Nso Itịbe inọ Hell Ikan̄?

NSO ke ikọ emi “hell” anam fi ekere? Ndi afo ese hell nte ata ata ebiet ikan̄ ye brimstone, emi ndutụhọ ye ọkpọsọn̄ ubiak mînyeneke utịt? Mîdịghe ndi ekeme ndidi ẹda hell ẹtịn̄ ẹban̄a ndamban̄a idaha?

Ke ediwak isua ikie, mme adaiso ido ukpono Christendom ẹkere ẹban̄a ikan̄-ikan̄ hell ọkpọsọn̄ ndutụhọ nte ata utịt mme anamidiọk. Ekikere emi osụk ọwọwọrọ etop ke otu ediwak ido ukpono eken. U.S.News & World Report ọdọhọ ete: “Eyedi Ido Ukpono Christ anam hell edi ikọ oro ẹtịmde ẹfiọk, edi idịghe enye ikpọn̄ ekpep ukpepn̄kpọ oro. Ekpere ndidi kpukpru ikpọ ido ukpono ererimbot ye ndusụk n̄kpri ido ukpono n̄ko ẹkop ndịk ẹban̄a ubiak ubiak ufen ke n̄kpa ebede.” Mbon Hindu, Buddha, Muslim, Jain, ye Tao ẹnịm orụk hell kiet m̀mê eken ke akpanikọ.

Nte ededi, enyene n̄kpọ efen oro hell ọwọrọde ke ekikere eyomfịn. Magazine oro ẹkesiakde ke enyọn̄ emi ọdọhọ ete: “Ke adan̄aemi mme owo ẹsụk ẹnịmde ekikere eset aban̄ade ikan̄-ikan̄ hell ke akpanikọ, mme ekikere eyomfịn ke ẹtọn̄ọ ndiwọn̄ọ ndi emi ẹwụtde nsinsi ndutụhọ nte ata idiọk idaha n̄kọbi-ntem, ẹnọde ekikere nte ke eyedi hell idịghe ata ata ebiet oro ikan̄ asakde nte ẹkenịmde ke akpanikọ ke mbemiso.”

N̄wedmbụk n̄ka Jesuit oro La Civiltà Cattolica ọkọdọhọ ete: “Edi abian̄a . . . ndikere nte ke Abasi esida mme demon ndinọ mbon oro ẹbiomde ikpe enyene-ndịk ufen, utọ nte ufen ikan̄.” N̄wedmbụk oro ama adian do ete: “Hell idụhe nte ebiet edi odu nte idaha, idaha emi owo okopde ubiak oto edidian̄ade n̄kpọn̄ Abasi.” Pope John Paul II ọkọdọhọ ke 1999 ete: “Utu ke ndidi ebiet, hell owụt idaha mbon oro ẹkoide-koi ẹdian̄ade idemmọ ofụri ofụri ẹkpọn̄ Abasi, kpa ebiet oro kpukpru uwem ye idatesịt ẹtode.” Kaban̄a ekikere oro ẹnyenede ẹban̄a hell nte ebiet ikan̄, enye ọkọdọhọ ete: “Mmọ ẹwụt ke uwem oro ẹsiode Abasi ẹfep esiyọhọ ye edikpu esinyụn̄ etie ukpọk ukpọk.” Marty Martin ewetmbụk ufọkabasi ọkọdọhọ ke edieke Pope akpakadade “mme edemeikan̄ ye devil emi esịnede ndatndat ọfọn̄idem onyụn̄ akamade ufatikan̄ ke ubọk” etịn̄ aban̄a hell, “mme owo ikpenịmke hell ke akpanikọ.”

Mme ukem ukpụhọde oro ke ẹda itie ke mme n̄ka ido ukpono en̄wen. Ntọt otode kọmiti esede aban̄a ukpepn̄kpọ Ufọkabasi England ọkọdọhọ ete: “Hell idịghe nsinsi ndutụhọ, edi edi utịt usụn̄ uwem oro owo mîkemeke ndikpụhọde oro ọbiọn̄ọde Abasi ofụri ofụri tutu n̄kukụre utịt edi ọyọhọ edisobo mfep.”

Catechism Ufọkabasi Episcopal eke United States akabade hell nte “nsinsi n̄kpa otode nnyịn ndisịn Abasi.” U.S.News & World Report ọdọhọ ke ibat owo oro ọkọride-kọri ke ẹsịn udọn̄ ẹnọ ekikere oro nte “ke utịt mme idiọkowo edi nsobo, idịghe nsinsi ndutụhọ. . . .  [Mmọ] ẹsọn̄ọ ẹtịn̄ ẹte ke ẹyeda hell ‘ikan̄ oro atade-ta’ ẹsobo mbon oro ẹsịnde Abasi.”

Okposụkedi edide edu eyomfịn ndisịn ekikere ikan̄ ye brimstone, ediwak owo ẹka iso ẹsọn̄ọ ẹnịm ke akpanikọ nte ke hell edi ata ata ebiet ndutụhọ. Albert Mohler eke Southern Baptist Theological Seminary ke Louisville, Kentucky, U.S.A. ọdọhọ ete: “N̄wed Abasi etịn̄ in̄wan̄-in̄wan̄ aban̄a hell nte ata ata ebiet ikan̄-ikan̄ ndutụhọ.” Ndien n̄wed oro The Nature of Hell, emi Evangelical Alliance Commission etịmde ọdọhọ ete: “Hell edi owo ndinen̄ede n̄kop nte edibịn nduọk ye editụhọde etiede.” Enye adian do ete: “Nsio nsio udomo ufen ye ndutụhọ ẹdu ke hell etienede nte idiọkn̄kpọ oro ẹkenamde ke isọn̄ okokponde eketre.”

Ini kiet efen, ndi hell edi ikan̄-ikan̄ ebiet nsinsi ndutụhọ m̀mê edi ebiet nsobo? Mîdịghe ndi enye edi ikpîkpu idaha edidian̄ade n̄kpọn̄ Abasi? Nso ke hell enen̄ede edi?

[Ekebe/Mme ndise ke page 4]

Ibio Ibio Mbụk Aban̄ade Hell Ikan̄

INI ewe ke mbon oro ẹdọhọde nte idide Christian ẹkedi ẹdinyịme ukpepn̄kpọ hell ikan̄? Anyan ini ke eyo Jesus Christ ye eke mme apostle esie ẹma ẹkebe. Encyclopædia Universalis eke France ọdọhọ ete: “Apocalypse of Peter (eke ọyọhọ isua ikie iba E.N.) ekedi akpa n̄wed Christian [oro mînyeneke nsọn̄ọ] nditịn̄ mban̄a ufen ye ndutụhọ mme idiọkowo ke hell.”

Nte ededi, eneni aban̄ade hell ama odu ke ufọt akpa Mme Ete Ufọkabasi. Justin Martyr, Clement eke Alexandria, Tertullian, ye Cyprian ẹkenịm ke akpanikọ ẹte ke hell ekedi ikan̄-ikan̄ ebiet. Origen ye Gregory eke Nyssa, kpa ekpep ukpepn̄kpọ ido ukpono, ẹkekere ke hell edi ebiet oro ẹdian̄arede ẹkpọn̄ Abasi—itie ndutụhọ eke spirit. Ke n̄kan̄ eken, Augustine eke Hippo, ekenịm ke akpanikọ ete ke ndutụhọ ke hell ekedi ke n̄kan̄ eke spirit ye ke n̄kan̄ eke ikpọkidem—kpa ekikere emi ẹnen̄erede ẹnyịme. Prọfesọ J. N. D. Kelly ekewet ete: “Ke ọyọhọ isua ikie ition, anana-mbọm ukpepn̄kpọ oro nte ke mme idiọkowo idinyeneke udiana ifet ke uwem enye emi ebede ndien ke ikan̄ oro editade mmọ idinịmeke, ama ada ubọn̄ ke kpukpru ebiet.”

Ke ọyọhọ isua ikie 16, mme utọ anam ukpụhọde mbon Protestant nte Martin Luther ye John Calvin ẹkefiọk ikan̄-ikan̄ ndutụhọ ke hell nte ndamban̄a edidian̄ade n̄kpọn̄ Abasi ke nsinsi. Nte ededi, ekikere ẹnyenede ẹban̄a hell nte ebiet ndutụhọ ama afiak edi ke isua ikie iba oro ẹketienede. Jonathan Edwards ọkwọrọikọ Protestant ama esida in̄wan̄-in̄wan̄ ndise hell ndisịn ndịk ke esịt mbon America emi ẹkedude ke idak Ukara Esenidụt ke ọyọhọ isua ikie 18.

Nte ededi, esisịt ini ke oro ebede, edemeikan̄ hell ama ọtọn̄ọ ndisụhọde nnyụn̄ nnịme sụn̄sụn̄. U.S.News & World Report ọdọhọ ete: “Hell ama ekpere ndinịme ke ọyọhọ isua ikie 20.”

[Mme ndise]

Justin Martyr ekenịm ke akpanikọ ete ke hell ekedi ikan̄-ikan̄ ebiet

Augustine eke Hippo ekekpep ete ke ndutụhọ ke hell ekedi eke spirit ye eke ikpọkidem