Ndisan̄a ke Usụn̄ Jehovah Ada Nti Utịp Edi

NDI akanam afo amasan̄a ke enyọn̄ ikpọ obot? Edieke edide amasan̄a, eyedi eketie fi ke idem nte n̄kpọ eke afo odorode ke enyọn̄ ererimbot. Ekedi inem inem n̄kpọ didie ntem ndin̄wek eti ofụm, ndida n̄kụt n̄kpọ ke ata anyan usụn̄, ndise ndiye ndise obot! Eyedi afo uketịghi aba mme mfịna eke usen ke usen.

Ata ediwak owo isiwakke ndinam mme utọ isan̄ oro, edi edieke afo edide Christian oro ama akayak idem ọnọ, eyedi afo amasan̄a ke enyọn̄ ikpọ obot ke ndusụk ini—ke usụn̄ifiọk eke spirit. Ukem nte andiwet psalm eke eset, afo nte eyịghe mîdụhe ọmọbọn̄ akam ete: “Wụt mi usụn̄ fo, O Jehovah; teme mi ido fo.” (Psalm 25:4) Ndi emeti nte eketiede fi ke idem akpa ini oro afo ọkọdọkde obot ufọk Jehovah okonyụn̄ ọtọn̄ọde ndisan̄a ke edikon̄ ebiet? (Micah 4:2; Habakkuk 3:19) Nte eyịghe mîdụhe, ikebịghike afo ama edi edifiọk ke ndisan̄a ke edikon̄ ebiet eke edisana utuakibuot emi ama ọnọ fi ukpeme ye idatesịt. Afo ama edinyene ukem ekikere andiwet psalm emi: “Ọfọfọn ọnọ mmọ eke ẹfiọkde n̄kpo idara: O Jehovah, mmọ ẹyesan̄a ke un̄wana iso fo.”—Psalm 89:15.

Nte ededi, ndusụk ini, mme akaisan̄ ke ikpehe emi etiede obot obot ẹsinyene ndiyọ ikpọ, nnyan itịghede. Ukot ẹsitọn̄ọ ndibiak mmọ, ndien mmọ ẹsikpa mba. Nnyịn n̄ko imekeme ndisobo n̄kpọsọn̄ idaha ke utom oro inamde inọ Abasi nnyịn. Ke ndondo emi, ekeme ndidi ukot ọtọn̄ọ ndibiak nnyịn. Didie ke nnyịn ikeme ndifiak n̄kop odudu ye idatesịt? Akpa usio-ukot edi ndifiọk nte mme usụn̄ Jehovah ẹkon̄de.

Mme N̄kokon̄ Ibet Jehovah

Mme usụn̄ Jehovah ‘ẹkon̄ ẹkan mme usụn̄ owo,’ ndien utuakibuot esie ‘owụhọ ke ibuot ikpọ obot, ẹnyụn̄ ẹmenede enye ẹkan n̄kpri obot.’ (Isaiah 55:9; Micah 4:1) Ọniọn̄ Jehovah edi “ọniọn̄ eke otode ke enyọn̄.” (James 3:17, NW) Mme ibet esie ẹkon̄ ẹkan kpukpru mme ibet eken. Ke uwụtn̄kpọ, ke ini oro mbon Canaan ẹkesinamde ibak ibak edinam ediwa nditọ, Jehovah ama ọnọ nditọ Israel mme n̄kokon̄ ibet ido uwem oro ẹkedade mbọm ẹdiọn̄ọ. Enye ọkọdọhọ mmọ ete: “Kûten̄e ubuene enyịn, kûnyụn̄ ukpono iso akamba owo. . . . Ẹbat esen . . . nte amana ke otu mbufo, nyụn̄ ma enye nte idem fo.”—Leviticus 19:15, 34.

Isua 1,500 ke ukperedem, Jesus ama ọnọ mme uwụtn̄kpọ efen efen aban̄a nte ibet Jehovah ‘ẹkon̄de.’ (Isaiah 42:21, NW) Ke Ukwọrọikọ oro ke Obot, enye ama asian mme mbet esie ete: “Ẹma mme asua mbufo, ẹnyụn̄ ẹbọn̄  akam ẹyom ufọn mmọ eke ẹnamde mbufo isịn-enyịn: man mbufo ẹdi nditọ Ete mbufo emi odude ke heaven.” (Matthew 5:44, 45) Enye ama adian do ete: “Ntre sededi mbufo ẹyomde owo ẹnam ye mbufo, ẹnam kpa ntre ye mmọ; koro emi edi ibet ye mme prophet.”—Matthew 7:12.

Mme n̄kokon̄ ibet emi ẹnyene odudu ke esịt mbon oro ẹnamde n̄kpọ ẹban̄a mmọ, onụkde mmọ ndikpebe Abasi oro mmọ ẹtuakde ibuot ẹnọ. (Ephesus 5:1; 1 Thessalonica 2:13) Kere ban̄a ukpụhọde oro Paul akanamde. Ke akpa ini oro ikopde iban̄a enye, enye ama “enyịme ẹwot” Stephen ama onyụn̄ “osobo ufọk Abasi.” Ke n̄kpasịp isua ifan̄ ke ukperedem, enye ama anam n̄kpọ sụn̄sụn̄ ye mme Christian ke Thessalonica nte emi “eka ọbọkde nditọ esie mmọ.” Ukpepn̄kpọ Abasi ama okpụhọde Paul emi ekedide andikọbọ anam akabade edi ima ima Christian. (Utom 8:1, 3; 1 Thessalonica 2:7) Enye ama enen̄ede owụt esịtekọm nte ke ukpepn̄kpọ Christ ama okpụhọde edu imọ. (1 Timothy 1:12, 13) Didie ke ukem esịtekọm oro ekeme ndin̄wam nnyịn ndika iso nsan̄a ke mme n̄kokon̄ usụn̄ Abasi?

Ndisan̄a ye Esịtekọm

Mme akaisan̄ ẹsikop idatesịt ndida ke enyọn̄ obot nse mme aduai-owo-idem ndise. Mmọ n̄ko ẹsikpep ndinyene inemesịt nto n̄kpri n̄kpọ ke usụn̄ isan̄ mmọ, utọ nte esen esen itiat, ediye flawa, m̀mê ndida n̄kụt unamikọt. Ke usụn̄ifiọk eke spirit, oyom nnyịn idu ke edidemede iban̄a mme utịp—ikpọ ye n̄kpri—ẹtode edisan̄a ye Abasi. Ifiọk emi ekeme ndinam ukot afiak ọsọn̄ nnyịn onyụn̄ anam mba mba isan̄ akabade edi isan̄ oro ọnọde odudu. Nnyịn iyetịn̄ mme ikọ David emi: “Nam n̄kop ima fo ke usenubọk: koro mbuọtde idem mi ye afo: wụt mi usụn̄ eke n̄kpasan̄ade.”—Psalm 143:8.

Mary, emi asan̄ade ke usụn̄ Jehovah ke ediwak isua, ọdọhọ ete: “Ke ini nsede mme n̄kpọ obot Jehovah, nsikwe awak-n̄kukọhọ ndudiọn̄ kpọt edi mmesikụt ima ima edu Abasi. Edide unam, inuen, m̀mê n̄ken̄, mmọ kiet kiet ẹdi mme san̄asan̄a edibotn̄kpọ ẹnyụn̄ ẹyọhọ ye mme n̄kpọ oro ẹduaide owo idem. Ukem inemesịt oro ke ẹsinyene ẹto mme akpanikọ eke spirit oro ẹsitịmde ẹn̄wan̄a owo nte mme isua ẹbede.”

Didie ke nnyịn ikeme ndinen̄ede n̄wụt esịtekọm? Ke ubak ubak, ebe ke nditre ndida se Jehovah anamde ọnọ nnyịn mfefere mfefere. Paul ekewet ete: “Ẹkûdop akam; ẹnọ Abasi ekọm ke kpukpru n̄kpọ.”—1 Thessalonica 5:17, 18; Psalm 119:62.

Ukpepn̄kpọ idemowo esitịp esịn ke owo ndinyene edu ediwụt esịtekọm. Paul ama eteme mme Christian ke Colossae ete: “Ẹsasan̄a ke [Christ Jesus], . . . ẹnyụn̄ ẹdọdiọn̄ ẹsọn̄ọ ẹda ke mbuọtidem . . . ẹnyụn̄ ẹnọ Abasi ẹkọm eti-eti.” (Colossae 2:6, 7) Ndikot Bible nnyụn̄ ntie n̄kere se nnyịn ikotde ọsọn̄ọ mbuọtidem nnyịn onyụn̄ anam nnyịn itịm isan̄a ikpere Andiwet Bible. Mme n̄kpọuto ẹdu ke esịt esie oro ẹkemede ndinụk nnyịn ‘ndinọ Abasi ẹkọm eti-eti.’

Ndidiana ye nditọete nnyịn nnam n̄kpọ Jehovah esinam isan̄ nnyịn emem. Andiwet psalm ama etịn̄ aban̄a idemesie ete: “Ami ndi nsan̄a kpukpru mmọ eke ẹbakde fi.” (Psalm 119:63) Mme ini mbono Christian m̀mê mme ini eken oro idude ye nditọete nnyịn ẹdi ndusụk mme ini oro nnyịn isikopde inemesịt ikan. Nnyịn imọfiọk ite ke ọsọn̄urua ubon Christian nnyịn ofụri ererimbot enyene ntọn̄ọ esie oto Jehovah ye mme n̄kokon̄ usụn̄ esie.—Psalm 144:15b.

Ke ẹsiode ediwụt esịtekọm ẹfep, ekikere edibiom mbiomo ọyọsọn̄ọ nnyịn idem ndika iso nsan̄a ke mme n̄kokon̄ usụn̄ Jehovah.

 Ndisan̄a ye Ekikere Edibiom Mbiomo

Mme akaisan̄ oro ẹnyenede edu edibiom mbiomo ẹsifiọk ke oyom mmimọ itịm isan̄a edieke anade mmimọ ikûsop usụn̄ m̀mê ikûyo ikodụk ebeden̄. Nte mbon oro ẹnyenede ifụre edimek, Jehovah ayak nnyịn inyene ukeuke ifụre ye odudu ndibiere n̄kpọ nnọ idem nnyịn. Edi oyom utọ ifụre oro asan̄a ye edu edibiom mbiomo nte nnyịn ibiomde mme mbiomo Christian nnyịn.

Ke uwụtn̄kpọ, Jehovah enyene mbuọtidem nte ke mme asan̄autom imọ ẹyebiom mbiomo mmọ nte ọfọnde. Enye itịn̄ke udomo odudu ye ini oro nnyịn ikpesịnde ke mme utom Christian mîdịghe m̀mê okụk ifan̄ m̀mê mme n̄kpọ efen ewe ke nnyịn ikpetịp isịn ke utom emi. Utu ke oro, ikọ oro Paul ekewetde ọnọ mbon Corinth abuana kpukpru nnyịn: “Yak kpukpru owo kiet kiet ọnọ nte enye akaduakde ke esịt esie.”—2 Corinth 9:7; Mme Hebrew 13:15, 16.

Edibuana eti mbụk ye mbon en̄wen esịne ke mbiomo edinọ enọ oro Christian enyenede. Nnyịn iwụt n̄ko ke nnyịn imenyene edu edibiom mbiomo ebe ke nditịp okụk kaban̄a utom Obio Ubọn̄ ofụri ererimbot. Gerhardt, ebiowo kiet, anam an̄wan̄a ete ke imọ ye n̄wan imọ ima inam etịbe mmimọ enen̄ede okpon ke ima ikọnyọn̄ mbono kiet ke N̄kan̄ Edem Usiahautịn Europe idi. Enye ọdọhọ ete: “Nnyịn ima ikụt ke nditọete nnyịn do ẹnyene ata esisịt inyene obụkidem; kpa ye oro mmọ ẹnen̄ede ẹwụt esịtekọm ẹban̄a mme n̄wed Bible nnyịn. Ntre nnyịn ima ibiere ndinọ nditọete nnyịn oro ẹdude ke unana ke mme idụt en̄wen adan̄a un̄wam nte ikekeme.”

Ndinam Ime Nnyịn Okpon

Esiyom ukeme man ẹkeme ndisan̄a ke enyọn̄ ikpọ obot. Mme akaisan̄ ẹsisịn̄ede idem ini ekededi oro mmọ ẹkemede, ndien ediwak mmọ ẹsinam mbio mbio isan̄ man ẹtịm idem ẹnọ nnyan isan̄. Ukem ntre, Paul ama esịn udọn̄ ọnọ nnyịn ndika iso nyọhọ ke mme utom ukara Abasi man ika iso ikop idem ke n̄kan̄ eke spirit. Paul ọkọdọhọ ke mbon oro ẹyomde ‘ndisan̄a ke ido nte odotde Ọbọn̄,’ ẹnyụn̄ ẹyomde ‘ẹsọn̄ọ mmimọ idem,’ ẹkpenyene ‘ndin̄wụm mfri ke edinam kpukpru nti utom.’—Colossae 1:10, 11.

Se inọde owo nsịnudọn̄ esitịp esịn ke akaisan̄ ndika iso n̄kop odudu. Didie? Ndiwụk ntịn̄enyịn ke in̄wan̄-in̄wan̄ ndise, utọ nte obot oro odude nsannsan, esidemede owo udọn̄. Ndien ke ini akaisan̄ asan̄ade mbahade iba isan̄ esie, enye ekeme ndise adan̄a nte enye ekperede ndisịm utịtmbuba esie. Nte afiakde ese adan̄a anyan usụn̄ oro enye ama akasasan̄a, enye oyokop uyụhọ.

Kpasụk ntre, idotenyịn nsinsi uwem esisọn̄ọ nnyịn idem onyụn̄ ọnọ nnyịn odudu. (Rome 12:12) Kan̄a ke emi, nte nnyịn isan̄ade ke usụn̄ Jehovah, nnyịn iyokụt unen ke ndinịm nnyụn̄ nsịm mme utịtmbuba Christian. Ndien nnyịn isikop idatesịt didie ntem ke ini ifiakde ise ediwak isua oro inamde akpanikọ m̀mê ke ini ikụtde mme ukpụhọde oro inamde ke edu uwem nnyịn!—Psalm 16:11.

Man ẹsan̄a anyan usụn̄ ẹnyụn̄ ẹka iso ẹkop odudu, mme akaisan̄ ẹsisan̄a ye idaha usọp oro ekemde. Ukem ntre, eti ndutịm oro esịnede edidụk mme mbono esop ye edibuana ke utom an̄wautom kpukpru ini ayanam nnyịn isan̄a ika iso tutu isịm utịtmbuba nnyịn. Ntem, Paul ama eteme ekemmọ mme Christian ete: “Ẹyak nnyịn ika iso itịm isan̄a ke ido emi kpasụk ntre.”—Philippi 3:16, NW.

Nte ededi, nnyịn isan̄ake ikpọn̄ ke usụn̄ Jehovah emi. Paul ewet ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom.” (Mme Hebrew 10:24) Eti itie ebuana eke spirit ayanam edi mmemmem ndikama idaha usọp oro ekemde nte nnyịn isan̄ade ye ekemmọ mme andinịm ke akpanikọ.—Mme N̄ke 13:20.

Ke akpatre, ata akpan n̄kpọ edi, inaha nnyịn idede ifre odudu oro Jehovah ọnọde. Mbon oro odudu Jehovah odude mmọ ke idem ‘ẹyeda nsọn̄idem ẹdọdiọn̄ ẹka iso.’ (Psalm 84:5, 7) Okposụkedi nnyịn isinyenede ndiyọ n̄kpọsọn̄ idaha ke usụn̄ isan̄ nnyịn ke ndusụk idaha, ye un̄wam Jehovah nnyịn imekeme ndinam emi.