ke ndausụn̄ Christ edi ata idem n̄kpọ ọnọ nnyịn. Nte ededi, didie ke nnyịn ikeme ndiwụt ke uwem nnyịn eke usen ke usen nte ke Messiah edi Adausụn̄ nnyịn?
Mme Uyen—Ẹka Iso ‘Ẹkọri ke Eti Ibuot’
4. (a) Nso iketịbe ke ini Jesus emi ekedide isua 12 ke emana akakade Jerusalem ke ini Passover? (b) Ifiọk Jesus okokpon adan̄a didie ke edide isua 12 kpọt ke emana?
4 Kere ban̄a uwụtn̄kpọ oro Adausụn̄ nnyịn ekenịmde ọnọ n̄kpri owo. Okposụkedi ẹfiọkde esisịt ẹban̄a ini uyen Jesus, n̄kpọntịbe kiet enen̄ede owụt idem. Ke ini Jesus ekedide isua 12 ke emana, ete ye eka esie ẹma ẹda enye ẹka Jerusalem ndikodụk Passover eke isua ke isua. Ke usọrọ emi, enye ama esịn idem ke nneme N̄wed Abasi, ndien ubon esie ẹma ẹnyọn̄ọ ẹkpọn̄ enye ye unana ndifiọk. Usen ita ke ukperedem ete ye eka esie, Joseph ye Mary emi ẹketịmerede esịt, ẹma ẹkụt enye ke temple “nte etiede ke ufọt mme andikpep, akpan̄ utọn̄ okop se mmọ ẹtịn̄de, onyụn̄ obụp mmọ mbụme.” Akan oro, “idem akpa kpukpru mmọ emi ẹkopde ikọ Esie, aban̄a ọniọn̄ ye mme ibọrọ Esie.” Kere, ke edide isua 12 kpọt ke emana, Jesus ikekemeke ndibụp mme mbụme oro anamde owo ekere n̄kpọ ye mme mbụme oro ọnọde ndausụn̄ ke n̄kan̄ eke spirit kpọt, edi ọnọ n̄ko mme ibọrọ emi ẹsịnede ifiọk! Nte eyịghe mîdụhe, ukpep otode ete ye eka ẹkesin̄wam enye.—Luke 2:41-50.
5. Didie ke n̄kparawa owo ẹkeme ndidụn̄ọde edu mmọ kaban̄a ukpepn̄kpọ Bible ubon?
5 Eyedi afo edi akparawa owo. Edieke ete ye eka fo ẹdide mme asan̄autom Abasi emi ẹyakde idem ẹnọ, anaedi mbufo ẹmenyene ndutịm ukpepn̄kpọ Bible ubon ofụri ini. Nso idi edu fo kaban̄a ukpepn̄kpọ ubon oro? Ntak mûtiehe ukere mme utọ mbụme nte: ‘Nte ami ke nnọ ndutịm ukpepn̄kpọ Bible ubon mi ibetedem ofụri esịt? Nte mmebere ye enye, ntrede ndinam n̄kpọ ekededi ndibiat ndutịm oro?’ (Philippi 3:16) ‘Nte ami ndi ifịk ifịk andibuana ke ukpepn̄kpọ emi? Ke ini odotde, nte ami mmesibụp mme mbụme mban̄a ibuotikọ ukpepn̄kpọ nnyụn̄ ntịn̄ nte ẹkpedade enye ẹsịn ke edinam? Nte nnamde n̄kọri ke n̄kan̄ eke spirit, nte ami mmọkọri udọn̄ kaban̄a “ọkpọsọn̄ udia [oro enyenede] mmọ emi ẹma ẹkekon̄ ẹwọrọ idaha”?’—Mme Hebrew 5:13, 14.
6, 7. Didie ke ndutịm edikot Bible eke usen ke usen ekeme ndinyene ufọn nnọ mme uyen?
6 Ndutịm edikot Bible eke usen ke usen enyene ufọn n̄ko. Andiwet psalm ama ọkwọ ete: “Ọfọfọn ọnọ owo eke mîsan̄ake ke item mme idiọk owo, mînyụn̄ idaha ke usụn̄ mme anam idiọk, mînyụn̄ itiehe ke itie mbon nsahi; edi mbet Jehovah adat enye esịt; enye onyụn̄ osụk ekere mbet esie ke uwemeyo ye ke okoneyo.” (Psalm 1:1, 2) Joshua, emi akadade itie Moses, ama ‘esikere n̄wed ibet ke uwemeyo ye ke okoneyo.’ Emi ama an̄wam enye etịm anam n̄kpọ onyụn̄ okụt unen ke ndinam utom emi Abasi ọnọde enye. (Joshua 1:8) Adausụn̄ nnyịn, Jesus Christ, ọkọdọhọ ete: “Ẹma ẹwet ẹte, idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” (Matthew 4:4) Edieke nnyịn iyomde udia eke obụk kpukpru usen, adan̄a didie akan oro ke nnyịn iyom udia eke spirit kpukpru ini!
7 Ke ọdiọn̄ọde aban̄a udọn̄ n̄kpọ spirit esie, Nicole emi ekedide isua 13 ke emana ama ọtọn̄ọ ndikot Bible kpukpru usen. * Idahaemi, ke edide isua 16 ke emana, enye okot ofụri Bible ini kiet ndien okot n̄kpọ nte mbahade iba ke ọyọhọ ikaba. Nte enye anamde emi edi mmemmem. Enye ọdọhọ ete: “Mmebiere ndikot ke nsụhọde n̄kaha ibuot kiet ke usen.” Didie ke edikot Bible esie eke usen ke usen an̄wam enye? Enye ọbọrọ ete: “Ndiọi odudu ẹwak mfịn. Ami mmesisobo mme mfịghe oro ẹdomode mbuọtidem mi ke usen ke usen ke ufọkn̄wed ye ke mme itie efen. Ndikot Bible kpukpru usen an̄wam mi ndisọsọp nti mme ewụhọ ye edumbet Bible oro ẹsịnde udọn̄ ẹnọ mi ndin̄wana mbiọn̄ọ mme mfịghe emi. Nte utịp, mmokụt nte n̄kperede Jehovah ye Jesus n̄kan.”
8. Nso ikedi ido Jesus kaban̄a synagogue, ndien didie ke n̄kparawa owo ẹkeme ndikpebe enye?
8 Jesus ama anam edi ido esie ndisikpan̄ utọn̄ nnọ nnyụn̄ ntiene mbuana ke edikot N̄wed Abasi ke synagogue. (Luke 4:16; Utom 15:21) Ọfọn didie ntem n̄kparawa owo nditiene uwụtn̄kpọ oro ebe ke ndidụk mme mbono esop Christian kpukpru ini, emi ẹsikotde ẹnyụn̄ ẹkpepde Bible! Ke ndiwụt esịtekọm nnọ mme utọ mbono esop emi, Richard emi edide isua 14 ke emana ọdọhọ ete: “Mme mbono esop ẹnyene ufọn ẹnọ mi. Do ke ẹsiti mi kpukpru ini ẹban̄a se idide eti ye idiọk, se idide eti ido uwem ye oburobụt ido uwem, se idide eke Christ ye se mîdịghe. Ami nnyeneke ndikpep oro ke ọkpọsọn̄ usụn̄—ebe ke ndotndot ifiọk n̄kpọntịbe.” Ih, “item Jehovah edi akpanikọ, asian mme ọkọi.” (Psalm 19:7) Nicole n̄ko anam edi ido esie ndidụk kpukpru mbono esop ition ke urua. Enye n̄ko esibiat hour iba esịm ita nditịm idem nnọ mmọ.—Ephesus 5:15, 16.
9. Didie ke n̄kpri owo ẹkeme ‘ndikọri ke eti ibuot’?
9 Ini uyen edi eti ini ndinyene ‘ifiọk ata Abasi kierakiet, ye Enye emi enye ọkọdọn̄de, kpa Jesus Christ.’ (John 17:3) Afo emekeme ndifiọk n̄kparawa owo oro ẹbiatde ekese ini ndikot mme n̄wed mbubru, ndise ekebe ndise, ndibre mme mbre vidio, m̀mê ndidụn̄ọde Intanet. Ntak emi afo ekpebede mmọ ke ini afo ekemede nditiene mfọnmma uwụtn̄kpọ Adausụn̄ nnyịn? Nte ekpri eyen, enye ama okop inemesịt ndikpep n̄kpọ mban̄a Jehovah. Ndien nso ikedi utịp? Ke ntak ima emi enye ekenyenede ọnọ mme n̄kpọ eke spirit, “Jesus [ama] ọkọri ke eti ibuot.” (Luke 2:52) Afo n̄ko emekeme ndikọri ke eti ibuot.
“Ẹsụk Idem ẹnọ Kiet Eken”
10. Nso idin̄wam uwem ubon edi ebiet emem ye inemesịt?
10 Ufọk ekeme ndidi ebiet emi ẹnyenede emem ẹnyụn̄ ẹkopde uyụhọ m̀mê ebiet emi en̄wan ye utọk ẹdude. (Mme N̄ke 21:19; 26:21) Nnyịn ndinyịme ndausụn̄ Christ anam emem ye inemesịt ẹdu ke ubon. Ke akpanikọ, uwụtn̄kpọ Jesus edi se ẹkpekpebede ke itie ebuana ubon. N̄wed Abasi ọdọhọ ete: “Ẹsụk idem ẹnọ kiet eken ke uten̄e Christ. Iban, ẹsụk idem ẹnọ mme ebe mbufo, nte ẹnam ẹnọ Ọbọn̄. Koro ebe edi ibuot ọnọ n̄wan, kpa nte Christ edide Ibuot ọnọ ufọk Abasi, ke emi Enye edide Andinyan̄a Idem. . . . Mme ebe, ẹma iban mbufo, kpa nte Christ akamade ufọk Abasi, okonyụn̄ ayakde Idem ọnọ ke ibuot esie.” (Ephesus 5:21-25) Apostle Paul ama ewet n̄wed ọnọ ẹsọk esop ke Colossae ete: “Nditọ, ẹsụk ibuot ẹnọ mme ete mbufo ye mme eka mbufo ke kpukpru n̄kpọ, koro emi enemde Ọbọn̄ esịt.”—Colossae 3:18-20.
11. Didie ke ebe ekeme ndiwụt nte ke ndausụn̄ Christ edi ata idem n̄kpọ ọnọ imọ?
11 Nditiene item emi ọwọrọ ete ebe ada usụn̄ ke ubon, n̄wan ọnọ enye ọyọhọ ibetedem, ndien nditọ ẹkop uyo mme ete ye eka mmọ. Nte ededi, itie ibuot eren esisụn̄ọ ke inemesịt n̄kukụre ke ini ẹkamade enye nte enende. Ana ebe emi enyenede eti ibuot ọfiọk nte akamade itieibuot ke ndikpebe andidi Ibuot ye Adausụn̄ nnọ enye, Christ Jesus. (1 Corinth 11:3) Idem okposụkedi Jesus ke ukperedem akakabarede edi “Ibuot kpukpru n̄kpọ, ọnọ ufọn ufọk Abasi,” enye ikedịghe isọn̄ “man ẹnam n̄kpọ ẹnọ Enye, edi man Enye anam n̄kpọ ọnọ owo.” (Ephesus 1:22; Matthew 20:28) Ke ukem usụn̄ oro, ebe emi edide Christian ikamake itieibuot esie ke ibụk, edi ese aban̄a mme udọn̄ n̄wan ye nditọ esie—ih, udọn̄ ofụri ubon. (1 Corinth 13:4, 5) Enye oyom ndikpebe mme edu Abasi eke enye emi edide ibuot ọnọ enye, Jesus Christ. Nte Jesus, enye enyene ifụre-ifụre ido onyụn̄ osụhọde idem ke esịt. (Matthew 11:28-30) Mme utọ ikọ nte “mbọk kûyat esịt” m̀mê “afo emenen” idịghe ọkpọsọn̄ ikọ inọ enye nditịn̄ ke ini enye anamde ndudue. Eti uwụtn̄kpọ esie anam edi mmemmem n̄kpọ ọnọ n̄wan esie ndidi “andinyan̄a,” ‘andinam ekem’ ye “nsan̄a” nnọ utọ eren oro, ekpepde n̄kpọ oto enye onyụn̄ anamde utom ọtọkiet ye enye.—Genesis 2:20; Malachi 2:14.
12. Nso idin̄wam n̄wanndọ odu uwem ekekem ye edumbet itieibuot?
12 Amaedi n̄wanndọ, enye enyene ndisụk idem nnọ ebe esie. Nte ededi, edieke edu ererimbot emi otụkde enye, emi ekeme nditọn̄ọ ndinam enye ese edumbet itieibuot ke usụhọde, ndien ekikere edisụk idem nnọ ebe idinemke enye. N̄wed Abasi inọhọ ekikere nte ke eren ekpenyene nditie ukara ukara, edi oyom ete iban ẹsụk idem ẹnọ mme ebe mmọ. (Ephesus 5:24) Bible n̄ko ọdọhọ ete ke ebe m̀mê ete edinam ibat, ndien ke ini ẹnamde item Bible, emi eyetịp esịn ke emem ye eti ndutịm ke ubon.—Philippi 2:5.
13. Nso uwụtn̄kpọ nsụkibuot ke Jesus ekenịm ọnọ nditọ?
13 Nditọ ẹnyene ndikop uyo nnọ mme ete ye eka mmọ. Ke afan̄ emi, Jesus ama enịm eti uwụtn̄kpọ. Ke etienede n̄kpọntịbe oro ke temple ke ini ẹkenyọn̄de ẹkpọn̄ Jesus emi ekedide isua 12 ke emana ke usen ita, “Enye asan̄a ye [ete ye eka esie] osụhọde edi ke Nazareth, onyụn̄ osụk ibuot ọnọ mmọ.” (Luke 2:51) Nditọ ndisụk idem nnọ mme ete ye eka mmọ etịp esịn ke emem ye n̄kemuyo eke ubon. Ke ini kpukpru owo ke ubon ẹsụkde ibuot ẹnọ ndausụn̄ Christ, utịp edi ubon oro okopde inemesịt.
14, 15. Nso idin̄wam nnyịn ndikụt unen ke ini isobode ọkpọsọn̄ idaha ke ubon? Nọ uwụtn̄kpọ.
14 Idem ke ini n̄kpọsọn̄ idaha ẹdemerede ke ubon, ukpọhọde edikụt unen edi ndikpebe Jesus nnyụn̄ nnyịme ndausụn̄ esie. Ke uwụtn̄kpọ, ndọ Jerry emi ekedide isua 35 ke emana ye Lana, emi ama ekenyene eyenan̄wan emi ekedide uyen, ama ada mfịna oro owo mmọ ndomokiet mîkekereke iban̄a edi. Jerry anam an̄wan̄a ete: “Ami mma ndiọn̄ọ nte ke man ndi eti ibuot ufọk, n̄kenyene ndida mme ukem edumbet Bible oro ẹnamde mme ubon eken ẹkụt unen, nsịn ke edinam. Edi ibịghike mma ndikụt nte ke nnyene ndibuan mmọ ye eti ibuot ye ọniọn̄ emi okponde akan.” Adiaha n̄wan esie akada enye nte owo emi abiatde itie ebuana imọ ye eka imọ onyụn̄ enen̄ede asua enye. Ama oyom Jerry enyene ọniọn̄ man ọfiọk ete ke edu emi ama otụk se eyen emi ekesitịn̄de onyụn̄ anamde. Didie ke enye ekese aban̄a idaha oro? Jerry ọbọrọ ete: “Ami ye Lana ima inyịme ite ke nsụhọde n̄kaha idahaemi kan̄a, Lana eyese aban̄a ikpehe edibọk nditọ oro aban̄ade edinọ ntụnọ ke adan̄aemi ami ndiwụkde ntịn̄enyịn ke edibọp eti itie ebuana ye adiaha n̄wan mi. Nte ini akakade, se nnyịn ikanamde emi ama ada eti utịp edi.”
15 Ke ini isobode n̄kpọsọn̄ idaha ke ubon, nnyịn imoyom ọniọn̄ man ifiọk ntak emi mme andibuana ke ubon ẹtịn̄de ikọ ẹnyụn̄ ẹnamde n̄kpọ ke usụn̄ oro mmọ ẹnamde. Nnyịn n̄ko imoyom ọniọn̄ man ida mme edumbet Abasi isịn ke edinam nte enende. Ke uwụtn̄kpọ, Jesus ama etịm ọfiọk ntak emi n̄wan emi ọkọdọn̄ọde uwọrọ iyịp okotụkde enye, enye ama anam n̄kpọ ye enye ke eti ibuot ye ke mbọm. (Leviticus 15:25-27; Mark 5:30-34) Eti ibuot ye ọniọn̄ ẹdi mme edu Adausụn̄ nnyịn. (Mme N̄ke 8:12) Nnyịn iyokop inemesịt edieke nnyịn inamde n̄kpọ ke usụn̄ emi enye akpanamde.
“Ẹbem Iso Ẹyom Obio Ubọn̄”
16. Nso ikpedi akpa ke uwem nnyịn, ndien didie ke Jesus ekenịm uwụtn̄kpọ ke emi?
16 Jesus ikenyeneke eyịghe iban̄a se ikpedide akpa ke uwem mbon emi ẹnyịmede ndausụn̄ esie. Enye ọkọdọhọ ete: “Ẹkam ẹbem iso ẹyom Obio Ubọn̄ Esie ye edinen ido Esie [Abasi].” (Matthew 6:33) Ndien ebede ke uwụtn̄kpọ esie, enye ama owụt nnyịn nte ikpanamde emi. Jesus ama osobo idomo ke esịmde utịt utreudia, editie n̄kere n̄kpọ, ye edibọn̄ akam ke usen 40 emi ẹketienede baptism esie. Satan kpa Devil ama ọnọ enye ukara “kpukpru mme obio ererimbot.” Kere utọ uwem oro Jesus ekpekenyenede edieke enye ekpekenyịmede ndibọ enọ Devil! Nte ededi, Christ okowụk ntịn̄enyịn ke edinam uduak Ete esie. Enye ama ọfiọk n̄ko, ete ke utọ uwem oro ke ererimbot Satan edidi ke ekpri ini. Enye ama esịn enọ Devil ke ndondo oro, ọdọhọde ete: “Ẹma ẹwet ẹte, Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄-ikpọn̄.” Ibịghike, ke oro ebede, Jesus “ọtọn̄ọ ndikwọrọ, ndinyụn̄ ndọhọ, ete, Ẹkabade esịt; koro Ubọn̄ Heaven ke ekpere.” (Matthew 4:2, 8-10, 17) Ke nsụhọ uwem esie eke isọn̄, Christ ekedi anditan̄a Obio Ubọn̄ Abasi uyọhọ ini.
17. Didie ke nnyịn ikeme ndiwụt nte ke mme ufọn n̄kpọ Obio Ubọn̄ ẹdi akpa ke uwem nnyịn?
17 Nnyịn ikpenyene ndinam ọfọn ndikpebe Adausụn̄ nnyịn inyụn̄ iyakke ererimbot Satan atap nnyịn esịn ke ndinam utom ye ubọkọkọ emi ẹkpede ediwak okụk ẹdi akpan utịtmbuba nnyịn ke uwem. (Mark 1:17-21) Ekpedi ndisịme didie ntem nnyịn ndinen̄ede n̄kọmọ ke edibịne mme n̄kpọ ererimbot tutu mme ufọn n̄kpọ Obio Ubọn̄ ẹkabade ẹdi mme udiana n̄kpọ! Jesus ayak utom edikwọrọ Obio Ubọn̄ ye edinam mbet esịn nnyịn ke ubọk. (Matthew 24:14; 28:19, 20) Ih, nnyịn imekeme ndinyene ubon m̀mê mme mbiomo eken ndise mban̄a, edi nte nnyịn isikopke inemesịt ndida mbubịteyo ye mme utịturua nse mban̄a mbiomo Christian nnyịn ke ndikwọrọ ikọ ye ndikpep owo n̄kpọ? Ndien ọnọ nsịnudọn̄ didie ntem nte ke isua utom 2001, n̄kpọ nte owo 780,000 ẹma ẹkeme ndinam utom nte mme asan̄autom uyọhọ ini, m̀mê mme asiakusụn̄!
18. Nso in̄wam nnyịn ndinyene idara ke utom ukwọrọikọ?
18 Mme mbụk Gospel ẹwụt Jesus nte ata owo uko ọkọrọ ye owo emi enyenede ntụk. Ke okụtde mme udọn̄ n̄kpọ eke spirit mbon oro ẹkedude ye enye, enye ama atua mmọ mbọm onyụn̄ ọnọ mmọ un̄wam ye ọkpọsọn̄ udọn̄. (Mark 6:31-34) Utom ukwọrọikọ nnyịn esitie idara idara ke ini nnyịn ibuanade ke enye ke ntak ima oro imade mbon efen ye udọn̄ esịt akpanikọ ndin̄wam mmọ. Edi didie ke nnyịn ikeme ndinyene utọ udọn̄ oro? Akparawa kiet oro ekerede Jayson ọdọhọ ete: “Ke ini n̄kedide uyen, n̄kenen̄ekede n̄kop inem utom ukwọrọikọ.” Nso ikan̄wam enye ndikọri ima nnọ utom emi? Jayson ọbọrọ ete: “Ke ubon nnyịn, ẹkesiyak usenubọk Saturday ẹsịn ke utom ukwọrọikọ. Emi ama ọfọn ye ami koro adan̄a nte n̄kọwọrọde an̄wautom, ntre ke n̄kokụt ufọn oro enye anamde ndien ntre ke n̄kenen̄ede n̄kop inem esie.” Nnyịn n̄ko ikpenyene ndibuana ke utom ukwọrọikọ kpukpru ini ye ifịk ifịk.
19. Nso ikpenyene ndidi ubiere nnyịn kaban̄a ndausụn̄ Christ?
19 Ke akpanikọ, ndinyịme ndausụn̄ Christ anam ikop nsọn̄idem onyụn̄ enyene ufọn. Ke ini nnyịn inamde ntre, ini uyen akabade edi ini ndikọri ke ifiọk ye ke ọniọn̄. Uwem ubon akabade edi ebiet emi emem ye inemesịt ẹtode, ndien utom ukwọrọikọ akabade edi se inọde idatesịt ye uyụhọ. Do, ke usụn̄ ekededi, ẹyak nnyịn ibiere ndiwụt ke uwem nnyịn eke usen ke usen ye ke mme ubiere oro nnyịn inamde nte ke ndausụn̄ Christ edi ata idem n̄kpọ ọnọ nnyịn. (Colossae 3:23, 24) Nte ededi, Jesus Christ ọmọnọ nnyịn ndausụn̄ ebe ke usụn̄ efen—esop Christian. Ibuotikọ oro etienede eyeneme nte nnyịn ikemede ndibọ ufọn nto ndutịm emi.
[Ikọ idakisọn̄]
^ ikp. 7 Ẹkpụhọ ndusụk enyịn̄.
Nte Afo Emeti?
• Didie ke nnyịn nditiene Adausụn̄ nnyịn emi Abasi emekde ọnọ nnyịn ufọn?
• Didie ke mme uyen ẹkeme ndiwụt nte ke mmimọ iyom nditiene ndausụn̄ Jesus?
• Nso utịp ke ndausụn̄ Christ enyene ke uwem ubon mbon oro ẹsụkde ibuot ẹnọ enye?
• Didie ke utom ukwọrọikọ nnyịn ekeme ndiwụt nte ke ndausụn̄ Christ edi ata idem n̄kpọ ọnọ nnyịn?
[Mme Mbụme Ukpepn̄kpọ]
[Mme ndise ke page 9]
Ini uyen edi eti ini ndinyene ifiọk Abasi ye eke Adausụn̄ nnyịn oro ẹmekde
[Ndise ke page 10]
Nditiene ndausụn̄ Christ anam ubon okop inemesịt
[Mme ndise ke page 12]
Jesus ama ebem iso oyom Obio Ubọn̄. Nte afo omoyom?