Mme Mbụme Ẹtode Mme Andikot

Ndi odot ndibọn̄ akam nnọ Abasi ye unana edida mme ikọ nte “ke enyịn̄ Jesus”?

Bible owụt ete ke mme Christian oro ẹyomde ndibọn̄ akam nnọ Jehovah ẹkpenyene ndinam ntre ke enyịn̄ Jesus. Jesus ọkọdọhọ mme mbet esie ete: “Owo baba kiet itieneke Ete, ibọhọke ebe ke Ami.” Enye ama adian do ete: “Nyonyụn̄ nnam n̄kpọ ekededi eke mbufo ẹdiben̄ede ke enyịn̄ Mi, man Ete enyene ubọn̄ ke Eyen. Edieke mbufo ẹben̄ede n̄kpọ ke enyịn̄ Mi, nyanam.”—John 14:6, 13, 14.

Ke etịn̄de aban̄a anana-mbiet idaha Jesus, Cyclopedia of Biblical, Theological, and Ecclesiastical Literature ọdọhọ ete: “Owo oro ẹbọn̄de akam ẹnọ edi Abasi kpọt, ebe ke Jesus Christ nte Esịne-Ufọt. Ke ntre, kpukpru n̄kpeubọk oro ẹnamde ẹnọ ndisana owo m̀mê mme angel inyeneke ufọn onyụn̄ edi n̄kpọ isụn̄i. Kpukpru edituak ibuot nnọ edibotn̄kpọ, inamke n̄kpọ m̀mê edibotn̄kpọ oro okpon itie adan̄a didie, edi ukpono ndem, ndien ẹnen̄ede ẹkpan emi ke edisana ibet Abasi.”

Nso edieke owo, ke ama ekenyene ata eti ifiọk n̄kpọntịbe, ọdọhọde ete, “Jehovah sọsọn̄ọ” ye unana edidian “ke enyịn̄ Jesus”? Nte emi akpakwan̄a? Inen̄ekede idi ntre. Yak idọhọ ke Christian osobo n̄kpọndịk ke mbuari ndien enye ofiori ete: “Jehovah, nyan̄a mi!” Ọkpọsọsọn̄ Abasi ndisịn ndin̄wam koro asan̄autom esie mîkọdọhọke “ke enyịn̄ Jesus.”

Nte ededi, ẹkpenyene nditịm mfiọk nte ke ikpîkpu editịn̄ ikọ uyo ọwọrọ idem ẹtịn̄de ẹnọ Abasi ikam inamke oro ke idemesie edi akam. Ke uwụtn̄kpọ, ke Jehovah ama ekebiere ikpe ọnọ enye ke ndikowot eyeneka esie Abel, Cain ama ọdọhọ ete: “Ufen mi okpon akan mi ndibiom. Sese afo ke ebịn mi ke idụt emi efep mfịn emi; nyonyụn̄ ndịbe fi ke iso; nnyụn̄ ndi nyon̄ ye andiyo ke isọn̄; ndien ama ekem, kpukpru owo eke ẹkụtde mi ẹyewot mi.” (Genesis 4:13, 14) Okposụkedi Cain eketịn̄de ikọ esie ọnọ Jehovah, ediwụt ntụk esie emi ekedi eseme kaban̄a ndotndot utịp idiọkn̄kpọ.

Bible asian nnyịn ete: “Abasi ọbiọn̄ọ mbon iseri, edi ọnọ mbon nsụhọde-idem mfọn.” Nditịn̄ ikọ ye Ata Edikon̄ nte ẹmade-ma, nte n̄kpọ eke enye edide ikpîkpu owo ekpenen̄ede owụt unana nsụhọdeidem. (James 4:6; Psalm 47:2; Ediyarade 14:7) Ekpedi edu unana ukpono n̄ko ndifiọk se Ikọ Abasi etịn̄de aban̄a udeme oro Jesus enyenede edi nnyịn ikokoi ibọn̄ akam ye unana edinọ Jesus Christ ukpono.—Luke 1:32, 33.

Emi iwọrọke ite ke Jehovah oyom ida akpan usụn̄ ubọn̄ akam kiet ke ini ibọn̄de akam. Akpan n̄kpọ oro ẹyomde edi idaha esịt owo. (1 Samuel 16:7) Ke akpa isua ikie E.N., akwa owoekọn̄ Rome oro ekekerede Cornelius ‘ama esibọn̄ akam ọnọ Abasi kpukpru ini.’ Cornelius, owo Gentile emi mînaha mbobi, ikayakke idem inọ Jehovah. Okposụkedi mîtiehe nte ke enye ọkọbọn̄ akam esie ke enyịn̄ Jesus, mmọ ‘ẹma ẹdọk ke iso Abasi nte n̄kpọ editi.’ Ntak-a? Koro ‘andidomo esịt owo,’ ama okụt nte ke Cornelius ekedi “owo emi eten̄ede Abasi onyụn̄ abakde Abasi.” (Utom 10:2, 4; Mme N̄ke 17:3) Ke ama ekedinyene ifiọk aban̄a “Jesus eyen Nazareth,” Cornelius ama ọbọ edisana spirit onyụn̄ akabade edi mbet Jesus oro anade baptism.—Utom 10:30-48.

Ke akpatre, idịghe mme owo ẹnyene ndibiere m̀mê akam ewe ke Abasi esikop. Edieke Christian ke ndusụk idaha eketịn̄de ikọ ọnọ Abasi onyụn̄ efrede ndida mme utọ ikọ nte “ke enyịn̄ Jesus,” ufọn ididụhe enye ndibiom idemesie ikpe. Jehovah enen̄ede ọfiọk mme mmeme nnyịn onyụn̄ oyom ndin̄wam nnyịn. (Psalm 103:12-14) Nnyịn imekeme nditịm nnịm nte ke edieke nnyịn ibuọtde idem ke “Eyen Abasi . . . , edieke nnyịn iben̄ede n̄kpọ ekededi nte ekemde ye uduak Esie, Enye [ọyọbiọn̄] utọn̄ ke eben̄e nnyịn.” (1 John 5:13, 14) Nte ededi, akpan akpan ke ini ẹbọn̄de akam an̄wan̄wa ke ibuot mmọ efen, mme ata Christian ẹsiwụt ke imọdiọn̄ọ udeme oro Jesus enyenede ke uduak Jehovah nte N̄wed Abasi osiode owụt. Ndien mmọ ke n̄kopitem ẹsidomo ndikpono Jesus ebe ke ndibọn̄ akam nnọ Abasi ebe ke enye.