N̄wọrọnda N̄kọri Oyom Ẹbọp Mme Ufọkmbono Obio Ubọn̄ Usọp Usọp
“Ẹtiene Mi, . . . Ndien Ami Nyọnọ Mbufo Nduọk-Odudu”
N̄wọrọnda N̄kọri Oyom Ẹbọp Mme Ufọkmbono Obio Ubọn̄ Usọp Usọp
“ẸTIENE Mi, . . . ndien Ami nyọnọ mbufo nduọk-odudu,” ntre ke Jesus Christ ọkọdọhọ. (Matthew 11:28) Nso ufiop ufiop ikot otode Ibuot esop Christian ke emi edi ntem! (Ephesus 5:23) Ke ini nnyịn itiede ikere mme ikọ oro, nnyịn itreke ndiwụt esịtekọm mban̄a akpan n̄kpọ emi ọnọde nduọkodudu—edibuana ye nditọete nnyịn eke spirit ke mme mbono esop Christian. Ke akpanikọ nnyịn imenyịme ye andiwet psalm oro ọkọkwọde ete: “Idụn̄ nditọ-ete ke idem ọtọ kiet ọfọn didie! onyụn̄ eye didie!”—Psalm 133:1.
Ke akpanikọ, mbon oro nnyịn isobode ke mme mboho utuakibuot oro ẹdi mme mfọnn̄kan nsan̄a, ndien idaha eke spirit oro esidude esinọ ukpeme onyụn̄ etie inem inem. Ye eti ntak ndien, uyen Christian kiet ama ọdọhọ ete: “Ami nsika ufọkn̄wed kpukpru usen, ndien enye anam idem emem mi. Edi mme mbono esop ẹtie nte ebiet ubọhọ ke desat, emi anamde mfiak n̄kop nsọn̄idem ndiyọ ke ufọkn̄wed ke usen efen.” Uyen Nigeria kiet ọkọdọhọ ete: “Mmokụt nte ke n̄kpet n̄kpet itie ebuana ye mbon oro ẹmade Jehovah an̄wam mi ndisịk n̄kpere enye.”
Ufọkmbono Obio Ubọn̄ Mme Ntiense Jehovah ke n̄kann̄kụk enen̄ede edi iwụk ebiet utuakibuot akpanikọ ke ikpehe oro. Ke ata ediwak ebiet, ẹsinịm mme mbono esop ke Ufọkmbono Obio Ubọn̄ ke nsụhọde n̄kaha ikaba ke urua, ndien ẹsisịn udọn̄ ẹnọ nditọ ukpepn̄kpọ Bible nditọn̄ọ ndidụk usọp usọp nte ẹkekeme man ẹbọ ufọn ẹto itie ebuana Mme Hebrew 10:24, 25.
oro ọnọde nduọkodudu do.—Se Ẹyomde Usọp Usọp
Nte ededi, odot ẹtịm ẹfiọk nte ke idịghe kpukpru Mme Ntiense Jehovah ẹnyene Ufọkmbono Obio Ubọn̄ oro odotde ndida nnam n̄kpọ. Oyom ẹnam n̄kpọ usọp usọp ẹban̄a n̄wọrọnda n̄kọri ke ibat mme anditan̄a Obio Ubọn̄ ke ofụri ererimbot. Ke ẹsụk ẹyoyom ediwak tọsịn Ufọkmbono Obio Ubọn̄, akpan akpan ke mme idụt oro ẹtọn̄ọde-tọn̄ọ uforo.—Isaiah 54:2; 60:22.
Ke ndinam an̄wan̄a: Ufọkmbono Obio Ubọn̄ duop kpọt ẹkedu ẹnọ esop 290 ke ibuot obio Democratic Republic of Congo. Ẹma ẹyom ediwak Ufọkmbono Obio Ubọn̄ usọp usọp ke idụt oro. Ata ediwak esop ke Angola ẹsisop idem ke an̄wa koro ibat ibat Ufọkmbono Obio Ubọn̄ kpọt ẹdu. Ukem ntre, ẹyom Ufọkmbono Obio Ubọn̄ ke ediwak idụt efen.
Ke ntre, ọtọn̄ọde ke 1999, ẹmenam ndutịm man ẹn̄wam ndibọp Ufọkmbono Obio Ubọn̄ ke mme idụt oro mînen̄ekede inyene uforo. Man ẹn̄wam ke utom ubọpn̄kpọ ke mme utọ idụt oro, Mme Ntiense oro ẹnyenede usọ ẹmenọ idemmọ unyịme unyịme ndinam utom. Ke ini ẹdiande utọ usọ oro ye edu unyịmesịt eke mme anamutom unyịmesịt ẹtode n̄kann̄kụk, utịp esinen̄ede akama nsịnudọn̄. Ke n̄kan̄ eken, mme Ntiense n̄kann̄kụk ke ẹbọ ufọn ẹto ukpep emi mmọ ẹbọde. Kpukpru emi an̄wam ẹbọp Ufọkmbono Obio Ubọn̄ oro ẹyomde ke nsio nsio idụt mmọ.
Ntem ẹnọ ata ata un̄wam ebe ke mmemmem usụn̄ ubọp Ufọkmbono Obio Ubọn̄ oro ẹdade mme n̄kpọutom ye usụn̄ ubọp ufọk n̄kann̄kụk. Uduak idịghe ndibọp Ufọkmbono Obio Ubọn̄ oro ẹnen̄erede ẹyom kpọt edi n̄ko nditọn̄ọ ndutịm editịm n̄kama oro ekemde ye idaha n̄kann̄kụk.—2 Corinth 8:14, 15.
Utịp Oro Akamade Nsịnudọn̄
Nso idi utịp kpukpru ukeme emi ẹsịnde ndibọp mme itie utuakibuot? Ke ntọn̄ọ ntọn̄ọ isua 2001, ntọt otode Malawi ọkọdọhọ ete: “Se ẹnamde ke idụt emi enen̄ede otụk owo ke idem. Ke ọfiọn̄ iba efen, nnyịn iyọbọp mme Ufọkmbono Obio Ubọn̄ efen efen ikụre.” (Ndise 1 ye 2) Mme anamutom unyịmesịt ke Togo ẹma ẹkeme ndibọp ediwak ukeuke Ufọkmbono Obio Ubọn̄ ke mme ọfiọn̄ ndondo emi. (Ndise 3) Eti utom oro mme anamutom unyịmesịt ẹnamde an̄wam n̄ko ndinam mme Ufọkmbono Obio Ubọn̄ oro ẹdotde ẹdu ke Mexico, Brazil, ye mme idụt eken.
Mme esop ẹkụt nte ke ini ẹbọpde Ufọkmbono Obio Ubọn̄, mme owo ke n̄kann̄kụk ẹsidi ẹdifiọk nte ke Mme Ntiense Jehovah ẹdidu do ke nsinsi. Ediwak owo ẹma ẹsimen̄e ndibuana ye Mme Ntiense ibọhọke ke ẹma ẹkebọp itie utuakibuot oro odotde. Esop Nafisi ke Malawi ọtọt ete: “Sia
inyenede Ufọkmbono Obio Ubọn̄ oro odotde idahaemi, emi omosụn̄ọ ke edinọ eti ikọ ntiense. Ke ntre, edi mmemmem n̄kpọ nditọn̄ọ mme ukpepn̄kpọ Bible.”Ẹma ẹsak mme andibuana ke Esop Krake ke Benin nsahi ke ini edem koro akani Ufọkmbono Obio Ubọn̄ mmọ ekedide ufọk eset ke ẹmende ẹdomo ye ndusụk ufọkabasi. (Ndise 4) Idahaemi esop oro enyene obufa ediye Ufọkmbono Obio Ubọn̄ oro enyenede uku, emi adade ke enyịn̄ utuakibuot akpanikọ. (Ndise 5) Esop emi ekenyene mme asuanetop Obio Ubọn̄ 34 ndien ibat mbon oro ẹkesidụkde mbono esop ke Sunday ekesidi 73 ke ẹbaharede ukem ukem, edi owo 651 ẹkedụk edinam ediyak Ufọkmbono Obio Ubọn̄ oro nnọ. Ata ediwak ke otu mmọ ẹkedi mbio-obio
oro idem akakpade ndikụt nte Mme Ntiense ẹkemede ndibọp ufọkmbono ke ata ekpri ini. Ke etide mme n̄kpọntịbe ini edem ke afan̄ emi, n̄kọk itieutom Zimbabwe ama ewet ete: “Ke ufan̄ ọfiọn̄ kiet ke ẹma ẹkebọp obufa Ufọkmbono Obio Ubọn̄, ibat mme andidụk esiwak ndidọk utịm ikaba.”—Ndise 6 ye 7.Ye unana eyịghe, ediwak mbufa Ufọkmbono Obio Ubọn̄ oro ẹbọpde ẹnam mme Christian oro ẹma ẹkeyak idem ẹnọ ye mbon oro ẹnyenede udọn̄ ẹnyene mme itie ndibọ nduọkodudu eke spirit. Ke esop n̄kann̄kụk mmọ ama ọkọtọn̄ọ ndida obufa Ufọkmbono Obio Ubọn̄ nnam n̄kpọ, Ntiense kiet ke Ukraine ama ọdọhọ ete: “Nnyịn imenen̄ede ikop idatesịt. Nnyịn imada enyịn nnyịn ikụt nte Jehovah an̄wamde ikọt esie.”
[Ekebe/Mme ndise ke page 10, 11]
Ẹdara Un̄wam Ofụri Esịt
Mme Ntiense Jehovah ẹkop idatesịt ndikụt usọp usọp n̄kọri oro ẹnamde man ẹbọp mbufa Ufọkmbono Obio Ubọn̄ oro ẹyomde usọp usọp ke ofụri ererimbot. N̄kaiso n̄kọri ke ibat mme andituak ibuot nnọ Jehovah ke nsio nsio idụt oyom ẹbọp ediwak mbufa Ufọkmbono Obio Ubọn̄ ke ini iso. Kamse, ke ofụri ofụri, ke isua utom 2001, ẹma ẹtọn̄ọ mbufa esop 32 kpukpru urua! Mme utọ esop oro ẹyom mme itie ndisop idem kaban̄a utuakibuot.
Mbụme ekeme ndidemede, ‘Nnyịn isida okụk ke m̀mọ̀n̄ ise iban̄a mme utọ utom nte edibọp mbufa Ufọkmbono Obio Ubọn̄, akpan akpan ke mme idụt emi nditọete ẹnyenede esisịt okụk?’ Ibọrọ edi nte ke un̄wam Abasi ye ntatubọk owo ẹbuana.
Nte enye ọkọn̄wọn̄ọde, Jehovah ọmọnọ mme asan̄autom esie edisana spirit, anamde mmọ “ẹfọn ido, ẹnyụn̄ ẹnam nti utom uwak-uwak, ẹnyụn̄ ẹtat ubọk, ẹnyịme ndinọ owo n̄kpọ.” (1 Timothy 6:18) Spirit Abasi esinụk Mme Ntiense Jehovah ndinọ utom ukwọrọikọ Obio Ubọn̄ ibetedem ke kpukpru usụn̄—ẹyakde ini, odudu, ukeme, ye inyene mmọ eken ẹsịn ke mme edinam Christian.
Edu ntatubọk esinụk Mme Ntiense ye mbon en̄wen ndida okụk n̄n̄wam ke utom editat ye ubọpn̄kpọ. Ke ẹsiode edinọ un̄wam okụk ofụri ini ke esop n̄kann̄kụk ẹfep, mmọ ẹsitịp etịbe kaban̄a utom ubọpufọk ke mme ikpehe isọn̄ eken.
Ke esop kiet kiet, ẹbon mme ekebe oro ẹwetde in̄wan̄-in̄wan̄ idiọn̄ọ oro “Contributions for the Worldwide Work—Matthew 24:14.” Mme owo ẹkeme ndisịn mme ẹnọ imaesịt do edieke mmọ ẹyomde ndinam ntre. (2 Ndidem 12:9) Ẹdara kpukpru etịbe, ikpọ ye n̄kpri. (Mark 12:42-44) Ẹsida okụk emi ẹnam n̄kpọ ke nsio nsio usụn̄ nte ekemde ye se ẹyomde, esịnede edibọp mme Ufọkmbono Obio Ubọn̄. Owo idaha utọ okụk oro ikpe ikpọ owo sia Mme Ntiense Jehovah mînyeneke utọ ikpọ owo oro.
Nte mme etịbe ẹtịpde kaban̄a utom ofụri ererimbot ẹyọhọ uduak mmọ? Ih, mmọ ẹyọhọ. N̄kọk itieutom Liberia—idụt oro ekọn̄ mbio-obio abiatde—ọtọt ete ke ata ediwak ke otu Mme Ntiense n̄kann̄kụk inyeneke utom ẹnyụn̄ ẹsobo ikpọ mfịna okụk. Didie ke ikọt Jehovah ke idụt emi ẹkeme ndibọp itie utuakibuot oro odotde? N̄kọk itieutom oro ọtọt ete: “Ẹdida mme etịbe ofụri esịt ẹtode nditọete ke mme idụt efen ẹse ẹban̄a utom oro. Nso ima ima ndutịm oro owụtde eti ibuot ke emi edi ntem!”
Nditọete n̄kann̄kụk ẹsitịp etịbe n̄ko, kpa ye unana mmọ. Sierra Leone ke Africa, ọtọt ete: “Nditọete n̄kann̄kụk ẹnọ utom oro ibetedem ẹnyụn̄ ẹkop inemesịt ndisịn ukeme ye se ededi etịbe okụk oro mmọ ẹkemede nditịp man ẹn̄wam ke utom edibọp mme Ufọkmbono Obio Ubọn̄.”
Ke akpatre, utom ubọpn̄kpọ emi ada itoro ọsọk Jehovah. Nditọete Liberia ẹdọhọ ke inemesịt ẹte: “Ndibọp mme itie utuakibuot oro ẹdotde ke ofụri idụt emi oyowụt mme owo nte ke utuakibuot akpanikọ edidu mi ke nsinsi oyonyụn̄ ọnọ akwa enyịn̄ Abasi nnyịn uku ye ubọn̄.”