Anie Edibọhọ Usen Jehovah?
Anie Edibọhọ Usen Jehovah?
“Usen oro ke edi, ke asak nte usan̄-uyo.”—MALACHI 4:1.
1. Didie ke Malachi etịn̄ aban̄a utịt idiọk editịm n̄kpọ emi?
ABASI ama ọnọ prọfet Malachi odudu spirit ndiwet ntịn̄nnịm ikọ aban̄ade mme enyene-uten̄e n̄kpọntịbe oro ẹdidade itie ke ata n̄kpet n̄kpet ini iso. Mme n̄kpọntịbe emi ẹyetụk kpukpru owo ke isọn̄. Malachi 4:1 ebem iso etịn̄ ete: “Sese, usen oro ke edi, ke asak nte usan̄-uyo: ndien kpukpru mbon iseri, ye kpukpru mme anam idiọk ẹyekabade ẹdi etak nnyanyan̄a: ndien usen eke edidide ayata mmọ, Jehovah mme udịm ọdọhọ, emi mîdisụhọke orụn̄ mîdinyụn̄ isụhọke n̄kọk inọ mmọ.” Nsobo idiọk editịm n̄kpọ emi edikpon adan̄a didie? Enye editie nte eto emi ẹkesịbede mme orụn̄ ofụri ofụri ẹfep man enye okûfiak ọkọri tutu amama.
2. Didie ke ndusụk itie N̄wed Abasi ẹtịn̄ ẹban̄a usen Jehovah?
2 Afo emekeme ndibụp ete, ‘Nso “usen” ke prọfet Malachi ebem iso etịn̄ aban̄a mi?’ Enye edi ukem usen oro ẹtịn̄de ẹban̄a ke Isaiah 13:9, emi ọdọhọde ete: “Sese, usen Jehovah ọmọn̄ edi, mbọm idụhe, enye akpahesịt, iyatesịt asak nte ikan̄, man enịm isọn̄ ke n̄wụre; ndien enye oyosobo mme idiọk owo mmọ efep ke esịt.” Zephaniah 1:15 etịn̄ aban̄a emi ete: “Usen ifụtesịt edi usen oro: usen ukụt ye nnan-enyịn, usen n̄wụre ye nsobo, usen ekịm ye okoneyo, usen obubịt enyọn̄ ye ata ekịm.”
“Akwa Ukụt”
3. Nso idi “usen Jehovah”?
3 Ke akpan edisu ntịn̄nnịm ikọ Malachi oro, “usen Jehovah” edi iduọk ini oro ẹdade “akwa ukụt” ẹdiọn̄ọ. Jesus ama ebem iso etịn̄ ete: “Ke ini oro akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Kere ban̄a adan̄a nnanenyịn oro ererimbot okụtde, akpan akpan toto ke 1914. (Matthew 24:7-12) Kamse, Ekọn̄ Ererimbot II kpọt ama ada se ibede uwem miliọn owo 50! Edi, mme n̄kpọntịbe oro ẹdikponde ẹkan mme utọ afanikọn̄ oro ẹyetịbe ke “akwa ukụt.” N̄kpọntịbe oro, ukem nte usen Jehovah, edisịm utịt ke Armageddon, adade ukperedem ini eke idiọk editịm n̄kpọ emi ekesịm utịt.—2 Timothy 3:1-5, 13; Ediyarade 7:14; 16:14, 16.
4. Nso iditịbe ke ini usen Jehovah edisịmde utịt?
4 Etisịm utịt usen Jehovah oro, ẹyesọhi ererimbot Satan ye mme andida nnọ enye ẹfep. Akpa n̄kpọ oro edibede ifep edidi kpukpru nsunsu ido ukpono. Ekem Jehovah eyebiere ikpe ọnọ ndutịm unyamurua ye ndutịm ukaraidem Satan. (Ediyarade 17:12-14; 19:17, 18) Ezekiel etịn̄ ntịn̄nnịm ikọ ete: “Mmọ ẹyemen silver mmọ ẹduọk ke esien; gold mmọ ẹyenyụn̄ ẹkabade ẹdi ndek: silver mmọ ye gold mmọ idikemeke ndinyan̄a mmọ ke usen ifụtesịt Jehovah.” (Ezekiel 7:19) Kaban̄a usen oro, Zephaniah 1:14 ọdọhọ ete: “Akwa usen Jehovah emekpere, emekpere, oyonyụn̄ ọsọp eti-eti.” Ke ikerede iban̄a se Bible etịn̄de aban̄a usen Jehovah, nnyịn ikpenyene ndibiere ndinam n̄kpọ ke n̄kemuyo ye ndinen n̄kpọ oro Abasi oyomde.
5. Nso ke mbon oro ẹbakde enyịn̄ Jehovah ẹnyene?
5 Ke ama ekebem iso etịn̄ se usen Jehovah edinamde ye ererimbot Satan, Malachi 4:2 ewet nte Jehovah ọdọhọde ete: “Utịn edinen ido asiaha ọnọ mmọ: se inamde itọn̄ uwem ọsọn̄ọ onyụn̄ odu enye ke mba; ndien mbufo ẹyewọn̄ọ ẹkefrọ nte nditọ-enan̄ n̄kụhọ.” Jesus Christ edi “utịn edinen ido.” Enye edi “un̄wana ererimbot,” ke n̄kan̄ eke spirit. (John 8:12) Jesus asiaha ayama man anam udọn̄ọ okụre, akpa kan̄a anam udọn̄ọ eke spirit okụre, emi nnyịn ikụtde mfịn, ndien ekem ayanam kpukpru udọn̄ọ eke ikpọkidem ẹkụre ke obufa ererimbot. Nte Jehovah ọdọhọde, mbon oro ẹnamde itọn̄ uwem ọsọn̄ “ẹyewọn̄ọ ẹkefrọ nte nditọ-enan̄ n̄kụhọ” oro ẹkopde nduaidem ye idatesịt ndiwọrọ ke ọkọ.
6. Usọrọ edikan ewe ke mme asan̄autom Jehovah ẹdibuana?
6 Nso kaban̄a mbon oro ẹfụmide mme n̄kpọ oro Jehovah oyomde. Malachi 4:3 ọdọhọ ete: “Mbufo [mme asan̄autom Abasi] ẹyedịghi mme idiọk owo; koro mmọ ẹyebiet ntọn̄ ke idak ikpat ukot mbufo, ke usen eke ami ndinamde, Jehovah mme udịm ọdọhọ.” Mme andituak ibuot nnọ Abasi oro ẹdide mme owo iditieneke ibuana ke ndisobo ererimbot Satan. Utu ke oro, mmọ ke ndamban̄a usụn̄ ‘ẹdidịghi mme idiọk owo’ ke ndibuana ke usọrọ edikan oro editienede usen Jehovah. Akwa usọrọ ama etiene nsobo udịmekọn̄ Pharaoh ke Ididuot Inyan̄. (Exodus 15:1-21) Kpasụk ntre usọrọ edikan eyetiene nsobo Satan ye ererimbot esie ke akwa ukụt. Mme anam-akpanikọ andibọhọ usen Jehovah ẹyefiori ẹte: “Iyadara inyụn̄ ibre mbre iban̄a edinyan̄a esie.” (Isaiah 25:9) Nso idara edidu ntem ke ini ẹdiwụtde unen itie edikara Jehovah ẹnyụn̄ ẹnam isọn̄ asana man ẹdụn̄ ke emem!
Christendom Ekpebe Israel
7, 8. Tịn̄ ban̄a idaha eke spirit Israel ke eyo Malachi.
7 Mbon oro ẹdide ẹdinyene eti itie ebuana ye Jehovah ẹdi mbon oro ẹnamde n̄kpọ ẹnọ enye, ndien emi idịghe ntre ye mbon oro mînamke n̄kpọ inọ enye. Ukem oro ke ekedi ke ini Malachi ekewetde n̄wed esie. Ke 537 M.E.N., ẹma ẹfiak ẹtan̄ nsụhọ Israel ẹbok ke ntan̄mfep Babylon eke isua 70 ama ekebe. Nte ededi, ke se ikande isua ikie oro eketienede, idụt oro ẹketan̄de ẹbok mi ama ọduọ odụk nsọn̄ibuot ye idiọkido. Ata ediwak owo ẹma ẹsuene enyịn̄ Jehovah; ẹfụmi ndinen ibet esie; ẹsabade temple esie ke ndida mme unam emi ẹdide nnan, mbụn̄ọ, eke ẹnyụn̄ ẹdọn̄ọde ndiwa uwa; ẹnyụn̄ ẹsion̄o iban uyen mmọ ndọ.
8 Ntem, Jehovah ama asian mmọ ete: “Ami nyasan̄a n̄kpere mbufo ke ikpe, nnyụn̄ nnịm owowo ntiense mban̄a mbia-idiọn̄ ye mme esịn efịbe, ye mmọ eke ẹn̄wọn̄ọde nsu, ye mmọ eke ẹtụkde anamutom ke utịp esie, ẹtụk ebe-akpa ye eyen-akpa, emi ẹnyụn̄ ẹfịkde esen owo, ndien mîbakke mi . . . Koro ami ndide Jehovah, n̄kpụhọkede.” (Malachi 3:5, 6) Kpa ye oro, Jehovah ama ọnọ owo ekededi oro ọkọwọn̄ọrede ọkpọn̄ mme idiọk usụn̄ ikot, ete: “Mbufo ẹkabade ẹtiene mi, ndien ami nyakabade ntiene mbufo.”—Malachi 3:7.
9. Didie ke mme ntịn̄nnịm ikọ Malachi ẹkenyene akpa edisu?
9 Mme ikọ oro n̄ko ẹma ẹnyene edisu ke akpa isua ikie E.N. Nsụhọ mme Jew ẹma ẹnam n̄kpọ Jehovah ẹnyụn̄ ẹkabade ẹdi ubak obufa “idụt” eke mme Christian emi ẹyetde aran ke spirit, emi ekedide edisịne mme Gentile. Edi n̄wakn̄kan ibat ke otu Israel eke obụk ẹma ẹsịn Jesus. Ke ntre Jesus ama ọdọhọ idụt Israel oro ete: “Sese, ẹyak ufọk mbufo ẹkpọn̄ ẹnọ mbufo nte ndon.” (Matthew 23:38; 1 Corinth 16:22) Ke isua 70 E.N., nte ẹkebemde iso ẹtịn̄ ke Malachi 4:1, ‘usen oro asakde nte usan̄uyo’ ama edisịm Israel eke obụk. Ẹma ẹsobo Jerusalem ye temple esie, ndien ẹtọt ẹte ke se ibede owo miliọn kiet ẹma ẹkpan̄a ke ntak akan̄, en̄wan ubọ ukara nda, ye en̄wan oro udịmekọn̄ Rome akadade edi. Nte ededi, mbon oro ẹkenamde n̄kpọ ẹnọ Jehovah ẹma ẹbọhọ ukụt oro.—Mark 13:14-20.
10. Ke nso usụn̄ ke mme owo ke ofụri ofụri ye mme ọkwọrọ ederi ẹkpebe Israel akpa isua ikie?
10 Ubonowo, ndien akpan akpan Christendom, emekpebe idụt Israel eke akpa isua ikie. Mme adausụn̄ ye mme owo ke ofụri ofụri ke Christendom ẹma mme edinịm ke akpanikọ ido ukpono ẹkan akpanikọ Abasi oro Jesus ekekpepde. Mme ọkwọrọ ederi ẹnyene nduduọhọ akpan akpan. Mmọ ẹsịn ndida enyịn̄ Jehovah, idem ẹsiode enye ẹfep ke mme edikabade Bible mmọ. Mmọ ẹda mme ukpepn̄kpọ oro mîkemke ye N̄wed Abasi ẹsuene Jehovah, utọ nte ukpepn̄kpọ nsinsi ndutụhọ ke ikan̄ hell oro mme okpono ndem ẹkpepde, ukpepn̄kpọ Abasi-Ita-ke-Kiet, ukpọn̄ ikpaha ke nsinsi, ye edito ke unam mforo owo. Mmọ ke ntem ẹsịn ndinọ Jehovah itoro oro enye odotde, kpa nte mme oku ẹkesịnde ndinọ ke eyo Malachi.
11. Didie ke mme ido ukpono ererimbot ẹwụt owo oro mmọ ẹnen̄erede ẹnam n̄kpọ ẹnọ?
11 Ke ukperedem ini ama ọkọtọn̄ọ ke 1914, mme ido ukpono ererimbot emi, oro mbon oro ẹdọhọde nte idide Christian ẹdade usụn̄, ẹma ẹwụt owo emi mmọ ẹnen̄erede ẹnam n̄kpọ ẹnọ. Ke ini ekọn̄ ererimbot mbiba, mmọ ẹma ẹsịn udọn̄ ẹnọ mme andibuana ke otu mmọ ndika ekọn̄ ke ntak utọk mme idụt, idem ọkpọkọm oro ọkọwọrọ ndiwot mbon ido ukpono mmọ. Ikọ Abasi enen̄ede anam ẹdiọn̄ọ mbon oro ẹsụkde ibuot ẹnọ Jehovah ye mbon oro mîsụkke: “Ẹda emi ẹyarade ẹfiọk nditọ Abasi ye nditọ Satan; baba owo kiet eke mînamke edinen ido idịghe eke Abasi, ndien edi ntre ye owo emi mîmaha eyenete esie. Koro emi edi etop emi mbufo ẹkekopde toto ke editọn̄ọ, ẹte, nnyịn ikpama kiet eken; ikûbiet Cain, emi ekedide eke andidiọk, onyụn̄ owotde eyenete esie.”—1 John 3:10-12.
Ndisu Ntịn̄nnịm Ikọ
12, 13. Mme ntịn̄nnịm ikọ ewe ke mme asan̄autom Abasi ẹsu ke eyo nnyịn?
12 Etisịm utịt Ekọn̄ Ererimbot I ke 1918, mme asan̄autom Jehovah ẹma ẹkeme ndikụt nte ke Abasi ama obiom Christendom ọkọrọ ye kpukpru nsunsu ido ukpono eken, ikpe. Ọtọn̄ọde ke ini oro ka iso, ẹma ẹnọ mbon oro ẹnyenede eti esịt ikot ẹte: “Mbufo ikọt Mi, ẹwọn̄ọ ke esịt, mbak mbufo ẹdibuana ke idiọk-n̄kpọ esie, ẹdinyụn̄ ẹtiene ẹbọ mme ufen esie; koro mme idiọk-n̄kpọ esie ẹma ẹboho ẹkon̄ ẹsịm enyọn̄, Abasi omonyụn̄ eti mme ukwan̄n̄kpọ esie.” (Ediyarade 18:4, 5) Ẹma ẹtọn̄ọ ndinam mbon oro ẹkeyomde ndinam n̄kpọ Jehovah ẹsana ẹbọhọ mme idiọn̄ọ nsunsu ido ukpono, ndien mmọ ẹma ẹtọn̄ọ ndikwọrọ eti mbụk Obio Ubọn̄ oro ẹma ẹkewụk ke ofụri ererimbot, kpa utom oro anade ẹkụre mbemiso utịt idiọk editịm n̄kpọ emi edide.—Matthew 24:14.
13 Emi ekedi man ẹsu ntịn̄nnịm ikọ oro odude ke Malachi 4:5, emi Jehovah ọkọdọhọde ete: “Sese, ami nyọdọn̄ prophet Elijah utom ke ọtọ mbufo, ke akwa ye ndịk-ndịk usen Jehovah.” Ntịn̄nnịm ikọ oro ekenyene akpa edisu ke utom John Andinịm owo baptism, emi Elijah akadade aban̄a. John akanam utom oro ebietde eke Elijah ke ini enye ekenịmde mme Jew oro ẹkekabarede esịt ẹkpọn̄ idiọkn̄kpọ oro mmọ ẹkenamde ẹbiat Ibet ediomi, baptism. Ke edide akpan n̄kpọ akan, John ekedi andibem Messiah iso. Nte ededi, utom John ekedi sụk akpa edisu ntịn̄nnịm ikọ Malachi. Ke adan̄aemi eketịn̄de aban̄a John nte udiana Elijah, Jesus ama owụt nte ke ẹyenam utom “Elijah” ke ini iso.—Matthew 17:11, 12.
14. Nso akpan utom ke ana ẹnam mbemiso editịm n̄kpọ emi esịmde utịt?
14 Ntịn̄nnịm ikọ Malachi ama owụt nte ke ẹdinam akwa utom Elijah emi mbemiso “akwa ye ndịk-ndịk usen Jehovah.” Usen oro edisịm utịt ke ekọn̄ akwa usen Abasi Andikara kpukpru n̄kpọ oro asan̄ade ekpere usọp usọp, ke Armageddon. Emi ọwọrọ ete ke ẹyenam utom ebietde eke Elijah mbemiso utịt idiọk editịm n̄kpọ emi ye ntọn̄ọ Ukara Tọsịn Isua eke Obio Ubọn̄ Abasi eke heaven ke ubọk Jesus Christ oro ẹdoride ke ebekpo. Nte ntịn̄nnịm ikọ oro owụtde, mbemiso Jehovah osobode idiọk editịm n̄kpọ emi, otu Elijah eyomfịn, oro ediwak miliọn mme ekemmọ Christian oro ẹnyenede idotenyịn eke isọn̄ ẹnọde ibetedem, ke ẹnam utom edifiak n̄wụk edisana utuakibuot ifịk ifịk ye ke ifiopesịt, ẹmenerede enyịn̄ Jehovah ke enyọn̄, ẹnyụn̄ ẹkpepde mbon mbieterọn̄ akpanikọ Bible.
Jehovah Ọdiọn̄ Mme Asan̄autom Esie
15. Didie ke Jehovah eti mme asan̄autom esie?
15 Jehovah ọdiọn̄ mbon oro ẹnamde n̄kpọ ẹnọ enye. Malachi 3:16 ọdọhọ ete: “Ndien mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, mmọ ẹnyụn̄ ẹwet n̄wed editi ke iso esie ẹnọ mme abak Jehovah ye mme ekere enyịn̄ esie.” Ọtọn̄ọde ke Abel ka iso, Abasi ke ewet enyịn̄ mbon oro enye editide edinyụn̄ ọnọde nsinsi uwem ke n̄wed, yak idọhọ ntre. Jehovah ọdọhọ mmọ emi ete: “Mbufo ẹda kpukpru ọyọhọ mbak duop ẹdisịn ke ufọk unịm-n̄kpọ, man udia odu ke ufọk mi, ndien ẹda emi ẹdomo mi, . . . m̀mê ami ndiberekede window heaven nnọ mbufo, nnyụn̄ n̄n̄wan̄a nti n̄kpọ nnọ mbufo, tutu akaha.”—Malachi 3:10.
16, 17. Didie ke Jehovah ọdiọn̄ ikọt esie ye utom mmọ?
16 Jehovah enen̄ede ọdiọn̄ mbon oro ẹnamde n̄kpọ ẹnọ enye. Didie? Usụn̄ kiet edi nte ke ẹda n̄kaiso ifiọk aban̄ade mme uduak esie ẹdiọn̄ mmọ. (Mme N̄ke 4:18; Daniel 12:10) Usụn̄ efen edi ke enye ndinọ mmọ ndyọ ndyọ utịp ke utom ukwọrọikọ mmọ. Ediwak mbon esịt akpanikọ ẹmediana ye mmọ ke utuakibuot akpanikọ, ndien mmọ emi kpukpru ẹnam ‘akwa otu owo eke ẹtode ke kpukpru obio ye esien ye idụt ye usem ẹda ke iso ebekpo ye ke iso Eyen-erọn̄ ẹnyụn̄ ẹfioride ke ọkpọsọn̄ uyo, ẹte, Yak edinyan̄a enyene Abasi nnyịn emi etiede ke ebekpo, onyụn̄ enyene Eyen-erọn̄.’ (Ediyarade 7:9, 10) Akwa otuowo emi ẹma ẹwụt idem ke utịbe utịbe usụn̄, ndien mbon oro ẹnamde n̄kpọ Jehovah ifịk ifịk idahaemi ẹwak ẹbe miliọn itiokiet ke se ibede esop 93,000 ke ofụri isọn̄!
17 Ẹkụt edidiọn̄ Jehovah n̄ko ke nte Mme Ntiense Jehovah ẹsion̄ode mme n̄wed ẹkọn̄ọde ke Bible emi ẹsuande atara akan ke ofụri mbụk. Kpukpru ọfiọn̄ idahaemi ẹmịn̄ n̄kpọ nte idem magazine Enyọn̄-Ukpeme ye Awake! miliọn 90; Enyọn̄-Ukpeme ke usem 144, Awake! ke usem 87. Ẹma ẹsuan n̄wed ukpepn̄kpọ Bible oro Akpanikö oro Adade osim Nsinsi Uwem, emi ẹkesiode ke 1969, awak ebe idem miliọn 107 ke usem 117. Afo Emekeme Ndidu Uwem ke Nsinsi ke Paradise ke Isọn̄, emi ẹkesiode ke 1983, ama ebe idem miliọn 81 ke usem 131. Kan̄a ke emi ẹmịn̄ n̄wed Ifiọk Oro Adade Osịm Nsinsi Uwem, emi ẹkesiode ke 1995, awak ebe idem miliọn 85 ke usem 154. Ẹmesuan ediye uduot ekpri n̄wed Nso ke Abasi Oyom Oto Nnyịn?, emi ẹkesiode ke 1996, ẹsịm idem miliọn 150 ke usem 244 idahaemi.
18. Ntak emi nnyịn idarade uforo eke spirit kpa ye ubiọn̄ọ?
18 Ẹdara uforo eke spirit emi kpa ye ọkpọsọn̄ ubiọn̄ọ anyan ini otode ererimbot Satan. Emi owụt nte Isaiah 54:17 edide akpanikọ: “Baba n̄kpọ ekọn̄ kiet eke ẹbotde ẹban̄a fi idikwe unen; afo oyonyụn̄ anam ikọ etịp kpukpru edeme eke ẹdahade ẹda ẹnam ikọ ye afo. Jehovah ọdọhọ ete, Emi edi udeme ikọt Jehovah, edinen ido mmọ onyụn̄ oto ye ami.” Edi n̄kpọ ndọn̄esịt didie ntem ọnọ mme asan̄autom Jehovah ndifiọk nte ke Malachi 3:17 ke enyene akpan edisu esie ke idem mmọ: “Jehovah mme udịm ọdọhọ ete, Mmọ ẹyedi ata inyene mi ke usen emi ami ndoride.”
Ndinam N̄kpọ Jehovah ke Idatesịt
19. Didie ke mbon oro ẹnamde n̄kpọ Jehovah ẹkpụhọde ye mbon oro mînamke?
19 Ukpụhọde oro odude ke ufọt mme anam-akpanikọ asan̄autom Jehovah ye mbon oro ẹdude ke ererimbot Satan ke enen̄ede ana in̄wan̄-in̄wan̄ nte ini ebede. Malachi 3:18 ama ebem iso etịn̄ ete: “Mbufo ẹyetọn̄ọ ntak ẹkụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.” Kiet ke otu ediwak ukpụhọde oro edi nte ke mbon oro ẹnamde n̄kpọ Jehovah ẹnam oro ye akwa idatesịt. Utịbe utịbe idotenyịn oro mmọ ẹnyenede esịne ke otu ntak anamde mmọ ẹkop akwa idatesịt. Mmọ ẹnyene ọyọhọ mbuọtidem ke Jehovah ke ini enye ọdọhọde ete: “Sese, mmọn̄ mbot mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt. Edi mbufo ẹdat esịt, ẹnyụn̄ ẹbre nsinsi ke se ami mbotde.”—Isaiah 65:17, 18; Psalm 37:10, 11, 29; Ediyarade 21:4, 5.
20. Ntak emi nnyịn ikopde idatesịt?
20 Nnyịn imenịm un̄wọn̄ọ Jehovah oro nte ke mme anam-akpanikọ ikọt esie ẹyebọhọ akwa usen esie ẹnyụn̄ ẹbe ẹdụk obufa ererimbot. (Zephaniah 2:3; Ediyarade 7:13, 14) Ndien ke adan̄aemi ndusụk mmọ ẹkemede ndikpan̄a mbemiso ini oro ke ntak usọn̄, udọn̄ọ, m̀mê mbabuat n̄kpọntịbe, Jehovah ọnọ nsọn̄ọ nte ke imọ iyanam mmọ ẹset ẹdidu nsinsi uwem. (John 5:28, 29; Titus 1:2) Ntre ke adan̄aemi kpukpru nnyịn inyenede mme mfịna ye mme n̄kpọ ata, nte nnyịn isakde iso ise usen Jehovah emi, nnyịn imenyene kpukpru ntak ndidi mbon emi ẹkopde idatesịt ẹkan ke isọn̄.
Afo Ọbọrọ Didie?
• Nso idi “usen Jehovah”?
• Didie ke mme ido ukpono ererimbot ẹkpebe Israel eset?
• Mme ntịn̄nnịm ikọ ewe ke mme asan̄autom Jehovah ẹsu?
• Didie ke Jehovah ọdiọn̄ ikọt esie?
[Mme Mbụme Ukpepn̄kpọ]
[Ndise ke page 21]
Jerusalem akpa isua ikie ama ‘asak nte usan̄-uyo’
[Mme ndise ke page 23]
Jehovah esinọ se mbon oro ẹnamde n̄kpọ esie ẹyomde
[Mme ndise ke page 24]
Mme asan̄autom Jehovah ẹnen̄ede ẹkop idatesịt ke ntak utịbe utịbe idotenyịn mmọ