Ẹdu ke Ukpeme, Ẹsan̄a Ẹka Iso ye Uko!

Ntọt Aban̄ade Mme Akpan Mbono

ANIE ekeme ndifan̄a nte enende nte ke nnyịn idụhe uwem ke “ndiọk eyo”? Nte Mme Ntiense Jehovah, nnyịn ibọhọke mme mfịghe ẹtode edidu uwem ke “ukperedem ini.” (2 Timothy 3:1-5) Edi nnyịn imọfiọk ite ke mme owo ẹyom un̄wam. Mmọ ifiọkke se mme n̄kpọntịbe ererimbot ẹwọrọde. Mmọ ẹyom ndọn̄esịt ye idotenyịn. Ke akpa ifet, nso idi udeme nnyịn ke ndin̄wam mme ekemmọ owo?

Abasi ọnọ nnyịn utom edibuana eti mbụk Obio Ubọn̄ Abasi oro ẹma ẹkewụk. (Matthew 24:14) Oyom mme owo ẹfiọk ẹte ke Obio Ubọn̄ heaven emi edi n̄kukụre idotenyịn ubonowo. Nte ededi, owo isidarake etop nnyịn kpukpru ini. Ke ndusụk ebiet, ẹkpan utom nnyịn ẹnyụn̄ ẹkọbọ nditọete nnyịn. Kpa ye oro, nnyịn ikpaha mba. Ye ọyọhọ mbuọtidem ke Jehovah, nnyịn imebiere ndidu ke ukpeme ndinyụn̄ nsan̄a n̄ka iso ye uko, itan̄ade eti mbụk ye unana edikpa mba.—Utom 5:42.

Ẹma ẹkụt uyarade ọkpọsọn̄ ubiere oro ke mme akpan mbono oro ẹkenịmde ke October 2001. Ke Saturday, October 6, ẹma ẹnịm mbono ofụri isua eke Watch Tower Bible and Tract Society of Pennsylvania, ke Ufọk Mbono Mme Ntiense Jehovah ke Jersey City, New Jersey, United States. * Ke usen oro eketienede, ẹma ẹnịm mme mbono efen efen ke itie inan̄, ita ke United States ye kiet ke Canada. *

Ke ntọn̄ọikọ esie ke mbono ofụri isua oro, etieibuot okpokoro, Samuel F. Herd, owo Otu Ukara eke Mme Ntiense Jehovah, ama etịn̄ aban̄a Psalm 92:1, 4 ndien ekem ọdọhọ ete: “Nnyịn iyom ndiwụt esịtekọm.” Ke akpanikọ, ẹma ẹnọ mme ntak ndiwụt esịtekọm ke ntọt ition oro ẹtode ofụri ererimbot.

Mme Ntọt Ẹtode Kpukpru Ebiet

Brọda Alfred Kwakye ama ọtọt n̄kọri utom ukwọrọikọ ke Ghana, oro ẹkediọn̄ọde ke mbemiso nte Gold Coast. Ẹma ẹkpan utom nnyịn ke idụt oro ke ediwak isua. Mme owo ẹma ẹsibụp ẹte: “Ntak ukpan emi-e? Nso ke mbufo ẹkenam?” Emi ama ẹsiberede ifet edinọ ikọ  ntiense, ntem ke Brọda Kwakye ọkọdọhọ. Ke 1991 ke ini ẹkedororede ukpan, Mme Ntiense Jehovah 34,421 ẹkedu ke Ghana. Ke August 2001, ofụri ibat ekedi 68,152—n̄kọri edide mbahade 98 eke ikie. Ke ẹnam ndutịm ndibọp Ufọk Mbono oro odụkde owo 10,000. Nte an̄wan̄ade, nditọete nnyịn eke spirit ke Ghana ke ẹda ifụre ido ukpono mmọ ẹnam n̄kpọ nte ẹkekeme.

Kpa ye ndutịme ukaraidem, nditọete nnyịn ke Ireland ke ẹbuana ifịk ifịk ke utom ukwọrọikọ, ndien ẹkpono mmọ kaban̄a edida san̄asan̄a mmọ. Esop 115 oro ẹbaharede ẹdọn̄ ke circuit 6 ẹdu ke Ireland, ntem ke Peter Andrews, anam ndutịm Kọmiti N̄kọk Itieutom, ọkọdọhọ. Brọda Andrews ama obụk ifiọkutom aban̄ade Liam, eyeneren isua duop oro esikwọrọde ikọ ye unana ndịk ke ufọkn̄wed. Liam ama enịm N̄wed Mi eke Mme Mbụk Bible, oro Mme Ntiense Jehovah ẹsiode, ọnọ mme nsan̄a ubet ukpepn̄kpọ esie 25 ọkọrọ ye andikpep esie. Liam ama oyom ndina baptism, edi owo ama obụp m̀mê enye ikprike ikaha. Liam ama ọbọrọ ete: “Idịghe isua emana mi ke ẹkpeda ẹbiere edi ẹkpeda ima oro nnyenede nnọ Jehovah ẹbiere. Baptism mi oyowụt udomo ima oro mmade enye.” Utịtmbuba Liam edi ndidi isụn̄utom.

Ke 1968 mme asuanetop eti mbụk 5,400 ẹkedu ke Venezuela. Edi idahaemi ẹwak ẹbe 88,000, ntem ke Stefan Johansson, anam ndutịm Kọmiti N̄kọk Itieutom, ọkọdọhọ. Ndien idotenyịn odu kaban̄a n̄kọri efen efen koro se iwakde ibe owo 296,000 ẹkedụk Editi ke 2001. Ke December 1999, edịm ukwọ ama anam mbat ọtọ ewet osụhọde ediwot n̄kpọ nte owo 50,000, esịnede ediwak Ntiense. Mbat ama ọyọhọ Ufọkmbono Obio Ubọn̄ kiet tutu akayak ubak mita kiet ndisịm dek ufọk oro. Ke ini owo ọkọnọde ekikere ete ẹwọrọ ẹkpọn̄ ufọk oro, nditọete ẹma ẹbọrọ ẹte: “Baba! Ufọkmbono Obio Ubọn̄ nnyịn edi emi, ndien nnyịn iyomke ndiwọrọ n̄kpọn̄ enye idahaemi.” Mmọ ẹma ẹtọn̄ọ utom, ẹsion̄ode ata ediwak mbat, itiat, ye mme mbio eken. Ẹma ẹfiak ẹdiọn̄ ufọk oro, ndien nditọete ẹdọhọ ke enye eye idahaemi akan nte ekedide mbemiso ukwọ oro eketịbede!

Ẹsem usem 87 ke Philippines, ntem ke Brọda Denton Hopkinson, anam ndutịm Kọmiti N̄kọk Itieutom, ọkọdọhọ. Ke isua utom oro ekebede, ẹma ẹsio ofụri New World Translation of the Holy Scriptures ke akpan usem ita oro ẹsemde ke idụt oro—Cebuano, Iloko, ye Tagalog. Brọda Hopkinson ama obụk ifiọkutom aban̄ade eyeneren oro edide isua usụkkiet ke emana oro okokotde n̄wed oro Eti Mbụk Ndinam  Fi Okop Inemesịt, emi Mme Ntiense Jehovah ẹsiode. Enye ama ọbọ mme n̄wed en̄wen oto n̄kọk itieutom, onyụn̄ okot mmọ emi n̄ko, edi ubon esie ẹma ẹbiọn̄ọ enye. Ediwak isua ke ukperedem ke ini enye okodude ke ufọkn̄wed ukpep ibọkusọbọ, enye ama enyene nneme ye n̄kọk itieutom onyụn̄ eben̄e ukpepn̄kpọ Bible. Enye ama ana baptism ke 1996 ndien ikebịghike ama odụk utom ukwọrọikọ uyọhọ ini. Idahaemi enye anam utom ye n̄wan esie ke ọfis n̄kọk itieutom.

‘Utom Puerto Rico edi “ndinọ Mme Ntiense ẹka idụt efen,”’ ntem ke Ronald Parkin, anam ndutịm Kọmiti N̄kọk Itieutom, ọkọdọhọ. N̄kpọ nte mme asuanetop 25,000 ẹdu ke isuo oro, ndien ibat oro osụk edi ukem ke ediwak isua. Ntak-a? Ọfọn, ẹdọhọ ke Puerto Rico ‘esinọ’ n̄kpọ nte mme asuanetop 1,000 ẹka United States kpukpru isua, ediwak mmọ ẹwọrọ ẹka do ke ntak ndutịm uforo. Brọda Parkin ama etịn̄ aban̄a n̄wọrọnda ubiere esopikpe oro akabuanade Luis, Ntiense edide isua 17 ke emana, oro ọkọdọn̄ọde kansa afia nsen iyịp. Sia Luis mîkenyịmeke ndibọ iyịp, ẹma ẹkot enye ikpe ke esop. Ebiereikpe okoyom nditịn̄ ikọ ye enye nnennen nnennen, ntre enye ama ekese Luis ke ufọkibọk. Luis ama obụp enye ete: “Ntak emi edide edieke nnamde akwa idiọkn̄kpọ, mbufo ẹbiere ikpe ẹnọ mi nte akwa owo, edi ke ini nyomde ndikop uyo Abasi, mbufo ẹda mi nte eyenọwọn̄?” Ebiereikpe oro ama enịm ke akpanikọ ete ke enye ekedi uyen oro enyenede unen nte ikpọ owo onyụn̄ ekemede ndibiere n̄kpọ nnọ idemesie.

Ke etienede mme ntọt ẹtode esenidụt, Harold Corkern eke Kọmiti N̄kọk Itieutom United States, ama anam ndụn̄ọde ye mme asan̄autom Jehovah inan̄ oro ẹma ẹkenam utom ke anyan ini. Arthur Bonno esịn isua 51 ke utom uyọhọ ini ndien idahaemi anam utom ke Kọmiti N̄kọk Itieutom Ecuador. Angelo Catanzaro esịn isua 59 ke utom uyọhọ ini, ata ediwak ke otu isua oro nte esenyịn oro asan̄ade-san̄a. Richard Abrahamson okokụre ukpep ke Ufọkn̄wed Gilead ke 1953, ndien enye ama enyene ifet ndise mban̄a utom ke Denmark ke isua 26 mbemiso akafiakde ọnyọn̄ Bethel Brooklyn. Ke akpatre, kpukpru owo ẹma ẹkop idatesịt ndikop nto Carey W. Barber oro edide isua 96 ke emana. Sia akanade baptism ke 1921, Brọda Barber esịn isua 78 ke utom uyọhọ ini onyụn̄ edi owo Otu Ukara toto ke 1978.

Mme Aduai-Owo-Idem Utịn̄ikọ

Mbono ofụri isua oro ama esịne udịm udịm utịn̄ikọ oro ẹnamde owo ekere n̄kpọ. Brọda Robert W. Wallen ama etịn̄ ikọ ke ibuotikọ oro “Ikọt Enyịn̄ Esie.” Nnyịn idi ikọt enyịn̄ Abasi, ndien ẹkeme ndikụt nnyịn ke se iwakde ibe idụt 230. Jehovah ọmọnọ nnyịn “ini iso ye idotenyịn.” (Jeremiah 29:11, NW) Ana nnyịn ika iso nditan̄a Obio Ubọn̄ Abasi, ibuanade utịbe utịbe etop ndọn̄esịt ye nsụkesịt oro ye mme owo. (Isaiah 61:1) Brọda Wallen ama eberi ete: “Nnyịn ikpakam ika iso ke usen ke usen ndidu uwem ekekem ye enyịn̄ oro ẹkotde nnyịn, Mme Ntiense Jehovah.”—Isaiah 43:10.

Akpatre ikpehe ke ndutịm oro ekedi nneme emi mbon Otu Ukara ita ẹkenemede. Ibuotikọ ekedi “Idahaemi Edi Ini Ndidu ke Ukpeme, Ndisọn̄ọ Nda, Ndinyụn̄ N̄kop Odudu.”—1 Corinth 16:13.

Akpa, Brọda Stephen Lett ama etịn̄ ikọ ke ibuotikọ oro “Ẹdu ke Ukpeme ke Akpatre Ini Emi.” Brọda Lett ama anam an̄wan̄a ete ke idap edi enọ. Enye esinam nnyịn ifiak ikop nsọn̄idem. Nte ededi, idap eke spirit ifọnke. (1 Thessalonica 5:6) Didie, ndien, ke nnyịn ikeme ndika iso ndu ke edidemede ke n̄kan̄ eke spirit? Brọda Lett ama etịn̄ aban̄a “n̄kpasịp ibọk” eke spirit ita: (1) Ẹyọhọ kpukpru ini ke utom Ọbọn̄. (1 Corinth 15:58) (2) Ẹdiọn̄ọ udọn̄ n̄kpọ eke spirit mbufo. (Matthew 5:3, NW) (3) Ẹsọp ndinyịme item Bible man ẹnam n̄kpọ ye eti ibuot.—Mme N̄ke 13:20.

Brọda Theodore Jaracz ama ọnọ aduai-owo-idem utịn̄ikọ oro ibuotikọ ekedide “Ẹsọn̄ọ Ẹda ke Idak Idomo.” Ke etịn̄de aban̄a Ediyarade 3:10, Brọda Jaracz ama obụp ete: “Nso idi ‘ini idomo’?” Idomo oro edi ke “usen Ọbọn̄,” emi nnyịn idude uwem idahaemi. (Ediyarade 1:10) Idomo oro aban̄a akpan eneni oro—nte nnyịn  ida inọ Obio Ubọn̄ Abasi oro ẹma ẹkewụk m̀mê ida inọ idiọk editịm n̄kpọ Satan? Tutu ini idomo oro esịm utịt, nnyịn iyosobo idomo m̀mê nsọn̄ọn̄kpọ. Nte nnyịn iyaka iso ndinam akpanikọ nnọ Jehovah ye esop esie? Brọda Jaracz ama ọdọhọ ete: ‘Nnyịn idiwụt utọ edinam akpanikọ oro nte owo kiet kiet.’

Ke akpatre, Brọda John E. Barr ama etịn̄ ikọ ke ibuotikọ oro “Kop Odudu nte Owo eke Spirit.” Ke etịn̄de aban̄a Luke 13:23-25, enye ama ọdọhọ ete ke ana nnyịn in̄wana “ndibe ke mfafaha inua-otop ndụk.” Ediwak owo ẹkpu ndibe ndụk koro mmọ mînen̄ekede isịn ifịk man ẹkop odudu. Man idi mme Christian oro ẹkọride ẹsịm ọyọhọ idaha, ana nnyịn ikpep ndida mme edumbet Bible nsịn ke edinam ke kpukpru ikpehe uwem. Brọda Barr ama eteme ete: “Ami mmenịm ke akpanikọ nte ke mbufo ẹyenyịme ẹte ke idahaemi edi ini (1) ndinịm Jehovah ke akpa ye ebeiso; (2) ndikop odudu; ye (3) ndisịn̄ede idem nnyịn ke ndinam uduak Jehovah. Ke usụn̄ emi nnyịn iyekeme ndibe ke mfafaha inuaotop oro adade esịm utịbe utịbe uwem oro mînyeneke utịt.”

Nte mbono ofụri isua oro akasan̄ade ekpere utịt, mbụme kiet ama odu oro owo mîkọbọrọke: Nso idi ibuotikọ isua 2002? Ẹma ẹbọrọ mbụme oro ke usen oro eketienede.

Mbono Efen

Ẹma ẹnen̄ede ẹkop nduaidem ke usenubọk Sunday nte ndutịm mbono efen ọkọtọn̄ọde. Enye ọkọtọn̄ọ ye ibio ibio edineme ibuotikọ ukpepn̄kpọ Enyọn̄-Ukpeme urua oro, ndien nneme ke ndusụk mbio mbio akpan n̄kpọ udọn̄ eke mbono ofụri isua ama etiene. Ekem, kpukpru owo ẹma ẹdat esịt ndikop utịn̄ikọ ke ibuotikọ isua 2002: “Ẹtiene Mi, . . . ndien Ami nyọnọ mbufo nduọk-odudu.” (Matthew 11:28) Utịn̄ikọ oro ọkọkọn̄ọ ke mme ibuotikọ ukpepn̄kpọ oro ẹkesiode ke ukperedem ke nsiondi Enyọn̄-Ukpeme, December 15, 2001.

Ke oro ebede, ndusụk mbon oro ẹkedụkde san̄asan̄a Mbono “Mme Andikpep Ikọ Abasi” ke France ye Italy ke August 2001 ẹma ẹbuana ifiọkutom mmọ. * Ke akpatre, nte akpan n̄kpọ udọn̄ ke ndutịm usen oro, mme etịn̄ikọ ẹtọde Bethel Brooklyn ẹdi ẹma ẹnọ akpatre utịn̄ikọ iba.

Akpa ibuotikọ ekedi “Ndinen̄ede Mberi Edem ke Jehovah ke Ndiọkeyo Emi.” Etịn̄ikọ ama anam mme akpan n̄kpọ ẹtienede mi ẹn̄wan̄a: (1) Ndinen̄ede mberi edem ke Jehovah edi akpan n̄kpọ ọnọ ikọt Abasi kpukpru ini. Bible ọdọn̄ọ ediwak uwụtn̄kpọ mbon oro ẹkenyenede uko ye mbuọtidem kpa ye ubiọn̄ọ. (Mme Hebrew 11:1-12:3) (2) Jehovah ọnọ nnyịn eti ntak ndiberi edem ke enye ọyọhọ ọyọhọ. Mme utom ye Ikọ esie ẹsọn̄ọ nte ke enye ekere aban̄a mme asan̄autom esie ye nte ke enye idifreke mmọ tutu amama. (Mme Hebrew 6:10) (3) Ẹyom uko ye ibetedem akpan akpan mfịn. “Ẹsua” nnyịn kpa nte Jesus ekebemde iso etịn̄. (Matthew 24:9) Man ikeme ndiyọ, oyom nnyịn iberi edem ke Ikọ Abasi, inyenede mbuọtidem nte ke spirit esie odu ye nnyịn, inyụn̄ inyene uko ndika iso ntan̄a eti mbụk. (4) Mme uwụtn̄kpọ ẹsọn̄ọ nte ke nnyịn ke isobo ubiọn̄ọ ata idahaemi. Ama enen̄ede otụk kpukpru owo ke idem ke ini etịn̄ikọ okobụkde se nditọete nnyịn ẹsobode ke Armenia, France, Georgia, Kazakhstan, Russia, ye Turkmenistan. Ke akpanikọ, idahaemi edi ini ndinyene uko ye ibetedem ke Jehovah!

Akpatre etịn̄ikọ ama atat ibuotikọ oro “Ndisan̄a N̄ka Iso ye Esop Jehovah ke Edidianakiet.” Utịn̄ikọ oro ama otụk ediwak ekemini akpan n̄kpọ. (1) Ẹnen̄ede ẹkụt nte ikọt Jehovah ẹsan̄ade ẹka iso. Utom ukwọrọikọ ye mme mbono nnyịn ẹnam mme owo ẹdiọn̄ọ nnyịn.  (2) Jehovah omowụk esop oro adianade kiet. Ke 29 E.N., ẹma ẹda edisana spirit ẹyet Jesus aran man enye akpatan̄ “kpukpru n̄kpọ”—mbon oro ẹnyenede idotenyịn eke heaven ọkọrọ ye mbon oro ẹnyenede idotenyịn eke isọn̄—ọdọn̄ ke ubon Abasi oro adianade kiet. (Ephesus 1:8-10) (3) Ikpọ mbono ẹdi n̄wọrọnda uyarade edidianakiet ofụri ererimbot. Emi ama enen̄ede ana in̄wan̄-in̄wan̄ ke mme san̄asan̄a mbono oro ẹkenịmde ke France ye Italy ke August isua oko. (4) Ẹma ẹnyịme aduai-owo-idem ubiere ke France ye Italy. Etịn̄ikọ ama abuana ibat ibat ntọt ẹtode aduai-owo-idem ubiere oro. Ọyọhọ uwetn̄kpọ ubiere oro odu ke idak emi.

Ke akpatre utịn̄ikọ okụrede, etịn̄ikọ ama okot ntọt oro okotụkde owo ke idem emi Otu Ukara ekewetde. Enye ọkọdọhọ ke ubak ubak ete: “Idahaemi edi ini ndidu ke edidemede nnyụn̄ ndu ke ukpeme, itịmde ifiọk nte mme n̄kpọntịbe ererimbot ẹkade iso. . . . Nnyịn iyom ndinam mbufo ẹfiọk ima ima edikere oro Otu Ukara ekerede aban̄a mbufo ye kpukpru ikọt Abasi eken. Enye akpakam ọdiọn̄ mbufo uwak uwak ke ndinam uduak esie ke ofụri ukpọn̄.” Ikọt Jehovah ke kpukpru itie ẹbiere ndidu ke edidemede ke ndiọkeyo emi ndinyụn̄ nsan̄a uko uko n̄ka iso ye esop Jehovah oro adianade kiet.

[Mme Ikọ idakisọn̄]

[Ekebe/Mme ndise ke page 29-31]

Ubiere

Ke August 2001, ẹma ẹnịm san̄asan̄a Mbono “Mme Andikpep Ikọ Abasi” ke France ye Italy. Ẹma ẹkot aduai-owo-idem ubiere ke mme mbono oro. Se itienede mi ẹdi mme uwetn̄kpọ ubiere oro.

“NTE MME NTIENSE JEHOVAH, ẹmekpep kpukpru nnyịn oro isopde idem ke Mbono ‘Mme Andikpep Ikọ Abasi’ emi ukpepn̄kpọ oro enen̄erede enyene ufọn. Ẹwụt ebiet emi ukpepn̄kpọ emi otode in̄wan̄-in̄wan̄. Ukpepn̄kpọ emi itoho owo. Oto Enye emi prọfet Isaiah eke eset eketịn̄de aban̄a nte ‘Akwa Anditeme’ nnyịn. (Isaiah 30:20, NW) Tịm fiọk se Jehovah etide nnyịn nte ẹwetde ke Isaiah 48:17: ‘Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.’ Didie ke enye anam emi? Enye anam emi akpan akpan ebe ke n̄wed oro ẹkabarede ẹnyụn̄ ẹsuande ntatara ntatara ẹkan ke ererimbot, kpa Bible, emi asiande nnyịn in̄wan̄-in̄wan̄ ete: ‘Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ.’—2 Timothy 3:16.

“Mfịn, ubonowo enen̄ede oyom utọ enyene-ufọn ukpepn̄kpọ oro. Ntak emi ikemede ndidọhọ ntre? Ke ẹkerede ẹban̄a nte idaha ererimbot emi okpụhọrede onyụn̄ etịmerede, nso ke mme ekere n̄kpọ owo ẹnyịme? Mmọ ẹnyịme emi: Okposụkedi ediwak miliọn owo ẹbọde ukpep ẹto ndutịm ubọ ukpep ererimbot, mmọ ẹnen̄ede ẹnana nti ido uwem ẹnyụn̄ ẹkpu ndifiọk se idide eti ye idiọk. (Isaiah 5:20, 21) Mme owo ẹnen̄ede ẹnana ifiọk Bible. Ke adan̄aemi ifiọk ubotn̄kpọ anamde ẹnyene ntọt barasuene ebe ke kọmputa, m̀mọ̀n̄ ke ẹkeme ndinyene ibọrọ nnọ mme utọ akpan mbụme nte, Nso idi uduak uwem? Nnyịn ikpada mme n̄kpọntịbe eyo nnyịn didie? Nte eti idotenyịn odu kaban̄a ini iso? Nte emem ye ifụre ẹyedi ata idem n̄kpọ tutu amama? N̄ko-n̄ko, ediwak miliọn n̄wed ẹdu ke mme itie ubon n̄wed oro ẹkperede nditụk kpukpru ikpehe ke uwem owo. Kpa ye oro, ubonowo ke anam ukem ndudue eke eset. Ubiatibet ke ọdọk. Mme udọn̄ọ oro ẹkekerede ini kiet ko ẹte ke ẹma ẹsọhi ẹfep ẹfiak ẹdi, ke adan̄aemi mbon eken, utọ nte AIDS, ẹtarade ẹsuana  ke udomo oro enyenede ndịk. Uwem ubon ke owụre ke udomo oro akpade owo idem. Usabaden̄kpọ ke abiat n̄kann̄kụk. Edinam oyomonsia ye mme n̄kpọekọn̄ ọkwọkudịm nsobo iyakke ẹnyene emem. Mme mfịna oro mînyeneke usọbọ ẹka iso ndidọk. Nso idi nnennen utom nnyịn ke ndin̄wam mme ekemmọ owo ke ndiọkeyo emi? Nte odu ukpepn̄kpọ oro anamde se idide ntak nnanenyịn ubonowo an̄wan̄a oro mîwụtke usụn̄ edinyene eti uwem idahaemi kpọt edi n̄ko ọnọde nyayama idotenyịn ini iso oro mîkpụhu?

“Utom N̄wed Abasi nnyịn edi, ‘ẹka ẹkenam kpukpru mme idụt ẹdi mbet, ẹkpep mmọ ẹnam kpukpru n̄kpọ emi Christ eketemede.’ (Matthew 28:19, 20) Jesus Christ ọkọnọ utom emi ke enye ama akakpa onyụn̄ eset ke n̄kpa, ke ini enye ama ọkọbọ ofụri odudu ke heaven ye ke isọn̄. Enye okpon akan kpukpru utom oro ubonowo esịnde udọn̄ ọnọ. Ke ekikere Abasi, utom nnyịn, emi owụhọde ke mme udọn̄ n̄kpọ eke spirit mbon oro ẹkopde biọn̄ edinen ido, edi ebeiso. Nnyịn imenyene nti ntak N̄wed Abasi ndida utom oro ke akpan n̄kpọ.

“Emi oyom ete inịm utọ utom oro akpa ke uwem nnyịn. Ye edidiọn̄ ye un̄wam Abasi, ẹyenam utom oro ẹkụre, kpa ye ediwak n̄kpọ oro ẹwọn̄ọrede ntịn̄enyịn, mme n̄kpọ ubiọn̄ọ, ye mme ubiọn̄ọ ẹtode ido ukpono ye ukara, oro ẹtịmde man ẹkpan ndutịm unọ ukpep ofụri ererimbot emi ndika iso. Nnyịn imenịm ke akpanikọ inyụn̄ inyene mbuọtidem nte ke utom emi ayaka iso ndinyene uforo tutu esịm ata utịt esie. Ntak emi nnyịn ikemede nditịm nnịm oro? Koro Ọbọn̄ Jesus Christ ama ọn̄wọn̄ọ ete ke imọ iyodu ye nnyịn ke utom emi Abasi ọnọde nnyịn mi tutu esịm utịt editịm n̄kpọ emi.

“Utịt nnanenyịn ubonowo emekpere. Nnyịn inyene ndikụre utom oro ẹnọde nnyịn ndinam idahaemi mbemiso utịt edide. Ke ntre, nnyịn, nte Mme Ntiense Jehovah, imebiere ite:

“Akpa: Nte mme asan̄autom oro ẹma ẹkeyak idem ẹnọ, nnyịn imebiere ndinịm mme ufọn n̄kpọ Obio Ubọn̄ akpa ke uwem nnyịn nnyụn̄ n̄ka iso ndikọri ke n̄kan̄ eke spirit. Ke ntak oro, akam nnyịn odu ke n̄kemuyo ye mme ikọ Psalm 143:10: ‘Teme mi ndinam se afo amade: koro afo edide Abasi mi.’ Emi oyom nnyịn idi ifịk ifịk nditọ ukpepn̄kpọ, idomode ndikot Bible ke usen ke usen, isịnde idem ke ọkpọkpọ ukpepn̄kpọ ye edinam ndụn̄ọde. Man inam kpukpru owo ẹkụt n̄kọri nnyịn, nnyịn iyesịn ofụri ukeme nditịm idem nnọ nnyụn̄ mbọ ufọn ọyọhọ ọyọhọ nto ukpepn̄kpọ ukara Abasi oro ẹnọde ke mme mbono esop, ke mme mbono circuit, mme mbono district, mme mbono ofụri idụt, ye mme mbono ofụri ererimbot.—1 Timothy 4:15; Mme Hebrew 10:23-25.

“Ọyọhọ iba: Man idi se Abasi ekpepde, nnyịn ididia udia ke okpokoro esie kpọt inyụn̄ itịm inam item Bible aban̄ade mme abian̄a abian̄a ukpepn̄kpọ mme demon. (1 Corinth 10:21; 1 Timothy 4:1) Nnyịn iyenen̄ede ikpeme ibiọn̄ọ mme n̄kpọ oro ẹnọde unan, esịnede mme nsu ido ukpono, ikpîkpu ekikere, mme esuene esuene obukpo ido idan̄, mme akama-n̄kpa ndise idan̄, oburobụt unọ idem inemesịt, ye kpukpru mmọ emi ‘mînyịmeke inọ nti ukpepn̄kpọ.’ (Rome 1:26, 27; 1 Corinth 3:20; 1 Timothy 6:3; 2 Timothy 1:13) Ke ntak ukpono inyenede inọ ‘mme enọ ke owo’ (NW) emi ẹdotde ndikpep nti ukpepn̄kpọ, nnyịn iyenen̄ede ikpono ukeme mmọ inyụn̄ ibere ye mmọ ke ofụri esịt ke ndimụm edisana ye edinen idaha ido uwem ye idaha eke spirit eke Ikọ Abasi n̄kama.—Ephesus 4:7, 8, 11, 12; 1 Thessalonica 5:12, 13; Titus 1:9.

“Ọyọhọ ita: Nte mme ete ye eka oro ẹdide Christian, nnyịn iyodomo ke ofụri esịt ndinọ nditọ nnyịn ukpep idịghe ke ikọ kpọt edi n̄ko ke uwụtn̄kpọ. Akpan n̄kpọ oro ebehede nnyịn edi ndin̄wam mmọ toto ke uyen ‘ndifiọk Edisana N̄wed Abasi man ẹnyene ọniọn̄ kaban̄a edinyan̄a.’ (2 Timothy 3:15) Nnyịn iyeti nte ke ndibọk mmọ ke ntụnọ ye item Ọbọn̄ ọyọnọ mmọ mfọnn̄kan ifet ndikụt edisu un̄wọn̄ọ Abasi oro nte ke ‘ọyọfọn ye mmọ, mmọ ẹyenyụn̄  ẹdu uwem ẹbịghi ke isọn̄.’—Ephesus 6:1-4.

“Ọyọhọ inan̄: Ke ini nnyịn ikopde editịmede esịt m̀mê isobode n̄kpọsọn̄ mfịna, akpa kan̄a, nnyịn ‘iyasian Abasi se nnyịn iyomde,’ inịmde ke akpanikọ ite ke ‘emem Abasi, emi ayan̄ade ifiọk owo’ eyekpeme nnyịn. (Philippi 4:6, 7) Sia ima ikedidụk ke idak ọkpọnọ Christ, nnyịn iyokụt nduọkodudu. Sia ifiọkde ite ke Abasi ekere aban̄a nnyịn, nnyịn idimen̄eke nditop editịmede esịt nnyịn ndori enye.—Matthew 11:28-30; 1 Peter 5:6, 7.

“Ọyọhọ ition: Ke ndiwụt esịtekọm nnọ Jehovah ke ifet oro inyenede ndidi mme andikpep Ikọ esie, nnyịn iyesịn obufa ukeme ‘nditịm nsiak ikọ akpanikọ’ nnyụn̄ ‘nnam utom nnyịn mma.’ (2 Timothy 2:15; 4:5) Sia nnyịn inen̄erede ifiọk se ibuanade, udọn̄ ofụri esịt nnyịn edi ndiyom mbon oro ẹdotde nnyụn̄ mbọk n̄kpasịp oro ẹketọde. N̄ko-n̄ko, nnyịn iyofori ukpepn̄kpọ nnyịn ebe ke ndinịm mme ukpepn̄kpọ Bible efen efen uforo uforo. Emi ayanam nnyịn inen̄ede inam n̄kpọ ke n̄kemuyo ye uduak Abasi oro nte ‘kpukpru owo ẹnyene edinyan̄a, ẹnyụn̄ ẹsịm ifiọk akpanikọ.’—1 Timothy 2:3, 4.

“Ọyọhọ itiokiet: Ke ofụri isua ikie oro ẹkebede tutu esịm isua ikie emi, Mme Ntiense Jehovah ke ediwak idụt ẹsobo nsio nsio orụk ubiọn̄ọ ye ukọbọ. Edi Jehovah ada ye nnyịn. (Rome 8:31) Ikọ esie oro mînyeneke ndudue ọsọn̄ọ ọnọ nnyịn ete ke ‘baba n̄kpọ ekọn̄ kiet eke ẹbotde ẹban̄a nnyịn’ ndida mbiọn̄ọ, nsụhọde, m̀mê ndida ntre utom nnyịn eke edikwọrọ Obio Ubọn̄ ye edikpep owo n̄kpọ, idikwe unen. (Isaiah 54:17) Edide ke ini emem m̀mê ke ini afanikọn̄, nnyịn ikemeke nditre nditịn̄ akpanikọ. Ubiere nnyịn edi ndinam utom ukwọrọikọ ye unọ ukpep nnyịn usọp usọp. (2 Timothy 4:1, 2, NW) Uduak nnyịn edi ndibuana eti mbụk Obio Ubọn̄ Abasi ọyọhọ ọyọhọ nte ikekeme ye mme owo ẹtode kpukpru idụt. Ntem, mmọ ẹyeka iso ndinyene ifet ndikpep mban̄a ndutịm edinyene nsinsi uwem ke edinen obufa ererimbot. Nte akwa otu mme andikpep Ikọ Abasi oro ẹdianade kiet, nnyịn imebiere ndika iso ntiene uwụtn̄kpọ Akwa Andikpep, kpa Jesus Christ, nnyụn̄ n̄wụt mme edu uten̄e Abasi esie. Nnyịn iyanam kpukpru emi ke ukpono ye itoro Akwa Anditeme ye Ọnọ-Uwem nnyịn, Jehovah Abasi.

“Kpukpru owo oro ẹdụkde mbono emi oro ẹnyịmede ubiere emi, mbọk ẹdọhọ IH!”

Ke ini ẹkebụpde owo 160,000 oro ẹkesopde idem ke itiembono ita ke France ye owo 289,000 oro ẹkesopde idem ke itie usụkkiet ke Italy akpatre mbụme oro, ẹma ẹbọrọ “Ih” ke ọkpọsọn̄ uyo ke ediwak usem mme andidụk mbono oro.