Mme Mbụme Ẹtode Mme Andikot

Nte okpowụt ifiọk ata Christian ndidụk edinam ubụkowo m̀mê udianndọ ke ufọkabasi?

Nnyịn ndibuana ke orụk nsunsu ido ukpono ekededi inemke Jehovah esịt ndien ana ifep emi. (2 Corinth 6:14-17; Ediyarade 18:4) Edinam ubụkowo ufọkabasi edi edinam ido ukpono oro ekemede ndibuana ukwọrọikọ oro esịnde udọn̄ ọnọ mme ekikere oro mîkemke ye N̄wed Abasi utọ nte ukpọn̄ ikpaha ke nsinsi ye kpukpru nti owo ndika heaven. Enye ekeme n̄ko ndisịne mme utọ edinam nte edinam idiọn̄ọ cross ye editiene oku m̀mê ọkwọrọikọ mbọn̄ akam. Akam ye mme edinam ido ukpono eken oro ẹdude ke ntuaha ye ukpepn̄kpọ Bible ẹkeme n̄ko ndidi ubak edinam udianndọ eke ido ukpono oro ẹnịmde ke ufọkabasi m̀mê ke ebiet en̄wen. Sia odude ke otuowo oro kpukpru owo ẹtienede ẹbuana ke nsunsu edinam ido ukpono, ekeme ndidi ọkpọsọn̄ n̄kpọ nnọ Christian ndibiọn̄ọ mfịghe editiene mbuana. Owụt unana eti ibuot didie ntem ndisio idem nnyan nnọ utọ mfịghe oro!

Nso edieke Christian ekerede ke obiomo imọ ndidụk edinam ubụkowo m̀mê udianndọ oro ẹnịmde ke ufọkabasi? Ke uwụtn̄kpọ, ebe oro mînịmke ke akpanikọ ekeme ndidọhọ n̄wan esie oro edide Christian ete etiene imọ aka utọ edinam oro. Nte enye ekpetiene enye aka nte andida nse oro mîtieneke ibuana? Ke okponode mme uduak ebe esie, n̄wan oro ekeme ndibiere nditiene enye n̄ka, ebierede nte ke imọ iditieneke ibuana ke mme edinam ido ukpono ekededi. Ke n̄kan̄ eken, enye ekeme ndibiere nditre ndika, ekerede nte ke mfịghe eke ntụk oro mme idaha oro ẹdidemerede oyokpon akaha ọnọ imọ, ndusụk anamde imọ ibiat mme edumbet Abasi. Edi n̄wan emi enyene ndinam ubiere. Enye ke akpanikọ akpama ndinyene ifụre ekikere ye ubieresịt oro mîbiomke enye.—1 Timothy 1:19.

Ke idaha ekededi, ọkpọfọn enye ndinam an̄wan̄a ebe esie nte ke ubieresịt imọ idiyakke imọ itiene ibuana ke mme edinam ido ukpono ekededi m̀mê nditiene n̄kwọ ikwọ m̀mê ndinụk ibuot ke ini ẹdibọn̄de akam. Ke ntak edinam an̄wan̄a esie, ebe oro ekeme ndibiere nte ke n̄wan imọ ndidi ekeme ndidemede idaha oro edidade esuene ọsọk imọ. Enye ekeme ndimek ndika ikpọn̄ ke ntak ima oro enye enyenede ọnọ n̄wan esie, ukpono oro enye enyenede ọnọ se enye enịmde ke akpanikọ, m̀mê ke ntak oro enye oyomde ndifep esuene ekededi. Edi edieke enye ọsọn̄ọde eyịre ete n̄wan imọ asan̄a ye imọ aka, enye ekeme ndika n̄kukụre nte andida nse.

Owo ikpenyeneke ndifụmi utịp oro edidụk edinam ke ufọkabasi ekemede ndinyene ke idem mme ekemmọ andinịm ke akpanikọ. Ndi oro ekeme ndinọ ubieresịt ndusụk owo unan? Nte emi ekeme ndinam ukeme mmọ ndifep ndibuana ke ukpono ndem emem? Apostle Paul ọnọ item ete: ‘Ẹdomo ẹfiọk se ifọnde ikan, kpan̄ mbufo ẹnana ndudue ẹkûnyụn̄ ẹsịn mbon en̄wen ẹtuak ukot ẹduọn̄ọ tutu esịm usen Christ.’—Philippi 1:10, NW.

Edieke edinam oro abuanade n̄kpet n̄kpet iman, mfịghe otode ubon ekeme ndisọn̄ ubọk. Ke idaha ekededi, ana Christian enen̄ede ekere aban̄a kpukpru n̄kpọ oro ẹbuanade. Ke ndusụk idaha, ebe m̀mê n̄wan ekeme ndibiere nte ke mfịna ndomokiet ididemekede ke imọ ndidụk edinam ubụkowo m̀mê udianndọ ke ufọkabasi nte andida nse. Nte ededi, idaha ekeme ndidu emi edidụk ọnọde ubieresịt enyene idem m̀mê eke mbon en̄wen unan oro okponde akan ufọn ekededi oro enye ndidụk edinam oro ekemede ndinọ. Ke idaha ekededi, Christian ekpenyene ndikụt nte ke ubiere oro idituahake ye imọ ndimụm eti ubieresịt n̄kama ke iso Abasi ye ke iso owo.