Da Esịt ye Ekikere Fo Yom Abasi

Ata Ido Ukpono Christ esịn udọn̄ ọnọ edida esịt ye ekikere n̄kọri mbuọtidem oro enemde Abasi esịt.

KE AKPANIKỌ, Jesus Christ, anditọn̄ọ Ido Ukpono Christ, ekekpep ete ke nnyịn inyene ndima Abasi ke “ofụri ekikere,” m̀mê ukeme ukere n̄kpọ nnyịn, ke adianade ye “ofụri esịt” ye “ofụri ukpọn̄” nnyịn. (Matthew 22:37) Ih, ana ukeme ukere n̄kpọ nnyịn enyene akpan udeme ke utuakibuot nnyịn.

Ke ini ọdọhọde mme andikpan̄ utọn̄ nnọ enye ete ẹkere ẹban̄a ukpepn̄kpọ esie, Jesus ama esiwak ndibụp ete: “Mbufo ẹkere nso?” (Matthew 17:25; 18:12; 21:28; 22:41) Ke ukem usụn̄ oro, apostle Peter ama ewet n̄wed ọnọ ẹsọk ekemmọ mme andinịm ke akpanikọ ‘ndidemede ukeme ukere n̄kpọ mmọ.’ (2 Peter 3:1, NW) Apostle Paul, akpa isụn̄utom oro akanamde isan̄ akan, ama eteme mme Christian ete ẹda “ukeme ukere n̄kpọ” mmọ (NW) ẹnam n̄kpọ ẹnyụn̄ “ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:1, 2) Edi n̄kukụre ke ndinam utọ ndụn̄ọde ntịn̄enyịn oro mban̄a se mmọ ẹnịmde ke akpanikọ ke mme Christian ẹkeme ndikọri mbuọtidem oro enemde Abasi esịt onyụn̄ an̄wamde mmọ ndiyọ mme idomo oro ẹdemerede ke uwem.—Mme Hebrew 11:1, 6.

Man ẹn̄wam mbon efen ẹkọri utọ mbuọtidem oro, mme akpa Christian oro ẹkedide mme ọkwọrọikọ ẹma ‘ẹsio ikọ ke n̄wed Abasi ẹda ẹbuen ikọ ye mmọ, ẹnyụn̄ ẹsọn̄ọ ẹwụt mmọ’ mme n̄kpọ oro mmọ ẹkekpepde. (Utom 17:1-3) Utọ usụn̄ edinam owụtde eti ibuot do ama anam mbon esịt akpanikọ ẹnam n̄kpọ nte ọfọnde. Ke uwụtn̄kpọ, ediwak owo ke obio Beroea ke Macedonia ẹma “ẹkop ikọ [Abasi] ke edinyịme esịt, ẹnyụn̄ ẹdụn̄ọde n̄wed Abasi  ke usen ke usen, ẹte ifiọk m̀mê mme ikọ oro [Paul ye mme nsan̄a esie ẹketịn̄de] ẹkem ntre.” (Utom 17:11) Odot ẹtịm ẹfiọk n̄kpọ iba mi. Akpa, mbon Beroea ẹma ẹkop Ikọ Abasi ke edinyịme esịt; ọyọhọ iba, mmọ ikenyịmeke nnan nnan nte ke se mmimọ ikokopde ama enen, edi ẹma ẹfiak ẹkedụn̄ọde N̄wed Abasi. Luke isụn̄utom Christian ke nsụhọdeidem ama otoro mbon Beroea kaban̄a emi, okotde mmọ mme “enyene-ido.” Nte afo emesiwụt utọ ido oro ke usụn̄ nte afo anamde n̄kpọ aban̄a mme n̄kpọ eke spirit?

Ekikere ye Esịt Ẹsan̄a Kiet

Nte ẹketịn̄de ke mbemiso, ido ukpono akpanikọ abuana ekikere ye esịt. (Mark 12:30) Kere ban̄a uwụtn̄kpọ oro ẹkenọde ke ibuotikọ oro ekebemde iso ẹban̄a andiyet ndom ke ufọk oro ẹkekpede utom oro akadade idiọk uduot ndom eyet ke ufọk. Edieke enye ekpeketịmde akpan̄ utọn̄ ke item eteutom esie, enye ekpekekeme ndida ofụri esịt nnam utom esie nnyụn̄ nnyene mbuọtidem nte ke eteutom imọ eyenyịme utom imọ. Ukem oro ke edi ye utuakibuot nnyịn.

Jesus ọkọdọhọ ete ke ‘ata mme andituak ibuot ẹdituak ibuot ẹnọ Ete ke spirit ye ke akpanikọ.’ (John 4:23) Ntem, apostle Paul ama ewet ete: “Ke ntak emi . . . nnyịn n̄ko idopke ndibọn̄ akam mban̄a mbufo, ndinyụn̄ nnam n̄kpe-ubọk ite, Abasi akpakam anam mbufo ẹyọhọ ye [nnennen ifiọk, NW] uduak Esie ke kpukpru eti ibuot ye ikike ke n̄kpọ Spirit; man mbufo ẹsan̄a ke ido nte odotde Ọbọn̄, ẹnem Enye esịt ke kpukpru usụn̄.” (Colossae 1:9, 10) Utọ “nnennen ifiọk” oro anam mbon esịt akpanikọ ẹsịn ofụri esịt mmọ ke utuakibuot mmọ ye ọyọhọ mbuọtidem koro mmọ ‘ẹtuakde ibuot ẹnọ se mmọ ẹfiọkde.’—John 4:22.

Ke mme ntak emi, Mme Ntiense Jehovah isinịmke nseknditọ m̀mê mbon oro ẹnyenede udọn̄ obufa, oro mîtịmke ikpep N̄wed Abasi, baptism. Jesus ọkọdọhọ mme anditiene enye ete: “Ẹkenam kpukpru mme idụt ẹdi mbet Mi, . . . ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Edi n̄kukụre ke ẹma ẹkenyene nnennen ifiọk uduak Abasi ke ifịk ifịk nditọ ukpepn̄kpọ Bible ẹkeme ndinam ubiere oro ọkọn̄ọde ke nnennen ifiọk ke n̄kpọ aban̄ade utuakibuot. Nte afo ke esịn ukeme ndinyene utọ nnennen ifiọk oro?

Ndifiọk Akam Ọbọn̄

Man ikụt ukpụhọde oro odude ke ufọt edinyene nnennen ifiọk Bible ye edinyene enyọn̄ enyọn̄ ifiọk mban̄a se enye etịn̄de, ẹyak nnyịn ikere iban̄a se ẹsiwakde ndikot Ete Nnyịn, m̀mê Akam Ọbọn̄, oro ẹwetde ke Matthew 6:9-13.

Ediwak miliọn owo ẹsibọn̄ akam uwụtn̄kpọ Jesus emi kpukpru ini ke ufọkabasi. Edi owo ifan̄ ke ẹkpep se enye ọwọrọde, akpan akpan akpa ikpehe akam oro aban̄ade enyịn̄ ye Obio Ubọn̄ Abasi? Mme ibuot nneme emi ẹnen̄ede ẹdi akpan n̄kpọ tutu Jesus enịm mmọ akpa ke akam oro.

Enye ọtọn̄ọ ntem: “Ete nnyịn emi odude ke heaven: Yak ikpono enyịn̄ Fo,” emi ọwọrọde yak ẹnam enyịn̄ esie asana. Tịm fiọk ete ke Jesus ọkọdọhọ yak ẹbọn̄ akam ẹte ẹnam enyịn̄ Abasi asana. Ye ediwak owo, emi edemede ke nsụhọde n̄kaha mbụme iba. Akpa, nso idi enyịn̄ Abasi? Ndien ọyọhọ iba, ntak oyomde ẹnam enye asana?

Ẹkeme ndikụt ibọrọ akpa mbụme oro ke se iwakde ibe itie 7,000 ke Bible ke akpasarade usem esie. Kiet odu ke Psalm 83:18: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.” (Sịghisịghi ubọkn̄wed edi eke nnyịn.) Kaban̄a enyịn̄ Abasi, Jehovah, Exodus 3:15 ọdọhọ ete: “Emi edi enyịn̄ mi ke nsinsi, emi onyụn̄ edi se ẹdade ẹti mi ke kpukpru emana.” * Edi ntak emi oyomde ẹnam enyịn̄ Abasi, emi asanade ke anana-mbiet usụn̄, asana?  Koro ẹsuene ẹnyụn̄ ẹbiat enyịn̄ oro toto ke ata ntọn̄ọ mbụk ubonowo.

Ke Eden, Abasi ọkọdọhọ Adam ye Eve ete ke mmọ ẹyekpan̄a edieke mmọ ẹdiade mfri oro ẹkekpande. (Genesis 2:17) Satan ke nsọn̄ibuot ama etịn̄ se ikedide isio ye se Abasi eketịn̄de, ọdọhọde Eve ete: “Mbufo idikpaha.” Ntem, Satan ama odori Abasi ikọ ete ke osu nsu. Edi, enye iketreke do. Enye ama odori esuene efen efen ke enyịn̄ Abasi, ọdọhọde Eve ete ke Abasi ama edịp enye ọsọn̄urua ifiọk nte mînenke. “Koro Abasi ọmọfiọk ete, ke usen eke mbufo ẹdiade [eto ifiọk eti ye idiọk], ndien enyịn mbufo ẹyetara; mbufo ẹyenyụn̄ ẹtie nte Abasi, ẹfiọk eti ye idiọk.” Nso edidọk ke emi ekedi ntem!—Genesis 3:4, 5.

Ebede ke ndidia mfri oro ẹkekpande, Adam ye Eve ẹma ẹmek ndida ye Satan. Ọtọn̄ọde ke ini oro ata ediwak owo, edide ẹfiọk m̀mê ifiọkke, ẹka iso ndinam akpa esuene oro okpon ebe ke ndisịn ndisana idaha Abasi. (1 John 5:19) Mme owo ẹsụk ẹtetịn̄ idiọk ẹdian Abasi ebe ke ndiduọhọ enye ke ntak ndutụhọ mmọ—idem okposụkedi ekemede ndidi ndiọi usụn̄ mmọ ẹdi ntak. Mme N̄ke 19:3 ọdọhọ ete: “Ndisịme ido owo abiat usụn̄ esie: ndien enye ayat esịt ye Jehovah.” Nte afo emekeme ndikụt ntak oro Jesus, emi ekenen̄erede ama Ete esie, ọkọbọn̄de akam ete ẹnam enyịn̄ Esie asana?

‘Yak Obio Ubọn̄ Fo Edi’

Ke ama ọkọbọn̄ akam ete ẹnam enyịn̄ Abasi asana, Jesus ama ọdọhọ ete: “Yak [Obio] Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Kaban̄a ubak udịmikọ oro, nnyịn imekeme ndibụp ite: ‘Nso idi Obio Ubọn̄ Abasi? Ndien nso ke edidi esie enyene ndinam ye edinam uduak Abasi ke isọn̄?’

Ke Bible, ikọ oro ‘Obio Ubọn̄’ akpan akpan ọwọrọ “itie ukara edidem.” Do, nte owụtde ifiọk, Obio Ubọn̄ Abasi etịn̄ aban̄a itie ukara, m̀mê ukara Abasi, ye edidem emi enye emekde. Edidem emi idịghe owo efen ikan Jesus Christ oro ẹkenamde eset ke n̄kpa—“Edidem ndidem ye Ọbọn̄ mbọn̄.” (Ediyarade 19:16; Daniel 7:13, 14) Kaban̄a Obio Ubọn̄ Messiah Abasi ke ubọk Jesus Christ, prọfet Daniel ekewet ete: “Ke eyo ndidem oro [mme ukara owo oro ẹkarade idahaemi] Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”—Daniel 2:44.

Ih, Obio Ubọn̄ Abasi ayakara isọn̄ ofụri ofụri, osion̄ode kpukpru ndiọi owo efep onyụn̄ akarade “ke nsinsi.” Ke usụn̄ emi, Obio Ubọn̄ Abasi edi se Jehovah adade anam enyịn̄ esie asana, anamde enye asana ọbọhọ kpukpru nsunsu esuene Satan ye ndiọi owo.—Ezekiel 36:23.

Kpa nte edide ye kpukpru ukara, Obio Ubọn̄ Abasi enyene mme andidu ke idak esie. Mmanie ke mmọ ẹdi? Bible ọbọrọ ete: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:11) Ukem ntre, Jesus ọkọdọhọ ete: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.” Nte ededi, mmọ emi ẹnyene nnennen ifiọk Abasi, emi edide se ẹyomde kaban̄a uwem.—Matthew 5:5; John 17:3.

Nte afo emekeme ndikere nte mbon nsụkidem ye mbon oro ẹtiede ifụre ifụre, oro ẹnen̄erede ẹma Abasi ye kiet eken, ẹyọhọde ofụri isọn̄? (1 John 4:7, 8) Oro edi se Jesus ọkọbọn̄de akam eben̄e ke ini enye ọkọdọhọde ete: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” Nte afo omokụt ntak emi Jesus ekekpepde mme anditiene enye ndibọn̄ akam ke usụn̄ oro? Ke edide akpan n̄kpọ akan, nte afo omokụt nte ibọrọ akam oro ekemede nditụk fi ọkpọkpọ?

Ediwak Miliọn Owo ke Ẹbuen Ikọ Idahaemi ke N̄wed Abasi

Jesus ama ebem iso etịn̄ aban̄a ubịnikọt unọ ukpep eke spirit ke ofụri ererimbot oro editọtde Obio Ubọn̄ Abasi oro edide. Enye ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme  idụt, ndien adan̄aoro ke utịt [ererimbot, m̀mê editịm n̄kpọ, emi odude ke emi] eyedi.”—Matthew 24:14.

Ke ofụri ererimbot n̄kpọ nte Mme Ntiense Jehovah miliọn itiokiet ke ẹbuana eti mbụk oro ye mme mbọhọidụn̄ mmọ. Mmọ ẹnọ fi ikot ndikpep n̄kpọ efen efen mban̄a Abasi ye Obio Ubọn̄ esie ebe ke ndida ukeme ukere n̄kpọ fo ‘ntịm ndụn̄ọde n̄wed Abasi.’ Ndinam ntre ọyọsọn̄ọ mbuọtidem fo onyụn̄ anam fi okop idatesịt nte afo ekerede aban̄a idotenyịn uwem ke paradise isọn̄, emi ‘ifiọk Jehovah ediyọhọde kpa nte mmọn̄ ofụkde inyan̄.’—Isaiah 11:6-9.

[Ikọ idakisọn̄]

 [Ekebe/Ndise ke page 8]

KPEBE AKWA ANDIKPEP

Jesus ekesiwak ndinọ ukpep ebe ke ndiwụk ntịn̄enyịn ke mme akpan ibuotikọ Bible. Ke uwụtn̄kpọ, ke enye ama ekeset ke n̄kpa, enye ama anam udeme oro enye enyenede ke uduak Abasi an̄wan̄a mbet iba oro ẹkenyenede eyịghe ẹban̄a n̄kpa esie. Luke 24:27 ọdọhọ ete: “Enye ọtọn̄ọ ke Moses ye kpukpru mme prophet asian se ẹketịn̄de ẹban̄a Enye ke Idem Esie ke ofụri N̄wed Abasi ọnọ mmọ.”

Tịm fiọk ete ke Jesus ekemek akpan ibuot nneme—“Idem Esie,” kpa Messiah—ye nte ke enye ama okot oto “ofụri N̄wed Abasi” ke nneme esie. Ke nditịm ntịn̄, Jesus ama atan̄ mme itien̄wed Bible oro ẹkenyenede ebuana ọdọn̄ ọtọkiet, emi ama an̄wam mme mbet esie ndikụt in̄wan̄-in̄wan̄ uwụtn̄kpọ akpanikọ eke spirit. (2 Timothy 1:13) Nte utịp, emi ikanamke mmọ ẹnyene ifiọk kpọt edi ama enen̄ede otụk esịt mmọ. Mbụk oro asian nnyịn ete: “Mmọ ẹdọhọ kiet eken ẹte, Nte esịt ikofiopke nnyịn, ke ini Enye enemede nneme ye nnyịn ke usụn̄, onyụn̄ asiakde ikọ Abasi ọnọ nnyịn?”—Luke 24:32.

Mme Ntiense Jehovah ẹsidomo ndikpebe usụn̄ unọ ukpep Jesus ke utom ukwọrọikọ mmọ. Mme akpan n̄wed ukpepn̄kpọ mmọ ẹdi ediye uduot ekpri n̄wed Nso ke Abasi Oyom Oto Nnyịn? ye n̄wed Ifiọk Oro Adade Osịm Nsinsi Uwem. Mmọemi ẹneme ediwak ibuotikọ Bible oro ẹdemerede udọn̄, utọ nte: “Anie Edi Abasi?,” “Ntak Emi Abasi Ayakde Ndutụhọ Odu-o?,” “Didie ke Afo Ekeme Ndikụt Ido Ukpono Akpanikọ?,” “Mmọemi Ẹdi Ukperedem Ini!,” ye “Ndibọp Ubon Oro Okponode Abasi.” Ibuot ukpepn̄kpọ kiet kiet ọdọn̄ọ ediwak itie N̄wed Abasi.

Afo emekeme ndisobo ye Mme Ntiense Jehovah ke n̄kann̄kụk mbufo mîdịghe ewet n̄wed ọnọ ẹsọk adres oro odude ke page 2 ke magazine emi kaban̄a ukpepn̄kpọ Bible mfọn ke ibuot nneme emi ye mme ibuot nneme efen.

[Ndise]

Sịm esịt eyen ukpepn̄kpọ fo ebe ke ndiwụk ntịn̄enyịn ke mme akpan ibuotikọ Bible

[Mme ndise ke page 7]

Nte afo ọmọfiọk se akam uwụtn̄kpọ Jesus ọwọrọde?

“Ete nnyịn emi odude ke heaven: yak ikpono enyịn̄ Fo . . . ”

“Yak Ubọn̄ [Messiah] Fo edi . . . ”

“Yak inam uduak Fo; nte ẹnamde ke heaven, yak inam ke isọn̄ kpasụk ntre”