Ẹbiomo Ndo ke Kpukpru Ebiet
Ẹbiomo Ndo ke Kpukpru Ebiet
MBONEKỌN̄ ẹma ẹmụm Christian, emi odụn̄de ke idụt kiet ke Africa, ẹnyụn̄ ẹdomo ndinyịk enye odụk ekọn̄, edi enye ikenyịmeke ke ntak ubieresịt esie oro Bible ọnọde ukpep. Ekem mbonekọn̄ oro ẹma ẹda enye ẹka itienna mbonekọn̄, ebiet emi owo mmọ kiet akadade ikan̄ otop enye ukot ke ẹma ẹketịm enye ke usen inan̄. Christian ama odomo ukeme ekesịm ufọkibọk, edi ẹkenyene ndisịbe ukot esie ke edọn̄ mfep. Ke idụt efen ke Africa, mbon oro ẹsọn̄de ibuot ye ukara, oro ẹkamade n̄kpọ en̄wan, ẹma ẹkam ẹkpok nditọwọn̄ ubọk. Ndien ọtọn̄ọde ke Cambodia tutu esịm Balkans, ọtọn̄ọde ke Afghanistan tutu esịm Angola, mme bọmb oro ẹbụkde ke isọn̄ ke ẹka iso ndibiomo n̄kpri ye ikpọ owo ndo ntịme ntịme.
Mme n̄kpọ efen oro ẹbiomode owo ndo ẹdi mbabuat n̄kpọntịbe ye udọn̄ọ, utọ nte udọn̄ọ ikịm an̄wan n̄kụhọ. Idem mme ibọk n̄kpa ke n̄kann̄kụk ẹkeme ndida nsịm edibiomo ndo. Ke uwụtn̄kpọ, ke mme obio oro ẹdude ẹkpere kiet eken ke n̄kan̄ Edem Usiahautịn Europe, ediwak nditọwọn̄ ẹmana ye unana edinyene ubọk kiet. Mmọ ẹnyene sụk ibio ubọk. Uyarade owụt nte ke emi oto nsenubon emi usabaden̄kpọ mmọn̄ibọk ama akabiat. Anana-ibat mbon efen ẹsụk ẹnyenyene kpukpru ubọk mmọ edi ẹbiomo ndo ke ntak udọn̄ọ akpauben̄ m̀mê ndusụk udọn̄ọ efen. Ke akpanikọ, ẹbebiomo ndo ke kpukpru ebiet.
Inamke n̄kpọ m̀mê nso idi ntak, edibiomo ndo ekeme ndikama ubiak. Junior akataba ukot ufien ke ini enye ekedide isua 20 ke emana. Enye ọkọdọhọ ke ukperedem ete: “Mma nnyene ekese mfịna eke ntụk. Mma nsitua eyet ediwak ini ke ndifiọk nte ke ndifiakke nnyene ukot aba tutu amama. N̄kọfiọkke se n̄kpanamde. Ekikere ama etịmede mi.” Edi, nte ini akakade edu Junior ama okpụhọde akamba akamba. Enye ama ọtọn̄ọ ndikpep Bible onyụn̄ edi edifiọk mme n̄kpọ oro mîkan̄wamke enye ndiyọ kpọt edi n̄ko ẹkenọde enye utịbe utịbe idotenyịn inem inem ini iso ke isọn̄ emi. Edieke afo obiomode ndo, nte afo akpama ndinyene ukem idotenyịn oro?
Ke edide ntre, do mbọk kot ibuotikọ oro etienede. Nnyịn imesịn udọn̄ inọ fi ndida Bible fo n̄kot mme itie N̄wed Abasi oro ẹsiakde ẹdọn̄ man afo ekeme ndikụt ke idemfo se Andibot enịmde ọnọ mbon oro ẹkpepde ẹban̄a uduak esie ẹnyụn̄ ẹdude uwem ẹkekem ye uduak oro.