“Afo Edi Enyene-Ido An̄wan”

Ẹketịn̄ mme ikọ itoro emi ẹban̄a n̄kaiferi Moab kiet. Enye ekedi ebeakpa ekerede Ruth, n̄wan eyen Naomi an̄wan Israel. Enye okodụn̄ ke Israel ke n̄kpọ nte isua 3,000 emi ẹkebede, ke ini mme ebiereikpe ẹkekarade, Ruth ama anam eti enyịn̄ ọnọ idemesie nte enyene-ido an̄wan. (Ruth 3:11) Enye akasan̄a didie enyene eti enyịn̄ emi? Mmanie ẹkeme ndibọ ufọn nto uwụtn̄kpọ esie?

Sia mîkoyomke ndidia “udia ifu,” Ruth ama anam utom ọkpọsọn̄ ke ediwak hour nte anditan̄ ukpen̄e ke in̄wan̄, ndien ẹma ẹtoro enye ke ifịk esie. Idem ke ini ẹkenamde utom efere enye, enye okosụk ananam utom ọkpọsọn̄, anamde akan nte ẹkekerede. Ke edide n̄wọrọnda, enye ama anam se Bible etịn̄de aban̄a n̄wanndọ oro odotde itoro, enyenede ukeme, onyụn̄ enyenede ifịk.—Mme N̄ke 31:10-31; Ruth 2:7, 15-17.

Mme edu eke spirit oro Ruth ekenyenede—nsụhọdeidem, edu n̄waidem ye ima akpanikọ—ẹkedi mme akpan n̄kpọ oro ẹkenamde enye enyene eti enyịn̄ ke iso mme owo. Ke ọkpọn̄de ete ye eka ye obio emana esie, mînyụn̄ inyeneke idotenyịn ndinyene ifụre oro ndọ ekemede ndinọ, enye ama ọsọn̄ọ ada ye Naomi. Ke ukem ini oro, Ruth ama owụt udọn̄ esie ndinam n̄kpọ Jehovah, kpa Abasi eka ebe esie. Ke ọsọn̄ọde etịn̄ nte enye ọkọfọnde, mbụk N̄wed Abasi ọdọhọ ke enye ama ‘ọfọn ye Naomi akan nditọ-iren itiaba.’—Ruth 1:16, 17; 2:11, 12; 4:15.

Okposụkedi mme owo ẹketorode eti ido Ruth, se ikedide akpan n̄kpọ ikan ekedi nte ke Abasi ama otoro mme edu esie onyụn̄ ọnọ enye utịp ke ndinam enye akabade edi ekaete Jesus Christ. (Matthew 1:5; 1 Peter 3:4) Nso eti uwụtn̄kpọ ke Ruth edi ntem ọnọ iban Christian ye kpukpru mbon oro ẹdọhọde ke ituak ibuot inọ Jehovah!