‘Ikọ Abasi Enyene Odudu’

BRE

Ntọt Mme Anditan̄a Obio Ubọn̄

‘Ikọ Abasi Enyene Odudu’

KE UFIOP ufiop isuo Jamaica ke Caribbean, ata ediwak owo ẹmehe ye Bible. Ke akpanikọ, ẹkeme ndikụt King James Version ke ekperede ndidi ke kpukpru ufọk, ndien ndusụk owo ẹmekụt ke “ikọ Abasi enyene uwem onyụn̄ enyene odudu.” (Mme Hebrew 4:12, NW) Odudu emi ekeme ndikpụhọde uwem mme owo, nte ifiọkutom oro etienede mi owụtde.

Kiet ke otu Mme Ntiense Jehovah ama awaha ekese eren kiet emi ekerede Cleveland, emi mîkebịghike ọkọnyọn̄ utom edi. Ke ama akabuana ndusụk akpan n̄kpọ ẹtode N̄wed Abasi ye enye, Ntiense oro ama ọkpọn̄ n̄wed un̄wam ukpep Bible oro Ifiọk Oro Adade Osịm Nsinsi Uwem ọnọ enye. Cleveland ikọfiọkke adan̄a nte Ikọ Abasi edinyenede odudu ke uwem imọ.

Cleveland ekesibọn̄ akam utịm ikata ke usen, eben̄ede Abasi an̄wam imọ ikụt nnennen usụn̄ ndituak ibuot nnọ Enye. Cleveland ama enịm ke akpanikọ ke ete ye eka imọ ikatuakke ibuot ke nnennen usụn̄, edi ke ama okodụn̄ọde mme ido ukpono eken, enye ama okụt edikpu. Okposụkedi enye okokopde aban̄a Mme Ntiense Jehovah, enye ama eyịk m̀mê mmọ ẹnyene akpanikọ. Kpa ye mme eyịghe esie, Cleveland ama enyịme ndikpep Bible ye Ntiense oro akawahade enyịnusụn̄ esie. Ntak-a? Koro enye okoyomde ndikụt ndudue nnọ Mme Ntiense!

Ikebịghike, Cleveland ama edifiọk ke oburobụt ebuana oro imọ ikenyenede ye iban iba ikenemke Abasi esịt. (1 Corinth 6:9, 10) Ke ama ekekpep n̄kpọ ikaba kpọt, enye ama enyene uko ndisịbe ebuana oro enye ekenyenede ye iban emi mfep. Enye n̄ko ama ọtọn̄ọ ndidụk mme mbono esop Christian ke Ufọkmbono Obio Ubọn̄. Edi emi ekedi idomo efen.

Cleveland ama enen̄ede esịn idem ke n̄ka mbre ikpa n̄kann̄kụk esie, ndien mme mbre ikpa n̄ka emi ẹma ẹsibiọn̄ọ enye ndidụk mbono esop. Nso ke enye akanam? Kpa ye oro ọkpọsọn̄ mfịghe okotode mbon mbre ikpa mmọ, andinọ mbon mbre ikpa ukpep, ye mme ufan esie, Cleveland ama ebiere ndikpọn̄ n̄ka mbre ikpa oro. Ih, Ikọ Abasi ama ọtọn̄ọ ndinyene odudu ke idem esie, adade ufọn ọsọk enye!

Ẹma ẹfiak ẹkụt odudu oro Ikọ Abasi enyenede ke ini Cleveland ọkọtọn̄ọde ndibuana ifiọk Bible esie ye mbon en̄wen. (Utom 1:8) Nte utịp, n̄kani mbon mbre ikpa esie iba ẹma ẹtọn̄ọ ndidụk mme mbono esop Mme Ntiense Jehovah. Ke Cleveland ama okodot ndikabade ndi asuanetop eti mbụk, enye ama enyene akwa idatesịt ke utom ukwọrọikọ, adade Ikọ Abasi an̄wam mbon en̄wen.

Ke odudu Ikọ Abasi akade iso ndinụk enye, Cleveland ke akpatre ama ayarade uyakidem esie nnọ Jehovah ebe ke baptism mmọn̄ onyụn̄ enyene ifet ndinam utom nte asan̄autom uyọhọ ini ye nte asan̄autom unamutom ke esop.

Ke akpanikọ, ke Jamaica ye ke ofụri ererimbot, ediwak tọsịn owo ke ẹdi ẹdifiọk nte ke Ikọ Abasi “enyene uwem onyụn̄ enyene odudu.”

[Ndise obio/Ndise ke page 8]

(Ama oyom ndikụt nte enye enen̄erede etie, se n̄wed)

JAMAICA

[Ebiet Ẹdade N̄kpọ Ẹto]

ENYỌN̄-UKPEME (EKE UKPEPN̄KPỌ)