Mme Mbụme Ẹtode Mme Andikot

Edieke owo owotde idem, ndi ọkpọfọn asan̄autom Christian ndinọ utịn̄ikọ ubụkowo oro?

Asan̄autom Christian kiet kiet ekpenyene ndibiere nnọ idemesie m̀mê eti ubieresịt esie ayayak enye ọnọ utịn̄ikọ ke itie n̄kpa owo oro etiede nte ke enye okowot idem. Ke ini anamde ubiere oro, enye ekpenyene ndikere mban̄a mme mbụme oro ẹtienede mi: Didie ke Jehovah ese uwotidem? Nte n̄kpa oro ekenen̄ede edi uwotidem? Nte udọn̄ọ mbeibuot m̀mê eke ntụk akada ekesịm uwotidem emi? Didie ke ẹse uwotidem ke n̄kann̄kụk oro?

Nte mme Christian, nnyịn imenyene udọn̄ ke nte Jehovah esede uwotidem. Uwem owo edi ọsọn̄urua ye edisana ọnọ Jehovah. (Genesis 9:5; Psalm 36:9) Owo ndikokoi n̄wot idemesie akwan̄a ke enyịn Abasi. (Exodus 20:13; 1 John 3:15) Ndi oro ọbiọn̄ọ edinọ utịn̄ikọ ke itie n̄kpa owo oro owotde idem?

Kere se iketịbede inọ Edidem Saul eke Israel. Ke ini enye ọkọfiọkde ete imọ idibọhọke akpatre ekọn̄ oro ikan̄wanade ye mme Philistine, utu ke ndiyak mme asua esie ẹnam enye n̄kpọ bụt, ‘Saul ama ada ofụt esie ọduọ ke esịt.’ Ke ini mme Philistine ẹdide edikụt okpo esie, mmọ ẹma ẹmenede enye ẹkọn̄ ke ibibene Beth-shan. Ke ini ẹkedide ẹdifiọk se mme Philistine ẹkenamde, mme andidụn̄ Jabesh-gilead ẹma ẹkekọn̄ọde okpo oro ẹfep ẹkefọp. Ndien mmọ ẹda mme ọkpọ esie ẹkebụk. Mmọ ẹma ẹkam ẹtre udia ke usen itiaba, kpa ido editua mme akpan̄kpa eke nditọ Israel. (1 Samuel 31:4, 5a, 8-13; Genesis 50:10) Ke ini David, enye emi Jehovah ekeyetde aran, okokopde se mme andidụn̄ Jabesh-gilead ẹkenamde, enye ama ọdọhọ ete: “Yak Jehovah osụk ọdiọn̄ mbufo, emi ẹkenamde ufọn emi ẹnọ ete mbufo, kpa Saul, ke emi mbufo ẹbụkde enye. Ndien yak Jehovah osụk anam ufọn ye akpanikọ ọnọ mbufo n̄ko.” (2 Samuel 2:5, 6) N̄wed Abasi iwụtke ke ẹma ẹbiom mme andidụn̄ Jabesh-gilead ikpe ke ndikanam se ẹkemede ndida nte edinam ubụkowo nnọ Edidem Saul. Men oro domo ye mbon oro owo mîkobụkke ke ntak idiọk edinam mmọ. (Jeremiah 25:32, 33) Asan̄autom Christian ekeme ndikere mban̄a mbụk aban̄ade Saul mi ke ndibiere m̀mê imọ imekeme ndinọ utịn̄ikọ ke itie n̄kpa owo oro owotde idem.

Asan̄autom oro ekeme n̄ko ndikere mban̄a uduak utịn̄ikọ ubụkowo. Ke mîbietke mbon oro ẹnịmde ke ukpọn̄ ikpaha ke nsinsi, Mme Ntiense Jehovah isinọhọ utịn̄ikọ ubụkowo ye ukwan̄ ekikere ndinọ akpan̄kpa aka ererimbot efen. Utu ke ndinyene ufọn nnọ akpan̄kpa, akpan uduak ẹsinọde utịn̄ikọ ubụkowo edi ndidọn̄ mbon oro owo mmọ akpade esịt ndinyụn̄ nnọ mbon oro ẹdụkde edinam oro ikọ ntiense aban̄ade idaha mme akpan̄kpa. (Ecclesiastes 9:5, 10; 2 Corinth 1:3-5) Akpan ntak efen oro ẹsinọde utịn̄ikọ ubụkowo esidi man ẹn̄wam kpukpru mme andidụk edinam ubụkowo ẹkere ẹban̄a nte uwem omụhọde. (Ecclesiastes 7:2) Nte ẹyeyọhọ uduak emi ke ndinọ utịn̄ikọ edibụk owo oro owotde idem?

Edi akpanikọ, ndusụk owo ẹkeme ndikere ke owo oro okokokoi owot idemesie, etịmde ọfiọk ete ke imọ imanam idiọkn̄kpọ idian Jehovah. Edi ndi ẹsikeme ndisọn̄ọ utọ ekikere oro? Nte ekeme ndidi emi eketịbe ke mbuari? Ndusụk mbon oro ẹsidomode ndiwot idem ẹsikpụhọde ekikere ẹnyụn̄ ẹtre ndiwot idem. Owo ikemeke ndikabade esịt ke se akanamde ke enye ama akakpa.

Akpan n̄kpọ efen oro enyenede ebuana ye ediwak uwotidem edi udọn̄ọ mbeibuot ye eke ntụk. Ẹkeme ndinen̄ede n̄kot mmọ emi mbon unọmọ uwotidem. Nte ekemde ye ndusụk ibat, mbahade 90 eke ikie ke otu mbon oro ẹsiwotde idem ẹnyene ndusụk orụk mfịna mbeibuot, eke ntụk,  m̀mê mbumehe uda n̄kpọsọn̄ ibọk. Nte Jehovah eyefen utọ mbon mbeibuot oro ẹwotde idem do? Nnyịn idụhe ke idaha ndibiere m̀mê akpan̄kpa oro akanam idiọkn̄kpọ oro edifen nnọ mîdụhe ke iso Jehovah. Asan̄autom Christian ekeme ndikere mban̄a mme idaha ye n̄wetnnịm n̄kpọ ẹban̄ade nsọn̄idem akpan̄kpa ke ini enye ekerede m̀mê ikpenyene ndinọ utịn̄ikọ ke itie n̄kpa owo oro owotde idem.

Odu n̄kpọ kiet efen oro anade ẹkere ẹban̄a: Didie ke mme owo ke n̄kann̄kụk oro ẹse uwotidem ye n̄kpa owo oro? Emi etịm ebehe mbiowo, emi ẹnyenede udọn̄ ẹban̄a nte emi editụkde eti enyịn̄ esop n̄kann̄kụk Mme Ntiense Jehovah. Ọkọn̄ọde ke ọsọ edu oro ẹnyenede ẹban̄a uwotidem ke n̄kann̄kụk oro, ndien akpan akpan kaban̄a uwotidem emi, mbiowo ẹkeme nditre ndinọ utọ utịn̄ikọ ubụkowo oro ke eferife m̀mê ke Ufọkmbono Obio Ubọn̄.

Nte ededi, edieke ẹdọhọde asan̄autom Christian ẹte ọnọ utịn̄ikọ ubụkowo oro, enye ekeme ndikere sia edide ọkpọkpọ ubiere, ke imọ imekeme ndinam ntre. Edieke enye ebierede ndinam ntre, enye ekpenyene ndiwụt ọniọn̄ ke nditre nditịn̄ ọkpọikọ ekededi kaban̄a m̀mê andiwot idem eyeset ke n̄kpa m̀mê idisetke. Idotenyịn ini iso ekededi oro odude ọnọ akpan̄kpa esịne Jehovah ke ubọk, ndien owo ndomokiet ikemeke nditịn̄ m̀mê ẹyenam akpan̄kpa oro eset m̀mê owo idinamke. Asan̄autom ekeme ndiwụk ntịn̄enyịn ke mme akpanikọ Bible ẹban̄ade n̄kpa nnyụn̄ ndọn̄ mbon oro owo mmọ akpade esịt.