Ntọt Mme Anditan̄a Obio Ubọn̄

Ndikụt Akpanikọ ke Ebiet Owo Mîkodorike Enyịn

ABASI oyom “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:3, 4) Man ẹnam oro, Mme Ntiense Jehovah ẹmịn̄ ẹnyụn̄ ẹsuan ediwak miliọn Bible ye mme n̄wed un̄wam ukpep Bible. Ke ndusụk idaha, mme n̄wed emi ẹsin̄wam mbon oro ẹnyenede esịt akpanikọ ẹkpep akpanikọ ke usụn̄ oro owo mîkodorike enyịn. Ke afan̄ emi, mme anditan̄a Obio Ubọn̄ ke Freetown, Sierra Leone, ẹtọt ifiọkutom oro etienede mi.

Osman ekedi udọ ke ubon oro enyenede nditọ usụkkiet. Sia ọkọkọride okpon ke ubon oro amade ido ukpono, kpukpru ini enye ama esisan̄a ye ete esie aka ufọkabasi. Nte ededi, se ido ukpono esie ekekpepde aban̄a hell ama enen̄ede afịna Osman. Ikan̄wan̄ake enye ntak emi Abasi mbọm okpotụhọrede mme idiọkowo ebe ke ndifọp mmọ ke ikan̄. Ofụri se ẹketịn̄de ndinam ukpepn̄kpọ hell ikan̄ an̄wan̄a Osman ikọnọhọ enye ifụre ekikere.

Usen kiet, ke ini Osman ekedide isua 20 ke emana, enye ama okụt blublu n̄wed emi mbio okofụkde ubak ubak nte esịnede ke n̄kpọ mbio. Sia enye amade n̄wed, enye ama osio n̄wed oro, ọkwọhọde, onyụn̄ okụt ibuotikọ oro—Akpanikö oro Adade osim Nsinsi Uwem. *

Osman ama ekere: ‘Nso akpanikọ edi emi?’ Ke emi edemerede enye udọn̄, Osman ama ada n̄wed oro ọnyọn̄ ufọk onyụn̄ okokot enye okụre ke ebe kiet. Enye okokop inemesịt didie ntem ndifiọk ke Abasi enyene ọkpọkpọ enyịn̄—Jehovah! (Psalm 83:18) Osman ama edifiọk n̄ko ete ke n̄wọrọnda edu Abasi edi ima ye nte ke idem ekikere editụhọde mme owo ke ebiet oro asakde ikan̄ edi n̄kpọ itekesịt ọnọ Enye. (Jeremiah 32:35; 1 John 4:8) Ke akpatre, Osman ama okot nte ke Jehovah ọyọsọp ndida paradise isọn̄ ndi emi mme owo ẹdikemede ndidu nsinsi uwem. (Psalm 37:29; Ediyarade 21:3, 4) Nso utịbe utịbe akpanikọ otode Abasi ima ye mbọm ke emi ekedi ntem! Ye ntotụn̄ọ esịtekọm, Osman ama ọkọm Jehovah ke ndikayak imọ ikụt akpanikọ ke ebiet oro imọ mîkodorike enyịn.

Usen ifan̄ ke ukperedem, ye un̄wam ndusụk ufan, Osman ama okụt Ufọkmbono Obio Ubọn̄ Mme Ntiense Jehovah onyụn̄ odụk mbono esop do ke akpa ini. Do ke enye ekeben̄e Ntiense kiet ete ekpep Bible ye imọ. Kpa ye ọkpọsọn̄ ubiọn̄ọ otode ubon, Osman ama aka iso ndinam n̄kọri ke n̄kan̄ eke spirit onyụn̄ ana baptism. (Matthew 10:36) Mfịn, enye anam utom nte ebiowo ke esop. Edi utịben̄kpọ didie ntem nte ke kpukpru emi okoto edikụt n̄wed Bible kiet ke n̄kpọ mbio!

[Ikọ idakisọn̄]