Sụk Ibuot nọ Odudu Ukara Abasi ke Edinam Akpanikọ

‘Jehovah edi ebiereikpe nnyịn, Jehovah edi owụk-ewụhọ nnyịn, Jehovah edi edidem nnyịn.’—Isaiah 33:22.

1. Mme n̄kpọ ewe ẹkenam Israel eset edi n̄wọrọnda ke otu mme idụt?

 IDỤT Israel ama edidu ke isua 1513 M.E.N. Ke ini oro, enye ikenyeneke ibuot obio, obio emana, ye edidem oro ẹkụtde ke enyịn. Nditọisọn̄ esie ẹkedi n̄kani ifịn. Nte ededi, obufa idụt oro ekedi n̄wọrọnda ke usụn̄ en̄wen n̄ko. Jehovah Abasi ekedi Ebiereikpe, Owụk-Ewụhọ, ye Edidem esie oro enyịn mîkwe. (Exodus 19:5, 6; Isaiah 33:22) Idụhe idụt efen oro ekekemede nditịn̄ ntem!

2. Nso mbụme edemerede kaban̄a usụn̄ oro ẹketịmde Israel, ndien ntak emi ibọrọ edide akpan n̄kpọ ọnọ nnyịn?

² Sia Jehovah edide Abasi ndutịm, ọkọrọ ye Abasi emem, nnyịn ikpodori enyịn ndikụt idụt ekededi oro enye akarade nte enyenede eti ndutịm. (1 Corinth 14:33) Ntre ke ekedi ye Israel. Edi, didie ke Abasi oro enyịn mîkwe ekpekeme ndida esop eke isọn̄ oro ẹkụtde ke enyịn usụn̄? Nnyịn iyanam ọfọn ndikere mban̄a usụn̄ oro Jehovah akakarade idụt eset oro, inọde ntịn̄enyịn akpan akpan ke nte usụn̄ unam n̄kpọ esie ye Israel owụtde ufọn edisụk ibuot nnọ odudu ukara Abasi ke edinam akpanikọ.

Nte Ẹkekarade Israel Eset

3. Nso nti ndutịm ke Jehovah akanam man ada ikọt esie usụn̄?

³ Okposụkedi Jehovah ekedide Edidem oro enyịn mîkwe, emi akakarade Israel, enye ama emek irenowo oro ẹkụtde ke enyịn, emi ẹnamde akpanikọ nte mme andida ke ibuot esie. Mbọn̄, mme ibuot ufọk, ye nyobiowo ẹma ẹdu ndinam n̄kpọ nnọ mme owo nte mme ọnọitem ye mme ebiereikpe. (Exodus 18:25, 26; Deuteronomy 1:15) Nte ededi, nnyịn inyeneke ndibiere nte ke irenowo emi ẹnyenede mbiomo mi ẹma ẹkeme ndida mfọnmma ọniọn̄ ye mbufiọk mbiere mme mfịna ye unana ndausụn̄ Abasi. Mmọ ikedịghe mfọnmma, ndien mmọ ikekemeke ndifiọk se idude ke esịt ekemmọ mme andituak ibuot. Kpa ye oro, mme ebiereikpe oro ẹbakde Abasi ẹma ẹkeme ndinọ ekemmọ mme andinịm ke akpanikọ eti item koro enye ọkọkọn̄ọde ke Ibet Jehovah.—Deuteronomy 19:15; Psalm 119:97-100.

4. Mme ntụhọ ewe ke mme anam-akpanikọ ebiereikpe Israel ẹkedu ke ukpeme ndifep, ndien ntak-a?

 ⁴ Nte ededi, owo ndidi ebiereikpe, ama abuana se ikande edifiọk Ibet. Sia ẹkedide mme anana-mfọnmma owo, nyobiowo oro ẹkenyene ndidu ke ukpeme man ẹbiọn̄ọ ndiọi ntụhọ eke idemmọ ekededi—utọ nte ibụk, editen̄e owo enyịn, ye idiọkitọn̄—oro ẹkemede ndinam mmọ ẹkwan̄a ikpe. Moses ọkọdọhọ mmọ ete: “Mbufo ẹkûten̄e owo enyịn ke ikpe: ẹkop uyo ekpri owo, kpa nte uyo akamba owo; mbufo ẹkûbak iso owo; koro ikpe edide eke Abasi.” Ih, ikpe oro mme ebiereikpe Israel ẹkekpede ekedi eke Abasi. Nso enyene-uten̄e ifetutom ke emi ekedi ntem!—Sịghisịghi ubọkn̄wed edi eke nnyịn; Deuteronomy 1:16, 17.

5. Ke adianade ye edimek mme ebiereikpe, nso ndutịm efen ke Jehovah akanam man ese aban̄a ikọt esie?

⁵ Jehovah ama anam mme ndutịm efen man ese aban̄a udọn̄ n̄kpọ eke spirit ikọt esie. Idem mbemiso mmọ ẹkedide ẹdisịm Isọn̄ Un̄wọn̄ọ, enye ama owụk mmọ ete ẹbọp ataya, kpa iwụk ebiet utuakibuot akpanikọ. Enye n̄ko ama owụk itie oku ndikpep Ibet, ndiwa uwa unam, ndinyụn̄ mfọp incense ke usenubọk ye ke mbubịteyo. Abasi ama enịm Aaron, akpaneka Moses, nte akpa akwa oku Israel ama onyụn̄ emek nditọ Aaron ndin̄wam ete mmọ ke utom esie.—Exodus 28:1; Numbers 3:10; 2 Chronicles 13:10, 11.

6, 7. (a) Nso itie ebuana ikodu ke ufọt mme Levite oro ẹkedide oku ye mbon oro mîkedịghe? (b) Nso ke nnyịn ikeme ndikpep nto ọkpọikọ oro nte ke mme Levite ẹkesinam nsio nsio utom? (Colossae 3:23)

⁶ Ekedi akwa mbiomo ndise mban̄a udọn̄ n̄kpọ eke spirit ediwak miliọn owo, ndien mme oku ikawakke. Ntre ẹma ẹnam ndutịm man mbon en̄wen oro ẹtode esien Levi ẹn̄wam mmọ. Jehovah ama ọdọhọ Moses ete: “Da ndien mme Levite nọ Aaron, ye nditọ esie: ẹda mmọ ke otu nditọ Israel ẹnọ enye.”—Numbers 3:8, 9, 39.

⁷ Ẹma ẹnen̄ede ẹtịm mme Levite. Ẹma ẹbahade mmọ ẹdọn̄ ke ubon ita—ubon Gershon, Kohath, ye Merari—kiet kiet enyenede iso utom esie ndinam. (Numbers 3:14-17, 23-37) Ekeme ndidi eketie nte ndusụk utom ẹma ẹnen̄ede ẹdi akpan n̄kpọ ẹkan mbon eken, edi kpukpru ẹma ẹnyene ufọn. Utom mme Levite ẹtode ubon Kohath ama oyom mmọ ẹdu ẹkpere edisana ekebe ediomi ye n̄kpoduoho ataya. Nte ededi, Levite kiet kiet, edide okoto ubon Kohath m̀mê ikotoho, ama enyene mme utịbe utịbe ifetutom. (Numbers 1:51, 53) Ke mfụhọ, ndusụk mmọ ikowụtke esịtekọm iban̄a mme ifetutom mmọ. Utu ke ndisụk ibuot nnọ odudu ukara Abasi ke edinam akpanikọ, mmọ ikokopke uyụhọ ẹma ẹnyụn̄ ẹtọn̄ọ nditan̄ idem, ndiyom ikpọ itie, ndinyụn̄ mfịbe ufụp. Levite ekekerede Korah ekedi kiet ke otu mmọ.

“Mbufo Ẹmọn̄ Ẹyom Itie Oku N̄ko”?

8. (a) Korah ekedi anie? (b) Anaedi nso ikanam Korah ọtọn̄ọ ndise mme oku ke usụhọde?

⁸ Korah ikedịghe ibuot ufọk Levi, enye ikonyụn̄ idịghe ibuot ufọk nditọ Kohath. (Numbers 3:30, 32) Nte ededi, enye ekedi ọbọn̄ oro ẹkekponode ke Israel. Ekeme ndidi utom Korah ama anam enye enyene n̄kpet n̄kpet ebuana ye Aaron ye nditọ esie. (Numbers 4: 18, 19) Ke okụtde unana mfọnmma iren emi nnennen nnennen, ekeme ndidi Korah ama ekere ete: ‘Mme oku emi ẹnen̄ede ẹdi mme anana-mfọnmma owo, edi ẹdori enyịn ami ndisụk ibuot nnọ mmọ! Ibịghike Aaron akanam eyen enan̄ o-gold. Ndituak ibuot nnọ eyen enan̄ oro ama anam ikọt nnyịn ẹduọ ẹdụk ukpono ndem. Idahaemi Aaron eyeneka Moses anam utom nte akwa oku! Nso utọ uten̄e owo enyịn edi emi! Ndien nso kaban̄a Nadab ye Abihu, nditọ Aaron? Kamse, mmọ ẹma ẹwụt idiọk unana ukpono ẹnọ itieutom mmọ tutu Jehovah ekenyene ndiwot mmọ!’ * (Exodus 32:1-5; Leviticus 10:1, 2) Se ededi oro Korah ekekerede, ana in̄wan̄-in̄wan̄ nte ke enye ama ọtọn̄ọ ndise itie oku ke usụhọde. Oro ama osụn̄ọ ke enye ndisọn̄ ibuot ye Moses ye Aaron, ndien ke akpatre, ye Jehovah.—1 Samuel 15:23; James 1:14, 15.

9, 10. Nso ikọ ke Korah ye ekemmọ mbon nsọn̄ibuot ẹkedori Moses, ndien ntak emi mmọ ẹkpekefiọkde ke se mmimọ ikanamde ikọfọnke?

⁹ Sia ekedide ọwọrọiso owo, ikọsọn̄ke Korah ndidụri mbon oro ẹkenyenede ukem edu esie nnọ idemesie. Enye, ọkọrọ ye Dathan ye Abiram, ẹma ẹkụt owo 250 oro ẹkenyenede ukem edu mmọ—kpukpru ẹdide ikpọ owo esop. Mmọ ẹma ẹdiana kiet ẹsan̄a ẹbịne Moses ye Aaron ẹnyụn̄ ẹdọhọ ẹte: “Ofụri esop kpukpru [ẹdi] edisana, Jehovah onyụn̄ odu ke otu mmọ n̄ko: nsinam ndien mbufo ẹmende idem mbufo ke enyọn̄ ntre ẹkan esop Jehovah”?—Numbers 16:1-3.

¹⁰ Akpakana mbon nsọn̄ibuot oro ẹfiọk ẹte ke ifọnke ndineni odudu Moses. Esisịt ini ke mbemiso, Aaron ye Miriam ẹma ẹnam kpa ukem n̄kpọ oro. Kamse, mmọ ẹma ẹkam ẹtịn̄ ikọ ebietde eke Korah! Nte Numbers 12:1, 2 ọdọhọde, mmọ ẹma ẹbụp ẹte: “Nte ye Moses ikpọn̄ ke Jehovah osụk ọdọhọ? Nte enye idọhọke ye nnyịn n̄ko?” Jehovah ke akakpan̄ utọn̄. Enye ama owụk Moses, Aaron, ye Miriam ete ẹsop idem ke enyịnusụn̄ efe esop man imọ ikpowụt owo oro imekde nte adausụn̄. Ekem, Jehovah ama etịn̄ in̄wan̄-in̄wan̄ ete: “Edieke prophet edidụn̄de ke otu mbufo, ami Jehovah nyayarade idem mi nnọ enye ke n̄kukụt, nnyụn̄ ndọhọ ye enye ke ndap. Moses owo mi itiehe ntem: enye edi owo akpanikọ ke ofụri ufọk mi.” Ke oro ebede, Jehovah ama ọtọ Miriam akpamfia ke ibio ini.—Numbers 12:4-7, 10.

11. Didie ke Moses ekese aban̄a idaha oro akabuanade Korah?

¹¹ Anaedi Korah ye mbon oro ẹkedade ye enye ẹma ẹfiọk ẹban̄a n̄kpọntịbe oro. Mmọ ikenyeneke ntak ndisọn̄ ibuot. Kpa ye oro, Moses ke ime ama odomo ndikọk ibuot ye mmọ. Enye ama esịn udọn̄ ọnọ mmọ ndinen̄ede n̄wụt esịtekọm mban̄a mme ifetutom mmọ, ọdọhọde ete: “Nte mbufo ẹbat ke ata ekpri n̄kpọ, emi Abasi Israel akadianarede mbufo ke mbon esop Israel, onyụn̄ ada mbufo adian ke idem?” Baba, ikedịghe “ekpri n̄kpọ”! Mme Levite ẹma ẹnyenyene ekese. Nso efen ke mmọ ẹkpekeyom? N̄kaiso ikọ Moses ama owụt ekikere esịt mmọ: “Mbufo ẹmọn̄ ẹyom itie oku n̄ko”? * (Numbers 12:3; 16:9, 10) Nte ededi, didie ke Jehovah akanam n̄kpọ aban̄a nsọn̄ibuot emi ẹkesọn̄de ye odudu ukara Abasi?

Ebiereikpe Israel Esịbe Odụk

12. Israel ndika iso nnyene eti itie ebuana ye Abasi ọkọkọn̄ọ ke nso?

¹² Ke ini Jehovah ọkọnọde Israel Ibet, enye ama asian mme owo oro ete ke edieke mmọ ẹdikopde item, mmọ ẹyekabade ẹdi “edisana idụt,” ndien idụt oro ayaka iso ndidi edisana adan̄a nte mmọ ẹdinyịmede ndutịm Jehovah. (Exodus 19:5, 6) Idahaemi, ke in̄wan̄-in̄wan̄ nsọn̄ibuot oyomde ndida itie, ini ama ekem Ebiereikpe ye Owụk-Ewụhọ Israel ndisịbe ndụk! Moses ama ọdọhọ Korah ete: “Afo ye  ofụri esop fo ẹdi ke iso Jehovah, afo ye mmọ, ye Aaron, n̄kpọn̄: mbufo kpukpru ẹnyụn̄ ẹda censer mbufo, ẹnyụn̄ ẹsịn mmọ incense ke esịt, ndien yak kpukpru owo ẹda censer mmọ ẹdi ke iso Jehovah, censer ikie iba ye aba ye duop; afo n̄ko ye Aaron ẹda censer mbufo ẹdi.”—Numbers 16:16, 17.

13. (a) Ntak emi mbon nsọn̄ibuot oro ndikọfọp incense ke iso Jehovah ekedide ntan̄idem? (b) Didie ke Jehovah akanam n̄kpọ ye mbon nsọn̄ibuot emi?

¹³ Nte Ibet Abasi ọdọhọde, mme oku kpọt ẹkenyene ndifọp incense. Idem ekikere aban̄ade Levite oro mîdịghe oku ndifọp incense ke iso Jehovah akpakana anam mbon nsọn̄ibuot oro ẹnen̄ede ẹkere n̄kpọ. (Exodus 30:7; Numbers 4:16) Korah ye mme andinọ enye ibetedem ikekereke n̄kpọ! Ke ndan̄nsiere enye ama “obon kpukpru mbon esop, man ẹnam ikọ ye [Moses ye Aaron], ke usụn̄ efe esop.” Mbụk oro asian nnyịn ete: “Ndien Jehovah ọdọhọ Moses ye Aaron, ete, Mbufo ẹdianade idem mbufo ke esop emi, ndien nyosobo mmọ ini kiet.” Edi Moses ye Aaron ẹma ẹkpe ubọk ẹte ẹnịm mme owo oro uwem. Jehovah ama enyịme n̄kpeubọk mmọ. Amaedi Korah ye otuowo esie, ‘ikan̄ ama oto Jehovah, edita owo ikie iba ye aba ye duop emi ẹfọpde incense.’—Numbers 16:19-22, 35. *

14. Ntak emi Jehovah okotụnọde esop Israel?

¹⁴ Ke edide n̄kpọ n̄kpaidem, nditọ Israel oro ẹkekụtde nte Jehovah akanamde n̄kpọ ye mbon nsọn̄ibuot oro ikekpepke n̄kpọ ito emi. ‘Ke ndan̄nsiere kpukpru mbon esop nditọ Israel ẹsụk Moses ye Aaron uyo, ẹte, Mbufo ẹmewot ikọt Jehovah.’ Nditọ Israel emi ẹkeda ẹnọ mbon nsọn̄ibuot oro! Ke akpatre, ime Jehovah ama edisịm utịt. Owo ndomokiet—idem Moses m̀mê Aaron—ikekemeke ndinam n̄kpeubọk nnọ mme owo oro idahaemi. Jehovah ama ada udọn̄ọ ọnọmọ mbon nsọn̄ibuot oro, “ndien mmọ emi ẹkpan̄ade ke udọn̄ọ oro ẹdi tọsịn owo duopenan̄, ye ikie itiaba, ọkọrọ ye mme mmọ emi ẹkpan̄ade ke ikọ Korah.”—Numbers 16:41-49.

15. (a) Mme ntak ewe ẹkpekenam nditọ Israel ẹnyịme ndausụn̄ Moses ye Aaron ye unana mmen̄e? (b) Nso ke mbụk emi ekpep fi aban̄a Jehovah?

¹⁵ Mme owo oro ẹkpekefep nditaba uwem mmọ. Ubaha nte ekpedide mmọ ẹma ẹda ukeme ukere n̄kpọ mmọ ẹnam n̄kpọ ke afan̄ emi. Mmọ ẹkpekebụp idemmọ mme utọ mbụme nte: ‘Mmanie ẹkesịn uwem mmọ ke itiendịk ke ndida ke iso Pharaoh? Mmanie ẹkedọhọ ẹsana nditọ Israel ẹyak? Anie ikpọn̄-ikpọn̄ ke ẹkekot ọdọk edi Obot Horeb ke ẹma ẹkenyan̄a nditọ Israel man editịn̄ ikọ iso ye iso ye angel Abasi?’ Ke akpanikọ n̄wọrọnda mbụk Moses ye Aaron ọnọ uyarade aban̄a edinam akpanikọ mmọ nnọ Jehovah ye ima oro mmọ ẹkemade mme owo. (Exodus 10:28; 19:24; 24:12-15) Jehovah ikenemke esịt ndiwot mbon nsọn̄ibuot oro. Edi, ke ini akanade in̄wan̄-in̄wan̄ nte ke mme owo oro ẹyeka iso ke nsọn̄ibuot mmọ, enye ama anam n̄kpọ ke usụn̄ oro enyenede iwụk. (Ezekiel 33:11) Kpukpru emi ẹnyene akpan n̄kpọ oro ẹwọrọde ẹnọ nnyịn mfịn. Ntak-a?

Ndifiọk Usụn̄ Oro Ẹdade Ẹnam N̄kpọ Mfịn

16. (a) Nso uyarade ikpakanam mme Jew akpa isua ikie ẹnịm ẹte ke Jesus ekedi andida ke ibuot Jehovah? (b) Nso ke Jehovah akada okpụhọ ye itie oku Levi, ndien ntak-a?

¹⁶ Mfịn, obufa “idụt” odu oro enyenede Jehovah nte Ebiereikpe, Owụk-Ewụhọ, ye Edidem esie oro enyịn mîkwe. (Matthew 21:43) “Idụt” oro ekedidu ke akpa isua ikie E.N. Ke ini oro, ediye temple ke Jerusalem, emi mme Levite ẹkesụk ẹnamde utom, ama ada itie ataya oro okodude ke eyo Moses. (Luke 1:5, 8, 9) Nte ededi, ke isua 29 E.N., temple en̄wen, eke spirit, ama edidu, enyenede Jesus Christ nte Akwa Oku. (Mme Hebrew 9:9, 11) Mbụme aban̄ade odudu ukara Abasi ama  afiak edemede inikiet efen. Anie ke Jehovah edida ndinọ obufa “idụt” emi ndausụn̄? Jesus ama owụt idemesie nte enye emi anamde akpanikọ ọnọ Abasi ọyọhọ ọyọhọ. Enye ama ama mme owo. Enye n̄ko ama anam ediwak utịbe utịbe idiọn̄ọ. Nte ededi, ukem nte mme ete ete mmọ oro ẹkesọn̄de ibuot, ata ediwak mme Levite ẹma ẹsịn ndinyịme Jesus. (Matthew 26:63-68; Utom 4:5, 6, 18; 5:17) Ke akpatre, Jehovah ama ada ata isio isio itie oku okpụhọ ye itie oku Levi—mme oku edidem. Mme oku edidem oro ẹnam utom tutu esịm usen mfịn.

17. (a) Ewe otu anam mme oku edidem mfịn? (b) Didie ke Jehovah ada mme oku edidem anam n̄kpọ?

¹⁷ Mmanie ẹnam mme oku edidem emi mfịn? Apostle Peter ọbọrọ mbụme oro ke akpa leta esie eke odudu spirit. Peter ama ewet ọnọ mme andibuana ke idem Christ oro ẹyetde aran ete: “Mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi enịmde ọnọ Idem Esie, man mbufo ẹka ẹketan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.” (1 Peter 2:9) Ana in̄wan̄-in̄wan̄ oto mme ikọ emi nte ke mme anditiene nde ikpat Jesus oro ẹyetde aran, nte otu, ẹnam “mme oku edidem,” emi Peter okokotde n̄ko “edisana idụt.” Mmọ ẹnam usụn̄ oro Jehovah adade ndinọ ikọt esie item ye ndausụn̄ eke spirit.—Matthew 24:45-47.

18. Nso ebuana idu ke ufọt mbiowo oro ẹmekde ye mme oku edidem?

¹⁸ Mbiowo oro ẹmekde, emi ẹkamade mme ifetutom ke mme esop ikọt Jehovah ke ofụri isọn̄, ẹda ke ibuot mme oku edidem emi. Irenowo emi ẹdot ukpono ye ibetedem ofụri esịt nnyịn, edide mmọ ẹdi mbon oro ẹyetde aran m̀mê idịghe. Ntak-a? Koro, Jehovah ada edisana spirit esie emek mbiowo emi ọnọ mme ifetutom mmọ. (Mme Hebrew 13:7, 17) Didie ke oro ekeme ndidi ntre?

19. Ke nso usụn̄ ke ẹda edisana spirit ẹmek mbiowo?

¹⁹ Mbiowo emi ẹsịm mme n̄kpọ oro ẹnamde owo odot oro ẹwetde ke Ikọ Abasi, emi ẹkedade spirit Abasi ẹwet. (1 Timothy 3:1-7; Titus 1:5-9) Ntem, ẹkeme ndidọhọ ke ẹda edisana spirit ẹmek mmọ. (Utom 20:28) Ana mbiowo ẹtịm ẹmehe ye Ikọ Abasi. Ukem nte Akakan Ebiereikpe oro ekemekde mmọ, ana mbiowo n̄ko ẹnen̄ede ẹsua uten̄e owo enyịn ke ikpe.—Deuteronomy 10:17, 18.

20. Nso ke afo enen̄ede ama ke mbiowo emi ẹnamde utom ọkpọsọn̄?

²⁰ Utu ke ndifan̄a odudu mmọ, nnyịn imenen̄ede iwụt esịtekọm iban̄a mbiowo nnyịn emi ẹnamde utom ọkpọsọn̄! Mbụk utom mbuọtidem mmọ, esiwakde ndidi ke ediwak isua, onụk nnyịn ndinyene mbuọtidem ke idemmọ. Mmọ ẹsinen̄ede ẹtịm idem ẹnọ  ẹnyụn̄ ẹnịm mme mbono esop, ẹnam utom ọtọkiet ye nnyịn ke ndikwọrọ “gospel Ubọn̄ Abasi,” ẹnyụn̄ ẹnọ nnyịn item N̄wed Abasi ke ini nnyịn iyomde enye. (Matthew 24:14; Mme Hebrew 10:23, 25; 1 Peter 5:2) Mmọ ẹsidi ẹdise nnyịn ke ini idọn̄ọde ẹnyụn̄ ẹdọn̄ nnyịn esịt ke ini ifụhọde. Mmọ ẹsisọn̄ọ ẹda ẹnọ mme ufọn n̄kpọ Obio Ubọn̄ ibetedem ye unana ibụk. Spirit Jehovah odu ye mmọ; mmọ ẹnyene unyịme esie.—Galatia 5:22, 23.

21. Nso ke mbiowo ẹnyene ndifiọk, ndien ntak-a?

²¹ Edi akpanikọ, mbiowo idịghe mfọnmma. Ke ẹfiọkde mmeme mmọ, mmọ idomoke ndikara otuerọn̄, “emi ẹdide udeme Abasi.” Utu ke oro, mmọ ẹse idemmọ nte ‘nsan̄a utom kaban̄a idatesịt nditọete mmọ.’ (1 Peter 5:3, NW; 2 Corinth 1:24, NW) Mbiowo emi ẹsụhọrede idem ẹnyụn̄ ẹnamde utom ọkpọsọn̄ ẹma Jehovah, ndien mmọ ẹfiọk ẹte ke adan̄a nte mmimọ itịmde ikpebe enye, ntre ke mmimọ idikeme ndinam ekese ufọn ke esop. Ye emi ke ekikere, mmọ ẹdomo kpukpru ini ndikọri mme utọ edu Abasi nte ima, mbọm, ye ime.

22. Didie ke ndidụn̄ọde mbụk Korah ọsọn̄ọ mbuọtidem fo ke esop Jehovah oro ẹkụtde ke enyịn?

²² Nnyịn ikop inemesịt didie ntem ndinyene Jehovah nte Andikara nnyịn oro enyịn mîkwe, Jesus Christ nte Akwa Oku nnyịn, mme oku edidem oro ẹyetde aran nte mme andikpep nnyịn, ye mme anam-akpanikọ mbiowo Christian nte mme ọnọitem nnyịn! Okposụkedi mîdụhe esop ndomokiet oro mme owo ẹdade usụn̄ oro ekemede ndidi mfọnmma, nnyịn imokop idatesịt ndikeme ndinam n̄kpọ Abasi ọtọkiet ye mme anam-akpanikọ ekemmọ mme andinịm ke akpanikọ, emi ẹdatde esịt ndisụk ibuot nnọ odudu ukara Abasi!

[Mme Ikọ idakisọn̄]

Nso ke Afo Ekpep?

• Nso ima ima ndutịm ke Jehovah akanam man ese aban̄a nditọ Israel?

• Ntak emi Korah mîkenyeneke ntak ndisọn̄ ibuot ye Moses ye Aaron?

• Nso ke nnyịn ikpep ito usụn̄ oro Jehovah akanamde n̄kpọ ye mbon nsọn̄ibuot oro?

• Didie ke nnyịn ikeme ndiwụt ke imowụt esịtekọm iban̄a mme ndutịm Jehovah mfịn?

[Mme Mbụme Ukpepn̄kpọ]

[Ndise ke page 9]

Ndi afo amada ifetutom ekededi ke utom Jehovah ke ọsọn̄urua n̄kpọ?

[Ndise ke page 10]

“Nsinam ndien mbufo ẹmende idem mbufo ke enyọn̄ ntre ẹkan esop Jehovah”?

[Ndise ke page 13]

Mbiowo oro ẹmekde ẹda ke ibuot mme oku edidem