Ukpepn̄kpọ Otode Stork

“IDEM stork ke ikpa-enyọn̄ ọmọfiọk edikem ini esie; . . . edi ikọt mi ifiọkke ikpe Jehovah.” (Jeremiah 8:7) Prọfet Jeremiah akada mme ikọ oro atan̄a ubiereikpe Jehovah odori mme ọsọn̄ibuot mbon Judah, oro ẹkekpọn̄de Jehovah Abasi mmọ ẹnyụn̄ ẹwọn̄ọrede ẹbịne utuakibuot isen abasi. (Jeremiah 7:18, 31) Ntak emi Jeremiah ekemekde ndida stork nnọ mme Jew oro mîkanamke akpanikọ ukpep oro ẹkụtde ke enyịn?

Nditọ Israel ẹma ẹsikụt stork, akpan akpan afia stork, ọwọrọde idụn̄ ke mme idụt Bible. Ke usem Hebrew, enyịn̄ akamba inuen inyan̄ emi enyenede nnyan ukot mi edi orụk ikọ oro ẹsidade ẹtịn̄ ẹban̄a n̄wan onyụn̄ ọwọrọde “enye emi anamde akpanikọ; enye emi owụtde ima-mfọnido.” Emi odot, koro ke mîbietke ata ediwak inuen eken, ayara ye uman afia stork ẹsika iso ẹdụn̄ ọtọkiet ke ofụri eyouwem mmọ. Ke ẹma ẹkebiat ini etuep ke mme ikpehe oro ẹfiopde, kpukpru isua, ata ediwak stork ẹsifiak ẹnyọn̄ọ, ẹwakde ndinyọn̄ n̄kodụk ukem efọk oro mmọ ẹkedụn̄de ke mbemiso.

Edu stork owụt edu edinam akpanikọ ke mme n̄wọrọnda usụn̄ en̄wen. Ayara ye uman stork ẹsibuana ke ndikụbọ ke nsen ndinyụn̄ mbọk nditọ mmọ. N̄wed oro Our Magnificent Wildlife anam an̄wan̄a ete: “Ayara ye uman stork ẹsinam akpanikọ ẹnọ kiet eken ke n̄wọrọnda usụn̄. Ayara stork ke Germany ama efe ọkọtọ urụkikan̄ ilektrik onyụn̄ akpa. Nsan̄a esie ama aka iso ndikụbọ ke nsen ikpọn̄ ke usen 3, okonyụn̄ ọkpọn̄ efọk esie ini kiet kpọt ke ibio ini ndikoyom udia. . . . Ke idaha efen, ke ini ẹketopde uman stork ẹwot, ayara ama ọbọk n̄kpri nditọ.”

Ke akpanikọ, ke ndinam akpanikọ nnọ nsan̄a eyouwem esie nnyụn̄ nnọ nditọ esie ima ima ukpeme, stork odu uwem ekekem ye se enyịn̄ esie ọwọrọde—“enye emi anamde akpanikọ.” Ntem, stork ekedi okopodudu uwụtn̄kpọ ọnọ mme ọsọn̄ibuot nditọ Israel oro mîkanamke akpanikọ.

Ediwak owo mfịn ẹse edinam akpanikọ nte ekikere eset—oro ẹmade edi oro owo mîkemeke ndinam. N̄kọri ke ibat usiondọ, edidian̄ade ntie, edidia okụk ke n̄wo, ye mme orụk abian̄a en̄wen ẹwụt ke owo idaha aba edinam akpanikọ ke akpan n̄kpọ. Ke edide isio, Bible ada edinam akpanikọ oro ima ye mfọnido ẹnụkde ke ata akpan n̄kpọ. Enye esịn udọn̄ ọnọ mme Christian ‘ndimen obufa owo nsịne emi ẹbotde ebiet Abasi ke edinen ido ye edisana ido akpanikọ.’ (Ephesus 4:24) Ih, obufa owo emi an̄wam nnyịn ndinam akpanikọ, edi nnyịn imekeme n̄ko ndikpep edinam akpanikọ nto stork.