Ka Iso Ndinam N̄kpọ Jehovah ye Esịt Oro Enyenede Iwụk
Ka Iso Ndinam N̄kpọ Jehovah ye Esịt Oro Enyenede Iwụk
“Esịt mi omowụhọ, O Abasi, esịt mi omowụhọ.”—PSALM 57:7.
1. Ntak emi nnyịn ikemede ndinyene mbuọtidem oro ebietde eke David?
JEHOVAH ekeme ndinam nnyịn isọn̄ọ ida ke mbuọtidem Christian, man nnyịn ikeme ndisọn̄ọ nyịre ke ata Ido Ukpono Christ nte mme asan̄autom esie oro ẹyakde idem ẹnọ. (Rome 14:4) Ke ntre, nnyịn imekeme ndinyene mbuọtidem oro ebietde eke David andiwet psalm, emi okonụkde enye ndikwọ ete: “Esịt omowụhọ mi, O Abasi.” (Psalm 108:1) Edieke esịt nnyịn enyenede iwụk, oyonụk nnyịn ndidu uwem ekekem ye uyakidem nnyịn nnọ Abasi. Ndien ebede ke ndiberi edem ke enye kaban̄a ndausụn̄ ye odudu, nnyịn imekeme ndiwụt nte ke idi se n̄kpọ mîkemeke ndisehede, isọn̄ọde iyịre ke ubiere ye mme edinịm ke akpanikọ nnyịn nte mbon nsọn̄ọnda, ‘iyọhọde kpukpru ini ke utom Ọbọn̄.’—1 Corinth 15:58.
2, 3. Nso ke item Paul oro ẹwetde ke 1 Corinth 16:13 ọwọrọ?
2 Ke item oro enye ọkọnọde mme anditiene Jesus ke Corinth eset, edi oro ke akpanikọ enyenede n̄kpọ ndinam ye mme Christian ke eyomfịn, apostle Paul ọkọdọhọ ete: “Ẹdu ke ukpeme, ẹsọn̄ọ ẹda ke mbuọtidem; ẹnam n̄kpọ nte irenowo; ẹkop odudu.” (1 Corinth 16:13) Ke usem Greek ẹda ikọ owụtde edinam eke idahaemi ẹwet item emi kiet kiet, ke ntem esịnde udọn̄ ọnọ edinam oro akade-ka iso. Nso ke item emi ọwọrọ?
3 Nnyịn ikeme ‘ndidu ke ukpeme’ ke n̄kan̄ eke spirit ebe ke ndibiọn̄ọ Devil nnyụn̄ nsan̄a n̄kpere Abasi. (James 4:7, 8) Ndiberi edem ke Jehovah anam nnyịn idiana kiet inyụn̄ ‘isọn̄ọ ida ke mbuọtidem Christian.’ Nnyịn—esịnede ediwak iban oro ẹdude ke otu nnyịn—‘inam n̄kpọ nte irenowo’ ebe ke ndinam n̄kpọ Abasi uko uko nte mme anditan̄a Obio Ubọn̄. (Psalm 68:11) Nnyịn ‘ikop odudu’ ebe ke ndika iso mberi edem ke Ete nnyịn eke heaven ndinọ nnyịn ukeme ndinam uduak esie.—Philippi 4:13.
4. Nso ikada ikesịm nnyịn ndina baptism nte mme Christian?
4 Nnyịn ikowụt ke imenyịme akpanikọ ke ini nnyịn ikanamde uyakidem oro owo mîfamke n̄kpọ ida inọ Jehovah inyụn̄ iyarade enye ke edibụhọ ke mmọn̄. Edi nso ikada ikesịm nnyịn ndina baptism? Akpa nnyịn ima ikpep nnennen ifiọk Ikọ Abasi. (John 17:3) Emi ama anam inyene mbuọtidem onyụn̄ onụk nnyịn ndikabade esịt, iwụtde ite ke imenen̄ede ifụhọ iban̄a idiọk edinam ini edem. (Utom 3:19; Mme Hebrew 11:6) Ekem nnyịn ima inam mme ukpụhọde, koro nnyịn ima iwọn̄ọde ikpọn̄ ndiọi edinam man ibịne usụn̄ uwem oro odude ke n̄kemuyo ye uduak Abasi. (Rome 12:2; Ephesus 4:23, 24) Se iketienede emi ekedi uyakidem ofụri esịt nnọ Jehovah ke akam. (Matthew 16:24; 1 Peter 2:21) Nnyịn ima iben̄e Abasi eti ubieresịt inyụn̄ ina baptism nte idiọn̄ọ uyakidem nnyịn nnọ enye. (1 Peter 3:21) Ndinyene mme usio-ukot emi ke ekikere ayan̄wam nnyịn iwụk ekikere ke ufọn edika iso nsịn ukeme ndidu uwem ekekem ye uyakidem nnyịn nnyụn̄ n̄ka iso nnam n̄kpọ Jehovah ye esịt oro enyenede iwụk.
Ka Iso Ndiyom Nnennen Ifiọk
5. Ntak emi nnyịn ikpakade iso ndikpep ifiọk N̄wed Abasi?
5 Man idu uwem ekekem ye uyakidem nnyịn nnọ Abasi, ana nnyịn ika iso ndikpep ifiọk N̄wed Abasi oro ọbọpde mbuọtidem. Nso idatesịt ke ekedi ntem ndidia udia eke spirit ke akpa ini oro nnyịn ikemehede ye akpanikọ Abasi! (Matthew 24:45-47) Mme “udia” oro ẹma ẹnem etieti—ndien mmọ ẹma ẹnen̄ede ẹbọk nnyịn ke n̄kan̄ eke spirit. Idahaemi edi akpan n̄kpọ nte nnyịn ika iso ndidia ọnọ-nsọn̄idem udia eke spirit emi man inyene esịt oro enyenede iwụk nte mme asan̄autom Jehovah oro ẹyakde idem ẹnọ.
6. Ekeme ndidi ẹken̄wam fi didie ndikọri ntotụn̄ọ esịtekọm nnọ akpanikọ Bible?
6 Oyom ukeme man ẹka iso ẹkpep ifiọk N̄wed Abasi. Enye etie nte edidụn̄ọde nyom n̄kpọuto eke edịbede—n̄kpọ oro oyomde nsịn̄edeidem. Edi ọnọ uyụhọ didie ntem ndikụt “ifiọk Abasi”! (Mme N̄ke 2:1-6) Ke akpa ini oro asuanetop Obio Ubọn̄ ekekpepde Bible ye afo, ekeme ndidi enye akada n̄wed Ifiọk Oro Adade Osịm Nsinsi Uwem. Ekeme ndidi ẹma ẹda ekese ini ndineme ibuot kiet kiet, eyedi ke se iwakde ibe ini ukpepn̄kpọ kiet. Afo ama ọbọ ufọn ke ini ẹkekotde ẹnyụn̄ ẹnemede mme itie N̄wed Abasi oro ẹsiakde ẹsịn. Edieke ọkọsọn̄de fi ndimụm akpan n̄kpọ, ẹma ẹnam enye an̄wan̄a. Owo oro ekenịmde ukpepn̄kpọ Bible fo ama esitịm idem mfọn mfọn, ọbọn̄ akam oyom spirit Abasi, onyụn̄ an̄wam fi ndikọri ntotụn̄ọ esịtekọm nnọ akpanikọ.
7. Nso inam owo odot ndikpep mbon en̄wen akpanikọ Abasi?
7 Ukeme emi ama odot, koro Paul ekewet ete: “Yak owo eke ọbọde ukpep-n̄kpọ ke ikọ Abasi ọfọn ido ye andikpep enye ke kpukpru nti enọ.” (Galatia 6:6) Mi uwetn̄kpọ Greek owụt nte ke ẹma ẹsisịn ukpepn̄kpọ Ikọ Abasi ke ekikere ye esịt owo eke “ọbọde ukpep-n̄kpọ.” Ndinọ fi ukpep ke utọ usụn̄ oro anam fi odot ndikpep mbon en̄wen n̄ko. (Utom 18:25) Man odu uwem ekekem ye uyakidem fo, ana afo omụm nsọn̄idem eke spirit ye nsọn̄ọnda fo akama ebe ke ndika iso n̄kpep Ikọ Abasi.—1 Timothy 4:13; Titus 1:13; 2:2.
Ti Edikabade Esịt ye Edinam Ukpụhọde Fo
8. Didie ke ẹkeme ndika iso nnyene edu uten̄e Abasi?
8 Nte afo emeti nte ekenemde fi ke idem ke ini afo ekekpepde akpanikọ, akabarede esịt, ndien ekem ọfiọkde ke Abasi efen ọnọ fi, ọkọn̄ọde ke mbuọtidem ke uwa ufak Jesus? (Psalm 32:1-5; Rome 5:8; 1 Peter 3:18) Ke akpanikọ afo uyomke ndifiak mbịne usụn̄ uwem unam idiọkn̄kpọ. (2 Peter 2:20-22) Ke adianade ye mme n̄kpọ eken, ndibọn̄ akam ofụri ini nnọ Jehovah ayan̄wam fi ndika iso nnyene edu uten̄e Abasi, ndidu uwem ekekem ye uyakidem fo, nnyụn̄ n̄ka iso ndinam n̄kpọ Jehovah ke edinam akpanikọ.—2 Peter 3:11, 12.
9. Ke ima ikọwọn̄ọde ikpọn̄ ndiọi edinam, nso usụn̄ uwem ke nnyịn ikpebịne?
9 Ke ama akanam ukpụhọde ebe ke ndiwọn̄ọde n̄kpọn̄ ndiọi edinam, ka iso ndiyom un̄wam Abasi ke ndinam esịt fo enyene iwụk. Ke nditịm ntịn̄, afo akasan̄a ke ukwan̄ ọkpọusụn̄ edi ama odụn̄ọde n̄wed usụn̄isan̄ oro ẹkemede ndiberi edem, ama onyụn̄ ọtọn̄ọ ndisan̄a ke nnennen usụn̄. Kûyo ukpọn̄ usụn̄ ke emi. Ka iso ndiberi edem ke ndausụn̄ Abasi, nyụn̄ biere ndidu ke usụn̄ oro adade esịm uwem.—Isaiah 30:20, 21; Matthew 7:13, 14.
Kûdede Ufre Uyakidem nnọ ye Baptism Fo
10. Mme akpan n̄kpọ ewe ẹban̄ade uyakidem nnyịn nnọ Abasi ke nnyịn ikpeti?
10 Ti ete ke afo ama ayak idem ọnọ Jehovah ke akam, ye ekikere edinam utom ke edinam akpanikọ ke nsinsi. (Jude 20, 21) Uyakidem nnọ ọwọrọ edisio nnịm san̄asan̄a nnọ edisana uduak. (Leviticus 15:31; 22:2) Uyakidem fo ikedịghe ediomi ibio ini m̀mê ediomi oro anamde ye mme owo. Enye ekedi nsinsi uyakidem oro anamde ọnọ Andikara Ekondo, ndien ndidu uwem ekekem ye enye oyom anam akpanikọ ọnọ Abasi ke ofụri ini uwem fo. Ih, ke ‘idude-du m̀mê ke ikpade-kpa, nnyịn inyene Ọbọn̄.’ (Rome 14:7, 8) Inemesịt nnyịn ọkọn̄ọ ke nnyịn ndisụk ibuot nnọ uduak esie ye nnyịn ndika iso nnam n̄kpọ esie ye esịt oro enyenede iwụk.
11. Ntak emi afo ekpetide baptism fo ye se enye ọwọrọde?
11 Kpukpru ini ti ete ke baptism fo edi idiọn̄ọ uyakidem ofụri esịt fo nnọ Abasi. Enye ikedịghe baptism oro ẹkenyịkde-nyịk, koro afo akanam ubiere oro ke idemfo ikpọn̄. Nte afo ke emi emebiere ndinam uduak fo odu ke n̄kemuyo ye uduak Abasi ke ofụri eyouwem fo? Afo ama eben̄e Abasi ọnọ fi eti ubieresịt ama onyụn̄ ana baptism nte idiọn̄ọ uyakidem fo nnọ enye. Mụm eti ubieresịt oro kama ebe ke ndidu uwem ekekem ye uyakidem fo, ndien eyenyene akpakịp edidiọn̄ Jehovah.—Mme N̄ke 10:22.
Edimek Fo Enyene Udeme
12, 13. Didie ke edimek nnyịn enyene ebuana ye uyakidem nnọ ye baptism?
12 Ke akpanikọ, uyakidem nnọ ye baptism ẹda akamba ufọn ẹsọk ediwak miliọn owo ke ofụri isọn̄. Ke ini nnyịn iyararede uyakidem nnyịn inọ Abasi ebe ke ndina baptism, nnyịn imakpa ikpọn̄ akani usụn̄ uwem nnyịn edi ikpaha ikpọn̄ edimek nnyịn. Nte mme andinịm ke akpanikọ oro ẹtịmde ẹnọ ukpep, nnyịn ikanam edimek ke idem nnyịn ke ini nnyịn ikayakde idem inọ Abasi ke akam inyụn̄ ina baptism. Usụn̄ uwem uyakidem nnọ ye baptism oyom ete nnyịn ifiọk se uduak Abasi edide ndien ekem nnyịn ikokoi imek ndinam enye. (Ephesus 5:17) Ntem nnyịn ikpebe Jesus, emi ekemekde ke idemesie ndikpọnọde utom usọeto nnịm n̄kan̄ kiet, nna baptism, nnyụn̄ nyak idemesie ofụri ofụri nsịn ke ndinam uduak Ete esie eke heaven.—Psalm 40:7, 8; John 6:38-40.
13 Jehovah Abasi ama aduak ete Eyen esie “asan̄a ke ndutụhọ akabade ọfọn ama.” Ke ntre Jesus ekenyene ndimek ke idemesie ndiyọ utọ ndutụhọ oro ke edinam akpanikọ. Ke ntak oro, enye ama ‘ọbọn̄ akam onyụn̄ anam n̄kpe-ubọk ye ọkpọsọn̄ eseme ye mmọn̄-eyet . . . Abasi ama onyụn̄ eyere Enye, koro Enye eten̄ede Abasi.’ (Mme Hebrew 2:10, 18; 5:7, 8) Edieke nnyịn iwụtde ukem uten̄e uten̄e mbak Abasi oro, nnyịn n̄ko imekeme nditịm nnịm nte ke ‘Abasi eyeyere nnyịn,’ ndien nnyịn imekeme ndinyene mbuọtidem nte ke Jehovah ayanam isọn̄ọ ida nte Mme Ntiense esie oro ẹyakde idem ẹnọ.—Isaiah 43:10.
Afo Emekeme Ndika Iso Nnyene Esịt Oro Enyenede Iwụk
14. Ntak emi nnyịn ikpokotde Bible ke usen ke usen?
14 Nso idin̄wam fi ndika iso nnyene esịt oro enyenede iwụk ndien ke ntem odude uwem ekekem ye uyakidem fo nnọ Abasi? Kot Bible ke usen ke usen, ye uduak edinyene ifiọk Ikọ Abasi oro akade-ka iso ndikọri. Emi edi n̄kpọ oro “asan̄autom emi anamde akpanikọ, onyụn̄ enyenede ọniọn̄” esịnde udọn̄ ọnọ nnyịn ndinam kpukpru ini. Ẹnọ utọ item oro koro ndidu uwem ekekem ye uyakidem nnyịn oyom ete nnyịn ika iso isan̄a ke akpanikọ Abasi. Edieke esop Jehovah okpokoide-koi enyịme nsunsu ukpepn̄kpọ, tutu amama owo ikpọnọhọ Mme Ntiense Jehovah ye mbon oro mmọ ẹkwọrọde ikọ ẹnọ item ẹte ẹkot Bible.
15. (a) Nso ke ẹkpekere ẹban̄a ke ini ẹnamde mme ubiere? (b) Ntak emi ẹkemede ndidọhọ nte ke utom idịbi udia Christian edi utom oro ẹnịmde ke udiana itie?
15 Ke ini anamde mme ubiere, kpukpru ini kere ban̄a nte mmọ ẹkemede nditụk edidu uwem ekekem ye uyakidem fo nnọ Jehovah. Emi ekeme ndibuana utom idịbi udia fo. Ndi afo omodomo ndinam enye an̄wam fi ke ndinam utuakibuot akpanikọ aka iso? Okposụkedi mme eteutom ke ofụri ofụri ẹsikụtde nte ke mme Christian oro ẹma ẹkeyak idem ẹnọ ẹdi mbon oro ẹkemede ndiberi edem ẹnyụn̄ ẹnyenede ifịk, mmọ ẹfiọk n̄ko ẹte ke Mme Ntiense Jehovah inyeneke ọkpọsọn̄ udọn̄ ndinyene ikpọ itie ke ererimbot inyụn̄ imiaha mbuba ye mbon en̄wen ndiyom ifetutom oro ẹkpede ediwak okụk. Emi edi koro utịtmbuba Mme Ntiense idịghe edinyene inyene, uwọrọetop, uku, m̀mê odudu. Ye mbon oro ẹdude uwem ekekem ye uyakidem mmọ nnọ Abasi, ata akpan n̄kpọ edi edinam uduak Abasi. Utom idịbi udia oro anamde mmọ ẹnyene mme n̄kpọ oro ẹyomde ke uwem edi utom oro ẹnịmde ke udiana itie. Ukem nte apostle Paul, utom, m̀mê akpan utom mmọ, edi utom ukwọrọikọ Christian. (Utom 18:3, 4; 2 Thessalonica 3:7, 8; 1 Timothy 5:8) Nte afo emenịm mme ufọn n̄kpọ Obio Ubọn̄ akpa ke uwem fo?—Matthew 6:25-33.
16. Nso ke nnyịn ikeme ndinam edieke editịmede esịt oro mîdotke anamde edi ọkpọsọn̄ n̄kpọ ndidu uwem ekekem ye uyakidem nnyịn nnọ Abasi?
16 Ekeme ndidi nsio nsio editịmede esịt ẹma ẹkpere ndikan ndusụk owo ubọk mbemiso mmọ ẹkedide ẹdikpep akpanikọ. Edi esịt mmọ ọkọyọhọ ye idatesịt, esịtekọm, ye ima ẹnyenede ẹnọ Abasi didie ntem ke ini mmọ ẹkenyịmede idotenyịn Obio Ubọn̄! Editie n̄kere mme ufọn oro mmọ ẹbọde ọtọn̄ọde ke ini oro ekeme ndinen̄ede n̄n̄wam mmọ ndidu uwem ekekem ye uyakidem mmọ nnọ Jehovah. Ke n̄kan̄ eken, nso edieke editịmede esịt oro mîdotke kaban̄a mme ọsọ mfịna uwem eke editịm n̄kpọ emi ẹyomde ndibaba “ikọ Abasi” n̄wot ke emi, kpa nte n̄kukịm ekemede ndibiọn̄ọ n̄kpasịp ndikọri nsịm ọyọhọ idaha edin̄wụm mfri? (Luke 8:7, 11, 14; Matthew 13:22; Mark 4:18, 19) Edieke afo ọfiọkde ete ke emi ọtọn̄ọ nditịbe nnọ fi m̀mê ubon fo, top editịmede esịt fo nọ Jehovah nyụn̄ bọn̄ akam ete enye an̄wam fi ọkọri ima ye esịtekọm. Edieke afo otopde mbiomo fo ọnọ enye, enye ọyọsọn̄ọ fi idem onyụn̄ ọnọ fi odudu ndika iso nnam n̄kpọ esie ke inemesịt ye esịt oro enyenede iwụk.—Psalm 55:22; Philippi 4:6, 7; Ediyarade 2:4.
17. Didie ke ẹkeme ndiyọ n̄kpọsọn̄ idomo?
17 Ka iso ndibọn̄ akam nnọ Jehovah Abasi kpukpru ini, idem kpa nte afo ọkọbọn̄de akam ke ini akanamde uyakidem fo ọnọ enye. (Psalm 65:2) Ke ini ẹdomode fi ndinam idiọk m̀mê ke ini osobode ọkpọsọn̄ idomo, yom ndausụn̄ Abasi ye un̄wam esie man ọyọ. Ti nte ke oyom enyene mbuọtidem, koro mbet oro James ekewet ete: “Edi edieke owo mbufo ekededi ananade eti ibuot [ndiyọ idomo], yak enye eben̄e Abasi, emi ọnọde kpukpru owo ke ntatubọk, mînyụn̄ itọhọke owo; ndien Abasi ọyọnọ enye. Edi yak enye eben̄e ke mbuọtidem, okûyok; koro owo eke oyokde ebiet mbufụt mmọn̄, eke ofụm eberide, emen, otop, ọduọk ko. Owo oro okûse ete, imọ iyọbọ baba n̄kpọ kiet ke ubọk Ọbọn̄; enye edi owo esịt iba, eke mînyeneke nsọn̄ọ-nda ke kpukpru usụn̄ esie.” (James 1:5-8) Edieke idomo etiede nte oyom ndikan nnyịn ubọk, nnyịn imekeme ndinịm emi ke akpanikọ: “Idomo ikesịmke mbufo ibọhọke se inade owo ndibiom; edi Abasi edi akpanikọ, idinyụn̄ iyakke ẹdomo mbufo ẹbe se ukeme mbufo edide; edi Enye ayasiak usụn̄ ubọhọ ọnọ mbufo ke ufọt idomo, man mbufo ẹkeme ndibiom enye.”—1 Corinth 10:13.
18. Nso ke nnyịn ikeme ndinam edieke akwa idiọkn̄kpọ oro idịpde anamde ubiere nnyịn ndidu uwem ekekem ye uyakidem nnyịn nnọ Jehovah emem?
18 Nso edieke akwa idiọkn̄kpọ oro edịpde afịnade ubieresịt fo onyụn̄ anamde ubiere fo ndidu uwem ekekem ye uyakidem fo nnọ Abasi emem? Edieke afo akabarede esịt, afo emekeme ndibọ ndọn̄esịt ke ndifiọk nte ke Jehovah ‘idisịnke edibụn̄ọ ye edinuaha esịt ke ndek.’ (Psalm 51:17) Yom un̄wam to ima ima mbiowo Christian, ọfiọkde ete ke mmọ—ke ndikpebe Jehovah—ididaha udọn̄ fo ndifiak nnyene eti itie ebuana ye Ete fo eke heaven mfefere mfefere. (Psalm 103:10-14; James 5:13-15) Ndien ke afiakde enyene obufa ukeme eke spirit ye esịt oro enyenede iwụk, afo eyekeme ndisiak afan̄ eke enende ọnọ ikpat fo onyụn̄ okụt nte ekemede ndidu uwem ekekem ye uyakidem fo nnọ Abasi.—Mme Hebrew 12:12, 13.
Ka Iso Ndinam N̄kpọ ye Esịt Oro Enyenede Iwụk
19, 20. Ntak edide akpan n̄kpọ nte nnyịn ika iso idu uwem ekekem ye uyakidem nnyịn?
19 Ke ndiọkeyo emi, ana nnyịn isịn ọkpọsọn̄ ukeme ndidu uwem ekekem ye uyakidem nnyịn inyụn̄ ika iso ndinam n̄kpọ Abasi ye esịt oro enyenede iwụk. Jesus ọkọdọhọ ete: “Ẹyenyan̄a owo eke edimede ime tutu esịm akpatre.” (Matthew 24:13) Sia nnyịn idude uwem ke “ukperedem ini,” utịt ekeme ndidi ini ekededi. (2 Timothy 3:1) Akan oro, owo nnyịn ndomokiet ikemeke nditịm mfiọk m̀mê iyodu uwem isiere n̄kpọn̄. (James 4:13, 14) Ntre edi akpan n̄kpọ nte nnyịn ika iso ndidu uwem ekekem ye uyakidem nnyịn mfịn!
20 Apostle Peter ama ọsọn̄ọ etịn̄ emi ke udiana leta esie. Enye ama owụt ete ke idem kpa nte mbon unana uten̄e Abasi ẹkekpan̄ade ke Ukwọ, ntre ke ẹdisobo ndamban̄a isọn̄, m̀mê idiọk n̄kaowo, ẹfep ke “usen Jehovah.” Ke ntre Peter ama ọdọhọ ete: “Nso orụk owo ke mbufo ẹkpedi ke edisana ido ye ke uten̄e Abasi”? Enye ama eteme mmọ n̄ko ete: “Ndima, sia mbufo ẹma ẹkebem iso ẹfiọk emi, ẹkpeme mbak nduyo [eke mme abian̄a abian̄a andikpep ye mmọ emi mîbakke Abasi] edimen mbufo efep, onyụn̄ anam mbufo ẹkpọn̄ nsọn̄ọnda mbufo.” (2 Peter 3:5-17) Ekpedi n̄kpọ mfụhọ didie ntem edieke ẹkpenamde owo oro ama akana baptism awaha ọkpọn̄ usụn̄ ndien enye esịm utịt uwem esie nte owo oro mînyeneke esịt oro enyenede iwụk!
21, 22. Didie ke mme ikọ Psalm 57:7 ẹdi akpanikọ ẹban̄a David ye mme ata Christian?
21 Ubiere fo ndidu uwem ekekem ye uyakidem fo nnọ Abasi ekeme nditịm nsọn̄ edieke afo etide inem inem usen baptism fo onyụn̄ oyomde un̄wam Abasi man ikọ ye edinam fo ẹdat enye esịt. (Mme N̄ke 27:11) Akananam Jehovah ikpụhu ikọt esie, ndien ke akpanikọ nnyịn ikpenyene ndinam akpanikọ nnọ enye. (Psalm 94:14) Enye ama owụt mbọm ke ndibiat uduak mme asua nnyụn̄ nnyan̄a David. Ke owụtde esịtekọm aban̄a emi, David ama etịn̄ aban̄a ima oro enye enyenede ọnọ Andinyan̄a enye nte enyenede iwụk mînyụn̄ isehekede. Ye ọkpọsọn̄ ntụk, enye ama ọkwọ ete: “Esịt mi omowụhọ, O Abasi, esịt mi omowụhọ: nyọkwọ ikwọ, nnyụn̄ ntoro.”—Psalm 57:7.
22 Ukem nte David, mme ata Christian iyokke ke utuakibuot mmọ nnọ Abasi. Ye esịt oro enyenede iwụk, mmọ ẹfiọk ẹte ke edinyan̄a ye ukpeme mmimọ ẹto Jehovah, emi mmọ ke idatesịt ẹkwọde ikwọ itoro ẹnọ. Edieke esịt fo enyenede iwụk, enye ọyọbuọt idem ye Abasi, ndien ye un̄wam esie afo eyekeme ndidu uwem ekekem ye uyakidem fo. Ih, afo emekeme nditie nte “owo edinen ido” emi andiwet psalm ọkọkwọde aban̄a ete: “Idiọk etop idinamke enye ndịk: esịt esie omowụhọ, ọbuọt idem ye Jehovah.” (Psalm 112:6, 7) Ye mbuọtidem ke Abasi ye ọyọhọ ibetedem ke enye, afo emekeme ndidu uwem ekekem ye uyakidem fo onyụn̄ aka iso ndinam n̄kpọ Jehovah ye esịt oro enyenede iwụk.
Nte Afo Emeti?
• Ntak emi nnyịn ikpakade iso ndikpep nnennen ifiọk Bible?
• Ntak emi nnyịn ikpetide edikabade esịt ye edinam ukpụhọde nnyịn?
• Didie ke nnyịn ibọ ufọn ito editi uyakidem nnyịn nnọ ye baptism?
• Nso idin̄wam nnyịn ndika iso nnam n̄kpọ Jehovah ye esịt oro enyenede iwụk?
[Mme Mbụme Ukpepn̄kpọ]
[Mme ndise ke page 18]
Nte afo ke omụm nsọn̄idem eke spirit fo akama ebe ke ndikot Ikọ Abasi ke usen ke usen?
[Ndise ke page 18]
Ndinam utom ukwọrọikọ Christian edi akpan utom nnyịn an̄wam nnyịn ndika iso nnam n̄kpọ Jehovah ye esịt oro enyenede iwụk