Mme Mbụme Ẹtode Mme Andikot

Mme idaha ewe ke odot Christian an̄wan ayara n̄kpọ ke ibuot ke ebuana ye mme n̄kpọ eke spirit?

Apostle Paul ekewet ete: “Kpukpru n̄wan, eke ọbọn̄de akam onyụn̄ ọkwọrọde ikọ ye ibuot in̄wan̄, esuene enye emi edide ibuot ọnọ enye.” Ntak-a? Ke ntak edumbet Abasi aban̄ade itieibuot: “Erenowo onyụn̄ edi ibuot ọnọ n̄wan.” Nte ido edide, edi mbiomo eren ndibọn̄ akam m̀mê ndikwọrọ ikọ ke esop Christian. Ntem, ke ini Christian an̄wan esede aban̄a mme n̄kpọ oro ẹnyenede ebuana ye utuakibuot emi ebe esie m̀mê eren oro ama akana baptism ekpesede aban̄a, enye ekpenyene ndiyara n̄kpọ ke ibuot.—1 Corinth 11:3-10.

Mme idaha ẹkeme ndidemede ke itie ebuana ndọ oro ediyomde Christian an̄wan ayara n̄kpọ ke ibuot. Ke uwụtn̄kpọ, ke ini ubon ẹsopde idem ọtọkiet man ẹnịm ukpepn̄kpọ Bible m̀mê man ẹdia udia, edi ebe esida usụn̄ ke ndikpep mmọ n̄kpọ nnyụn̄ mbọn̄ akam ke ibuot mmọ nnọ Abasi. Nte ededi, edieke enye edide owo oro mînịmke ke akpanikọ, mbiomo emi ekeme ndidoro n̄wan esie ke idem. Ke ntre, ke ini n̄wan ọbọn̄de akam uyo ọwọrọ ke ibuot idemesie ye ke ibuot mbon en̄wen m̀mê ke ini enye enịmde ukpepn̄kpọ Bible ye nditọ esie ke ini ebe esie odude, Christian an̄wan nte enende ayayara n̄kpọ ke ibuot. Edieke ebe esie mîdụhe, iyomke n̄wan emi ayara n̄kpọ ke ibuot, koro Abasi ọnọ enye odudu ndikpep nditọ esie n̄kpọ.—Mme N̄ke 1:8; 6:20.

Nte ededi, nso edieke ekpri eyeneren  ke ubon oro edide asan̄autom Jehovah Abasi oro ama akayak idem ọnọ onyụn̄ ana baptism? Sia eyeneren oro edide andibuana ke esop Christian, enye ekpenyene ndibọ ukpep nto mme andibuana ke esop ẹdide iren. (1 Timothy 2:12) Edieke ete esie edide andinịm ke akpanikọ, eyeneren emi ekpenyene ndibọ ukpep nto ete esie. Nte ededi, edieke ete mîdụhe, do eka ekpenyene ndiyara n̄kpọ ke ibuot edieke enye enịmde ukpepn̄kpọ Bible ye ekpri eyeneren esie emi ama akana baptism ye nditọ eken. Enye enyene ndibiere m̀mê imọ ikpenyene ndidọhọ eyeneren emi ama akana baptism mi ọbọn̄ akam ke utọ ukpepn̄kpọ oro m̀mê ke ini udia. Eka emi ekeme ndikere ke eyeneren emi itịmke inyene ukeme, onyụn̄ ekeme ndimek ndibọn̄ akam ke idemesie. Edieke enye emekde ndibọn̄ akam ke utọ idaha oro, enye ekpenyene ndiyara n̄kpọ ke ibuot.

Ẹkeme ndiyom Christian iban ẹyara n̄kpọ ke ibuot ke adan̄aemi mmọ ẹbuanade ke ndusụk utom esop. Ke uwụtn̄kpọ, ke mbono an̄wautom ufọturua, ekeme ndidi Christian iban kpọt ẹdu ndien irenowo oro ẹma ẹkena baptism idụhe. Mme idaha efen ẹkeme ndidu oro irenowo oro ẹma ẹkena baptism mîdụhe ke mbono esop. Edieke anade eyenete an̄wan ese aban̄a mme utom oro eyenete eren esinamde ke mbono esop m̀mê mbono an̄wautom oro esop etịmde, enye ekpenyene ndiyara n̄kpọ ke ibuot.

Nte ana Christian iban ẹyara n̄kpọ ke ibuot ke ini ẹkabarede mme utịn̄ikọ Bible ke inua m̀mê ke usem idiọn̄ọ m̀mê ke ini ẹkotde mme ikpehe ekikere ẹnọ otuowo ke n̄wed un̄wam ukpep Bible oro ẹkamade ke mbono esop? Baba. Nditọete iban oro ẹsede ẹban̄a mme utom emi idaha usụn̄ m̀mê ndikpep n̄kpọ. Ukem ntre, owo inịmke ewụhọ nte ke ana nditọete iban ẹyara n̄kpọ ke ibuot ke ini ẹnamde nnamn̄wụt, ẹbụkde mme ifiọkutom, m̀mê ẹsede ẹban̄a utịn̄ikọ eyen ufọkn̄wed ke Ufọkn̄wed Utom Ukara Abasi.

Ke adan̄aemi edinọ ukpep ke esịt esop edide utom irenowo oro ẹma ẹkena baptism, iren ye iban ẹnyene mbiomo ndikwọrọ ikọ nnyụn̄ n̄kpep owo n̄kpọ ke ọwọrọde ọkpọn̄ esop. (Matthew 24:14; 28:19, 20) Ntre ke ini Christian an̄wan etịn̄de Ikọ Abasi ọnọ mbonan̄wa ke iso eren Ntiense Jehovah, idiyomke enye ayara n̄kpọ ke ibuot.

Nte ededi, idaha okpụhọde ke ini ẹnịmde ukpepn̄kpọ Bible ofụri ini ke ufọk owo ndien eren oro ama akayak idem ọnọ onyụn̄ ana baptism odude. Emi edi ikpehe ini ukpepn̄kpọ oro ẹma ẹkebebem iso ẹdiomi emi andinịm ukpepn̄kpọ oro edide adausụn̄. Ke mme utọ idaha emi, ukpepn̄kpọ oro akabade edi ubak ndutịm esop. Edieke n̄wan Ntiense oro ama akana baptism enịmde utọ ukpepn̄kpọ oro ndien eren Ntiense oro ama akana baptism odude, enye nte odotde ayayara n̄kpọ ke ibuot. Nte ededi, eyenete eren oro ama akayak idem ọnọ ekpenyene ndibọn̄ akam. Eyenete an̄wan idibọn̄ke akam ke ini eyenete eren oro ama akayak idem ọnọ odude ibọhọke ndusụk esen esen ntak ẹdu, utọ nte eyenete eren ndidi imụm.

Ke ndusụk idaha, eren edide asuanetop Obio Ubọn̄ oro mînaha baptism ekeme ndisan̄a ye Christian an̄wan oro akade ndinịm ukpepn̄kpọ Bible. Edieke eyenete an̄wan oro amade, enye ekeme ndidọhọ eren oro mînaha baptism mi enịm ukpepn̄kpọ oro. Edi sia enye nte enende mîkemeke ndibọn̄ akam nnọ Jehovah ke ibuot eyenete an̄wan oro ama akana baptism mi, oyodot eyenete an̄wan oro ndibọn̄ akam ke ukpepn̄kpọ oro. Edieke edide eyenete an̄wan oro edinịm ukpepn̄kpọ oro onyụn̄ ọbọn̄ akam, oyoyom enye ayara n̄kpọ ke ibuot. Idem okposụkedi asuanetop eren oro mînaha baptism kan̄a, mbonan̄wa ẹdiọn̄ọ enye nte andibuana ke esop ke ntak utom ukwọrọikọ esie.

Apostle Paul ekewet ete: “N̄wan ekpenyene ndiyara idiọn̄ọ edikara ke ibuot, kaban̄a mme angel.” Ih, nditọete Christian iban ẹnyene ifet ndidi nti uwụtn̄kpọ nnọ ediwak miliọn angel emi ke edinam akpanikọ ẹkade iso ndisụk ibuot nnọ Jehovah. Odot didie ntem ete iban emi ẹten̄ede Abasi ẹtịm ẹkere ẹban̄a ediyara n̄kpọ ke ibuot ke ini idaha oyomde ẹnam ntre!

[Mme ndise ke page 26]

Ndiyara n̄kpọ ke ibuot edi idiọn̄ọ ukpono ọnọ itieibuot