Itieuwa Enyenede Abasi Emi Owo Mîsiakke Enyịn̄

APOSTLE Paul akaka Athens, Greece, ke n̄kpọ nte isua 50 E.N. Do enye ama okụt itieuwa emi ẹkeyakde ẹnọ abasi emi owo mîfiọkke ndien ke ukperedem Paul ama etịn̄ aban̄a itieuwa emi ke adan̄aemi ọkọnọde eti ikọ ntiense aban̄a Jehovah.

Ke nditọn̄ọ utịn̄ikọ esie ke Obot Mars, m̀mê Areopagus, Paul ọkọdọhọ ete: “Mbufo mbio Athens, mmokụt nte ke kpukpru usụn̄ mbufo ẹdi mme andibak mme abasi eti-eti. Koro nte nsan̄ade mbe nse mme n̄kpọ eke mbufo ẹkponode, n̄kụt itie-uwa kiet n̄kọrọ do, emi ẹwetde ke esịt ẹte, Emi Enyene Abasi Emi Owo Mîfiọkke. Mmọdo se mbufo ẹtuakde ibuot ẹnọ ke unana ifiọk, kpa oro ke ami n̄kwọrọ nnọ mbufo.”—Utom 17:22-31.

Okposụkedi owo mîkwe itieuwa Athens oro, mme mbiet itieuwa oro ẹdu ke mme ikpehe en̄wen ke Greece. Ke uwụtn̄kpọ, Pausanias, owo Greece eke ọyọhọ isua ikie iba oro ekedide ekpepn̄kpọ mban̄a isọn̄, ama etịn̄ aban̄a mme itieuwa ẹnyenede “mme abasi emi Owo Mîfiọkke Enyịn̄” ke Phaleron, emi mîyomke usụn̄ ikpọn̄ Athens. (Description of Greece, Attica I, 4) Nte n̄wed oro osụk ọdọhọde, “itieuwa enyenede mme abasi emi Owo Mîfiọkke” ama odu ke Olympia.—Eleia I, XIV, 8.

Ke n̄wed esie oro, The Life of Apollonius of Tyana (VI, III), Philostratus, ewetn̄wed owo Greece oro (n̄kpọ nte 170 esịm n̄kpọ nte 245 E.N.) ọkọdọhọ ete ke ẹma “ẹnam mme itieuwa ndida n̄kpono mme abasi emi owo mîkam ifiọkke,” ke Athens. Ndien ke Lives of Philosophers (1.110), Diogenes Laertius (n̄kpọ nte 200-250 E.N.) ama ewet ete ke ẹma ẹkeme ndikụt “mme itieuwa oro mînyeneke enyịn̄” ke nsio nsio ikpehe Athens.

Mbon Rome n̄ko ẹma ẹnam mme itieuwa ẹnọ mme abasi oro owo mîsiakke enyịn̄. Enye oro ẹwụtde ke ndise emi ebịghi afiak edem ekesịm akpa m̀mê ọyọhọ isua ikie iba M.E.N. ẹkenyụn̄ ẹtịm ẹnịm ke Palatine Antiquarium ke Rome, Italy. Uwetn̄kpọ usem Latin oro ẹwetde ke enye owụt ke ekeme ndidi ẹkeyak itieuwa emi ẹnọ “abasi m̀mê abasi-an̄wan”—ubak udịmikọ “ẹkesiwakde ndikụt ke mme akam m̀mê ke mme ikọ ediyak nnọ oro ẹsikapde ẹsịn ke mme itiat ẹnyụn̄ ẹwetde ke mme n̄wed.”

Ediwak owo isụk ifiọkke “Abasi, emi okobotde ererimbot ye kpukpru se idude ke esịt.” Edi, kpa nte Paul akasiande mbon Athens, Abasi emi—Jehovah—‘iyomke usụn̄ ye baba nnyịn owo kiet.’—Utom 17:24, 27.

[Ebiet Ẹdade Ndise Ẹto ke page 32]

Itieuwa: Soprintendenza Archeologica di Roma