Nte Afo Omowụt Esịtekọm Aban̄a Ima Abasi?

EREN oro Job ama etịn̄ ini kiet ko aban̄a idaha unana mfọnmma owo ke mme ikọ emi: “Owo eke n̄wan amande omụhọ usen, onyụn̄ oyụhọ ukụt: Owo asiaha nte ikọn̄, ndien ẹsịbe enye ẹfep, enye efehe ebe nte ukpọn̄, inyụn̄ ibịghike.” (Job 14:1, 2) Nte Job ọkọfiọkde ini oro, uwem ọkọyọhọ ye ndutụhọ ye mfụhọ. Nte akanam etie fi ke idem ntre?

Nte ededi, kpa ye kpukpru n̄kpọsọn̄ idaha ye mfịna oro nnyịn ikemede ndisobo, idotenyịn oro enyenede nsọn̄ọ odu, enye oro ọkọn̄ọde ke mbọm ye ima Abasi. Akpa kan̄a, Ete nnyịn eke heaven oro esituade mbọm ọmọnọ uwa ufak ndifak ubonowo nsio ke n̄kpakpa idaha idiọkn̄kpọ mmọ. Nte John 3:16, 17 ọdọhọde, Jesus Christ ọkọdọhọ ete: “Koro Abasi akamama ererimbot [ubonowo] ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem. Koro Abasi ikọdọn̄ke [Jesus] Eyen Esie ke ererimbot ete ekpe ikpe ererimbot, edi ọkọdọn̄, man ẹnyan̄a ererimbot oto ke enye.”

N̄ko, kere ban̄a mfọnido oro Abasi owụtde nnyịn mme anana-mfọnmma owo. Apostle Paul ọkọdọhọ ete: “Enye anam kpukpru mme idụt ẹto ke ekpụk kiet ẹwọrọ ẹdidụn̄ ke ofụri iso isọn̄: onyụn̄ edi Enye enịm iduọk ini uwem mmọ ye adan̄a ebiet idụn̄ mmọ; kpan̄ mmọ ẹyom Abasi, ẹte ndusụk ifiọn̄ọ ubọk in̄wana ndisịm Enye, nnyụn̄ n̄kụt Enye; okposụk edi nte Enye mîyomke usụn̄ ye baba nnyịn owo kiet.” (Utom 17:26, 27) Kere ban̄a oro! Okposụkedi nnyịn idide mme anana-mfọnmma owo, nnyịn imekeme ndinyene ọkpọkpọ itie ebuana ye ima ima Andibot nnyịn, kpa Jehovah Abasi.

Do, nnyịn imekeme ndisak iso nse ini iso ye mbuọtidem, ifiọkde ite ke Abasi ekere aban̄a nnyịn ndien enye ke ima amanam ndutịm kaban̄a nsinsi ufọn nnyịn. (1 Peter 5:7; 2 Peter 3:13) Do, ke akpanikọ, nnyịn imenyene kpukpru ntak ndikpep n̄kpọ efen efen mban̄a ima ima Abasi nnyịn ebe ke ndikpep Ikọ esie, kpa Bible.