Ifụre Fo Ọkọn̄ọ ke Nso?

Ke ekpri obio-in̄wan̄ kiet ke Edem Usoputịn Africa, ekpri Josué ofụn̄ ubọk ọkọm ubon ye mme ufan esie ete ẹtie sụn̄-o. * Ekem enye anam isan̄ aka akwa obio ndikoyom ifụre oro okụk ọnọde. Nte ededi, ibịghike ke enye ama ekedi edisịm, idotenyịn esie ọtọn̄ọ ndikpa mfụhọ nte enye edide edifiọk ke idịghe mmemmem n̄kpọ ndisọp mforo ke akwa obio.

KE AN̄WANADE ndikpụhọde nda ekekem ye uwem akwa obio, Josué enen̄ede okụt edikpu. Akwa obio oro idịghe se enye okodoride enyịn. Kan̄a ke emi, ke enen̄ede ọdọn̄ Josué ndifiak nnyọn̄ mbịne ubon ye mme ufan esie oro enye ọkọkpọn̄de ke usụhọde obio-in̄wan̄ oro. Edi enye okop ndịk ete ke ndusụk mbon obio-in̄wan̄ oro ẹyesak imọ nsahi. Enye okop editịmede esịt ete ke ‘mmọ ẹyedọhọ ke imọ idi owo ndiọkiso, sia imọ mîkekwe unen ke akwa obio.’

Se ikam ifịnade enye ikan edi mfụhọ oro ete ye eka esie ẹdikopde. Mmọ ẹberi edem ke enye kaban̄a okụk. Ke adan̄aemi odomode ndiyọ mfịghe eke ntụk emi, Josué anam utom oro osụhọrede enye itie ke ata ediwak hour onyụn̄ ọbọ okụk oro osụhọrede akan se enye okodoride enyịn aban̄a. Ekikak utom anam enye akpa mba. Ndien ini emi odude ọnọ mme edinam Christian, emi enye adade ke ata ọsọn̄urua n̄kpọ, ọtọn̄ọ ndisụhọde nte urua kiet kiet ebede. Sia odude oyom usụn̄ ọkpọn̄ edima ubon ye n̄kani ufan esie, enye okop mfụhọ ye ndobo. Enye edikụt nte ke akwa obio inọhọ enye ifụre oro enye ekenen̄ede oyom.

Okposụkedi enyịn̄ ye ebiet ẹkpụhọrede, mfụhọ mfụhọ ifiọk n̄kpọntịbe Josué esitịbe ndien ndien. Idịghe nte ke Josué ekenyene udọn̄ ibụk ke ndiwọrọ n̄kpọn̄ ufọk—enye n̄kukụre okoyom ifụre. Enye ke esịt akpanikọ ekekere ete ke iyenyene mme ifet oro ẹfọnde ke akwa obio ikan nte inyenede ke ekpri obio-in̄wan̄ mmimọ. Edi akpanikọ, ke ndusụk ini owo ekeme ndinam idaha esie ke n̄kan̄ obụkidem ọfọn akan, edi oro idịghe ata ifụre. Emi ikedịghe ntre inọ Josué m̀mê enye ndidi ntre nnọ ata ediwak mbon eken oro ẹdomode ukem n̄kpọ oro. Emi anam nnyịn ibụp ite, ‘Nso idi ifụre?’

Nsio nsio owo ẹse ifụre ke nsio nsio usụn̄. N̄wed ukabadeikọ kiet ọdọhọ ete ke ifụre edi “ubọhọ n̄kpọndịk” m̀mê “edibọhọ ndịk m̀mê editịmede esịt.” Ata ediwak owo ẹfiọk ẹte ke owo ikemeke ‘ndibọhọ n̄kpọndịk’ ofụri ofụri mfịn. Mmọ ẹkop uyụhọ ama akam edi mmọ ẹdu ke ifụre, kpa ye ndiọi idaha oro ẹkemede ndikan mmọ n̄kụk.

Nso kaban̄a fi? M̀mọ̀n̄ ke afo esika okoyom ifụre? Ndi ẹkụt enye ke akwa obio utu ke obio-in̄wan̄, nte Josué ekekerede? Mîdịghe ndi ẹkụt enye ke okụk, inamke n̄kpọ m̀mê m̀mọ̀n̄ m̀mê didie ke afo ekeme ndinyene enye? Ndi ẹkeme ndikụt enye ke ndinyene akamba itie ke n̄kaowo? Inamke n̄kpọ m̀mê m̀mọ̀n̄ ke afo ekere ke imekeme ndinyene ifụre, ifụre oro edibịghi adan̄a didie ọnọ fi ye ubon fo?

Ẹyak nnyịn ikere iban̄a usụn̄ ita oro ediwak owo ẹyomde ifụre—akpan ebiet; okụk; idaha. Ekem nnyịn iyodụn̄ọde ebiet emi ata ifụre oro ebịghide otode.

[Ikọ idakisọn̄]