Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Nso ọkpọkpọ ndutịm abuanade Ukwọrọikọ oro ke Obot ke afo ekeme ndida nnam n̄kpọ man osụhọde mfịghe?

Ke usen kiet kiet, afo emekeme ndikot kiet ke otu akpan ukpepn̄kpọ Jesus oro ẹwụtde ke ukwọrọikọ oro m̀mê ke itie en̄wen ke mme Gospel. Ebede ke nditie n̄kere ukpepn̄kpọ oro nnyụn̄ nyom ndida enye nsịn ke edinam, eyedi afo oyokụt nte inemesịt fo okponde ndien mfịghe fo oyosụhọde.—12/15, page 12-14.

• Nso idi nti ntak ita oro anade mbiowo esop ẹkpep mme asan̄autom unamutom ndibiom mme mbiomo efen efen?

Ke ntak n̄kọri ke ibat Mme Ntiense Jehovah, ẹyom iren efen efen emi ẹdotde man ẹn̄wam mbon oro ẹnade baptism obufa ndinam n̄kọri. Usọn̄ m̀mê mfịna unana nsọn̄idem osụhọde se ndusụk mbiowo oro ẹnamde utom ke anyan ini ẹkemede ndinam idahaemi. Ndien ndusụk mbiowo oro ẹnyenede ukeme ẹbiom mme mbiomo oro ọwọrọde ọkpọn̄ mme mbiomo esop n̄kann̄kụk, ntre ekeme ndidi mmọ idikemeke ndinam ekese ke esop mmọ nte ẹkesinamde ke mbemiso.—1/1, page 29.

• Didie ke mme owo ẹbuọt idem ke mme abasi oro mîdịghe ata Abasi?

Ediwak owo ẹtuak ibuot ẹnọ mme abasi ido ukpono mmọ, edi mmọ emi ẹkeme ndikam ndi mme anana-uwem abasi oro mîkemeke ndinyan̄a ukem nte Baal mîkekemeke ndinyan̄a ke eyo Elijah. (1 Ndidem 18:26, 29; Psalm 135:15-17) Mbon en̄wen ẹtuak ibuot ẹnọ mbon edinam unọ idem inemesịt m̀mê mme ọwọrọiso ke mbre mbuba, emi mîkemeke ndinọ ata idotenyịn ekededi kaban̄a ini iso. Ke edide isio, Jehovah enen̄ede odu esinyụn̄ osu mme uduak esie.—1/15, page 3-5.

• Nso ke nnyịn ikeme ndikpep nto usụn̄ nte Cain akanamde n̄kpọ aban̄a item Abasi?

Abasi ọnọ nnyịn ifụre edimek, ndien nnyịn imekeme ndimek ndinam se inende utu ke ndiwọn̄ọde n̄kpọn̄ edinam eti n̄kpọ, emi edide usụn̄ emi Cain akanamde n̄kpọ. Mbụk Bible oro owụt n̄ko ete ke Jehovah esibiom mbon oro mîkabakede esịt ikpe.—1/15, page 22-23.

• Ntak emi usanaidem enen̄erede edi akpan n̄kpọ idahaemi?

Ke ntak emi usụn̄ uwem n̄kaowo akade-ka iso ndikpụhọde, ediwak owo ẹbiat esisịt ini ndinam ufọk mmọ asana nte ẹkesinamde. Ndifụmi usanaidem ke se iban̄ade udia ye mmọn̄ ekeme ndisịn nsọn̄idem ke itiendịk. Ke adianade ye usanaidem eke ikpọkidem, Bible odori nsọn̄uyo ke edinọ ntịn̄enyịn ke usanaidem eke spirit, ido uwem, ye ekikere.—2/1, page 3-6.

• Kaban̄a mme ntiense oro ẹkedude mbemiso eyo mme Christian, Paul ọkọdọhọ ete ke owo “ikemeke ndinam mmọ ẹfọn ẹma ke nnyịn mîdụhe.” Didie ke edi ntre? (Mme Hebrew 11:40)

Ke Tọsịn Isua oro edide, Christ ye nditọete esie oro ẹyetde aran emi ẹdude ke heaven, oro ẹnamde n̄kpọ nte ndidem ye mme oku, ẹyeda mme ufọn uwa ufak ẹsọk mbon oro ẹnamde ẹset ke n̄kpa. Ntem, ẹyenam utọ mme anam-akpanikọ nte mbon oro ẹsiakde ke Mme Hebrew ibuot 11 “ẹfọn ẹma.”—2/1, page 23.

• Nso ke ikọ Paul ọkọwọrọ ke ini enye ọkọdọhọde mbon Hebrew ete: “Mbufo ikan̄wanake kan̄a tutu ẹduọk iyịp”? (Mme Hebrew 12:4)

Ikọ esie ọkọwọrọ ndin̄wana tutu esịm n̄kpa. Mme uwụtn̄kpọ eke eset ẹma ẹdu ẹban̄ade mbon oro ẹkenamde akpanikọ tutu ẹsịm n̄kpa. Okposụkedi owo mîkodomoke mbon Hebrew oro Paul ekewetde n̄wed emi ọnọ ikesịm utọ udomo oro, ama oyom mmọ ẹkọri ẹsịm ọyọhọ idaha, ẹnamde mbuọtidem mmọ ọsọn̄ man ẹyọ n̄kpọ ekededi oro ekemede ndisịm mmọ.—2/15, page 29.

• Ntak ọfọnde ndifep ndidọhọ nte ke mbọm Jehovah akara unenikpe esie?

Ke ndusụk usem, “kara” ekeme ndiwọrọ ndinam emem m̀mê ndibiọn̄ọ. Jehovah edi Abasi unenikpe ye mbọm, ndien enye owụt edu mbiba oro ukem ukem. (Exodus 34:6, 7; Deuteronomy 32:4; Psalm 116:5; 145:9) Iyomke ẹnam unenikpe Jehovah emem m̀mê edi se mbọm akarade.—3/1, page 30.

• Nte enen Christian nditịm okpo andibuana ke ubon nnịm?

Editịm okpo nnịm edi usụn̄ edise mban̄a okpo mbak edibiara. Ndusụk mbon eset ẹketiene edinam emi ke mme ntak ido ukpono. Oro ikpenyeneke ndidi ntre ye mme ata andituak ibuot. (Ecclesiastes 9:5; Utom 24:15) Editịm okpo nnịm edikam esịk se owo mîkemeke ndifep enịm, okpo oro ndifiak ke ntan. (Genesis 3:19) Edi ufọn idụhe nditịmede esịt edieke ibet oyomde ẹtịm okpo ẹnịm, ndusụk mbonubon ẹyomde ẹnam enye, m̀mê ẹyomde ẹnam koro ndusụk owo ẹditode anyan usụn̄ ẹdi ubụkowo.—3/15, page 29-31.

• Mme uwụtn̄kpọ Bible ewe ẹkpep nnyịn nte ke Abasi adadara mme owo ẹtode kpukpru idụt?

Jehovah ama ọdọn̄ prọfet Jonah nditọt mbon Nineveh, ndien Abasi ama akpak Jonah ndinyịme edikabade esịt mmọ. Ke ikọ ye ke uwụtn̄kpọ, Jesus ama esịn udọn̄ ọnọ ediwụt mbon Samaria ima. Apostle Peter ye Paul ẹma ẹnyene udeme ke ndida eti mbụk nsọk mbon oro mîkedịghe mme Jew. Otode mme utọ uwụtn̄kpọ emi, nnyịn imekeme ndikụt ufọn oro odude ke ndidomo ndin̄wam mme owo ẹtode kpukpru idụt.—4/1, page 21-24.