“Ẹtiene Mi, . . . Ndien Ami Nyọnọ Mbufo Nduọk-Odudu”

“Ẹyak Nnyịn Ifọn Ido ye Kpukpru Owo”

NDIKWỌRỌ nnyụn̄ n̄kpep eti mbụk Obio Ubọn̄ Abasi ekedi akpan utom Jesus. (Mark 1:14; Luke 8:1) Sia edide udọn̄ mme anditiene Christ ndikpebe enye, mmọ ẹse utom edikpep etop Bible aban̄ade Obio Ubọn̄ Abasi nte ata akpan utom ke uwem mmọ. (Luke 6:40) Enen̄ede edi n̄kpọ inemesịt ọnọ Mme Ntiense Jehovah ndikụt nte etop Obio Ubọn̄ adade nduọkodudu oro ebịghide ọsọk mbon oro ẹnyịmede enye—kpa nte akanamde ke ini Jesus okodude ke isọn̄.—Matthew 11:28-30.

Ke ẹsiode edikpep Ikọ Abasi ẹfep, Jesus ama anam nti utom efen, utọ nte edikọk mbon udọn̄ọ ye edinọ mbon ọbiọn̄ udia. (Matthew 14:14-21) Ukem ntre, Mme Ntiense Jehovah ẹdian mme edinam oro ẹn̄wamde mme owo oro ẹdude ke unana ke utom edikpep Bible mmọ. Kamse, N̄wed Abasi etịm mme Christian idem ‘ndinam eti utom ekededi’ onyụn̄ eteme mmọ ‘ndifọn ido ye kpukpru owo.’—2 Timothy 3:16, 17; Galatia 6:10.

“Nditọete Nnyịn Ẹma Ẹdu Ndin̄wam Nnyịn”

Ke September 1999, akama-nsobo unyekisọn̄ ama ọnọmọ Taiwan. Ọfiọn̄ ifan̄ ke ukperedem, akamba edịm ye ikpọ eboho snow ye ice ẹma ẹda ẹsịm kiet ke otu ndiọkn̄kan oto-obot afanikọn̄ ke mbụk Venezuela. Ke ata ndondo emi, n̄kpọsọn̄ ukwọ ẹma ẹtọ ẹmen Mozambique. Ke kpukpru uwụtn̄kpọ ita emi, Mme Ntiense Jehovah ẹma ẹsọsọp ẹdibehe ke mme itie afanikọn̄ emi, ẹdade udia, mmọn̄, ibọk, ọfọn̄, ufọkọfọn̄ ye mme n̄kpoduoho utemudia ẹsọk mbon unọmọ. Mbonutom unyịmesịt oro ẹnyenede ifiọk ibọkusọbọ ẹma ẹbọp mme itie ukpeme mbon udọn̄ọ eke ibio ini man ẹkọk mbon oro ẹdade unan, ndien mbonutom unyịmesịt eke utom ubọpufọk ẹma ẹbọp mbufa ufọk ẹnọ mbon oro ẹketabade ufọkidụn̄ mmọ.

Ekemini un̄wam oro mbon unọmọ ẹkebọde ama otụk mmọ. Malyori, emi ikpọ eboho snow ye ice ẹkewetde ẹto obot ẹsụhọde ẹdibiat ufọk esie ke Venezuela ọdọhọ ete: “Ke ini nnyịn ikenen̄erede idu ke nnanenyịn, nditọete nnyịn ẹma ẹdu ndin̄wam nnyịn.” Ke mbonutom unyịmesịt ẹma ẹkebọp obufa ufọk ẹnọ ubon esie, Malyori ọkọdọhọ ete: “Nnyịn idikemeke ndikọm Jehovah ekem ke kpukpru se enye  anamde ọnọ nnyịn!” Ndien ke ini mbon oro ukwọ ọkọnọmọde ke Mozambique ẹkebọde ukpọhọde ufọk mmọ oro ẹkebọpde obufa mi, ofụri otu oro ke mbuari ẹma ẹtọn̄ọ ndikwọ ikwọ Obio Ubọn̄ emi “Jehovah Is Our Refuge” (“Jehovah Edi Ebiet Ubọhọ Nnyịn”). *

Ndin̄wam mbon unana ama ọnọ mbonutom unyịmesịt nduọkodudu n̄ko. Marcelo emi akanamde utom nte nurse ke itienna mbon itọkekọn̄ ke Mozambique ọkọdọhọ ete: “Mma n̄kop inemesịt ndikekeme ndin̄wam nditọete emi ẹkenen̄erede ẹbọ ufen ntre.” Huang, anamutom unyịmesịt ke Taiwan, ọkọdọhọ ete: “Ekedi n̄kpọ akwa idatesịt nditiene mbuana ke ndinọ nditọete oro ẹkedude ke unana udia ye ufọkọfọn̄. Enye ekedi utom oro ọsọn̄ọde mbuọtidem.”

Ndutịm Utom Unyịmesịt Oro Enyenede Utịp

Ke ofụri ererimbot, utom unyịmesịt amada nduọkodudu eke spirit n̄ko ọsọk ediwak tọsịn mbon n̄kpọkọbi ke mme itie duop. Didie? Ke mme isua ndondo emi, Mme Ntiense Jehovah ẹmenọ se iwakde ibe owo 30,000 oro ẹkọbide ke n̄kpọ nte ufọk-n̄kpọkọbi 4,000 ke United States ikpọn̄ mme n̄wed Bible. Ke adianade do, ke ebiet oro ẹkemede, Mme Ntiense ẹsiwaha ẹkese mme ufọk-n̄kpọkọbi ke idemmọ man ẹkpep Bible ẹnyụn̄ ẹnịm mme mbono esop Christian ye mbon n̄kpọkọbi. Ndi mbon n̄kpọkọbi ẹsibọ ufọn?

Ndusụk mbon n̄kpọkọbi oro ẹkpepde Bible ẹtọn̄ọ ndibuana ọnọ-nduọkodudu ukpepn̄kpọ Ikọ Abasi emi ye ekemmọ mbon n̄kpọkọbi. Nte utịp, mme otu mbon n̄kpọkọbi oro ẹtuakde ibuot ẹnọ Jehovah ọtọkiet ẹdu idahaemi ke ediwak ufọk-n̄kpọkọbi ke ofụri ererimbot. Owo n̄kpọkọbi kiet ke Oregon, U.S.A., ama ọtọt ke 2001 ete: “Otu nnyịn ke anam n̄kọri. Nnyịn imenyene mme asuanetop Obio Ubọn̄ 7 ndien nnyịn ke inịm mme ukpepn̄kpọ Bible 38. Se iwakde ibe owo 25 ẹsidụk utịn̄ikọ an̄wa ye ukpepn̄kpọ Enyọn̄-Ukpeme, ndien nnyịn ima inyene owo 39 oro ẹkedụkde Editi [n̄kpa Christ]. Ke mîbịghike owo ita efen efen ẹyena baptism!”

Mme Ufọn ye Idatesịt

Mme akama-utom ufọk-n̄kpọkọbi ẹkụt ke ndutịm utom unyịmesịt emi enyene ufọn. Se inen̄erede itụk mme akama-utom edi ufọn anyan ini oro ndutịm utom unyịmesịt emi enyenede. Ntọt kiet ọdọhọ ete: “Ke isua duop oro ndutịm emi odude ke edinam, idụhe owo n̄kpọkọbi ndomokiet oro ẹkesanade ẹyak emi akanade baptism ke ufọk-n̄kpọkọbi nte kiet ke otu Mme Ntiense Jehovah oro afiakde edi ufọk-n̄kpọkọbi—ke edide isio ye mbahade 50-60 eke ikie eke otu mbon eken oro ẹfiakde ẹdi.” Ke utịp oro mbonutom unyịmesịt ẹdide Mme Ntiense ẹnyenede otụkde, ọkwọrọ ederi ufọk-n̄kpọkọbi kiet ke Idaho ọkọdọhọ ke leta oro enye ekewetde ọnọ ẹsọk ibuot itieutom ofụri ererimbot eke Mme Ntiense Jehovah ete: “Ke adan̄aemi ami mmenyịmeke ye mme ukpepn̄kpọ ido ukpono mbufo, ami mmenen̄ede mma esop mbufo.”

Ndin̄wam mbon oro ẹdude ke ufọk-n̄kpọkọbi enyene ufọn n̄ko ọnọ mbonutom unyịmesịt. Ke ama ekenịm mbono esop ye otu mbon n̄kpọkọbi kiet emi ẹkekwọde ikwọ Obio Ubọn̄ ke akpa ini, anamutom unyịmesịt kiet ama ewet ete: “Ekedi n̄kpọ nsịnudọn̄ ndikụt irenowo 28 ẹdiande uyo ke ndikwọ itoro nnọ Jehovah. Ndien mmọ ẹkekwọ ikwọ emi ke ọkpọsọn̄ uyo! Nso ifet ke ekedi ntem ọnọ mi ndikodu ke utọ edinam oro!” Anamutom unyịmesịt kiet emi akakade ekese mme ufọk-n̄kpọkọbi ke Arizona ọkọdọhọ ete: “Nso edidiọn̄ ke edi ntem ndikabuana ke san̄asan̄a utom emi!”

Mbonutom unyịmesịt ẹdide Mme Ntiense ẹsọsọp ẹnyịme ye Jesus, emi ọkọdọhọde ete: “Ekese inemesịt odu ke ndinọnọ akan ke ndibọbọ.” (Utom 20:35, NW) Mmọ n̄ko ẹsọn̄ọ nte ke nditiene item Bible oro ọdọhọde ẹfọn ido ye kpukpru owo enen̄ede ọnọ nduọkodudu.—Mme N̄ke 11:25.

[Ikọ idakisọn̄]

[Ndise ke page 8]

Venezuela

[Ndise ke page 8]

Taiwan

[Ndise ke page 8]

Mozambique