Dian Uten̄e Abasi ke Ime Fo
Dian Uten̄e Abasi ke Ime Fo
‘Ẹdian ime ke mbuọtidem mbufo, ẹnyụn̄ ẹdian uten̄e Abasi ke ime mbufo.’—2 Peter 1:5, 6.
1, 2. (a) Nso n̄kọri ke ẹsiyom eyenọwọn̄ anam? (b) N̄kọri eke spirit edi akpan n̄kpọ adan̄a didie?
N̄KỌRI edi akpan n̄kpọ ọnọ eyenọwọn̄, edi ẹyom se ikande n̄kọri ikpọkidem. Ẹyom n̄kọri ke n̄kan̄ eke ekikere ye eke ntụk n̄ko. Nte ini akade, eyen oro ọyọkpọn̄ ido uyen onyụn̄ ọkọri ọwọrọ eren m̀mê n̄wan. Apostle Paul eketịn̄ aban̄a emi ke ini enye ekewetde ete: “Ke ini n̄kedide eyenọwọn̄, ntịn̄ ikọ nte eyenọwọn̄, n̄kere ekikere nte eyenọwọn̄, nnyụn̄ nneni eneni nte eyenọwọn̄; edi mma n̄kabade n̄kpon, mmokụre ye ido uyen.”—1 Corinth 13:11.
2 Ikọ Paul osio akpan n̄kpọ kiet aban̄ade n̄kọri eke spirit owụt. Oyom mme Christian ẹnam n̄kọri ẹbe edidi nditọwọn̄ ke n̄kan̄ eke spirit ẹsịm edidi mbon oro ‘ẹtiede nte ikpọ owo ke ekikere.’ (1 Corinth 14:20) Mmọ ẹkpenyene ndinyanade mbịne nnyụn̄ ndomo ndisịm “ofụri idaha uyọhọ Christ.” Do, mmọ ididịghe “nditọwọn̄, emi ukpepn̄kpọ ẹtode ke nsio-nsio edem ẹbara nte ofụm ẹmen ẹtop ẹduọk.”—Ephesus 4:13, 14.
3, 4. (a) Nso ke ana nnyịn inam man ikọri isịm ọyọhọ idaha ke n̄kan̄ eke spirit? (b) Ewe mme edu Abasi ke nnyịn ikpowụt, ndien mmọ ẹdi akpan n̄kpọ adan̄a didie?
3 Didie ke nnyịn ikeme ndikọri nsịm ọyọhọ idaha ke n̄kan̄ eke spirit? Ke adan̄aemi n̄kọri ikpọkidem esikperede nditịbe ye unana ukeme ke mme idaha ẹsan̄ade mfọn mfọn, n̄kọri eke spirit esiyom ẹkokoi ẹsịn ukeme. Enye esitọn̄ọ ye edinyene nnennen ifiọk Ikọ Abasi ye edinam n̄kpọ ke n̄kemuyo ye se nnyịn ikpepde. (Mme Hebrew 5:14; 2 Peter 1:3) Nte utịp, emi esin̄wam nnyịn ndiwụt mme edu Abasi. Kpa nte esidide ye nsio nsio ikpehe n̄kọri ikpọkidem, n̄kọri ke mme nsio nsio edu Abasi esiwak ndida itie ke ukem ini. Apostle Peter ekewet ete: “Mbufo ke n̄kan̄ mbufo ẹsịn ifịk ke ofụri ukeme ẹdian eti ido ke mbuọtidem mbufo, ẹnyụn̄ ẹdian ifiọk ke eti ido, ẹnyụn̄ ẹdian edifara ke idem ke ifiọk, ye ime ke edifara ke idem, ye uten̄e Abasi ke ime, ye iman ke uten̄e Abasi, ye ima ke iman.”—2 Peter 1:5-7.
4 Edu kiet kiet oro Peter asiakde mi edi akpan n̄kpọ, ndien owo ikemeke ndisio ndomokiet mfep. Enye adian do ete: “Edieke mme n̄kpọ emi ẹdude ke esịt mbufo ọyọhọ-ọyọhọ, mmọ ẹyenam mbufo ẹkûtie ifu, ẹkûnyụn̄ ẹnana mfri ke edifiọk Ọbọn̄ nnyịn Jesus Christ.” (2 Peter 1:8) Ẹyak nnyịn iwụk ntịn̄enyịn ke ufọn edidian uten̄e Abasi ke ime nnyịn.
Ufọn Edinyene Ime
5. Ntak oyomde nnyịn inyene ime?
5 Peter ye Paul ẹbuan uten̄e Abasi ye ime. (1 Timothy 6:11) Ndinyene ime akan ikpîkpu ediyọ n̄kpọsọn̄ idaha nnyụn̄ n̄ka iso nsọn̄ọ nda. Enye abuana uko, edisọn̄ọ nda, editre ndiduọk idotenyịn ke ini ẹsobode idomo, n̄kpọ ubiọn̄ọ, m̀mê ukọbọ. Nte mbon oro ẹdude uwem “uten̄e Abasi ke ebuana ye Christ Jesus,” nnyịn imodori enyịn ndisobo ukọbọ. (2 Timothy 3:12, NW) Ana nnyịn inyene ime edieke anade iwụt ima oro inyenede inọ Jehovah inyụn̄ ikọri mme edu oro ẹyomde man inyene edinyan̄a. (Rome 5:3-5; 2 Timothy 4:7, 8; James 1:3, 4, 12) Edieke nnyịn mîmehe ime nnyịn idinyeneke nsinsi uwem.—Rome 2:6, 7; Mme Hebrew 10:36.
6. Ndime ime tutu esịm akpatre ọwọrọ ndinam nso?
6 Inamke n̄kpọ m̀mê nnyịn ikọtọn̄ọ ọfọn adan̄a didie, se idide akpan n̄kpọ ikan edi nnyịn ndinyene ime. Jesus ọkọdọhọ ete: “Ẹyenyan̄a owo eke edimede ime tutu esịm akpatre.” (Matthew 24:13) Ih, ana nnyịn ime ime tutu esịm akpatre, edide tutu esịm utịt uwem nnyịn eke idahaemi m̀mê tutu esịm utịt idiọk editịm n̄kpọ emi. Ke idaha ekededi, ana nnyịn imụm nsọn̄ọnda nnyịn ke Abasi ikama. Nte ededi, edieke nnyịn mîdianke uten̄e Abasi ke ime nnyịn, nnyịn idikemeke ndinem Jehovah esịt, idinyụn̄ inyeneke nsinsi uwem. Edi nso idi uten̄e Abasi?
Se Uten̄e Abasi Ọwọrọde
7. Nso idi uten̄e Abasi, ndien nso ke enye esinụk nnyịn ndinam?
7 Uten̄e Abasi edi ọkpọkpọ ukpono, utuakibuot, ye utom oro inamde inọ Jehovah Abasi ke ntak edinam akpanikọ nnọ itie edikara ofụri ekondo esie. Man iten̄e Jehovah, nnyịn imoyom nnennen ifiọk aban̄ade enye ye mme usụn̄ esie. Nnyịn ikpenyene ndiyom nditịm mfiọk Abasi ọkpọkpọ. Emi oyonụk nnyịn ndikọri ima ofụri esịt oro odụride nnyịn ekpere enye, orụk ima oro owụtde idem ke mme edinam ye usụn̄ uwem nnyịn. Ekpedi udọn̄ nnyịn ndibiet Jehovah nte ikekeme—ndikpebe mme usụn̄ esie nnyụn̄ n̄wụt mme edu esie. (Ephesus 5:1) Ke akpanikọ, uten̄e Abasi onụk nnyịn ndiyom ndinem Abasi esịt ke kpukpru se nnyịn inamde.—1 Corinth 10:31.
8. Didie ke uten̄e Abasi ye san̄asan̄a utuakibuot ẹnyene n̄kpet n̄kpet ebuana?
8 Man iwụt ata uten̄e Abasi, ana nnyịn inọ Jehovah san̄asan̄a utuakibuot, ikûnyụn̄ iyak n̄kpọ efen ekededi ada itie esie ke esịt nnyịn. Nte Andibot nnyịn, enye enyene unen ndibọ san̄asan̄a utuakibuot nnyịn. (Deuteronomy 4:24, NW; Isaiah 42:8) Nte ededi, Jehovah inyịkke-nyịk nnyịn ndituak ibuot nnọ enye. Enye oyom nnyịn ituak ibuot inọ enye ke unyịmesịt. Edi ima oro imade Abasi, oro ọkọn̄ọde ke nnennen ifiọk aban̄ade enye, esinụk nnyịn ndinam uwem nnyịn asana nnyụn̄ nyak idem ofụri ofụri nnọ enye ndien ekem idu uwem ekekem ye uyakidem oro.
Kọri Itie Ebuana ye Abasi
9, 10. Didie ke nnyịn ikeme ndikọri nnyụn̄ n̄ka iso nnyene n̄kpet n̄kpet itie ebuana ye Abasi?
9 Ke ima ikayarade uyakidem nnyịn inọ Abasi ebe ke ndina baptism, osụk oyoyom nnyịn ikọri ata n̄kpet n̄kpet ọkpọkpọ itie ebuana ye enye. Ke ntre, udọn̄ nnyịn ndinam emi nnyụn̄ nnam n̄kpọ Jehovah ke edinam akpanikọ esinụk nnyịn ndika iso n̄kpep Ikọ esie nnyụn̄ ntie n̄kere enye. Ke ini nnyịn iyakde spirit Abasi akara ekikere ye esịt nnyịn, ima oro nnyịn imade Jehovah oyokpon. Itie ebuana nnyịn ye enye ayaka iso edi ata akpan n̄kpọ ke uwem nnyịn. Nnyịn iyabat Jehovah nte akpan Ufan nnyịn inyụn̄ iyom ndinem enye esịt kpukpru ini. (1 John 5:3) Idatesịt oro otode eti itie ebuana oro inyenede ye Abasi ọyọkọri, ndien nnyịn iyokop inemesịt nte ke enye ke ima ima usụn̄ ekpep nnyịn n̄kpọ onyụn̄ otụnọ nnyịn ke ebiet ẹyomde.—Deuteronomy 8:5.
10 Ibọhọke nnyịn inam mme usio-ukot ndisọn̄ọ ọsọn̄urua itie ebuana nnyịn ye Jehovah kpukpru ini, enye ekeme ndimem. Edieke oro ekpetịbede, Abasi ikpenyeneke nduduọhọ, koro ‘enye iyomke usụn̄ ye baba nnyịn owo kiet.’ (Utom 17:27) Nnyịn ikop inemesịt didie ntem nte ke Jehovah inamke edi ọkpọsọn̄ n̄kpọ nnyịn ndisan̄a n̄kpere enye! (1 John 5:14, 15) Edi akpanikọ, ana nnyịn inam utom ọkpọsọn̄ ndika iso nnyene n̄kpet n̄kpet ọkpọkpọ itie ebuana ye Jehovah. Nte ededi, enye an̄wam nnyịn ndisan̄a n̄kpere enye ebe ke ndinam kpukpru ndutịm oro nnyịn iyomde man ikọri inyụn̄ ika iso iwụt uten̄e Abasi. (James 4:8) Didie ke nnyịn ikeme ndida kpukpru ima ima ndutịm emi nnam n̄kpọ ọyọhọ ọyọhọ?
Sọn̄ Idem ke N̄kan̄ eke Spirit
11. Nso idi ndusụk edinam oro ẹwụtde ke nnyịn imeten̄e Abasi?
11 Ntotụn̄ọ ima oro inyenede inọ Abasi oyonụk nnyịn ndiwụt udomo uten̄e Abasi oro nnyịn inyenede, ke n̄kemuyo ye item Paul emi: “Sịn ifịk wụt Abasi idem fo, ete idi owo eke ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ.” (2 Timothy 2:15) Ndinam emi oyom ete nnyịn inyene eti ndutịm edikpep Bible, edidụk mbono esop, ye edibuana ke an̄wautom kpukpru ini. Nnyịn imekeme n̄ko ndisịk n̄kpere Jehovah ebe ke nditre ‘ndidop akam.’ (1 Thessalonica 5:17) Mmọ emi ẹdi mme akpan n̄kpọ oro ẹwụtde ke nnyịn imeten̄e Abasi. Ndifụmi ekededi ke otu mme n̄kpọ emi ekeme ndinam nnyịn idọn̄ọ ke n̄kan̄ eke spirit onyụn̄ ekeme ndisio nnyịn nnyan nnọ mme usụn̄ unam n̄kpọ Satan.—1 Peter 5:8.
12. Didie ke nnyịn ikeme ndiyọ mme idomo uforo uforo?
12 Ndisọn̄ idem nnyụn̄ nnyene ifịk ke n̄kan̄ eke spirit an̄wam nnyịn n̄ko ndiyọ ediwak idomo oro ẹsịmde nnyịn. Mme idomo ẹkeme ndito mme ebiet oro ẹkemede ndinen̄ede nsịn nnyịn ke udomo. Ekeme ndidi ọkpọsọn̄ n̄kpọ ndiyọ unana udọn̄, ubiọn̄ọ, ye ukọbọ, ke ini mmọ ẹtode mbonubon, mme iman, m̀mê mme mbọhọidụn̄. Mme etabi etabi mfịghe ndibiat mme edumbet Christian nnyịn ẹkeme ndidemede ke itieutom m̀mê ke ufọkn̄wed. Unana nsịnudọn̄, udọn̄ọ, ye mfụhọ ẹkeme ndinam nnyịn ikop mmemidem ke ikpọkidem ẹnyụn̄ ẹkeme ndinam etetịm edi ọkpọsọn̄ n̄kpọ nnyịn ndiyọ mme idomo mbuọtidem. Edi nnyịn imekeme ndiyọ kpukpru idomo uforo uforo edieke nnyịn isọn̄ọde iyịre ke ‘edisana ido ye ke uten̄e Abasi, itiede ibet inyụn̄ isọn̄ọde iyom edidi Usen Abasi.’ (2 Peter 3:11, 12) Ndien nnyịn imekeme ndika iso n̄kop idatesịt ke ndinam ntre, inyenede mbuọtidem nte ke Abasi ọyọdiọn̄ nnyịn.—Mme N̄ke 10:22.
13. Nso ke ana nnyịn inam edieke anade nnyịn ika iso iten̄e Abasi?
13 Okposụkedi Satan anamde mbon oro ẹten̄ede Abasi ẹdi iso en̄wan esie, iyomke nnyịn ikop ndịk. Ntak-a? Koro “Ọbọn̄ ọmọfiọk ndinyan̄a mmọ emi ẹten̄ede Enye nsio ke idomo.” (2 Peter 2:9) Man iyọ mme idomo inyụn̄ ikụt utọ edinyan̄a oro, ana nnyịn “idianade ikpọn̄ idiọk ido ye idiọk udọn̄ ererimbot, idu uwem ke eti ibuot ye edinen ido ye ido Abasi ke eyo emi.” (Titus 2:12) Nte mme Christian, ana nnyịn idu ke ukpeme mbak mmeme ekededi oro abuanade mme udọn̄ ye utom obụkidem edituaha ye uten̄e Abasi nnyịn onyụn̄ abiat enye. Ẹyak nnyịn idahaemi ikere iban̄a ndusụk ke otu mme n̄kpọndịk emi.
Kpeme Idem ke Mme N̄kpọ Oro Ẹkemede Ndibiat Uten̄e Abasi
14. Nso ke nnyịn ikpeti edieke afia uma-inyene atapde nnyịn ada?
14 Uma-inyene edi afia ọnọ ediwak owo. Nnyịn imekeme ndikam mbian̄a idem nnyịn, ikerede ke “uten̄e Abasi edi afan̄ udia-udori [n̄kpọ obụkidem].” Ntem, emi ekeme ndisọn̄ nnyịn esịt ndida mbuọtidem oro ekemmọ mme andinịm ke akpanikọ ẹnyenede ke idem nnyịn ndia idiọk udori nto mmọ. (1 Timothy 6:5) Nnyịn imekeme ndikam mbiere ke ndudue ite ke idiọkke ndinyịk Christian oro enyenede n̄kpọ mbọ ebuọt oro nnyịn mîdikemeke ndikpe. (Psalm 37:21) Edi ‘un̄wọn̄ọ uwem emi odude ke emi ye eke uwem emi edidide’ isan̄ake ye edikọ n̄kpọ obụkidem edi asan̄a ye uten̄e Abasi. (1 Timothy 4:8) Sia ‘nnyịn mîkadaha baba n̄kpọ kiet idụk ke ererimbot, mîdinyụn̄ ikemeke ndida baba n̄kpọ kiet n̄wọrọ,’ ẹyak nnyịn isịn ifịk ibịne “uten̄e Abasi . . . ye esịt eke okụtde ete se inyenede ekem” ndien ke ‘inyenede se idiade ye se idade ifụk iferi, iyokụt ite ke oro ekem.’—1 Timothy 6:6-11.
15. Nso ke nnyịn ikpanam edieke edibịne inemesịt oyomde ndibaba uten̄e Abasi nnyịn n̄wot?
15 Edibịne inemesịt ekeme ndibaba uten̄e Abasi nnyịn n̄wot. Ndi ekeme ndidi nte ke oyom nnyịn isọsọp inam mme ukpụhọde ke afan̄ emi? Edi akpanikọ, ẹsibọ ndusụk ufọn ẹto edisịn̄ede idem ye edinọ idem nduọkodudu. Edi, mme utọ ufọn oro ẹdi ata n̄kpri ke ẹmende ẹdomo ye nsinsi uwem. (1 John 2:25) Mfịn, ediwak owo “ẹma mbre ẹkan Abasi, ẹnyene enyọn̄-enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi,” ndien oyom nnyịn iwọn̄ọde ikpọn̄ mme utọ owo oro. (2 Timothy 3:4, 5) Mbon oro ẹdoride nsọn̄uyo ke uten̄e Abasi “ẹn̄wana ẹyom eti isọn̄ ẹnọ idem mmọ ke ini iso, man mmọ ẹkpemụm uwem eke edide ata uwem ẹkama.”—1 Timothy 6:19.
16. Ndiọi udọn̄ ewe ẹbiọn̄ọ ndusụk owo ndidu uwem ekekem ye ndinen n̄kpọ oro Abasi oyomde, ndien didie ke nnyịn ikeme ndikan mme udọn̄ emi?
16 Edida n̄kpọsọn̄ mmịn ye n̄kpọsọn̄ ibọk ke idiọk usụn̄, oburobụt ido, ye ndiọi udọn̄ ẹkeme ndibiat uten̄e Abasi nnyịn. Ndiyak idem nnọ mme n̄kpọ emi ekeme ndibiọn̄ọ nnyịn ndidu uwem ekekem ye ndinen n̄kpọ oro Abasi oyomde. (1 Corinth 6:9, 10; 2 Corinth 7:1) Paul ke idemesie ekenyene ndiyọ en̄wan oro akakade-ka iso ke ikpọkidem idiọkn̄kpọ esie. (Rome 7:21-25) Oyom isịn ọkpọsọn̄ ukeme man ibịn ndiọi udọn̄ ifep. N̄kpọ kiet edi-o, ana nnyịn ibiere ndika iso nsana ke ido uwem. Paul asian nnyịn ete: “Ẹwot mbak idem mbufo emi ẹdude ke isọn̄. Ẹkpọn̄ use, ye ndek-ndek ido, ye idiọk udọn̄, ye idiọk itọn̄, ye edisịn esịt ke n̄kpọ owo, emi edide ukpono-ndem.” (Colossae 3:5) Ndiwot mbak idem nnyịn ke se iban̄ade mme utọ idiọk n̄kpọ emi oyom uko man ikeme ndibịn mmọ mfep. Akam ofụri esịt oro ibọn̄de iyom un̄wam Abasi ayan̄wam nnyịn ndibịn ndiọi udọn̄ mfep nnyụn̄ mbịne edinen ido ye uten̄e Abasi ke idiọk editịm n̄kpọ emi.
17. Didie ke nnyịn ikpese ntụnọ?
17 Mmemidem ekeme ndinam ime nnyịn emem onyụn̄ abiat uten̄e Abasi nnyịn. Ediwak mme asan̄autom Jehovah ẹsikop mmemidem. (Numbers 11:11-15; Ezra 4:4; Jonah 4:3) Mmemidem ekeme ndinyene akama-nsobo utịp ke idem nnyịn edieke enye asan̄ade ye iyatesịt koro ikerede ke ẹdue nnyịn m̀mê koro ẹsọn̄ọ ẹsua ẹnọ nnyịn m̀mê ẹnọ nnyịn ọkpọsọn̄ ntụnọ. Nte ededi, nsuannọ ye ntụnọ ẹdi uyarade ima ima edikere mban̄a ye udọn̄ oro Abasi enyenede ke idem nnyịn. (Mme Hebrew 12:5-7, 10, 11) Nnyịn ikpadaha ntụnọ nte sụk edinọ ufen edi ikpada enye nte usụn̄ oro ẹdade ẹnọ nnyịn ukpep edinen ido. Edieke nnyịn isụhọrede idem, nnyịn iyadara inyụn̄ inyịme item, ifiọkde ite ke ‘ntụnọ ye item ẹdi usụn̄ uwem.’ (Mme N̄ke 6:23) Emi ekeme ndin̄wam nnyịn ndinam eti n̄kọri eke spirit ke ndibịne uten̄e Abasi.
18. Nso mbiomo ke nnyịn inyene ke ini edide edisịm ndutan̄uyo?
18 Ndutan̄uyo ye ọkpọkpọ ndudue ẹkeme ndibiat uten̄e Abasi nnyịn. Mmọ ẹkeme ndikama editịmede esịt mîdịghe ẹkeme ndinụk ndusụk owo ndinam usio-ukot oro mîwụtke eti ibuot ke ndidu nsannsan n̄kpọn̄ nditọete mmọ eke spirit. (Mme N̄ke 18:1, NW) Edi ọfọn nditi nte ke ndinyene udu m̀mê idiọkesịt mban̄a mbon en̄wen ekeme nditụk itie ebuana nnyịn ye Jehovah idiọk idiọk. (Leviticus 19:18) Ke akpanikọ, “owo emi mîmaha eyen-ete esie emi enye okokụtde ke enyịn ikemeke ndima Abasi emi enye mîkekwe.” (1 John 4:20) Ke Ukwọrọikọ esie oro ke Obot, Jesus ama ọsọn̄ọ etịn̄ ufọn edinam usọp usọp usio-ukot ke ndikọk mme ọkpọkpọ mfịna. Enye ọkọdọhọ mme andikpan̄ utọn̄ nnọ enye ete: “Mmọdo edieke adade enọ fo edi ke itie-uwa, onyụn̄ etide do ete, eyen-ete fo enyene ikọ ye afo, kpọn̄ enọ fo do ke iso itie-uwa, ka kebem iso nam emem ye eyen-ete fo, ndien di diwa enọ fo.” (Matthew 5:23, 24) N̄kpeubọk ekeme ndin̄wam ndikọk unan oro ndiọi ikọ m̀mê edinam ẹkenọde. Imekeme ndikọk mfịna nnyụn̄ mfiak ntie ke emem edieke nnyịn iben̄ede edifen nnọ inyụn̄ inyịmede ke ima inam n̄kpọ nte mîdotke. Jesus n̄ko ama ọnọ item en̄wen kaban̄a nte ikpesede iban̄a mfịna. (Matthew 18:15-17) Nnyịn isikop inemesịt didie ntem ke ini ikụtde unen ke ukeme oro isịnde ndikọk mme mfịna!—Rome 12:18; Ephesus 4:26, 27.
Kpebe Uwụtn̄kpọ Jesus
19. Ntak enen̄erede edi akpan n̄kpọ ndikpebe uwụtn̄kpọ Jesus?
19 Ke akpanikọ mme idomo ẹyesịm nnyịn, edi mmọ ikpenyeneke ndiwọn̄ọde ntịn̄enyịn nnyịn n̄kpọn̄ mbuba nsinsi uwem. Ti ete ke Jehovah ekeme ndinyan̄a nnyịn nsio ke idomo. Nte nnyịn ‘ikpọnọrede kpukpru mbiomo inịm n̄kan̄ kiet’ inyụn̄ ‘ifehede mbuba eke anade nnyịn ke iso ye ime,’ ẹyak nnyịn “iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama.” (Mme Hebrew 12:1-3) Nditịm ndụn̄ọde uwụtn̄kpọ Jesus nnyụn̄ ndomo ndikpebe enye ke ikọ ye ke edinam ayan̄wam nnyịn ndikọri uten̄e Abasi nnyụn̄ n̄wụt edu emi ke udomo oro okponde akan.
20. Mme utịp ewe ẹsito edime ime ye editen̄e Abasi?
20 Ime ye uten̄e Abasi ẹsin̄wam ndinam idotenyịn edinyan̄a nnyịn enen̄ede enyene nsọn̄ọ. Ke ndiwụt mme ọsọn̄urua edu emi, nnyịn imekeme ndika iso nnam akpanikọ ke edisana utom oro inamde inọ Abasi. Idem ke ini isobode idomo, nnyịn iyokop inemesịt nte nnyịn ikụtde ima ye edidiọn̄ Jehovah koro nnyịn imede ime inyụn̄ iwụtde uten̄e Abasi. (James 5:11) Akan oro, Jesus ke idemesie ọsọn̄ọ ọnọ nnyịn ete: “Ẹdida edime ime ke ukụt ẹbọ ukpọn̄ mbufo ẹda ẹnyene.”—Luke 21:19.
Didie ke Afo Ọkpọbọrọ?
• Ntak emi ime edide akpan n̄kpọ?
• Nso idi uten̄e Abasi, ndien didie ke ẹsiwụt enye?
• Didie ke nnyịn ikeme ndikọri nnyụn̄ n̄ka iso nnyene n̄kpet n̄kpet itie ebuana ye Abasi?
• Nso idi ndusụk n̄kpọ oro ẹkemede ndibiat uten̄e Abasi nnyịn, ndien didie ke nnyịn ikeme ndifep mmọ?
[Mme Mbụme Ukpepn̄kpọ]
[Mme ndise ke page 12, 13]
Ẹsiwụt uten̄e Abasi ke ediwak usụn̄
[Mme ndise ke page 14]
Kpeme idem ke mme n̄kpọ oro ẹkemede ndibiat uten̄e Abasi fo