Mme Mbụme Ẹtode Mme Andikot

Ndi oyom ẹbụk owo emi oyomde ndina baptism ofụri ofụri ke mmọn̄ edieke enye obiomode ndo idiọk idiọk m̀mê ọdọn̄ọde n̄kpa n̄kpa, emi edinamde edibụk ke mmọn̄ edi ọkpọsọn̄ n̄kpọ?

Ẹda ikọ oro “ndinịm baptism” ẹto ikọedinam Greek oro baʹpto, emi ọwọrọde “ndinyịni.” (John 13:26, NW) Ke Bible, “ndinịm baptism” edi ukem ye “ndibụk ke mmọn̄.” Kaban̄a baptism oro Philip ekenịmde eunuch owo Ethiopia, The Emphasised Bible, eke Rotherham, ọdọhọ ete: “Mmọ mbiba ẹsụhọde ẹdụk ke mmọn̄, Philip ye eunuch oro—ndien [Philip] obụk enye ke mmọn̄.” (Utom 8:38) Ntem, ẹnyịni owo oro ẹnịmde baptism ofụri ofụri ke mmọn̄.—Matthew 3:16; Mark 1:10.

Jesus ama eteme mme mbet esie ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism.” (Matthew 28:19, 20) Ukem ntre, Mme Ntiense Jehovah ẹsinam ndutịm man ẹnịm mme owo baptism ke obube mmọn̄, n̄kpọdiọhọ mmọn̄, inyan̄, m̀mê mme ebiet efen oro mmọn̄ okponde ekem ndibụk owo ofụri ofụri. Sia N̄wed Abasi oyomde ẹbụk owo ofụri ofụri ke mmọn̄ ke ini ẹnịmde baptism, mme owo inyeneke odudu nditre owo ekededi ndina baptism. Ntem, ẹkpenyene ndinịm owo baptism idem ke ini oyomde ẹnam esen esen usio-ukot ke ntak idaha esie. Ke uwụtn̄kpọ, edinịm baptism ke akamba akwa uyeremmọn̄ aman̄wam mbonusọn̄ m̀mê mbon oro ẹdọn̄ọde idiọk idiọk. Ẹkeme ndinam mmọn̄ oro odude ke akwa uyeremmọn̄ ofiop, ekem ẹmụm owo oro oyomde ndina baptism ẹsịn ke mmọn̄ oro sụn̄sụn̄, ndien ndondo oro enye emehede ye mmọn̄ oro, ẹkeme ndinịm ata ata baptism.

Ẹsikam ẹnịm mbon oro ẹbiomode ndo idiọk idiọk baptism. Ke uwụtn̄kpọ, ẹma ẹbụk mme owo oro ẹkenamde usiakidem ke usụn̄ ofụm ndien, nte utịp, ẹnyenede odudu oro ebịghide ke usụn̄ itọn̄, m̀mê mbon oro okoyomde ẹfọrọ ukwak ukot ibifịk ke ibuo, ke mmọn̄. Nte ededi, oyoyom ẹnen̄ede ẹnam ntịmidem ẹban̄a mme utọ baptism oro. Oyowụt eti ibuot ndinam nurse oro ama ọkọbọ ukpep m̀mê abiausọbọ odu ekpere edieke odude. Nte ededi, ke ini ẹwụtde san̄asan̄a ukpeme, ẹkeme ndinịm baptism ke ekperede ndidi ke kpukpru idaha. Ke ntre, ẹkpenyene ndisịn kpukpru ukeme oro ẹwụtde eti ibuot ndinịm owo baptism ke mmọn̄ edieke emi edide udọn̄ esịt akpanikọ owo oro, edieke enye onyụn̄ enyịmede mme n̄kpọndịk oro ẹbuanade.