Jehovah Ada Un̄wana Abana Ikọt Esie
Jehovah Ada Un̄wana Abana Ikọt Esie
“[O n̄wan, NW] daha ke enyọn̄! yama! koro un̄wana fo emedi, ubọn̄ Jehovah omonyụn̄ asiaha ọnọ fi.”—ISAIAH 60:1.
1, 2. (a) Nso idi idaha ubonowo? (b) Mmanie ẹdi ntak ekịm oro ofụkde ubonowo?
“OH, ubaha ikpenyenede Isaiah m̀mê Edisana Paul!” Oro ekedi nte Harry Truman, adaibuot ukara United States ekesemede ko ke edem ke iduọk isua 1940. Ntak emi enye eketịn̄de mme ikọ oro? Koro enye ama okụt ufọn edinyene mme adausụn̄ oro ẹnyenede n̄kokon̄ idaha eti ido uwem ke ererimbot eyo esie. Ubonowo ndikosụk mbe n̄kịmn̄kịm ini eke ọyọhọ isua ikie 20, kpa ini ekọn̄ ererimbot ọyọhọ iba, ekedi oro. Nte ededi, idem okposụkedi ekọn̄ oro okokụrede, ererimbot ikodụhe ke emem. Ekịm okosụk ododu. Ke akpanikọ, isua 57 tọn̄ọ nte ekọn̄ oro okokụre, ererimbot ke osụk ododu ke ekịm. Edieke Truman, adaibuot ukara oro okpodude uwem mfịn, eyịghe idụhe nte ke enye okposụk okokụt ufọn edinyene mme adausụn̄ oro ẹnyenede eti ido uwem nte Isaiah m̀mê Paul.
2 Edide Truman, adaibuot ukara oro, ama ọfiọk m̀mê ikọfiọkke, apostle Paul ama etịn̄ aban̄a ekịm oro ofụkde ubonowo, ndien enye ama odụri mme owo utọn̄ aban̄a emi ke mme uwetn̄kpọ esie. Ke uwụtn̄kpọ, enye ama odụri ekemmọ mme andinịm ke akpanikọ utọn̄ ete: ‘Nnyịn in̄wanake en̄wan nnyịn ye obụk ye iyịp, edi in̄wana ye mbọn̄, ye mme enyene-odudu ye mme andikara ekịm ererimbot, ye udịm mme idiọk spirit emi ẹdude ke enyọn̄.’ (Ephesus 6:12) Paul eketịn̄ mme ikọ emi ndiwụt ke imọ ikọfiọkke kpọt nte ke ekịm eke spirit ofụk ererimbot edi ke imọ ima ifiọk n̄ko ata ebiet oro ekịm emi otode—udịm mme okopodudu demon emi ẹtịn̄de ẹban̄a nte ‘mme andikara ererimbot.’ Sia mme okopodudu spirit ẹdide ntak ekịm ererimbot, nso ke mme ikpîkpu owo ẹkeme ndinam man ẹmen enye ẹfep?
3. Kpa ye ekịm oro ofụkde ubonowo, nso ke Isaiah ekebem iso etịn̄ aban̄a mbon oro ẹnamde akpanikọ?
3 Isaiah ama etịn̄ n̄ko aban̄a ekịm oro ofụkde ubonowo. (Isaiah 8:22; 59:9) Nte ededi, ke esede ebe esịm eyo nnyịn, enye ama ebem iso etịn̄ ke idak ndausụn̄ odudu spirit ete ke idem ke mme ini ekịm emi, Jehovah ayanam idotenyịn mme owo oro ẹmade un̄wana ayama. Ih, okposụkedi nnyịn mînyeneke Paul m̀mê Isaiah, nnyịn imenyene mme uwetn̄kpọ eke odudu spirit mmọ ndida nnyịn usụn̄. Man ikụt se utọ edidiọn̄ oro edide ọnọ mbon oro ẹmade Jehovah, ẹyak nnyịn ikere iban̄a ntịn̄nnịm ikọ Isaiah oro ẹkụtde ke ọyọhọ ibuot 60 ke n̄wed esie.
N̄wan Ntịn̄nnịm Ikọ Ọnọ Un̄wana
4, 5. (a) Nso ke Jehovah owụk n̄wan kiet ete anam, ndien nso un̄wọn̄ọ ke enye anam? (b) Mme aduai-owo-idem ikọ ewe ẹdọn̄ọ ke Isaiah ibuot 60?
4 Ẹtịn̄ mme akpa ikọ eke Isaiah ibuot 60 ẹnọ n̄wan kiet oro odude ke ata idiọk idaha—ke ekịm, onyụn̄ anade ke isọn̄. Ke mbuari, un̄wana asiaha odụk ekịm oro, ndien Jehovah ofiori ete: “[O n̄wan, NW] daha ke enyọn̄! yama! koro un̄wana fo emedi, ubọn̄ Jehovah omonyụn̄ asiaha ọnọ fi.” (Isaiah 60:1) Ini ekem n̄wan emi ndidaha nda nnyụn̄ n̄wụt un̄wana Abasi, kpa ubọn̄ esie. Ntak-a? Nnyịn ikụt ibọrọ ke ufan̄ikọ oro etienede mi: “Sese, ekịm oyofụk ererimbot, ọkpọsọn̄ ekịm oyonyụn̄ ofụk mme idụt: edi Jehovah ayasiaha ọnọ fi, ẹyenyụn̄ ẹkụt ubọn̄ esie eke odorode fi.” (Isaiah 60:2) Ke ini n̄wan oro anamde ewụhọ Jehovah, ẹn̄wọn̄ọ utịbe utịbe utịp ẹnọ enye. Jehovah ọdọhọ ete: “Mme idụt ẹyesan̄a ke un̄wana fo, ndidem ẹyenyụn̄ ẹsan̄a ke usiere fo.”—Isaiah 60:3.
5 Mme aduai-owo-idem ikọ ke ufan̄ikọ ita emi ẹdi ntọn̄ọikọ ye editịn̄ ibio ibio mban̄a se isịnede ke mme ufan̄ikọ eken ke Isaiah ibuot 60. Enye ebem iso etịn̄ aban̄a mme ifiọk n̄kpọntịbe n̄wan ntịn̄nnịm ikọ kiet onyụn̄ anam an̄wan̄a nte nnyịn ikemede ndidu ke un̄wana Jehovah kpa ye ekịm oro ofụkde ubonowo. Nte ededi, nso ke mme ndamban̄a n̄kpọ ke ntọn̄ọ ufan̄ikọ ita emi ẹda ẹban̄a?
6. Anie edi n̄wan eke Isaiah ibuot 60, ndien mmanie ẹda ẹban̄a enye ke isọn̄?
6 N̄wan eke Isaiah 60:1-3 edi Zion, kpa esop Jehovah eke enyọn̄ emi esịnede mme edibotn̄kpọ eke spirit. Mfịn, ke isọn̄, nsụhọ “Israel Abasi,” kpa esop ofụri ererimbot eke mme Christian oro ẹyetde aran ke spirit, oro ẹnyenede idotenyịn ndikara ye Christ ke heaven, ẹda ẹban̄a Zion. (Galatia 6:16) Idụt eke spirit emi edi edinyene ofụri ibat mme andibuana edide 144,000, ndien edisu eke Isaiah ibuot 60 eke eyomfịn enyene n̄kpọ ndinam ye mbon oro ẹdude uwem ke isọn̄ “ke ukperedem ini.” (2 Timothy 3:1; Ediyarade 14:1) Ntịn̄nnịm ikọ emi n̄ko enyene ekese nditịn̄ mban̄a mme nsan̄a nsụhọ Christian oro ẹyetde aran, kpa “akwa otuowo” eke “mme erọn̄ en̄wen.”—Ediyarade 7:9; John 10:16.
7. Nso ikedi idaha Zion ke 1918, ndien didie ke ẹketịn̄ ntịn̄nnịm ikọ ẹban̄a emi?
7 Nte ini ama odu oro “Israel Abasi” okodude ke ekịm, nte n̄wan ntịn̄nnịm ikọ oro okodude? Ih, emi eketịbe ke se iwakde ikan isua 80 emi ẹkebede. Ke ini akpa ekọn̄ ererimbot, mme Christian oro ẹyetde aran ẹma ẹn̄wana ọkpọsọn̄ ndinam utom edinọ ikọ ntiense aka iso. Edi ke 1918, akpatre isua ekọn̄ oro, utom ukwọrọikọ oro ẹtịmde ama ekpere nditre. Ẹma ẹbiere uwak isua n̄kpọkọbi ẹnọ Joseph F. Rutherford, emi ekesede aban̄a utom ukwọrọikọ eke ofụri ererimbot, ye mme esenyịn Christian eken ke nsunsu edori ikọ. Ke n̄wed Ediyarade, ẹma ẹtịn̄ ke ntịn̄nnịm ikọ ẹban̄a mme Christian oro ẹyetde aran oro ẹkedude ke isọn̄ ini oro nte mme okpo oro ẹnade “ke efak akwa obio oro ẹsiode enye enyịn̄ Sodom ye Egypt ke usem spirit.” (Ediyarade 11:8) Oro ekenen̄ede edi ini ekịm ọnọ Zion, emi nditọ esie oro ẹyetde aran emi ẹdude ke isọn̄ ẹdade ẹban̄a!
8. Nso n̄wọrọnda ukpụhọde ikada itie ke 1919, ye nso utịp?
8 Nte ededi, ẹma ẹkụt n̄wọrọnda ukpụhọde ke isua 1919. Jehovah ama ọnọ Zion un̄wana! Mbon Israel Abasi oro ẹkebọhọde ẹma ẹdaha ẹda man ẹwụt un̄wana Abasi, ẹfiakde ẹtọn̄ọ nditan̄a eti mbụk uko uko. (Matthew 5:14-16) Ke ntak obufa ifịk mme Christian emi, ẹma ẹdụri mbon efen ẹwụt un̄wana Jehovah. Akpa kan̄a, ẹma ẹyet mbufa owo efen efen aran nte mme andibuana ke Israel Abasi. Ẹkot mmọ ndidem ke Isaiah 60:3, sia mmọ ẹnyenede ndidi mme anditiene ndia akpa ye Christ ke Obio Ubọn̄ Abasi eke heaven. (Ediyarade 20:6) Ke ukperedem, ẹma ẹtọn̄ọ ndidụri akwa otuowo eke mme erọn̄ en̄wen n̄wụt un̄wana Jehovah. Mmọ emi ẹdi “mme idụt” oro ẹtịn̄de ẹban̄a ke ntịn̄nnịm ikọ oro.
Nditọ N̄wan Oro Ẹdi Ufọk!
9, 10. (a) Nso ndiye n̄kpọ ke n̄wan oro okokụt, ndien nso ke emi akada aban̄a? (b) Nso ntak ke Zion ekenyene ndidat esịt?
9 Idahaemi, Jehovah ọtọn̄ọ ndinọ ọyọhọ ntọt, yak idọhọ ntre, mban̄a mme ikọ oro ẹkụtde ke Isaiah 60:1-3. Enye ọnọ n̄wan oro ewụhọ efen. Kpan̄ utọn̄ kop se enye ọdọhọde: “Menede enyịn fo kabade kụk, nyụn̄ se.” N̄wan oro anam ewụhọ oro, ndien nso ndiye n̄kpọ ke enye okụt ntem! Nditọ esie ke ẹdi ufọk. Itie N̄wed Abasi oro aka iso ọdọhọ ete: “Kpukpru mmọ ẹbono ẹdi ke ọtọ fo: nditọ-iren fo ẹyeto ke anyan ebiet ẹdi, ẹyenyụn̄ ẹbiom nditọ fo iban ke n̄kan̄.” (Isaiah 60:4) Editan̄a Obio Ubọn̄ eke ofụri ererimbot oro ọkọtọn̄ọde ke 1919 ama ada ediwak tọsịn mbufa owo edisịn ke utom Jehovah. Mmọ emi n̄ko ẹma ẹkabade ẹdi “nditọ-iren” ye “nditọ iban” Zion, mme andibuana ke Israel Abasi oro ẹyetde aran. Ntem, Jehovah abana Zion ke ndida mme akpatre owo ke otu owo 144,000 ndisịn ke un̄wana.
10 Nte afo emekeme ndikere mban̄a idatesịt oro Zion enyenede ke nditọ esie ndidu ye enye? Edi, Jehovah ọnọ Zion mme ntak efen efen ndidat esịt. Nnyịn ikot ite: “Ndien afo oyokụt, onyụn̄ atara idem, esịt oyonyụn̄ ebre, onyụn̄ an̄wan̄a fi, koro inyene inyan̄ ẹyekabade ẹtiene fi, odudu [“inyene,” NW] mme idụt ẹyedi ke ọtọ fo.” (Isaiah 60:5) Ke n̄kemuyo ye mme ntịn̄nnịm ikọ oro, ọtọn̄ọde ke iduọk isua 1930, ata ediwak Christian oro ẹnyenede idotenyịn edidu uwem ke isọn̄ ke nsinsi ẹma ẹbụn̄ọ ẹka Zion. Mmọ ẹmewọrọ ke “inyan̄” ubonowo oro adian̄arede ọkpọn̄ Abasi, ndien mmọ ẹda ẹban̄a inyene mme idụt. Mmọ ẹdi “ndiye n̄kpọ kpukpru mme idụt.” (Haggai 2:7, NW; Isaiah 57:20) Tịm fiọk, n̄ko, ete ke “ndiye n̄kpọ” emi ikaha ndinam n̄kpọ nnọ Jehovah ke usụn̄ idemmọ. Baba, mmọ ẹtịp n̄kpọ ẹsịn ke uyai Zion ke ndituak ibuot ke ebuana ye nditọete mmọ oro ẹyetde aran, ndien ẹkabade ẹdi “otu-erọn̄ kiet” ye mmọ ke idak “ekpeme-erọn̄ kiet.”—John 10:16.
Mbonurua, Mme Ekpemerọn̄, ye Mme Anyamurua Ẹdi Zion
11, 12. Tịn̄ ban̄a otuowo oro ẹkụtde nte ẹbụn̄ọde ẹka Zion.
11 Editan̄ mbok emi ẹkebemde iso ẹtịn̄ mi ada esịm n̄wọrọnda n̄kọri ke ibat mme anditoro Jehovah. Ẹbem iso ẹtịn̄ emi ke mme ikọ ntịn̄nnịm ikọ oro ẹtienede mi. Kere nte ke afo ada ye n̄wan ntịn̄nnịm ikọ oro ke Obot Zion. Afo ese edem usiahautịn, ndien nso ke afo okụt? “Akwa udịm camel ẹyefụk fi, mme dromedary Midian ye eke Ephah; kpukpru mmọ ẹyeto ke Sheba, ẹbiom gold ye frankincense ẹdi, ẹyenyụn̄ ẹkwọrọ itoro Jehovah.” (Isaiah 60:6) Otu mbonurua ye akwa udịm camel mmọ ẹnam isan̄ ke afan̄ usụn̄ oro adade esịm Jerusalem. Kamse, mme camel oro ẹbiet ukwọ oro ofụkde isọn̄! Mme anyamurua oro ẹkama mme ọsọn̄urua enọ, “gold ye frankincense.” Ndien mbonurua emi ẹdi ẹbịne un̄wana Abasi man ẹtoro enye an̄wan̄wa, “ẹkwọrọ itoro Jehovah.”
12 Mbonurua oro isan̄ake ikpọn̄. Mme ekpemerọn̄ n̄ko ke ẹbụn̄ọ ẹka Zion. Ntịn̄nnịm ikọ oro aka iso ọdọhọ ete: “Kpukpru otu ufene Kedar ẹyebono ke ọtọ fo, okukịm Nebaioth ẹyenam n̄kpọ ẹnọ fi.” (Isaiah 60:7a) Otu mme ekpemerọn̄ ke ẹdi ke edisana obio ndinọ Jehovah mfọnn̄kan ke otuerọn̄ mmọ. Mmọ ẹkam ẹnọ idemmọ ndinam n̄kpọ nnọ Zion! Didie ke Jehovah adara isenowo emi? Abasi ke idemesie ọbọrọ ete: “Ẹyedọk ke itie-uwa mi nte n̄kpọ inem; nyonyụn̄ mbana ediye ufọk mi.” (Isaiah 60:7b) Jehovah ke mfọnido enyịme mme enọ ye utom isenowo emi. Mmọ ndidu abana temple esie.
13, 14. Nso ke ẹkụt nte ẹtode edem usoputịn ẹdi?
13 Idahaemi wọn̄ọde se utịt enyọn̄ n̄kan̄ edem usoputịn. Nso ke afo okụt? Ke ata nsannsan, se itiede nte afia ikpaenyọn̄ ofụk inyan̄. Jehovah obụp mbụme oro afo enyenede ke ekikere ete: “Mmanie ẹdi mme mmọ emi ẹfede (ẹdi) nte obubịt enyọn̄, ye nte ibiom ẹka ke mme window mmọ?” (Isaiah 60:8) Jehovah ọbọrọ mbụme esie ete: “Mme isuo ke ẹbet mi, mme ubom mbakara Tarshish ẹbet ke mbemiso, man ẹda nditọ mi ke anyan idụt ẹdi, silver mmọ ye gold mmọ n̄ko, ẹsọk enyịn̄ Jehovah Abasi fo, ye Edisana Abasi Israel; koro enye abanade fi.”—Isaiah 60:9.
14 Nte afo omokụt enye? Afia ikpaenyọn̄ oro etịm asan̄a ekpere ndien etie idahaemi nte uyọ ntọi ko-o ke edem usoputịn. Enye etie nte otu inuen oro ẹsan̄ade ke mbufịt inyan̄. Edi nte mmọ ẹsan̄ade ẹkpere, afo okụt ke mmọ ẹdi mme nsụn̄ikan̄ emi mme afara mmọ ẹtarade man ẹbọ ofụm. Ata ediwak nsụn̄ikan̄ ke ẹwat ẹka Jerusalem tutu mmọ ẹbiet otu ibiom. Ke ẹtode mme itiembehe oro ẹdude nsannsan, otu nsụn̄ikan̄ oro ẹwat ata usọp usọp, ẹda mme andinịm ke akpanikọ ẹka Jerusalem man ẹketuak ibuot ẹnọ Jehovah.
Esop Jehovah Ọkọri
15. (a) Nso n̄kọri ke ikọ Isaiah 60:4-9 ebem iso etịn̄ aban̄a? (b) Nso edu ke ata mme Christian ẹsiwụt?
15 Nso in̄wan̄-in̄wan̄ ntịn̄nnịm ndise ke ufan̄ikọ 4 esịm 9 ẹwụt ntem kaban̄a n̄kọri ofụri ererimbot oro adade itie toto ke 1919! Ntak emi Jehovah akadade utọ n̄kọri oro ọdiọn̄ Zion? Koro toto ke 1919, Israel Abasi okop item aka iso ndiwụt un̄wana Jehovah. Nte ededi, nte ufan̄ikọ 7 ọdọhọde, nte afo ama etịm ọfiọk ke mbufa owo oro “ẹdi ke itie-uwa [Abasi]”? Itieuwa edi ebiet emi ẹsifọpde mme uwa, ndien ikpehe ntịn̄nnịm ikọ enye emi eti nnyịn nte ke utom Jehovah abuana uwa. Apostle Paul ekewet ete: ‘Mmekpe mbufo ubọk nte ẹda ikpọkidem mbufo ẹnọ Abasi nte odu-uwem uwa, emi asanade, emi onyụn̄ enemde Abasi ndibọ; koro emi edide uwa eke anade ọnọ mbufo ndiwa.’ (Rome 12:1) Ke n̄kemuyo ye mme ikọ Paul, ata mme Christian isikopke uyụhọ ke ikpîkpu edidụk mme edinam ido ukpono ini kiet ke urua. Mmọ ẹsinọ ini, odudu, ye inyene mmọ ke ndimenede edisana utuakibuot ke enyọn̄. Nte mme utọ andituak ibuot oro ẹyakde idem ẹnọ ndidu ibanake ufọk Jehovah? Ntịn̄nnịm ikọ Isaiah ọkọdọhọ ke mmọ ẹyebana. Ndien nnyịn imekeme ndinịm ke akpanikọ nte ke mme utọ ifịk ifịk mme andituak ibuot oro ẹye n̄ko ke enyịn Jehovah.
16. Mmanie ke eset ẹketiene ẹbuana ke utom edifiak mbọp, ndien mmanie ẹnam oro ke eyomfịn?
16 Mbufa owo emi ẹyom ndinam utom. Ntịn̄nnịm ikọ oro aka iso ọdọhọ ete: “Nditọ isen owo ẹyebọp ibibene fo, ndidem mmọ ẹyenyụn̄ ẹnam n̄kpọ ẹnọ fi.” (Isaiah 60:10) Ke akpa edisu mme ikọ emi ko ke edem ke ini mme owo ẹkenyọn̄ọde ntan̄mfep ke Babylon, ndidem ye mbon idụt en̄wen ẹma ẹnen̄ede ẹn̄wam ke ndifiak mbọp temple ye obio Jerusalem. (Ezra 3:7; Nehemiah 3:26) Ke edisu eke eyomfịn, akwa otuowo ẹnọ nsụhọ oro ẹyetde aran ibetedem ke ndibọp utuakibuot akpanikọ. Mmọ ẹn̄wam ke ndibọp mme esop Christian ndien ke ntem ẹnamde esop Jehovah oro ebietde obio “ibibene” etetịm ọsọn̄ idem. Mmọ n̄ko ẹbuana ke ata ata ubọpn̄kpọ—edibọp mme Ufọkmbono Obio Ubọn̄, mme Ufọk Mbono, ye mme ufọkutom Bethel. Ke kpukpru usụn̄ emi, mmọ ẹnọ nditọete mmọ oro ẹyetde aran ibetedem ke ndise mban̄a mme udọn̄ esop Jehovah oro ọkọride-kọri!
17. Nso idi usụn̄ kiet emi Jehovah abanade ikọt esie?
17 Mme akpatre ikọ eke Isaiah 60:10 ẹdi n̄kpọ nsịnudọn̄ didie ntem! Jehovah ọdọhọ ete: “Ke iyatesịt mi ke n̄kamịgha fi, ndien ke mfọnido mi ke n̄katua fi mbọm.” Ih, ko ke edem ke 1918/1919, Jehovah ama otụnọ ikọt esie. Edi oro ekedi ke eset. Ini edi emi Jehovah nditua mme asan̄autom esie oro ẹyetde aran ye mme nsan̄a mmọ ẹdide mme erọn̄ en̄wen, mbọm. Uyarade ndiwụt nte ke emi edi ntre edi n̄wọrọnda n̄kọri emi enye adade ọdiọn̄ mmọ, ‘abanade mmọ,’ yak idọhọ ntre.
18, 19. (a) Nso un̄wọn̄ọ ke Jehovah ọn̄wọn̄ọ aban̄a mbufa owo oro ẹdidụkde ẹdi esop esie? (b) Nso ke mme nyọhọ-nsụhọ ufan̄ikọ Isaiah ibuot 60 ẹsian nnyịn?
18 Isua kiet kiet, ediwak tọsịn “isen owo” efen efen ke mme itie ikie ẹsibuana ye esop Jehovah, ndien usụn̄ oyosụk ana in̄wan̄ ọnọ ekese efen efen nditiene mmọ. Jehovah ọdọhọ Zion ete: “Ndien mme usụn̄ fo ẹyena in̄wan̄ kpukpru ini; idinyụn̄ isịnke mmọ ke uwemeyo ye ke okoneyo; man ẹda inyene mme idụt ẹsọk fi, ẹnyụn̄ ẹda ndidem mmọ ẹdi.” (Isaiah 60:11) Ndusụk mme andibiọn̄ọ ẹdomo ndiberi “mme usụn̄” oro, edi nnyịn imọfiọk ite ke mmọ ikemeke ndikụt unen. Jehovah ke idemesie ọdọhọ ke usụn̄ kiet m̀mê eken ete ke mme usụn̄ oro ẹdina in̄wan̄. N̄kọri ayaka iso.
19 Odu mme usụn̄ en̄wen oro Jehovah ọdiọn̄de ikọt esie, anamde mmọ ẹye ke ukperedem ini emi. Mme nyọhọ-nsụhọ ufan̄ikọ Isaiah 60 ẹwụt ke ntịn̄nnịm ikọ se mme usụn̄ oro ẹdide.
Nte Afo Emekeme Ndinam An̄wan̄a?
• Anie edi “n̄wan” Abasi, ndien mmanie ẹda ẹban̄a enye ke isọn̄?
• Ini ewe ke nditọ Zion ẹkena ke isọn̄, ndien ini ewe n̄ko didie ke mmọ ‘ẹkedaha ke enyọn̄’?
• Ke adade nsio nsio ndamban̄a n̄kpọ, didie ke Jehovah ekebem iso etịn̄ aban̄a n̄kọri ke ibat mme ọkwọrọ Obio Ubọn̄ eyomfịn?
• Ke mme usụn̄ ewe ke Jehovah anam un̄wana esie ayama ọnọ ikọt esie?
[Mme Mbụme Ukpepn̄kpọ]
[Ndise ke page 10]
Ẹwụk “n̄wan” Jehovah ẹte adaha ke enyọn̄
[Ndise ke page 12]
Otu nsụn̄ikan̄ ẹbiet mme ibiom oro ẹfede ke enyọn̄