“Mmọ Ẹmesụhọde”

“Akamba mmọn̄ omofụk mmọ: mmọ ẹmesụhọde ke udem nte itiat.”

MOSES ye nditọ Israel ẹma ẹda mme ikọ oro ndikwọ ndara edinyan̄a mmọ ke Ididuot Inyan̄ ye edisobo mme asua mmọ, kpa mbon Egypt oro ẹkebịnede mmọ—Pharaoh ye udịmekọn̄ esie.—Exodus 15:4, 5.

In̄wan̄-in̄wan̄ ukpepn̄kpọ ama odu ọnọ owo ekededi oro okokụtde n̄wọrọnda n̄kpọntịbe emi. Owo ndomokiet ikemeke ndikụt unen ke ndineni m̀mê ndibiọn̄ọ odudu ukara Jehovah nnyụn̄ ndu uwem. Nte ededi, n̄kpasịp ọfiọn̄ ifan̄ ke ukperedem, mme ọwọrọiso ke otu nditọ Israel—Korah, Dathan, Abiram, ye owo 250 oro ẹkenọde mmọ ibetedem—ẹma ẹsọn̄ ibuot an̄wan̄wa ye odudu oro Abasi ọkọnọde Moses ye Aaron.—Numbers 16:1-3.

Ke etienede ndausụn̄ Jehovah, Moses ama odụri nditọ Israel utọn̄ ete ẹwọn̄ọ ke tent mbon nsọn̄ibuot oro. Dathan ye Abiram, ye mbonubon mmọ ke nsọn̄ibuot ẹma ẹsịn ndikpụhọde edu mmọ. Ekem Moses ama ọtọt ete ke Jehovah, ke usụn̄ Esiemmọ ayanam an̄wan̄a mme owo nte ke irenowo emi ẹma ‘ẹsịn Jehovah ke ndek.’ Ke idaha oro, Jehovah anam isọn̄ oro odude mmọ ke idak asiaha. “Mmọ ẹnyụn̄ ẹsụhọde ke udi ndisi, ye kpukpru owo emi ẹdude ye mmọ, ndien isọn̄ esịre abaha mmọ.” Nso kaban̄a Korah ye mbon nsọn̄ibuot eken? “Ikan̄ oto Jehovah, edita owo ikie [iba] ye aba ye duop emi ẹfọpde incense.”—Numbers 16:23-35; 26:10.

Pharaoh ye udịmekọn̄ esie, ọkọrọ ye mbon nsọn̄ibuot oro ke Wilderness, kpukpru ẹma ẹtak koro mmọ ẹkesịnde ndinyịme odudu ukara Jehovah ye udọn̄ oro enye enyenede ke mbubehe ikọt esie. Ke ntre, edi usọp usọp n̄kpọ nte kpukpru mbon oro ẹyomde ndinyene ukpeme Jehovah ke ndiọkeyo emi, ẹkpep ẹban̄a ẹnyụn̄ ẹsụk ibuot ẹnọ Jehovah nte “Ata Edikon̄” ye “Ata Ọkpọsọn̄.” Ke ẹnamde ntre, mmọ ẹkeme ndibọ nsịnudọn̄ nto mme ikọ Jehovah emi: “Tọsịn owo ẹyeduọn̄ọ fi ke n̄kan̄, ye tọsịn duop ke ubọk nnasia fo; edi idisịmke fi. Afo oyokụt ke enyịn ikpọn̄-ikpọn̄, onyụn̄ okụt usiene mme oburobụt owo. Koro afo, Jehovah, edide ebiet ubọhọ mi. Afo emenịm Ata Edikon̄ ke ebiet idụn̄ fo.”—Psalm 91:1, 7-9.