Owo Isọn̄ke Ikaha Ndikpep N̄kpọ

KSENIYA akamana ke 1897. Enye ekenyene nditọiban 3, eyeneren kiet, nditọ nditọ 15, ye nditọ nditọ-nditọ 25. Ke ofụri uwem esie enye akanam se ete ye eka esie ẹkekpepde enye. Okposụkedi enye okotode Abkhaz Republic oro ekọn̄ akan̄wanade, emi odude ke ufọt ufọt Obubịt Inyan̄ ye Caucasus, edidụn̄ ke Moscow nte oyom ubọhọ ke esenidụt, enye ama enen̄ede okop uyụhọ ke uwem esie, akpan akpan ye se enye okokotde ido ukpono mme ete mi.

Ke 1993, Meri eyenan̄wan Kseniya ama akabade edi kiet ke otu Mme Ntiense Jehovah. Meri ama ọtọn̄ọ nditịn̄ nnọ Kseniya mban̄a Jehovah Abasi ye Bible, edi enye ikamaha ndikpan̄ utọn̄. Kseniya ama aka iso ndidọhọ enye ete, “Ini ebe akaha ami ndikpep obufa n̄kpọ.”

Kpa ye oro, Meri eyenan̄wan esie; Londa n̄wan eyeyen esie; ye nditọ nditọ-nditọ esie Nana ye Zaza, oro kpukpru ẹma ẹkekabade ẹdi Mme Ntiense Jehovah, ẹma ẹka iso nditịn̄ nnọ enye mban̄a Bible. Mbubịteyo usen kiet ke 1999, mmọ ẹma ẹkot itie N̄wed Abasi kiet ẹnọ Kseniya oro okotụkde enye esịt. Itien̄wed oro ama esịne mme okopodudu ikọ oro Jesus eketịn̄de ọnọ mme anam-akpanikọ apostle ke ini enye ọkọtọn̄ọde Udia Mbubịteyo Ọbọn̄. (Luke 22:19, 20) Ke edide isua 102 ke emana, Kseniya ama ebiere nditọn̄ọ ndikpep Bible ke mbubịteyo oro.

Kseniya ọdọhọ ete: “Ke mma n̄kodu uwem ke isua 102, mmedi ndifiọk se uwem ọwọrọde ke akpatre. Idahaemi mmọfiọk nte ke idụhe n̄kpọ ndomokiet oro ọfọnde akan ndinam n̄kpọ utịbe utịbe, ima ima Abasi nnyịn, Jehovah. Ami ke nsụk n̄kokop odudu nnyụn̄ nnyene nsọn̄idem. Mmekeme ndikot n̄wed ye unana edisịne akrasi enyịn mmesinyụn̄ mbuana ifịk ifịk ye ubon mi.”

Ke November 5, 2000, Kseniya ama ana baptism. Enye ọdọhọ ete: “Idahaemi mmayak uwem mi nnọ Jehovah ndinam n̄kpọ esie ke ima. Mmesinịm mme magazine ye tract ke adan̄aemi ntiede ke itiembehe bọs oro ekperede ufọk mi. Mme iman ẹsiwak ndidi ndise mi, ndien mmesikop inemesịt ndibuana akpanikọ aban̄ade Jehovah ye mmọ.”

Kseniya odori enyịn ndikụt usen emi ‘obụkidem esie edikabarede nsek akan eke eyenọwọn̄: enye edinyụn̄ afiakde ke mme usen uyen esie.’ (Job 33:25) Edieke owo oro ama ekebe isua ikie mîkereke ke imọsọn̄ ikaha ndikpep se uwem ọwọrọde nto Bible, nso kaban̄a fi?