Oyom Nnyịn Ifiọk Enye Emi Abasi Edide

NTE idem isikpaha fi ke ini esede ikpaenyọn̄ oro ọyọhọde ye ntantaọfiọn̄ ke okoneyo oro enyọn̄ an̄wan̄ade? Nte ufuọn̄ ndiye flawa isinemke fi? Nte isinemke fi ndikop ikwọ inuen ye uyom ikọn̄ oro ofụm enyen̄ede? Ndien mme okopodudu isọnsi ye mme edibotn̄kpọ eken oro ẹdụn̄de ke inyan̄ ẹnyene ndyọ didie ntem! Ke adianade do, mme owo oro ẹnyenede ndammana ubieresịt ye ndyọ ndyọ awak-n̄kukọhọ mfre. Afo ọkpọdọhọ ke kpukpru utịbe utịbe n̄kpọ oro ẹkande nnyịn ẹkụk ẹkesan̄a didie ẹdidu?

Ndusụk owo ẹnịm ke akpanikọ ẹte ke kpukpru n̄kpọ emi ẹkedidu ke mbuari. Edi edieke emi edide ntre, ntak emi mme owo ẹnịmde ke akpanikọ nte ke Abasi odu? Ntak emi nsio nsio mmọn̄ibọk ndibuaha ke mbuari okposion̄ode mme edibotn̄kpọ oro ẹnyenede udọn̄ n̄kpọ eke spirit edi?

“Ido ukpono enen̄ede ọdọn̄ n̄kam ke idem mme owo onyụn̄ odu ke kpukpru idaha ndutịm uforo ye eke ifiọkn̄wed.” Emi etịn̄ ibio ibio aban̄a ndụn̄ọde oro Prọfesọ Alister Hardy ekewetde aban̄a ke n̄wed esie oro The Spiritual Nature of Man. Ndomonse oro ẹnamde ndondo emi ke mfre anam ndusụk mme ekpepn̄kpọ mban̄a esịp ẹnọ ekikere nte ke ekeme ndidi “ẹkebobot” ukeme ndinyene ido ukpono “ẹsịn owo ke idem.” N̄wed oro Is God the Only Reality? ọdọhọ ete: “Edidụn̄ọde nyom ibọrọ ke ido ukpono . . . edi ọsọ n̄kpọ ke kpukpru n̄kann̄kụk ye ke ofụri emana tọn̄ọ nte ubonowo ekedidu.”

Kere ban̄a ubiere oro ọfiọkn̄wed kiet ekesịmde ke n̄kpọ nte isua 2,000 emi ẹkebede. Enye ekewet ete: “Kpukpru ufọk ẹnyene andibọp, edi Enye emi ọkọbọpde kpukpru n̄kpọ edi Abasi.” (Mme Hebrew 3:4) Ke akpanikọ, ata akpa ufan̄ikọ ke Bible ọdọhọ ete: “Ke editọn̄ọ Abasi okobot enyọn̄ ye isọn̄.”—Genesis 1:1.

Nte ededi, anie edi Abasi? Ubonowo enyene nsio nsio ibọrọ ọnọ mbụme emi. Ke ini ẹkebụpde m̀mê anie edi Abasi, akparawa Japan kiet oro ekerede Yoshi ọkọbọrọ ete: “Ntịmke mfiọk. Ami ndi owo ido ukpono Buddha, ndien ndifiọk owo emi Abasi edide idịghe akpan n̄kpọ inọ mi.” Nte ededi, Yoshi ama enyịme ete ke ediwak owo ẹkpono Buddha ke idemesie nte abasi. Nick, anam mbubehe oro odude ke iduọk isua 60, enịm ke akpanikọ ete ke Abasi odu onyụn̄ ekere ke enye edi ata ọkpọsọn̄ odudu. Ke ini ẹkedọhọde etịn̄ se enye ọdiọn̄ọde aban̄a Abasi, Nick ama ọbọrọ  ke ama okodop uyo ke anyan ini, ete: “Ufan, oro edi ata ọkpọsọn̄ mbụme. N̄kukụre se n̄kemede nditịn̄ edi nte ke Abasi mmọdo. Enye odu.”

Ndusụk owo “ẹtuak ibuot ẹnyụn̄ ẹnam n̄kpọ ẹnọ se Abasi okobotde utu ke Andibot ke idemesie.” (Rome 1:25, Today’s English Version) Ediwak miliọn owo ẹtuak ibuot ẹnọ mme ete ete oro ẹma ẹkekpan̄a, ẹnịmde ke akpanikọ ẹte ke Abasi odu oyom usụn̄ akan se ẹkemede ndisịm. Ke ido ukpono Hindu, ediwak abasi ye abasi-an̄wan ẹdu. Ẹma ẹtuak ibuot ẹnọ nsio nsio abasi, utọ nte Zeus ye Hermes ke eyo mme apostle Jesus Christ. (Utom 14:11, 12, NW) Ediwak ufọkabasi Christendom ẹkpep ẹte ke Abasi edi Ita-ke-Kiet, oro esịnede Abasi Ete, Abasi Eyen, ye Abasi Edisana Spirit.

Ke akpanikọ, Bible ọdọhọ ete ke ‘mme abasi ye mbọn̄ ẹwak.’ Nte ededi, enye adian do ete: “Nnyịn imenyene Abasi kiet kpọt, emi edide Ete, emi kpukpru n̄kpọ ẹtode Enye ẹwọn̄ọ.” (1 Corinth 8:5, 6) Ih, ata Abasi kiet kpọt odu. Edi anie ke enye edi? Enye ebiet nso? Edi akpan n̄kpọ ete nnyịn ifiọk ibọrọ mme mbụme emi. Jesus ke idemesie ọkọdọhọ ke akam ọkọbọn̄de ọnọ Enye ete: “Ndien nsinsi uwem oro edi ndifiọk fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Ntak odu ndinịm ke akpanikọ nte ke nsinsi mfọnọn̄kpọ nnyịn ọkọn̄ọ ke ndifiọk akpanikọ aban̄ade Abasi.

[Mme ndise ke page 3]

Mmọ ẹkesan̄a didie ẹdidu?

[Ebiet Ẹdade N̄kpọ Ẹto]

Isọnsi: Courtesy of Tourism Queensland

 [Ebiet ẹdade ndise ẹto ke page 2]

IKPAEDEM: Index Stock Photography © 2002