Ntọt Mme Anditan̄a Obio Ubọn̄

“N̄koyom Ndinam N̄kpọ Abasi”

“MBUFO ikọt Mi, ẹwọn̄ọ ke esịt.” Emi ekedi ikot oro apostle John okokopde oto angel ke akpa isua ikie E.N. Ke eyo nnyịn ediwak miliọn mbon esịt akpanikọ ẹyere ikot oro ẹnyụn̄ ẹfen̄e ẹwọn̄ọ ke “Akwa Babylon,” kpa ukara ererimbot eke nsunsu ido ukpono. (Ediyarade 18:1-4) Kiet ke otu mmọ edi Wilner oro otode Haiti, emi obụkde ifiọk n̄kpọntibe esie.

“N̄kamana ke 1956 ndụk ubon mme enyene-ifịk mbon Catholic ke ekpri obio St. Marc, Haiti. Kere nte ubon mi okokopde idatesịt ke ini ẹkemekde mi, ke adianade ye owo iba efen ke obio nnyịn, ndidụk ufọkn̄wed ukpep utom oku ke St. Michel de l’Atalaye, Haiti. Ekem, ke 1980, ẹma ẹnọ nnyịn ika Stavelot, Belgium, man ikọbọ ukpep efen efen. Do n̄ko nnyịn ima idụk ufọkn̄wed ntaifiọk Catholic.

“Ke akpa mma n̄kop nduaidem mban̄a edidụk utom oku. Usen kiet ke ubet udia uwemeyo, oku oro ekesede aban̄a otu nnyịn ama ọdọhọ mi mbet ke minit ifan̄ koro imọ imenyene se iyomde nditịn̄ nnọ mi. Kere nte n̄kokopde n̄kpaidem ke ini enye ọkọdọhọde in̄wan̄-in̄wan̄ ete ke imọ imenyene udọn̄ ndinyene ebuana idan̄ ye ami! Mma nsịn mme etabi esie edi mma nnen̄ede n̄kop idiọkesịt. Mma n̄wet n̄wed mban̄a n̄kpọntịbe oro nnọ ẹsọk ubon mi ndien ọfiọn̄ ifan̄ ke ukperedem mma n̄kpọn̄ ufọkn̄wed ukpep utom oku, kpa ye oro mmọ mîkenemke esịt. Mma mbọ ufọk ndụn̄ ke obio-in̄wan̄ oro nnyụn̄ nsịn idem ke ndibọ ukpep ke orụk ubọkọkọ efen.

“Ke ini n̄kafiakde nnyọn̄ St. Marc, n̄kenyeneke mbuọtidem ekededi aba ke Ufọkabasi Catholic. Kpa ye oro, ami n̄koyom ndinam n̄kpọ Abasi, edi n̄kọfiọkke se n̄kpanamde. Mma n̄ka ufọkabasi Adventist, ufọkabasi Ebenezer, ye ufọkabasi Mormon. N̄kenyeneke eti ndausụn̄ ke n̄kan̄ eke spirit.

“Ekem mma nti nte ke adan̄aemi n̄kodude ke ufọkn̄wed ukpep utom oku ke Belgium, mma nsikot Bible Crampon. Mma n̄kụt ke esịt esie nte ke Abasi enyene enyịn̄. Ntre ke ndade enyịn̄ esie mma mbọn̄ akam ifịk ifịk nnọ Abasi nte an̄wam mi ndikụt ido ukpono akpanikọ.

“Esisịt ini ke oro ebede, owo iba ke otu Mme Ntiense Jehovah ẹma ẹwọrọ ẹdidụn̄ ke n̄kann̄kụk mi. Mmọ ẹketie sụn̄sụn̄, ẹnọ owo ukpono, ẹnyụn̄ ẹnyene uku. Usụn̄ uwem mmọ ama otụk mi. Usen kiet, kiet ke otu Ntiense iba oro, ama ọnọ mi ikot ndidụk Editi n̄kpa Christ eke isua ke isua. Mma nnen̄ede n̄kop inem mbono oro nnyụn̄ nnyịme ukpepn̄kpọ Bible ofụri ini ye Mme Ntiense oro. Ke n̄kpọ nte ọfiọn̄ itiokiet, mma ndinịm ke akpanikọ nte ke mmokụt nnennen usụn̄ ndinam n̄kpọ Abasi. Mma nyak uwem mi nnọ Jehovah nnyụn̄ nna baptism ke November 20, 1988.”

Nte ini akakade, Wilner ama odụk utom uyọhọ ini. Mfịn, enye anam utom nte ebiowo esop. Enye ye n̄wan esie, ọkọrọ ye nditọ mmọ iba, ẹnam utom ke inemesịt ke esop.

[Ndise ke page 9]

Ebede ke ndikot Bible, Wilner ama edifiọk nte ke enyịn̄ Abasi edi Jehovah