Tetragrammaton Odu ke Septuagint

ẸDA Tetragrammaton, oro edi abisi Hebrew inan̄ emi יהוה (YHWH), ẹwet enyịn̄ Abasi, Jehovah. Ke anyan ini ẹkenịm ke akpanikọ ẹte ke Tetragrammaton ikodụhe ke Septuagint. Ntem ẹma ẹneni ẹte ke ini mme andiwet N̄wed Abasi Christian Usem Greek ẹkesikotde ẹto N̄wed Abasi Usem Hebrew, etie nte mmọ ikesidaha enyịn̄ Abasi ke uwetn̄kpọ mmọ.

Udịm udịm n̄kpọ oro ẹfiọhọde ke se ikande isua ikie emi ẹkebede m̀mê akande oro ẹma ẹwụt nte ke enyịn̄ Abasi ama odu ke Septuagint. N̄wed kiet ọdọhọ ete: “Udọn̄ nditịm edisana enyịn̄ Abasi nnịm ama enen̄ede okpon tutu mme Jew oro ẹkesemde usem Greek, ke ini ẹkekabarede Bible Usem Hebrew ẹsịn ke Greek, ẹma ẹsion̄o mme abisi Tetragrammaton oro nnennen nnennen ẹsịn ke uwetn̄kpọ usem Greek.”

Ikpan̄wed n̄kukịp oro ẹwụtde ke ubọk ufien mi edi kiet ke otu ediwak uwetn̄kpọ usem Greek oro osụk odude. Ẹkefiọhọ enye ke Oxyrhynchus, Egypt, ẹnyụn̄ ẹnọ enye nọmba emi 3522, ndien enye ebịghi afiak edem ekesịm akpa isua ikie E.N. * Enye edi n̄kpọ nte sentimita 7 ke uniọn̄ ye sentimita 10.5 ke ubom onyụn̄ esịne ubak udịmikọ otode Job 42:11, 12. Ẹwet Tetragrammaton, emi ẹwetde ekara ẹsịn ke ndise enyọn̄ emi, ke mme abisi usem Hebrew eset. *

Ntre, ndien, ndi enyịn̄ Abasi ama odu ke mme akpa N̄wed Abasi Christian Usem Greek? Eyen ukpepn̄kpọ oro George Howard ọdọhọ ete: “Sia Tetragrammaton oro okosụk odude ke Bible usem Greek [Septuagint] emi ekedide N̄wed Abasi akpa ufọkabasi, owụt ifiọk ndinịm ke akpanikọ nte ke mme andiwet O[bufa] T[estament], ke ini ẹkekotde ẹto N̄wed Abasi oro, ẹma ẹtịm Tetragrammaton oro ẹnịm ke uwetn̄kpọ Bible.” Etie nte esisịt ini ke oro ebede ke mme osion̄o n̄wed ẹkeda enyịn̄ efen ẹkpụhọ ye enyịn̄ Abasi, utọ nte, Kyʹri·os (Ọbọn̄) ye The·osʹ (Abasi).

[Mme Ikọ idakisọn̄]

[Ebiet Ẹdade Ndise Ẹto ke page 30]

Ẹbọ ẹto Egypt Exploration Society