Nte Eyen Kiet Akan̄wamde Ete Esie

JAMES, emi otode England onyụn̄ odude ke ntọn̄ọ ntọn̄ọ iduọk isua 30, ọdọn̄ọ idiọk udọn̄ọ ibuot oro okotụkde ukeme utịn̄ikọ esie. Kpa ye oro, ke ediwak isua enye ama asan̄a ye eka esie ye adiahaeka esie odụk mme mbono esop Mme Ntiense Jehovah. Nte ededi, akananam ete esie ikowụtke ọkpọsọn̄ udọn̄ ke mme edinịm ke akpanikọ mmọ. Mbubịteyo usen kiet ke mbono esop oro ẹkenamde ẹwụt nte ẹkemede ndinọ iman ikot ndidụk Editi n̄kpa Christ ama akasuana, James ama ọsọsọp aka ubet esie. Ye ọkpọsọn̄ udọn̄, eka esie ama etiene enye onyụn̄ okụt nte enye odụn̄ọrede n̄kani nsiondi magazine Enyọn̄-Ukpeme ye Awake! usọp usọp. Enye ama emek enye oro ekenyenede ikot Editi ke ikpaedem onyụn̄ efehe ebịne ete esie. Enye ama ebem iso anyan ubọk owụt ndise ndien ekem anyan ete esie ubọk onyụn̄ ọdọhọ ete “Afo!” Ete ye eka esie ẹma ẹse kiet eken ke n̄kpaidem nte mmọ ẹkedide ẹdifiọk ke James ọkọnọ ete esie ikot ete edi Editi. Ete esie ama ọdọhọ ke ekeme ndidi imọ iyodụk.

Ke mbubịteyo usen Editi, James ama odụk itie ubon ọfọn̄ ete esie, okosio ọfọn̄ukot, ada ọsọk ete esie, onyụn̄ anam idiọn̄ọ ọnọ enye ete ọbọ esịne. Ete esie ama ọbọrọ ete ke imọ idikaha mbono esop oro. Ntem, James ye eka esie ẹma ẹdaha Ufọkmbono Obio Ubọn̄.

Nte ededi, ndusụk ini ke ukperedem, James ama esinen̄ede esịn ndinyịme ke ini eka esie okodomode nditịm enye idem ndidụk mme mbono esop, emekde nditie ke ufọk ye ete esie. Ekem ke usenubọk Sunday kiet, James ama afiak esịn ndinyịme nte eka esie okodomode nditịm enye idem nnọ mbono esop. Ama enen̄ede akpa eka esie idem ndikụt nte ete James ọwọn̄ọrede ese James onyụn̄ ọdọhọde ete: “James, edieke n̄kade mbono esop mfịn, ndi afo eyetiene edi?” Enyịn ama an̄wan̄a James. Enye ama afat ete esie onyụn̄ ọdọhọ “Ih!” ndien mmọ mbita ẹma ẹdaha Ufọkmbono Obio Ubọn̄.

Ọtọn̄ọde ke usen oro, ete James ama aka iso ndidụk kpukpru mbono esop oro ẹkesinịmde ke Sunday ndien ikebịghike enye ama ọtọt ete ke edieke anade imọ inam n̄kọri, imọ inyene ndidụk mme mbono esop eken n̄ko. (Mme Hebrew 10:24, 25) Enye ama anam emi, ndien ọfiọn̄ iba ke ukperedem enye ama ọtọn̄ọ ndikpep Bible kpukpru ini. Enye ama anam n̄kọri usọp usọp, anamde mme ukpụhọde oro ẹkeyomde ke uwem esie, ndien ikebịghike enye ama ọtọn̄ọ ndibuana ke utom ukwọrọikọ Obio Ubọn̄. Isua kiet ke enye ama ọkọtọn̄ọ ndikpep Bible, enye ama ayak uwem esie ọnọ Jehovah onyụn̄ ayarade emi ke ndibụhọ ke mmọn̄. Idahaemi enye anam utom nte asan̄autom unamutom ke esop mmọ. Idahaemi kpukpru owo ke ubon oro ẹnam n̄kpọ Jehovah ke edidianakiet.